संत.लुकास 20

ईसु आला हक रे सवाल

(संत.मत्‍ती 21:23–27; संत.मरकुस 11:27–33)

1तेकर हिमीन बेरा मुसिङ ईसु बड़े बिनती ओड़ाअ रे होड़कु के सिखाव कुकेनाय, हेतरअ बेस खभाईर के सुनाव कुकेनाय, हिमीन रे बड़े पुरोहितकु तेकर धरम पुथी सि-सिखावकु, अगुवाकु लोः हेनाःड हीःग केते तिंगुः नाकु, 2एतान हाक रे नोःआँ कामीयाम, चाहे “नोःआँ कामी, लःअय ओके हक एमा तदमेआय?” मेन केते कुली लियाकु।

3तेकर हुनी, हुंकू के “ईङ होः मियांड बात कुलीः दिपीईङ। ईङ केहोः उदूः गेपे, 4जोहन आला बतिस्मा एतान सिरमा तरअः ताहिना चाहे होड़ पखी तरअः ताहिना नोःआँ उदूउईङपे” मेन केते कंहड़ी रूवाड़ोः लिकुआय।

5होनते हुंकू आकु-आकु कंहड़ी तानाकु, “आबु सिरमा पखी तरअः मेन गेआबु? दो हुनी एता लःअय, ‘हुनी रे कापे बिसवास लआ,’ बेता के बुआय? 6हेतरअ होड़कु पखी तरअः मेन गेआबु दो, जामे होड़ आबु के छेछोम किबुआकु, एता लःअय ची जोहन साथेगी आगमजानी तहिनाय होना के पड़ी केनाकु।” 7हिना लःअय, “हुंकू जोहन के बतिस्मा एमोअ रआ सवांग ओका पखी तरअः ताहीना होना के काले पाड़ीआ” मेन केते कंहड़ी रूवाड़ोः लियाकु।

8ईसु हुंकू के, “तब दो एतान हक रे नोःआँ ईङ कामी ताना, होना के ईङ होः, इरिंग उदूः पेआ” बेता लिकुआय।

मुदाई खितीहार आला गाम

(संत.मत्‍ती 21:33–46; संत.मरकुस 12:1–12)

9 # जसा 5:1 तेकर हुनी होड़ तरअः नोःआँ गाम के कंहड़ीओ लिकुआय, “मियांड होड़ अंगुर बाखड़ी बनाव लःअय, तेकर खितीहारकु के ठिका एमा केते, ढेर दिन लःअय परदेस उडुंग नाय। 10जोयोः बेरा हुनी बंधाउवा ताय तिकु के, अंगुर बाखड़ी रेनअः जोअ के अपन हिसा के एमाईयाकु मेन केते मियांड बंधाउवा ताय के खितीहारकु दुबाःड़े कुलगोःड लियाय। हुनी के हुमाअ केते एसेन तीः ते रूवाड़ किदयाकु। 11तेकर हुनी आउर एटाअ बंधाउवा के कुलगोःड लियाय; तेकर हुंकू हुनी के हुमाअ लियाकु, हेतरअ अपमान केते, एसेन तीः कु भेजवा रूवाड़ लियाकु। 12तेकर हुनी आउर एटाःई के कुलगोःड लियाय; तेकर हुंकू हुनी के हुमाअ घाव केते कु उडुंग लियाकु। 13तब अंगुर बाखड़ी रिनी मुंवार, ‘एतानीईङ, ईङ दुलार होपोन तिंग के भेजाईङ, जरूर नुई के माईन कियाकु’ सोंचाव लःअय! 14बकिर खितीहारकु हुनी के नेल केते, ‘नीईगी मुंवार आली होपोन ताय हेके। दु गुजियाबु, तब होले नोःआँ बाखड़ी आबु आला कोआ, मेन केते आकु-आकु सलाह लअकु!’ 15तेकर हुंकू हुनी के अंगुर बाखड़ी तरअः बाहरी उडुंग लियाकु।

“हेतरअ गोएःग लियाकु, नहाअः दो, अंगुर बाखड़ी रिनी मुंवार हुंकू के एतान किकुआय?” 16ईसु आउर “हीःग केते हुंकू खितीहारकु के गोएःग चबा किकुआय, हेतरअ अंगुर बाखड़ी के एटाअकु के एमा किकुआय” मेन केते कंहड़ी लःअय।

हुंकू नोःआँ आयुम केते, “नोकान ओका हिला होः आलु हुयाव कोअ” मेन लअकु!

17 # सिरिंग 118:22 बकिर हुनी हुंकू पखा लुड़ीःग केते,

“तब दो ओड़ाअ बा-बनाव कु, ‘बेकार मेन ताही लअकु,

हिना टुकू गी कोना टुकू पाड़ी नेना’

नोःआँ एतान लिखा लअः एदनाअ?” बेता लिकुआय।

18“जे होना टुकू रे नुरोआय हुनी छेछरा चबा कोआय; हेतरअ जेकर तेङ रे टुकू नुरोआ हुनी जनताव सेरेःड कोआय,” बेता लिकुआय।

कैसर के मालगुजारी एमोअ

(संत.मत्‍ती 22:15–22; संत.मरकुस 12:13–17)

19तेकर बड़े पुरोहितकु हेतरअ धरम पुथी सि-सिखावकु हुनी नोःआँ गाम आबु लःअय गी कंहड़ी तदबुआय, नोःआँ पाड़ी केते हिमीन रेगी हुनी के सा-सःब नाम केनाकु; बकिर होड़ तरअः बोरो नेनाकु।

20तेकर हुंकू पहाराई केनाकु हुनी आला जहान बात रे साबीयाबु। तेकर रोमी राजपाल आला तीः, हेतरअ हक रे एमियाबु मेन केते, जोहकाड़ के धरमीकु आला भेस रे कुलगोःड लिकुआकु। 21तेकर जोहकाड़ कु ईसु के, “ए गुरू, आम बढ़ियाँ केन कंहड़ीआम हेतरअ बेस सिखाव कुआम। तेकर ओके आला मेःड मुहांड़ काम नेलेआ, बकिर सचे गी परमेसर आला होरा उदूगेआम, होना के पाड़ी आले। 22आले आला कनहुन मोताबिक रे एतान मालगुजारी, रोमी महाराजा कैसर के एमोअ उचित एदनाअ, ची कनोआँ?” मेन केते कुली लियाकु।

23बकिर हुनी हुंकू आला चरपट के पाड़ी केते कंहड़ी लःअय, 24“मियांड ठर्ड़रा आगुउङपे। नोड़े ओके आला छापा हेतरअ नुमू लिखा लअः एदनाअ मेन केते कुली लिकुआय?”

हुंकू “रोमी महाराजा कैसर आला,” कंहड़ी लअकु।

25ईसु हुंकू के, “दो जे, रोमी महाराजा कैसर आला हेके होना के रोमी महाराजा के एमाईपे, तेकर जे परमेसर आला हेके होना के परमेसर के एमाईपे” बेता लिकुआय।

26तेकर हुंकू होड़कु आला मड़ांग रे नोःआँ बात रे हुनी के काकु सःब दाड़ी लिया, बकिर हुनी आला कंहड़ी रूरुवाड़ रे चाकित केते, एतान होः काकु साड़ी नेना।

जिवीःड बिरिडोः

(संत.मत्‍ती 22:23–33; संत.मरकुस 12:18–27)

27 # प्रे.कामी 23:8 तेकर थोड़ेक सदुकीकु, ईसु दुबाःड़े हीःग नेनाकु हुंकू जिवीःड-बिरिडोः कनोआँ गी मेन गेआकु, हेतरअ हुंकू हुनी के कुली लियाय कु। 28#कन 25:5हुंकू ईसु के बेता लियाकु, “‘ए गुरू, जाहें होड़ बेगार चेंगा रे आउराईत तेके गोएःग बाईःग तुयाय दो बोको ताय हुनी आउराईत के बिहाईयाय, अपन बोको दादा ताय आला नुमू रे चेंगा जनमाईयाय,’ नोःआँ आले लःअय मुसा लिखा तदाय। 29तेकर नोकान हुयाव नेना सात झन बोयहा ताही नेनाकु; बड़ेई बोको बिहा केते बेगार चेंगा छउवा रे गोएःग नाय। 30तेकर हुनी तरअः छोटेई हुनी के बिहा केते हुनी होः बेगार चेंगा छउवा रे गोएःग नाय, 31तेकर हुनी तरअः छोटेई होः हुनी आउराईत के बिहा लियाय। निआँ लकान सातो बोयहा बेगार चेंगा छउवा रे गोएःग नाकु। 32जामा तरअः तयोम, हुनी आउराईत होः गोएःग नाय। 33दो, जिवीःड-बिरिडोः बेरा, हुनी ओके आली आउराईत कोआय? एता लःअय ची हुंकू सातो लोः हुनी बिहा चुकाव थिनाय।”

34तेकर ईसु हुंकू के कंहड़ीओ लिकुआय, “नोःआँ जुग रे हेरेलकु बिहा योआकु तेकर आउराईतकु के बिहा एमा कुआकु, 35बकिर हिजोअ जुग रे का-अन्तोः जिनगी नानाम रआ तेकर जिवीःड-बिरिडोः लःअय लायक एदान कुआ होनाःड़े बिहा एरे हुयाआ। 36तेकर हुंकू आउर मिसा एरकु गोजोआ। हुंकू दो सिरमादूतकु लकान ताही कोआ, तेकर जिवीःड-बिरिःड केते परमेसर आलकु होपोन हुयाव कोआकु। 37#उइठ 3:6तेकर गोएःग उनकु जिवीःड बिरिडोआकु कंहड़ी के मुसा होः जानुम झुंड़ रेनअः गाम रे उदूः तदाय। होना रे ‘हुनी आम अब्राहम, आली परमेसर तेकर इसाहक आली परमेसर, हेतरअ याकुब आली परमेसर हेके’ मेन केते परभु के कंहड़ीयाय। 38परमेसर दो गोएःग उनकु आली कोवान, बकिर जिवीःड उनकु आली परमेसर हेके, एता लःअय ची हुनी लःअय दो जामा जिवीडाकु।”

39नोःआँ आयुम केते थोड़ेक धरम पुथी सि-सिखावकु, “ए गुरू आम बेस कंहड़ी लआम,” मेन केते कंहड़ी रूवाड़ लअकु! 40तेकर हुंकू हुनी के कुकुली लःअय आउर काकु डिड़ लआ।

ख्रीस्त ओके हेके

(संत.मत्‍ती 22:41–46; संत.मरकुस 12:35–37)

41आउर हुनी हुंकू के कंहड़ीओ लिकुआय, “ख्रीस्त दाऊद आली होपोन हेके मेन केते एतान लकान कंहड़ीआकु? 42#सिरिंग 110:1एता लःअय ची दाऊद भजन पुथी रे आएंग खुदे कंहड़ीआय,

“‘परभु परमेसर दो ईङ आली परभु तरअः कंहड़ी लःअय,

ईङ आला जोम पखी दुड़ूः मे।

43ईङ आम आलकु मुदाई कु के आम आला जांगा दुबारे काईङ दोहोकु जगुत।’

44दाऊद दो ख्रीस्त के ‘परभु’ बेताईयाय, दो हुनी, एता लकान हुनी आली होपोन कोआय?”

धरम गुरूकु तरअः चौंचित ताहिनापे

(संत.मत्‍ती 23:1–36; संत.मरकुस 12:38–40)

45जामा होड़ आयुमे केनाकु, हिमीन रे ईसु चेला ताय के कंहड़ीओ लिकुआय, 46“आपे धरम पुथी सि-सिखावकु तरअः चौंचित ताहिन पे, हुंकू के जिलीङ गेन्दरअ सोलोंग केते होनते-नोनते दंड़ान बेस आदा कुआ, तेकर बजार रे जोहार चिनोः नामाकु; बिनती ओड़ाअ रे मड़ांग रेनअः ठाँव रे तेकर नेवता घोटो जोम रे मड़ांग रेनअः ठाँव रे दुड़ूः बेस आदा कुआ; 47हुंकू राँड़ीयाहीकु आला ओड़ाअ के खंघार चबा कुलतआकु, तेकर नेलोः भाईर लःअय मुरुक जिलींग-जिलींग बिनती याकु! हुंकू जादे गी डांड़ नाम केआकु!”

Currently Selected:

संत.लुकास 20: ASR

Highlight

Compare

Copy