संत.जोहन 8

बेलाज ककामी आउराईत के छमा

1बकिर ईसु जैतुन बुरु रे सेन नेनाय। 2हुनी आँगा-पोटाअ फिन बड़े बिनती ओड़ाअ रअः राच रे हीःग नेनाय, जामा होड़ हुनी दुबाःड़े जवार नेनाकु, आउर दुड़ूः केते हुंकू के उपदेस एमा कु केनाय। 3हिमीन बेरा धरम पुथी सि-सिखावकु आउर फरीसीकु ब्यबिचार रे सःब लिनी मियांड आउराईत के आगु लियाकु आउर ताला रे तिंगु केते, 4हुंकू ईसु के बेता लियाकु, “हे गुरू नुई आउराईत ब्यबिचार कामी यअते सःब तनाय, 5#लेवी 20:10; कन 22:22–24कनहुन रे मुसा आले के नोकान आउराईत के छेछोम गोगोएःग रअः हुकूम एम तदाय, आम आला एतान क-कंहड़ी एदनाअ?” 6हुंकू ईसु के प-परीकछा लःअय नोःआँ बात कंहड़ी लअकु जेकर से ची हुनी रे दोस ललगाव लःअय जहान बात नामेकु। बकिर ईसु बोहोअ गाड़ा केते अंगड़ी तरअः ओत रे लिखाअ दाय। 7जब हुंकू हुनी के कुली एकाअ दियाकु दो हुनी सोझ कोअते हुंकू के बेता लिकुआय। “आपे रे जे बेकासुर एदानिङा हिनी जामा तरअः पहिल रे छेछोमीयाय।” 8आउर हुनी बोहोअ गाड़ा केते अंगड़ी तरअः ओत रे लिखाअ दाय। 9नोःआँ आयुम केते छोटे तरअः बड़े जगुत जामे मिहोंड़-मिहोंड़ केते घसकाव नाकु। ईसु एकले बंचाव नाय, आउर आउराईत हिनाःड़े ताला रे तिंगु बाईर ताहिः नाय। 10ईसु सोझ-कोअते हुनी के बेता लियाय, “हे आउराईत हुंकू ओकाते सेनोः नाकु? मिहोंड़-मिन होः आम के डांड़ काकु एमा लेमेआ?” 11हुनी बेता लियाय, “हे परभु ओके होः कोवान” ईसु हुनी के बेता लियाय “ईङ होः आम के डांड़ एरिङ एमा मेआ, जु आउर नहाअः तरअः फिन आलुम पाप के।”

ईसु दुनिया रिनी मरसल

12 # सं.मत्‍ती 5:14; सं.जोह 9:5 ईसु फिन होड़कु के बेता लिकुआय “दुनिया रिनी मरसल ईङ हेके, जे ईङ तयोम सेनाय, हुनी अंधार रे ऐरे सेना बकिर जिनगी रेनअः मरसल नाम केआय।” 13#सं.जोह 5:31फरीसीकु हुनी के बेता लियाकु “आम अपन गोवाही अपन एमेआम, आम आला गोवाही सच कनोआँ।” 14ईसु कंहड़ी रूवाड़ोअ लिकुआय, “ईङ अपन बारे रे गोवाही एमेईंग सेरे होः ईङ आला गोवाही सच एदनाआ, एता लःअय ची ईङ ओका तरअः हीःग नेनिंग आउर ओका-रे तोराइङा सेके पड़ीईंग, बकिर ओका तरअः हीःग तानिङ आउर ओकाःड़े तोराइङा सेके आपे कापे पड़ीआ। 15आपे होड़ आला नजाईर मोताबिक नेयायापे, ईङ ओके आला होः काईंग नेनाया, 16आउर जदि ईङ नेयाय होः नेयायीङ दो ईङ आला नेयाय सचा एदनाआ, एता लःअय ची ईङ एकले कनियाँ बकिर परम बाबा जे ईङ के कुलगोःड तदिङाय, हुनी आउर ईङ बनाहोड़ मिलाव केते नेयाय यालीङ। 17#कन 19:15आपे आला कनहुन रे होः लिखा लअः एदनाआ बारहोड़ आला गोवाही सच एदनाआ। 18ईङ अपन बारे रे गोवाही एमेईंग। आउर आपा होः जे ईङ के कुलगोःड तदिङाय ईङ बारे गोवाही एमेआय।” 19नोःआँ रे हुंकू ईसु के बेता लियाकु, “आम आली आपा ओकाःड़े एदानिया?” हुनी कंहड़ी रूवाड़ोअ लिकुआय, “आपे ना दो ईङ के पाड़ी आपे आउर ना दो बाबातिङ के होः, जदि आपे ईङ के पाड़ी किङापे दो, बाबातिङ के होः पाड़ी ताकियापे।” 20नोःआँ बात हुनी बड़े बिनती ओड़ाअ रे उपदेस एम यअते दान एमोअ ठाँव रे कंहड़ी लःअय, आउर ओके होः हुनी के काकु सःब लिया, एता लःअय ची हुनी आला बेरा नहाअः जगुत का हीःग थिना।

जे एड़े ईङ तोराईङा होनाःड़े आपे एरपे सेन दड़ीआ

21हुनी फिन हुंकू के बेता लिकुआय “ईङ तोराइङा आउर आपे नाम किङापे आउर पाप रे गोएःग कोआपे, जे एड़े ईङ तोराइङा होनाःड़े आपे एरपे हीःग दड़ीआ।” 22नोःआँ रे जाहुदीकु मेन लअकु “नुई अपन-हारते गोएःग दो एरे गोजोआ? एता लःअय ची ईङ जे एड़े तोराइङा आपे होनाःड़े एरपे हीःग दड़ीआ” मेन गेआय। 23ईसु हुंकू के बेता लिकुआय, “आपे लतार रेनपे हेके ईङ तेंग रिनीङ हेके आपे नोःआँ दुनिया रेनपे हेके, ईङ नोःआँ दुनिया रिनीङ नलागे। 24हिना लःअय ईङ आपे के बेता लिपीईंग ची आपे पाप रअः दसा रे गोएःग कोआपे। जदि आपे ईङ हिनी हेके सेके कापे बिसवासेआ दो आपे पाप रअः दसा रे गोएःग कोआपे।” 25तब हुंकू हुनी के कुली लियाकु, “आम ओके हेके?” ईसु कंहड़ी रूवाड़ोः लिकुआय, “ईङ हिनी हेके जे लकान ची पहिल तरअः गी आपे के बेता आगु तद पेईङ। 26आपे के क-कंहड़ी लःअय आउर आपे आला नेनेयाय लःअय ईङ दुबाःड़े ढेर बात एदनाआ। बकिर सचा हिनी हेके जे ईङ के कुलगोःड तदिङाय। ईङ हिना के दुनिया के उदूः गेईङ जे ईङ हुनी तरअः आयुम तदिङ।” 27हुनी आपा रअः बारे रे कंहड़ी तनाय सेके हुंकू काकु बुझाअ केना। 28हिना लःअय ईसु बेता लिकुआय, “जब आपे मनवा होपोन के तेंग रे रकाःब कियापे, दो ईङ हिनी हेके सेके पाड़ी केआपे, ईङ अपन-हारते एतान होः काईंग एतानेआ, बकिर जे लकान बाबातिङ ईङ के सिखाव तदिङाय हिना लकान गी नोःआँ बात कंहड़यीङ। 29ईङ के जे कुलगोःड तदिङाय हुनी ईङ लोः साँघे एदानिया। हुनी ईङ के एकले काय बाई तदिङा, एता लःअय ची जे हुनी के बेस आदाईया जामा बेरा ईङ हेंकाने-ईंग।” 30ढेरकु हुनी के नोकान क-कंहड़ी आयुम लियाकु आउर हुनी रे बिसवास लअकु।

सचाई आपे के आजाद केपेआय

31तब ईसु हुंकू जाहुदीकु के जे हुनी तेंग रे बिसवास थिलाअकु के बेता लिकुआय, “जदि आपे ईङ आला बचन रे बनाल ताहिनोआपे, दो सचे गी ईङ आलकु चेला ठहराव कोआपे। 32आपे सचाई के पाड़ी केआपे आउर सचाई आपे के आजाद केपेआय।” 33#सं.मत्‍ती 3:9; सं.लुका 3:8हुंकू हुनी के बेता लियाकु, “आले दो अब्राहम आलकु बंसवाईर हेके,” आले ओका हिला होः ओके आलकु बंधाउवा काले ताही ताना। फिन “आम एता लकान आपे आजाद कोआपे कंहड़ीयाम?” 34ईसु हुंकू के कंहड़ी रूवाड़ोः लिकुआय ईङ आपे के सचे बेताअः दिपीईंग जे पापेआय, हुनी पाप रअः बंधाउवा हेके। 35बंधाउवा एकसम ओड़ाअ रे काय ताहिनोआ, होपोन जामा बेरा ताहिनोआय। 36हिना लःअय जदि होपोन आपे के आजाद केपेआय दो आपे सचे आजाद कोआपे। 37ईङ पाड़ीईंग ची आपे अब्राहम आलकु बंसवाईर हेके, सेरे होः आपे ईङ के गोगोएःग रअः टाप रे ताहिनोआपे, एता लःअय ची ईङ आला वचन आपे आला हिरदाय रे का बसाव दड़ीयोआ। 38ईङ हिना कंहड़ीयीङ जे अपन आपा दुबाःड़े नेल तदिङ, आउर आपे हिना कामीयापे जे आपे अपन आपा तरअः आयुम तदापे। 39हुंकू हुनी के कंहड़ी रूवाड़ोः लियाकु, “आले आली आपा दो अब्राहम हेके।” ईसु हुंकू के बेता लिकुआय, “जदि आपे अब्राहम आलकु बंसवाईर ताहिकोआपे दो, आपे हिना कामी केआपे जे अब्राहम कामी थिलाआय। 40बकिर नहाअः दो आपे ईङ लकान होड़ के गोगोएःग नाम तनापे, जे आपे के होना सचा बचन उदूओ-लेपेआय, जे परमेसर तरअः आयुम लःअय, नोकान दो अब्राहम काय थिलाआ। 41आपे दो अपन आपा लकान कामीयापे।” हुंकू ईसु के बेता लियाकु, “आले बेलाज कामी रे काले जनमाव ताना, आले आली मियांड ठुका आपा एदानिया आउर हुनी परमेसर हेके।” 42ईसु हुंकू के बेता लिकुआय “जदि परमेसर आपे आली आपा ताही कोआय, दो आपे ईङ के दुलार किङापे एता लःअय ची ईङ परमेसर पखा तरअः हीःग तानिङ, आउर नहाअः ईङ नोआँड़े एदानिङा, ईङ अपन-हारते काईंग हीःग ताना बकिर हिनी ईङ के कुलगोःड तदिङाय। 43आपे ईङ आला कंहड़ी के एता लःअय कापे समझाआ? एता लःअय ची आपे ईङ आला वचन के अआयुम कापे नामा। 44आपे अपन आपा सैतान आलकु होपोन हेके, आउर अपन आपा आला मरजी पुपुरा नामापे। हुनी दो सुरू तरअः गी खपतानय आउर सचाई रे आसथिर काय थिना, एता लःअय ची सचाई हुनी रे कनोअ-गीआ, जब हुनी झुठ कंहड़ीयाय दो अपन चाईल-चाकर मोताबिक कंहड़ीयाय, एता लःअय ची हुनी झुठा हेके आउर झुठा आली आपा हेके। 45ईङ सचे कंहड़ीयीङ हिना लःअय आपे ईङ रे कापे बिसवासेआ। 46आपे रे ओके ईङ रे पाप रअः दोस लगाव सकायाय? जदि ईङ सचे कंहड़ीयीङ दो एता लःअय आपे कापे बिसवासेआ। 47जे परमेसर आली हेके हुनी परमेसर आला बचन के आयुमेआय, आउर आपे नोःआँ लःअय कापे आयुमेआ ची आपे परमेसर आलकु नलागे।”

ईसु आउर अब्राहम

48जाहुदीकु ईसु के बेता लियाकु, आले सचे कंहड़ीयाले आम समारिया#8:48 समारिया जाहुदीकु समारिया रेनकु कुलोः एतानहोअ काकु सम्बन्ध दोहोयकेना रेनमे हेके आउर आम के मुवाँ आतमा सःब तदमेआय। 49ईसु हुंकू के कंहड़ी रूवाड़ोअ लिकुआय “ईङ रे मुवाँ आतमा कनियाँ, बकिर ईङ अपन आपा के अदारीयीङ, आउर आपे ईङ के कापे आदारिङा। 50ईङ अपन बड़ाई काईंग चहाआ बकिर मियांड एदानिङा जे ईङ आला बड़ाई चहाआय आउर नेयाय होः नेयायाय।” 51ईङ आपे के सचे कंहड़ीओ दिपीईंग जदि जाहें ईङ आला बचन रे चलाआय, दो हुनी जुग-जुग गोजोअः के एरे नेलेआ। 52जाहुदीकु हुनी के बेताअः दियाकु “नहाअः दो आले आम रे मुवाँ आतमा एदानिया सेके पाड़ी केदाले। अब्राहम आउर आगमजानीकु गोएःग नाकु बकिर आम कंहड़ीयाम ‘जदि जाहें ईङ आला वचन रे चलाआय दो हुनी हिरगीस मराईन के एरे चखाया मेन गेआम।’ 53आले आली आपा अब्राहम दो गोएःग नाय, आम हुनी तरअः बड़ेआम एतान? आउर आगमजानीकु होः गोएःग नाकु, आम अपन के एतान समझाआम?” 54ईसु हुंकू के कंहड़ी रूवाड़ोः लिकुआय “जदि ईङ अपने आला बड़ाईयीङ दो होना बड़ाई रेनअः एतान मतलोब कनोआँ, बकिर ईङ आला बा-बड़ाई, ईङ आली आपा हेके जेके आपे हुनी आम आली परमेसर हेके कंहड़ीयापे। 55आपे दो हुनी के कापे पाड़ी लिया बकिर ईङ हुनी के पड़ीईंग जदि ईङ हुनी के काईंग पाड़ीआ कंहड़ीईङ, दो आपे लकान झुठा ठहराव कुईंग, बकिर ईङ हुनी के पाड़ीईंग आउर हुनी आला वचन रे चलाईंग। 56आपे आली आपा अब्राहम ईङ आला दिन नेनेल रअः आसरा रे मुरुक खुस थिनाय, आउर हुनी नेल लःअय आउर खुसी मनाव लःअय।” 57जाहुदीकु हुनी के बेता लियाकु “नहाअः जगुत पचास बरीस रेनमे काम हुयाव ताना, सेरे होः अब्राहम के नेल तदियाम?” 58ईसु हुंकू के बेता लिकुआय “ईङ आपे के सचे कंहड़ीओ दिपीईंग, ची नोःआँ तरअः पहिल ची अब्राहम सिरजाव नेनाय पहिले तरअः गी एदानिङा।” 59तब हुंकू हुनी के गोगोएःग लःअय टुकू हालांग लअकु, बकिर ईसु उकु केते बड़े बिनती ओड़ाअ तरअः उडुंग नाय।

Currently Selected:

संत.जोहन 8: ASR

Highlight

Compare

Copy