संत.लुकास 18
18
न्यायधीस हेतरअ राँड़ी आउराईत आला गाम
1रोज बि-बिनती हेतरअ ओका हिला होः हदरअ कोवान चाही, नोःआँ के ससमझाव लःअय ईसु नोःआँ गाम के चेला ताय के कंहड़ी सुनावओ लिकुआय। 2“मियांड सहर रे मियांड नेनेयाय वाला ताहिनाय हुनी परमेसर के काय बोरोई केना हेतरअ ना जाहें होड़ आला होः मनाअ केना। 3तेकर हिना सहर रे मियांड राँड़ी आउराईत होः ताहिनाय, हुनी, हुनी न्यायधीस दुबाःड़े हीःग-हीःग, ‘ईङ आला नेयायेमे तेकर मुदाई तिंग तरअः बनचाईङमे मेन केते गोहरअ केनाय!’ 4थोड़ेक दिन लःअय दो हुनी, राँड़ी आउराईत आला कंहड़ी काय आयुम लआ, बकिर ‘तयोम ईङ दो परमेसर के काईङ बो-रा हेतरअ ना जाहें होड़ आला आयुमी ईङ नोकान अपन मन-मन रे उईहार लःअय, 5रे होः नुई आउराईत बितलाव दिङाय हिना लःअय ईङ हुनी आला नेयाय चुकायीङ, कोवान दो नुई घड़ी-घड़ी हीःग केते बितलाव किङाय मेन केते आएंग मन रे उईहार लःअय!’”
6तेकर परभु ईसु कंहड़ी लःअय, “आयुमेपे नुई अधरमी नेयायी एताने कंहड़ी ताना। 7दो, परमेसर के दिन-राईत बिनती याकु? आएंग निबाड़ लिनकु होड़ लःअय नेयाय एरे चुकाया? एतान हुंकू रआ बारे न्याय लःअय दिरी केआय? 8हुनी तुरते, हुंकू आला नेयाय चुकाव ओकिकुआय ईङ कंहड़ीओ दिपीईङ। रे होः मनवा होपोन जब हिजोअ आय हिमीन रे एतान ओत रे बिसवास नाम केआय?”
फरीसी हेतरअ चेक नाकेदार आला गाम
9ईसु हुंकू जे अपने के धरमी गीआबु मेन केते अपन रे भरसा दोहोयाकु, तेकर एटाअकु के घिंड़ोः केनाकु, हुंकू होड़ लःअय नोःआँ गाम कंहड़ी लःअय। 10“बनहोंड़ बड़े बिनती ओड़ाअ रे बि-बिनती लःअय सेन नेनाकिन, मिहोंड़ फरीसी हेतरअ मिहोंड़ मालगुजारी ताइसलावकु ताहिनाय। 11फरीसी तिंगु केते नोकान बिनती केनाय, ‘ए परमेसर, ईङ एटाअ होड़कु लकान कनिङा, हुंकू दो रेरेःगकु, अधरमीकु, एटाअ लाईंकु लोः बेलाज कामीकु हेके, तेकर मालगुजारी ताइसलावकु लकान होः कनिङा निआँ मेन केते धन्यवाद दिमीईङ। 12ईङ हपता रे बार खेप उपासेईङ, तेकर ईङ जामा कमाई रेनअः दसवाँ हिसा होः एमेईंग।’ 13बकिर मालगुजारी ताइसलावी लंका रे तिंगु केते सिरमा पखी होः काय साँगील नाम नेना, बकिर छाती ताय के हुमाअ-हुमाअ, ‘ए परमेसर, ईङ पापीईङ, दयाईङ मे,’ मेन लःअय! 14#सं.मत्ती 23:12; सं.लुका 14:11ईसु कंहड़ी लःअय, नुई नाकेदार हुनी, तरअः जादे धरमी ठहराव कोअते ओड़ाअ सेन नेनाय, जे अपने के बड़े समझाआय हुनी छोटे कोआय, हेतरअ जे अपने के छोटे समझाआय हुनी बड़े कोआय।”
ईसु बालेक चेंगाकु के आसीस लिकुआय
(संत.मत्ती 19:13–15; संत.मरकुस 10:13–16)
15तेकर ईसु बालेक चेंगाकु के असीस एमा कुआय मेन केते, बालेक चेंगा ताकु के होड़ हुनी दुबाःड़े आगु कुकेनाकु।, बकिर चेला ताय नेल केते हुंकू के डपटाव लिकुआकु, 16बकिर ईसु हुंकू चेंगा के आएंग दुबाःड़े राअः केते चेला ताय के कंहड़ीओ लिकुआय, “बालेककु के ईङ दुबाःड़े हीःग चिकुपे तेकर हुंकू के आलपे बधराव कु, एता लःअय ची परमेसर आला राईज निकु बालेक चेंगा लकान होड़कु आला हेके। 17ईङ सचेगी कंहड़ीओ दिपीईङ! जे परमेसर आला राईज के बालेक चेंगाकु लकान काकु तेलाय रेदो हुंकू होंड़े कहियो एरकु बोल दड़ीआ।”
गीरहत होड़ हेतरअ का-अन्तोः जिनगी
(संत.मत्ती 19:16; संत.मरकुस 10:17–31)
18तेकर मियांड जाहुदी हाकिम, “ए बेस गुरू, का-अन्तोः जिनगी नानाम लःअय ईङ एतानिंग एतानेआ?” मेन केते ईसु के कुली लियाय।
19“ईङ के, आम बढ़ियाँ एतान लःअय मेन गेआम?” मियांड ठुका एदानिया परमेसर के बाई केते, “ओके होः बेस कानी कुआ मेन केते ईसु कंहड़ी रूवाड़ लःअय। 20#उइठ 20:14; कन 5:18; उइठ 20:13; कन 5:17; उइठ 20:15; कन 5:19; उइठ 20:16; कन 5:20; उइठ 20:12; कन 5:16आम हुकूम के दो पड़ीआम ‘आम ब्यबिचार आलुम के; आलुम गोएःग कु; आलुम चोरे; झुठो गोवाह आलुम एमे; अपन आया-बाबा आला आदारेमे’” बेता लियाय।
21गीरहत होड़, “ईङ नोःआँ के चेंगा बेरा तरअः, मनाव यःते दराईंङा” बेता लियाय।
22तेकर ईसु, नोःआँ आयुम केते, “नहाअः होः आम दुबाःड़े मियांड कंहड़ी रेनअः घटी एदनाअ जु आम सेन केते आम आला जामा जिनीस आखरिंग केते रांगेःगकु के हाटिङोः कुमे, होना रआ बदला सिरमा रे आम के धन भेटाव कोआ हेतरअ हीःग केते ओतोङिङ मे,” बेता लियाय। 23हुनी नोःआँ आयुम केते, मुरुक हदियाव नाय, एता लःअय ची हुनी दो मुरुक गीरहत ताहिनाय।
24तेकर ईसु हुनी के हदियाः नेल केते, “गीरहतकु लःअय परमेसर आला राईज रे बोल उकिन मसकीला! 25गीरहत होड़ के परमेसर आला राईज रे बोल तरअः सुई रेनअः बुचअ रे ऊँठ के परोम जुनोः सेबाआ” बेता लिकुआय।
26तेकर नोःआँ के आ-आयुमकु, तब दो “ओके आला, उधार हुयाव, सकाव कोआ?” मेन लअकु।
27ईसु बेता लिकुआय, “होड़ तरअः का हुयाव दाड़ी योआ, होना परमेसर तरअः हुयाव दाड़ी योआ।”
28तेकर पतरस, “नेलेमे! आले दो ओड़ाअ दुवार बाई केते आम के ओतोङ तदमेआले” बेता लियाय।
29तेकर ईसु हुंकू के, “ईङ सचेगी, कंहड़ीओ दिपीईङ जदि जाहें परमेसर आला राईज लःअय अपन ओड़ाअ चाहे बोको आउराईत तेके एंगा-आपा, चेंगा-छउवा के बाई तदकुआकु, 30दो नोःआँ समय रे होना के जादे नामेआ हेतरअ हिजोअ जुग रे का-अन्तोः जिनगी होः नाम केआकु।”
ईसु आएंग गोजोः बारे पे खेप उदूः लःअय
(संत.मत्ती 20:17–19; संत.मरकुस 10:32–34)
31तेकर ईसु बारहों चेला ताय के एटाअ ते ईदी केते हुंकू के कंहड़ीओ लिकुआय, “नेलेपे! आबु जिरोसलेम तोराबुआ तेकर मनवा होपोन रअः बारे आगमजानीकु जे लिखा तदाकु होना जामा पुरा हुयाअः वाला एदनाअ। 32एता लःअय ची एटाअ जाईतकु आला तीः रे एमा कोआय, तेकर हुंकू हुनी के लन्दाओ कियाकु, हेतरअ दुरबचन कियाकु, तेकर बेःग कियाकु। 33तेकर हुनी के कोड़रा रे हुमाअ कियाकु, हेतरअ गोएःग कियाकु, तेकर हुनी पे रोज रे जिवीःड बिरिःड कोआय।”
34बकिर हुंकू चेला ताय नोःआँ कंहड़ी के काकु अरखाव नेना; तेकर नोःआँ रआ मतलब हुंकू मड़ांग रे उकु ताहीना, हेतरअ हुंकू ईसु आला कंहड़ी के काकु आरखाव दाड़ी लआ।
कोय जोमी आंधरा के नेल चिलीयाय
(संत.मत्ती 20:29; संत.मरकुस 10:46–52)
35जब ईसु जेरीहो डिही सोदोर नेनाय, हिमीन रे मियांड आंधरा होरा दाऊंड़ी रे दुड़ूः कोओते, भीख कोय केनाय। 36तेकर तुन्दरा होड़ सेन परोमोः केनाकु के आयुम केते, “एतानोः ताना” मेन केते कुली लिकुआय।
37“नासरत रिनी ईसु परोमोः तनाय,” मेन केते उदूः लियाकु।
38तेकर हुनी आंधा गुल लःअय, “ए ईसु! ए दाऊद आली होपोन! दयाईङ” मे मेन केते हकाव लियाय!
39तेकर मड़ांग-मड़ांग सेनोः केनाकु, हुंकू आलुम साड़ी मेन केते डपटाव लियाकु, बकिर हुनी “ए दाऊद आली होपोन! दयाईङ मे” मेन केते छेरअ तनाय।
40तेकर ईसु तिंगु केते हुनी के ईङ दुबाःड़े आगुयपे मेन केते आचु लिकुआय, तेकर अंधा, हेनाःड हीःग नेनाय दो, 41“आम एतान आसरा तनाम ईङ आम लःअय एतानिंग एतानेआ” मेन केते कुली लियाय।
हुनी “ए परभु, ईङ फिन नेनेल नाम तानिङ” मेन केते कंहड़ीओ लियाय।
42तेकर ईसु बेता लियाय, “नेलेमे आम आला! बिसवास ताम आम के छुटाव तदमेआय।”
43तेकर हुनी हिमने रे नेल दाड़ी केदाय, तेकर परमेसर आला बड़ाई याःते, ईसु के ओतोङ लियाय। तेकर जामा होड़ नोःआँ नेल केते, परमेसर आला बड़ाई लअकु।
Currently Selected:
संत.लुकास 18: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
