संत.लुकास 23
23
रोमी राजपाल पिलातुस दुबाःड़े ईसु
(संत.मत्ती 27:1–2,11–14; संत.मरकुस 15:1–5)
1जामा पंचाईत रिनकु बिरिःड केते ईसु के रोमी राजपाल पिलातुस दुबाःड़े ईदी लियाकु, 2हुंकू नोकान कंहड़ी केते हुनी के दोसी केनाकु, “नुई आले एटाअ जाईतकु के बाबाहकाव, तेकर रोमी महाराजा कैसर के मालगुजारी एमोअ तरअः बधराव कुकेनाय, तेकर आएंग के ख्रीस्त राजा कंहड़ी याःते आयुम तदिया ले।”
3पिलातुस, ईसु के बेता लियाय “आम जाहुदीकु आली राजा हेके एतान?” मेन केते कुली लियाय।
तेकर ईसु बेता लियाय, “आम गी कंहड़ी तनाम।”
4तेकर पिलातुस, “नुई होड़ रे एतान गुनाह होः काईङ नाम लआ मेन केते बड़े पुरोहितकु हेतरअ तुन्दरा होड़ के” कंहड़ीओ लिकुआय।
5बकिर हुंकू, “नुई गलील तरअः नोःआँ जगुत गोटा जाहुदिया राईज रिनकु होड़ के, उपदेस एम केते भड़काव किद कुआय।” मेन केते आउर जोड़ केते कंहड़ी लअकु।
6पिलातुस आयुम केते, “नुई होड़ गलीली हेके एतान?” मेन केते कुली लिकुआय। 7तेकर हुनी हेरोदेस आला राईज हक पहटा रिनी हेके होना पाड़ी केते, हुनी के हेरोद दुबाःड़े कुलगोःड लियाय, एता लःअय ची हुनी, हिमीन बेरा जिरोसलेम रे ताहिनाय।
हेरोद राजा मड़ांग रे ईसु
8तेकर हेरोद ईसु के नेल केते मुरुक रिझ नेनाय, एता लःअय ची हुनी ईसु रअः बारे आयुम ताही लःअय हिना लःअय हुनी के ढेर दिन तरअः नेनेल नाम केनाय। हुनी तरअः चिनहा नेनेल रअः आसरा ताहिनाय। 9तेकर हुनी ढेर बात कुली लियाय, बकिर ईसु हुनी के एतान होः काय कंहड़ी रूवाड़ोः लिया। 10बड़े पुरोहितकु हेतरअ धरम पुथी सि-सिखावकु, तिंगु केते जोर जबराईन ईसु रे दोस लगाय केनाकु 11तेकर हेरोद सिपाही ताय लोः हुनी लोः लन्दाओ केते घिंड़ओई लियाकु, आउर मंहगा गेन्दरअ सोलोंगोः लियाकु; हेतरअ हुनी के पिलातुस दुबाःड़े कुलगोःड रूवाड़ लियाकु। 12हेन हिला तरअः पिलातुस तेकर हेरोद गातीः नकीन; होना तरअः पहिल रे बनाहोड़ बैरी ताही नेनाकिन।
ईसु के गोजोः डांड़
(संत.मत्ती 27:15–26; संत.मरकुस 15:6–15; संत.जोहन 18:39—19:16)
13तब पिलातुस बड़े पुरोहितकु, हेतरअ धरम नेताकु के, तेकर होड़ के, राअः जुमाव केते कंहड़ीओ लिकुआय, 14“आपे नुई होड़ के, बाबहकावी हेके मेन केते ईङ दुबाःड़े आगु तदियापे तेकर नेलेपे आपे मड़ांग रे कुली लियीङ, बकिर आपे, जे बात रेनअः गुनाह, हुनी तेङ रे लगायापे होना बात रेनअः एतान गुनाह होः हुनी रे काईङ नाम लआ। 15तेकर हेरोद होः काय नाम लआ, हुनी दो नुई के आबु दुबाःड़े कुलगोःड रूवाड़ लियाय। तेकर नेलेपे हुनी गोएःग चिनोः लकान एतान काम होः काय कामी तदा। 16हिना लःअय ईङ नुई के हुमाअ ची केते बाईयीङ।” 17पिलातुस होना पासका परब रे जाहुदीकु लःअय मिहोंड़ जेहेल लिनी के अड़ाअ कुकेनाय?#23:17 थोड़ेक मारी लिखा लअः मेसे नोःआँ पद रे कनोआँ।
18दो जामेकु, “नुई के गोजी मे! तेकर आले लःअय बराब्बस के आड़ागीमे” मेन केते छेराव नेनाकु! 19हुनी सहर रे सरकार रआ बिरुध तरअः, होड़ गोएःग चलते जेहेल ताहिनाय।
20पिलातुस ईसु के आ-आड़ाअ नाम केनाय, हिना लःअय आउर गी होड़कु के समझाव लिकुआय। 21बकिर हुंकू, “कुरूस रे रकाबिमे, कुरूस रे रकाबिमे,” मेन केते छेराव नेनाकु!
22तेकर पिलातुस, “एतान लःअय नुई होड़ एतान बुराई कामी तदाय? ईङ नुई के गोगोएःग लकान नुई रे एतान गुनाह होः काईङ नाम तदा! हिना लःअय हुनी के ईङ कोड़राव ची केते बाई गुल ताई मेन केते पेखेप हारीःग कंहड़ीओ लिकुआय।”
23बकिर हुंकू कुरूस रे रकाबिमे, कुरूस रे रकाबिमे मेन केते पुरा छेराव याःते गोहराव नेनाकु, तेकर हुंकू आला गुगुल रआ गी जीत हुयाव नेना। 24दो पिलातुस हुंकू आला गोहराअ लकाने पे मेन केते आचु लिकुआय। 25तेकर हुनी सरकार रआ खिलाप रे बिरुध तरअः हेतरअ होड़ गोएःग चलते जेहेल ताहिनाय जेके छोछोड़व नाम केनाकु, हुनी के बाई लियाय, बकिर ईसु के हुंकू आला मरजी रअः मोताबिक पलटनकु के एमा लिकुआय।
ईसु के कुरूस तेङ रे रकाःब लियाकु
(संत.मत्ती 27:32–44; संत.मरकुस 15:21–32; संत.जोहन 19:17–27)
26तेकर सिपाहीकु ईसु के ईदी केनाकु, हिमीन रे डिही तरअः हिजोअ केनाय, सिमोन नुमू रिनी कुरेनी सहर रिनी होड़ के सःब केते, ईसु तयोम-तयोम, कुरूस काठ के इईदी लःअय, हुनी के गोअ चिलियाकु।
27तेकर मुरुक तुन्दरा होड़ हुनी तयोम-तयोम सेनोः केनाकु, तेकर हुनी लःअय छाती थापड़ी-थापड़ी ईयाम याःते; आउराईतकु होः हुनी के ओतोङ लियाकु। 28तेकर ईसु हुंकू पखी लुड़ीःग चुवेर केते हुंकू के कंहड़ीओ लिकुआय, “ए जिरोसलेम! रिनकु कुड़ी होपोनकु ईङ लःअय आलपे ईयामे, बकिर आपे लःअय हेतरअ आपे आलकु होपोन लःअय ईयामेपे। 29नेलेपे होना दिन हिजोआ होना रे होड़कु कंहड़ी केआकु, ‘आउराईतकु धनया एदान कुआ, बाँझीकु तेकर जे काय जनमाव कुआ लाहीःग, हेतरअ काकु नुनू तदकुआ तोवा, सुख एदनाअ मेन केआकु!’ 30#होसे 10:8; दि.वचन 6:16हिमीन रे होड़कु ‘ए बुरु आले रे उयुगोःपे,’ तेकर ‘ए टिलहा! आले के तेपेःड लेपे!’ कंहड़ी केआकु। 31एता लःअय ची जदि हरियार सिंङ रआ हाल नोकाना, दो होना रोहोड़ ओना रेनअः एतान हुयाव कोआ?”
32हुंकू, हुनी लोः गोगोएःग लःअय, हुंकिन बनहोंड़ जे डाकु किन के ईदी लिकिनाकु। 33तेकर हुंकू “बोहोअ जाङ कंहड़ीयाकु,” होना ठाँव रे सोदोर केते होनाःड़े हुनी, हेतरअ हुंकिन डाकु किन के, मिहोंड़ के हुनी आला जोम पखी, हेतरअ आउर मिहोंड़ के हुनी आला कोंजरा पखी कुरूस खुंटा रे ठोकाव लिकिनाकु। 34#सिरिंग 22:18तेकर ईसु, “ए बाबा! नुकू के छमा कुमे, एता लःअय ची नुकू दो एतान कामी तानाकु होना के काकु पाड़ी ताना” मेन लःअय।
तेकर चिठी साला केते हुनी आला गेन्दरअ के हाटिङ लअकु। 35#सिरिंग 22:7तेकर होड़ तिंगु केते नेली केनाकु, तेकर जाहुदी नेता होः लन्दा-लन्दा केते, “नुई एटाअ होड़ के दो बंचाव लिकुआय; नुई परमेसर आली निबाड़ लिनी उधार एमोई ख्रीस्त हेके, रेदो आएंग के बंचाव जुनोए” कंहड़ी लअकु!
36 #
सिरिंग 69:21
तेकर सिपाहीकु होः हेनाःड हीःग केते लन्दाई केनाकु हेतरअ जोजो अंगुर रस आगु एमा केते, 37जदि आम जाहुदीकु आली राजा हेके, “होले अपन के बंचाअ मे” बेताई केनाकु!
38तेकर ईसु तरअः तेङ रे लटकाव लआ थिना, “नुई जाहुदीकु आली राजा हेके।” मेन केते मियांड पट्टी रे दोस चिठी लिखा लअः ताहिना।
मन रूवाड़ी डाकु
39तेकर हाका लिनकिन डाकु किन रे मिहोंड़ हुनी के निन्दा केते, “आम ख्रीस्त हेके? होले आम हेतरअ आलिंग के बंचाव लिङमे” बेता लियाय!
40बकिर एटाःई, हुनी के डपटाव केते, कंहड़ी रूवाड़ोः लियाय, “आम होः निआँ लकान डांड़ मे नाम दा, परमेसर केहोः काम बो-रा एतान? 41आलांग केदो नेयाय रआ, मोताबिक डांड़ भेटाअः ताना, एता लःअय ची आलांग दो जाईसन कामी लआलाङ हेंकान गी, हुनी दो होकान काय कामी तदा।” 42तेकर हुनी डाकु, “ए ईसु, जे बेरा आम अपन राईज रे हिजोआम दो, हिमीन रे ईङ के उयहारीङ” मे बेता लियाय!
43तेकर ईसु, हुनी “सचेगी कंहड़ीओ देमेआ तिसिंग गी आम होः ईङ लोः सिरमा राईज रे ताही कोआम” बेता लियाय।
ईसु आला गोजोः
(संत.मत्ती 27:45–46; संत.मरकुस 15:33–41; संत.जोहन 19:28–30)
44 #
उइठ 26:31–33
तेकर लगभग दुपहरा तरअः बोंगा ढाड़काः जगुत गोटा राईज आँधार ताहिना।
45सिंङ बोंगा आँधार ताहिनाय, तेकर बड़े बिनती ओड़ाअ रेनअः दनांग लेनअ परदा ताला रे फाड़ाः ना। 46#सिरिंग 31:5तेकर ईसु जोड़ से हकाव केते, “ए बाबा! ईङ आला आतमा के आम आला तीः रे एमाअ दिमीईंङ!” मेन लःअय तेकर नोकान कंहड़ी केते जीव ताय के बाई केदाय।
47तेकर मि साव सिपाहीकु आली अगुवा जे हुयाव नेना के नेल केते, परमेसर आला बड़ाई लःअय, तेकर “साथेगी नुई धरमी होड़ ताहिनाय” मेन लःअय!
48तेकर जे नोःआँ नेनेल लःअय जवार उनकु, जामे होड़ नोःआँ घटना के नेल केते, ईयाम याःते रूवाड़ नेनाकु। 49#सं.लुका 8:2,3बकिर हुनी आलकु जामा जान-चिनहार हेतरअ गलील तरअः हुनी के ओतोङ आगु लिनकु, आउराईत लंका रे तिंगु केते, नोःआँ जामा के नेनेल केनाकु।
ईसु के तेपेःड लियाकु
(संत.मत्ती 27:57–61; संत.मरकुस 15:42–47; संत.जोहन 19:38–42)
50होनाःड़े मियांड अरमतिया सहर रिनी जोसेफ नुमू रिनी, जाहुदी बड़े पंचाईत रिनी मंत्री थिनाय, जे बेस हेतरअ धरमी होड़ ताहिनाय।
51तेकर हुनी जाहुदी बड़े पंचाईत रे ईसु आला बिरोध रे इया लआ नोःआँ जोजना तेकर काम ताकु रे खुस काय थिना। तेकर हुनी जाहुदीकु आला सहर अरमतिया रिनी तहिनोई तेकर परमेसर आला राईज के नेल होराई केनाय। 52हुनी पिलातुस दुबाःड़े सेन केते, ईसु आला गोएःग होड़ो के कोय लःअय। 53तेकर हुनी के कुरूस तरअः अड़गु केते, मलमल गेन्दरअ रे गुड़मुड़ाव लियाय, तेकर सेरेंग रे ला बनाव लआ खोड़पअ लकान मारघटा रे दोहो लियाय, होंड़े ओका हिला होः ओके केहोः काकु दोहो थिलकुआ। 54तेकर हेन हिला जाहुदीकु आला सपड़ाअ रेनअः दिन थिना, हेतरअ सथाअ हिला रेनअः दिन सुरुयोः वाला थिना।
55तेकर गलील तरअः हुनी लोः हीःग उनकु आउराईतकु जोसेफ के होः ओतोङ ईदी केते होना मारघटा हेतरअ ईसु आला गोएःग होड़ो के एता लकान दोहो तदाकु होना के नेल लअकु। 56#उइठ 20:10; कन 5:14तेकर रूवाड़ केते, बढ़ियाँ सोहों जिनीस हेतरअ सोहों मलहम कु सपड़ाव लअकु।
तेकर हुंकू हुकूम रेनअः, मोताबिक सथाअ हिला सथाव नेनाकु।
Currently Selected:
संत.लुकास 23: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
