संत.मरकुस 4
4
बिहीन हेरोई आला गाम
(संत.मत्ती 13:1–9; संत.लुकास 8:4–8)
1 #
सं.लुका 5:1–3
ईसु, आउर मिसा डाहा दौंड़ी रे उदूः कु केनाय, तेकर नोकान होड़ तुन्दराः नाकु ची हुनी डाहा रे मियांड डोंगा रे रकाःब खेः दुड़ूः नाय, तेकर जामा तुन्दरा होड़ डाहा दौंड़ी ओत रे तिंगु ताही नेनाकु। 2हुनी हुंकू के ढेर कंहड़ी के गाम रे उदूः कु केनाय, तेकर हुनी उऊदूअ रे नोकान बेता लिकुआय, 3“आयुमेपे! मुसिङ मिहोंड़ बिहाईन हेरोई बिहाईन हेरोः उडुंग नेनाय। 4हेरोः बेरा थोड़ेक दो होरा दौंड़ी रे नुर नेना, होना के ओड़ेकु हलांग जोम केदाकु। 5तेकर थोड़ेक सेरेंग ओत रे नुर नेना, होंड़े बगरा हास का ताही नेना, तेकर गहीड़ जगुत हास का भेटाव नेना लःअय तुरते ओमोन नेना। 6तेकर बोंगा तुर नेनाय हिमीन रे सितोम रे कुंभलाव ना हेतरअ जाईर ते का जारीयाव दाड़ी नेना लःअय रोहोड़ ना। 7थोड़ेक बिहाईन झुंड़ रे नुर नेना तेकर होना के झुंड़ हरा केते तेपेःड केदाय तेकर होना का जो नेना। 8बकिर थोड़ेक बेस ओत रे नुर नेना, हेतरअ होना ओमोन नेना तेकर हरा केते जो नेना, ओका हिसी दस गुना, ओका पे खाँड़ी गुना, ओका पाँच खाँड़ी गुना जो नेना।” 9होना तयोम ईसु “जेकर लुतूर एदनाअ हुंकू आयुम केपे,” मेन केते बेता लिकुआय।
गाम रे एतान लःअय कंहड़ीआय
(संत.मत्ती 13:10–23; संत.लुकास 8:9–15)
10तुन्दरा होड़ सेनोः नाकु हिमीन रे, हुंकू बारह चेला तेकर होंड़े रिनकु आधा होड़ लोः, जामा गाम रअः बारे ईसु के कुली लियाकु। 11ईसु कंहड़ी लःअय, “आपे के दो परमेसर आला राईज रेनअः बारे पाड़ी लःअय बराकाईत भेटाव ताना, बकिर दो बाहरी तानकु लःअय जामा कंहड़ी गाम रे हुयाअः। 12#जसा 6:9,10एता लःअय ची,
“‘हुंकू नेनेला कु रे होः,
आलकु आरखाव कोओ,
तेकर आ-आयुमकु रे होः,
आलकु बुझाव कोओ,
जदि हुंकू बुझाव नेनाकु होले, हुंकू मन रूवाड़े आकु
हेतरअ पाप ताकु छमा जुनोआ।’”
बिहीन हेरोई आला गाम रेनअः मतलोब
(संत.मत्ती 13:18–23; संत.लुकास 8:11–15)
13“आपे नोःआँ गाम के कापे बुझाः दो, जामा गाम के एतान लकान बुझाव कोआपे?,” ईसु कुली लिकुआय। 14“हेरोई परमेसर आला कंहड़ी के हेरेआय, 15जे होरा दौंड़ी रिनकु हेके, जे एड़े बचन हेरोआ, हुंकू नुकू हेके जब हुंकू कंहड़ी के आयुमेआकु होना तयोम, तुरते सैतान हीःग केते हुंकू आला आयुम लआ बात के रेःग ईदी गुल तआय। 16निआँ लकान जे सेरेंग ओत रे हेर लआ बिहाईन लकानाकु, जे परमेसर आला कंहड़ी के आयुम केते रिझते तेलायाकु। 17बकिर अपन रे जाईर का-ताहिनोआ लःअय, कटिःग दिन लःअय ताहिनोआकु, तेकर तयोम परमेसर आला कंहड़ी चलते सताव चाहे दुख बिपाईत हिजोआ हिमीन रे हुंकू तुरते ठोकोर जोमेआकु। 18आधा होड़ जे रटपट झुंड़ ताला रे हेर लआ बिहाईन लकानाकु, हुंकू नुकू हेके जे परमेसर आला कंहड़ी के आयुमेआकु। 19बकिर दुनिया रे जिवीडोः रेनअः सोंच-फिकिर, तेकर खरचा रेनअः मोह, हेतरअ एटाअ-एटाअ जिनीस रेनअः लोभ, मन रे बोलो केते परमेसर आला कंहड़ी के हरा तेपेःड गुल तआय, तेकर होना कंहड़ी का जोयोआ। 20आधा होड़ जे बेस ओत रे हेर लेनाः बिहाईन लकानाकु, हुंकू नुकू हेके नुकू दो परमेसर आला कंहड़ी के आयुमेआकु तेकर तेलायाकु, हेतरअ ओके खाँड़ी दस, ओके मि मन मि खाँड़ी, ओके पाँच खाँड़ी गुना जे हेर लआ ताहीना होना हुयाआ।
दीया रेनअः गाम
(संत.लुकास 8:16–18)
21 #
सं.मत्ती 5:15; सं.लुका 11:33 “जाहें ढिबरी के खाईचलः चाहे खटिया लतार रे दोदोहो लःअय आगुयाकु एतान? दिलखा रे दोदोहो लःअय कोवान? 22#सं.मत्ती 10:26; सं.लुका 12:2नोकान एतान होअः ऊकु ओना कानोआँ, ची एरे नेलोआ, एतान होअः दनांग रे कनोआँ ची एरे नेलोआ। 23जेकर लुतूर एदनाअ हुंकू आयुम केपे,” नोकान ईसु कंहड़ी लःअय।
24 #
सं.मत्ती 7:2; सं.लुका 6:38 “एतान पे आयुमेआ, नोःआँ लःअय आपे चाँवचीत ताहिन पे, जे लकान आपे एटाअ होड़ लोः बेवहारेआपे, हिना लकान आपे लोः होअः बेवहार केआकु, तेकर होना तरअः जादे परमेसर बेवहार केआय। 25#सं.मत्ती 13:12; 25:29; सं.लुका 19:26जेकर दुबाःड़े एदनाअ हुनी के एमा कियाय, हेतरअ जेकर दुबाःड़े कनोआँ हुनी तरअः काईटको केन होअः एदनाअ होना केहोः इदी केआय,” मेन केते ईसु बेता लिकुआय।
ओमोनोः खाता बिहीन रअः गाम
26“परमेसर आला राईज नोकाना, ईसु नोकान कंहड़ी लःअय। जाहें होड़ ओत रे बिहाईन हेरेआय, 27तेकर निदा निन्दोआय हेतरअ दिने बिरिःड ताही नोआय, बिहाईन एता लकान ओमोनोआ हेतरअ हरायोआ सेके काय पड़ीआ। 28ओत अपन हरते गी बिहाईन के आखुवाः चिआय, हेतरअ गेलेयोआ, हेतरअ गेले रे बिली ओना अनाईज। 29#जोए 3:13तेकर दाना बिली जुनोआ हिमीन रे, ईरोई दिन हीःग ना मेन केते ईर एहेःब गुल तआय,” नोकान ईसु कंहड़ी लःअय।
राई गोटा रअः गाम
(संत.मत्ती 13:31,32; संत.लुकास 13:18,19)
30ईसु “परमेसर आला राईज ओका लकाना,” बेता केपेईंग, चाहे “ओका गाम रे होना के उदूः गिईङ? 31होना दो राई गोटा लकान एदनाआ, होना हेरोः बेरा ओत रेनअः जामा बिहाईन तरअः छोटे नेलोआ। 32बकिर हेर गुलतआकु होले, ओमोन केते, जामा साःग पात तरअः सेंड़ा हरा जुनोआ, तेकर होना रे नोकान सेंड़ा डाईड़ सिरजाव जुनोआ ची, सिरमा रिनकु ओड़े होअः होना डाईड़ रेनअः ऊम्बुल रे डेरा दाड़ीआकु,” मेन केते कंहड़ी लःअय।
33हुनी हुंकू के नोःआँ लकान ढेर गाम रे गाम-गाम ते हुंकू समझाअ लकान कंहड़ी उदूः कु केनाय। 34होड़कु लोः ताहिनाय हिमीन रे हुनी बेगार गाम ते हुंकू के एतान होअः काय उदूः कु केनाय, बकिर हुनी रिड़िगया ठाँव रे अपन चेला ताय के जामा कंहड़ी रअः माने के उदूः कु केनाय।
गर्ड़रा के आसथिर ची लःअय
(संत.मत्ती 8:23–27; संत.लुकास 8:22–25)
35हेन हिला गी आयुःब नेना हिमीन रे, ईसु चेला ताय के “दु, आबु डाहा होना पखी सेनाबु,” मेन केते बेता लिकुआय। 36तेकर हुंकू तुन्दरा होड़ के बाई केते जे डोंगा रे ईसु ताही नेनाय हिना नौका रे चेला ताय ईदी लियाकु, तेकर होना लोः आउर एटाअ नौका होअः ताही नेना। 37हिमीन रे मुरुक जोड़ गर्ड़रा हीःग नेना, तेकर हलका दाअः डोंगा रे बोलो पेरेगोः केना। 38तेकर दो आएंग डोंगा रअः पछली पखा मुड़सा केते निन्दोः केनाय, तेकर हुंकू हुनी के बिरिःड केते, “ए गुरू! आबु डुबाव गोजोः, तनाबु आम के फिकिर कानोआँ एतान?,” बेता लियाकु।
39हुनी बिरिःड केते गर्ड़रा के डपटाव लःअय, तेकर दाअः के कंहड़ी लःअय, “आसतीरोः मे, ठामकाव जुनोः मे!,” तेकर गर्ड़रा ठामकाव ना हेतरअ गोटे ते आसतीर ना। 40तेकर “आपे एतान लःअय बोर तनापे?, आपे के नहाअः जगुत होअः बिसवास कानोआँ एतान?,” मेन केते चेला ताय के बेता लिकुआय। 41हुंकू मुरुक बोरोः नाकु, तेकर आकु-आकु कंहड़ी तानाकु, “नुई दो ओके खाल होड़ हेके, नुई आला हुकूम के गर्ड़रा हेतरअ दाअः होअः आयुमेआय?”
Currently Selected:
संत.मरकुस 4: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
