संत.लुकास 11

ईसु चेला ताय के बि-बिनती सिखाव लिकुआय

(संत.मत्‍ती 6:9–13)

1ईसु मियांड ठाँव रे बिनती केनाय। तेकर बिनती चबा लःअय, हिमीन रे हुनी आली मियांड चेला “ए परभु, जोहन चेला ताय के बि-बिनती लःअय सिखाव लिकुआय, हिना लकान आले केहोः सिखाव लेमे” बेता लियाय।

2हुनी चेला ताय के, नोकान कंहड़ीओ लिकुआय, जब आपे बिनती यापे दो,

“ए बाबा,

आम आला नुमू रअः बड़ाई हुयाआ,

आम आला राईज हिजोआ।

3दिन भाईर रेनअः जोजमअ आले के रोज दिन एमा लेमे।

4तेकर आले आला पाप के छमाय मे,

एता लःअय ची आले होः अपन जामा गुनाहगारकु के छमा कुआले।

तेकर आले के परीकछा रे आलुम पड़ाव चिलेके।”

बिनती रेनअः बारे ईसु आला सिख

(संत.मत्‍ती 7:7–11)

5तेकर ईसु चेला ताय के कंहड़ीओ लिकुआय, “सोंचायपे ची आपे रे ओके एदानिया हुनी आली मिहोंड़ गाती एदानिया तेकर हुनी, हुनी दुबाःड़े आधा निदा सेन केते, ‘ए संगी, पेया लाःड एमाईङ मे, 6एता लःअय ची होरा डिड़ोई मिहोंड़ गाती तिंग ईङ दुबाःड़े हीःग तनाय, हेतरअ हुनी के खिखियाव लःअय ईङ दुबाःड़े एतान होः कनोआँ’ बेता लियाय! 7आलुम दुख एमाईङ नहाअः दो दुवार सीङा, हेतरअ ईङ लोः चेंगा तिंग गितीःग तनाकु। ‘ईङ बिरिःड केते काईङ एमोअ दाड़ी ताना!’ मेन केते ओड़ाअ ते तरअः कंहड़ी रूवाड़ोः लियाय। 8ईङ आपे के बेताः दिपीईङ, नुई गाती ताही केते होः, बिरिःड केते काय एमाई रे होः हुनी आला घड़ी-घड़ी कोकोय रआ चलते कोयाय होले, हुनी बिरिःड केते हुनी के जेतना चाही एमा कियाय। 9ईङ कंहड़ीओ दिपीईङ, कोयपे दो एमा केपेआकु, दंड़ायापे दो नाम केआपे, ठोक-ठोकायापे दो, आपे लःअय उघड़ाव कोआ। 10एता लःअय ची जे कोयाय हुनी के भेटाआ, हेतरअ जे दांड़ायाय हुनी नामेआय, तेकर जे ठोक-ठोकायाय हुनी लःअय उघड़ाआ। 11तेकर आपे बाबा पाड़ी केते जेकर होपोन हाकु कोईयाय दो हाकु रआ बदली रे बिंङ एमा कियाय एतान? 12चाहे बिली कोयाय दो हुनी के बिछी एमा कियाय? 13जदि आपे गादुस हुयाव केते होः, अपन चेंगा के बेस जिनीस एमोअ पड़ीआपे दो, आपे आली, सिरमा रिनी बाबा अपन कोकोय कु के पबितर आतमा जरूर एमा किकुआय!”

ईसु हेतरअ मुवाँ आतमाकु आली मुखिया बलजबुल

(संत.मत्‍ती 12:22–30; संत.मरकुस 3:20–27)

14तेकर मुसिङ ईसु मियांड होड़ तरअः मुवाँ आतमा के उडुंग लियाय; जे हुनी के गुंगा बनाव थिलयाय, हेतरअ मुवाँ आतमा उडुंग नेनाय, तेकर हुनी गुंगा होंड़े कंहड़ी तनाय। हेतरअ तुन्दरा ताहिनाकु हुंकू छकित नाकु, 15#सं.मत्‍ती 9:34; 10:25बकिर हुंकू मे से रे थोड़ेक, “नुई दो बलजबुल, नुमू रिनी मुवाँ आतमाकु आली मुखिया आला सहाड़ा रे, मुवाँ आतमा के उडुंग कुआय” मेन लअकु।

16 # सं.मत्‍ती 12:38; 16:1; सं.मर 8:11 एटाअकु प-परीकछा लःअय सिरमा रेनअः मियांड चिनहा कु कोय लआ, जेकर से ची नोःआँ पता चलाव सकअ ची हुनी के परमेसर कुलगोःड तदियाय। 17तेकर हुनी हुंकू आला मन रेनअः बात के पाड़ी केते, कंहड़ीओ लिकुआय, “जे राईज रे छिट-फुट हुयाअः होना उजाड़ जुनोआ; तेकर जे ओड़ाअ रिनकु रे छिट-फुट हुयाअः होना नास जुनोआ। 18तेकर सैतान आएंग आलागी बिरोधेआय रेदो, हुनी आला राईज एता लकान आसथिर ताही कोआ? आपे दो हुनी बलजबुल आला सहाड़ा रे मुवाँ आतमा के उडुंग जोला कुआय मेनोः तनापे। 19बकिर ईङ बलजबुल आला सहाड़ा रे मुवाँ आतमा के उडुंग कुईंग, दो आपे आलकु चेला ओके आला सहाड़ा रे मुवाँ आतमाकु के उडुंग कुआकु? हिना लःअय हिकुगी आपे आला नेयाय केआकु! 20बकिर ईङ परमेसर आला सवांग रे, मुवाँ आतमा के उडुंग कुईंग होले, परमेसर आला राईज आपे दुबाःड़े हीःग सोदोर ताना।

21“सवांगिया होड़ हांथेयार सःब केते, आएंग आला ओड़ाअ होरहोयाय, होले हुनी आला धन-खुरजी, जतनाव ताही नोःआँ। 22बकिर हुनी तरअः जादे केटेगी हीःग झपटाव केते हराव गुलताईयाय, दो हुनी भरसा ताहिनोआय होना हांथेयार के रेःग गुल तआय हेतरअ हुनी आला धन-खुरजी के रेःग केते हाटिङ गुल तआय।

23 # सं.मर 9:40 “जे ईङ लोः काय गतियोआ हुनी ईङ आला बिरोध रीया; हेतरअ ईङ लोः काय जवारेआ हुनी छितरायाय।

कटिःग केन सुधराअ रे बिपाईत एदनाअ

(संत.मत्‍ती 12:43–45)

24“असुध आतमा होड़ तरअः उडुंग केते, रिड़िगया ठाँव रे सथाअ लःअय ठाँव नाम बड़ायाय, बकिर काय नाम दड़ीआ, हेतरअ ईङ जे तरअः उडुंग निङ, ‘हिना मारी ओड़ाअ रे सेन रूवाड़ो ईङ मेन गेआय।’ 25तेकर हीःग केते जोअ अमिन लआ लकान हेतरअ सिंगराव लआ नामेआय। 26हेतरअ हुनी सेन केते आएंग तरअः जादे खपतान सातगोड़ मुवाँ आतमा के आएंग लोः आउर आगु कुआय, तेकर हुंकू हुनी रे बोलो केते, हेनेन रिकु बसाया, हेतरअ हुनी होड़ आला तयोम रेनअः दसा पहिल तरअः जादे बगड़ाव जुनोआ।”

सचा सुख

27तेकर नोःआँ कंहड़ी केनाय, हिमीन रे तुन्दरा होड़ तरअः मिहोंड़ आउराईत जोड़ से, “आम जे लाहीःग रे ताहिनाम हेतरअ जे तोवा के नु लआम होना धनया एदनाअ” मेन केते बेता लियाय!

28बकिर ईसु उतारा एमा लियाय, “हाँ, बकिर परमेसर आला कंहड़ी आयुमेआकु हेतरअ मनाअ आकु हिंकु धनया एदान कुआ।”

योना बेस खभाईर एमोई आला चिनहा

(संत.मत्‍ती 12:38–42)

29 # सं.मत्‍ती 16:4; सं.मर 8:12 तेकर तुन्दरा होड़ ईसु दुबाःड़े तुन्दरायोः ते सेनोः केनाकु, हिमीन रे हुनी कंहड़ी केनाय, “नोःआँ जुग रिनकु होड़ खपतानाकु! हुंकू चिनहा कु नाम ताना, बकिर जोना बेस खभाईर एमोई आला चिनहा बाई केते हुंकू लःअय एतान चिनहा होः एमोअ कनोआँ। 30#जोना 3:4निनवे रिनकु होड़ लःअय जोना मियांड चिनहा ताहिनाय, हिना लकान मनवा होपोन होः नोःआँ जुग रिनकु होड़ लःअय चिनहा ठहराव कोआय। 31#1 राजा 10:1–10; 2 इति 9:1–12सीबा रिनी रानी नोःआँ परिया रिनकु होड़ लोः नेयाय हिला तिंगु कोआय, हेतरअ नोःआँ परिया रिनकु होड़ के दोसी ठहराव किकुआय एता लःअय ची, हुनी सुलेमान आला बुधी आ-आयुम लःअय धरती रेनअः नोःआँ छोर तरअः होना छोर जगुत हीःग नेनाय, बकिर नेलीपे सुलेमान तरअः बड़े नोआँड़िया। 32#जोना 3:5निनवे रिनकु नोःआँ परिया रिनकु लोः नेयाय हिला तिंगु केते, हुंकू के दोसी ठहराव कि कुआकु; हुंकू दो योना आला परचार आयुम केते मन रूवाड़ लअकु हेतरअ नेलीपे जोना तरअः बड़े नोआँड़िया!

होड़ो रेनअः ढिबरी

(संत.मत्‍ती 5:15; 6:22,23)

33 # सं.मत्‍ती 5:15; सं.मर 4:21; सं.लुका 8:16 “जाहें होड़ ढिबरी बराव केते दनांग रे चाहे खाईचलः रे काकु हारुबेआ; बकिर भीतरी बोलोयोः कु, मरसल नेलेकु लःअय, दिलखा रे दोहोयाकु। 34आम आला मेःड दो आम आला होड़ो रेनअः ढिबरी हेके। हिना लःअय जदि आम आला मेःड बेस एदनाअ, दो गोटा होड़ो मरसल कोआ; बकिर होना गादुस एदनाआ, दो होड़ो ताम होः अंधारा। 35हिना लःअय जे मरसल आम रे एदनाअ होना आलु अंधार कोओ मेन केते चौंचित ताहिन मे। 36जदि आम आला गोटा होड़ो मरसल रे ताहिनोआ, हेतरअ होना रेनअः जामा हिसा अंधार रे का ताहिनोआँ दो होना हिना लकान जामा बेरा हुयाव कोआ जे बेरा, ढिबरी रेनअः धाईध ते गोटा मरसल मेआय।”

धरम गुरू हेतरअ फरीसीकु के चेताव कुकेनाय

(संत.मत्‍ती 23:1–36; संत.मरकुस 12:38–40)

37ईसु कंहड़ी केनाय, हिमीन रे मियांड फरीसी आम ईङ ओड़ाअ रे घोटो जोम केमे मेन केते हुनी लोः गोहराव नेनाय। हेतरअ ईसु बोलो केते जोजोम दुड़ूः नेनाय। 38ईसु जाहुदीकु आला नेग लकान बेगार ऊम ते जोम दाय के नेल केते फरीसी मोकाव नाय। 39परभु हुनी के नोकान कंहड़ीओ लियाय, “ए फरीसीकु, आपे डुभा हेतरअ थरिया तेङ-तेङ पे गितीलेआपे, बकिर भीतरी रेदो गिजगिजा गी ताहिनोआँ। हिना लकान आपे आला मन रेदो लोभ हेतरअ बुराई रे पेरेःग ताना। 40ए बोका कु, जे बाहरी रेनअः हिसा के बनाव लःअय, हुनी भीतरी रेनअः हिसा के काय बनाव लआ एतान? 41बकिर भीतरी रेनअः के दान गुल तापे, होले आपे लःअय जामा जिनीस सुध कोआ।

42-43 # लेवी 27:30 “ए फरीसी आपे लःअय हाय! हाय आपे फुदेना तेकर कड़ी सेकाम, हेतरअ जामा खाता रेनअः साःग पात रआ दसवाँ हिसा एमेआपे, बकिर परमेसर आला नेयाय हेतरअ दुलार के टलाव गुल तआ पे। हुयाअः दो नोकान चाही ताहिनेना, ची आपे नोःआँ केहोः कामी एका तकेआपे तेकर होना केहोः बाबाई का थिना। ए फरीसी आपे लःअय हाय! हाय आपे बिनती ओड़ाअ रे मड़ांग-मड़ांग दुड़ूः हेतरअ बजार कुरे जोहार चीनोः नामापे। 44आपे लःअय हाय! हाय आपे उकु ओना मारघटा लकानापे, होना तेङ रे सेनाकु होड़ काकु पड़ीआ ची नोःआँ मारघटा हेके।”

45होले धरम पुथी सि-सिखावकु रे मिहोंड़, “ए गुरू, नोकान कंहड़ी केते, आम आले के अपमान देलेआम” कंहड़ी रूवाड़ोः लियाय।

46ईसु कंहड़ीओ लिकुआय, “ए धरम पुथी सि-सिखावकु आपे के होः हाय! हाय आपे मुरुक हम्बाल बोझा के होड़ तेङ रे लादी ऊकूआपे! जेके आआलगाव का दड़ीयोआ, बकिर आपे होना बोझा के मियांड अंगड़ी रे होः कापे टुंड़ाअ गेआ 47आपे लःअय हाय! हाय आपे आलकु पुरखाकु हुंकू के गोएःग लिकुआकु! आगमजानीकु आला मारघटा पे बनाया। 48नोःआँ लकान आपे, आपे आलकु पुरखाकु आला कामी रेनअः गोवाह हेके, हेतरअ होना रे आपे मंजुर एदान पेआ; हुंकू दो गोएःग लिकुआकु, हेतरअ आपे हुंकू आला मारघटा पे बनाया। 49हिना लःअय परमेसर आला लुर होः कंहड़ीआय, ‘हुंकू दुबाःड़े ईङ आगमजानीकु हेतरअ प्रेरितकु के कुलगोःड कुईंग; हेतरअ हुंकू होड़ हुंकू मेसे, थोड़ेक के गोएःग किकुआकु थोड़ेक के सताव किकुआकु।’ 50तेकर दुनिया सिरजाव नेना हिमीन तरअः जेतना आगमजानीकु आला मयोम तु लआ एदनाअ होना जामा रेनअः लेखा निआँ जुग रिनकु होड़ के एमोअ पड़ाव कोआ, 51#एहेः 4:8; 2 इति 24:20,21हाबिल आला मयोम तरअः बिदी हेतरअ पबितर ठांव तलारे गोएःग लियाकु, जकरियस आला मयोम जगुत। साथेगी कंहड़ीओ दिपीईङ, होना रेनअः लेखा निआँ जुग रिनकु होड़ के एमोअ हुयाव कोआ!

52“आपे धरम पुथी सि-सिखावकु लःअय हाय! हाय! आपे बुधी रअः ताला रेनअः कुंजी ईदी लआपे; बकिर आपे दो कापे बोलो नेना, हेतरअ बोलोयोः केनाकु केहोः बधराव किद कुआपे।”

53तेकर ईसु होनाःड़े तरअः सेनोः नाय, हिमीन रे धरम पुथी सि-सिखावकु हेतरअ फरीसीकु हुनी तयोम पड़ाव नाकु तेकर ढेर बात रेनअः सवाल कुकुली लःअय तिरोघोचोः दियाकु, 54तेकर हुंकू, हुनी आला जहान ना जहान कंहड़ी रे साबीयाबु मेन केते घाईत नाम रे ताही नेनाकु।

Currently Selected:

संत.लुकास 11: ASR

Highlight

Compare

Copy