जोहन 3

ईसु जोटोः नीकुदेमुस

1फरीसीकु रे नीकुदेमुस ञुमुन मियड् होड़ दोहोलेना, जे जहुदीकु रेनि नेता दोहोलेनय। 2हुँनि ञीन्द ईसु एडे वेज कोते कथालअय, “ओय गुरु, इञः ठुवावनञ चि अमः परमेसर पड़ा एतेन वेज् लेनमी गुरु हके, चितानतआचि ओके नोंकन चिन-चमतकर कम जे अमः एरञेलेअम, अगर परमेसर हुँनि सुधा काय दोहोन रेदो, एरोय एरञेल बेजालेए।” 3ईसु हुँनिए कथा रुवड़वा लअय, “इञः सनारी अमः एडे कथायतेअइञ, अगर ओके नाव सिरीप काय जनम अँगावे रेदो परमेसर रआ राइज एरोय ञेल बेजालेए।” 4नीकुदेमुस हुँनि कथावा लअय, “ओके होड़ हपड़ोम यनाय दो फिन चिलका जनम अँगाव बेजायय? तना हुँनि अपन अया ताय रआ पोटा रे दुसरा खेप बोलो कोते जनम अँगाव सकावेए?” 5ईसु कथारुवड़ लअय, “इञः अमः एडे सनारी कथावा यतमिअइञ चि जबरे ओके होड़ दाअ् जोटोः आतमा ते जनम काय अँगावे दो, हुँनि परमेसर रआ राइज रे एरोय सेन बेजाना। 6चितानतआचि जे गतार एतेन जनम तनय, होना होड़ो ही हके; जोटोः जे आतमा एतेन जनम तनय होना आतमा हके। 7अलोम छकरीतोः चि इञः अमः अडेञ कथा लआ चि अमः नाव सिरीप जनम अँगाव जरुरीआ। 8होय जने चहावओ तने सेनोआँ, जोटोः अमः होना रआ सबद अयुमेअम, बकिन अमः नोआँ कम ठुवाया चि होना ओका एतेन वेजो गोना, जोटोः ओका पड़ा सेनोगोना? जे परमेसर रआ आतमा ते जनम तनय हुँनि नेंकाअय।” 9नीकुदेमुस हुँनि कथावा लअय, “नोआँ दुखमा चिलका होयाव सकावओ?” 10नोआँ अयुम केते ईसु हुँनि कथावा लअय, “अमः इस्राएल रेनकु गुरु हके रेहों तना नोआँ दुखमा कम समझावओ? 11इञः अमः एडे सनारी कथा यतेअइञ चि आले जे ले ठुवावना, हिनाले कथाया, जोटोः जे आले ञेल तड्अले हिना गोवाहीले एमा, जोटोः आपे आले रआ गोवाही कपे गरहानेए। 12जब इञः आपे एडे धरती रआ दुखमा बतलाव लाअइञ, जोटोः आपे होना रे कपे सरीना, दो अगर इञः आपे एडे सिरमा रआ दुखमा कथायइञ दो होना रे चिलकापे सारीयोओ? 13जोटोः ओके सिरमा रे ककु रकब् तना, सिरीप हिनी जे सिरमा एतेन अड़गु लेनय, मनेकी मनवाँ होपोन।” 14#लेखा 21:9जे लेका पहार रे मुसा पितल रआ बिञ खंभा तेञ रे लदी लअय, हेनका मनवाँ होपोन हों तेञ रे रकाबी दरकार इदानआँ, 15ताकि जे हुँनि रेकु सारीयोः, हुँकू का अन्तोः अवला जीवन ञमेअकु।

16चितानतआचि परमेसर दुनियाँ सुधा एतना दुलार लअय, चि हुँनि अपन एसकारी होपोनते एम लिदियय, जेकर ते जे ओके हों हुँनि एडे सारीयोओकु हुँकू अलोकु नसोः, बदे का अन्तोः अवला जीवन ञमे। 17परमेसर अपन होपोन ते दुनियाँ रे हिना तआ काय बिदालेदिया, चि दुनियाँ रेनकु होड़कु दोसी ठहरावकु, हुँनि हिनाते बिदा तदियय चि हुँनि दोवसते दुनियाँ रेनकु होड़ पाप एतेन बंचावोः। 18जे हुँनि रेकु सारीयोओ, हुँकू एडे डन्ड रआ हुकुम का होयावओ, बदे जे हुँनि रे ककु सारीयोओ, हुँनि दोसी ठहराव चुकाव कुअय, हिनाते चि हुँनि परमेसर रेनि एसकारी होपोन रआ ञुमुन रे ककु सरीलेना। 19डन्ड रआ हुकुम रआ कारन नोआँ हके चि मरसाल दुनियाँ रे वेज्‌तना, जोटोः होड़कु मरसाल एतेन बगरा ञोता सुधा दुलार लअकु, चितानतआचि हुँकू रआ काम बुरा दोहोलेना। 20जे ओके बुराइयेअकु, हुँकू मरसाल एतेन बिरोदेअकु, जोटोः मरसाल रआ ठँव रे ककुवेजोआ, नोंका अलो होयावकोः चि हुँनि रआ काम दिसतारोः। 21बदे जे सचाइ रेकु सेनेआँ, हुँकू मरसाल एडे वेजोअकु, जेकर ते हुँकू रआ काम ञेलोः, चि होना परमेसर पड़ा एतेन कराव तड्आ।

ईसु रआ बारे जोहन रआ गोवाही

22नोआँ तयोम ईसु अनेज् चेलाकु सुधा जहुदिया रआ देस रे वेज् कोते मी घड़ी हुँकू सुधा दोहोलेनाअय; जोटोः बतिसमा एम इञोःनय। 23जोहन हों सालेम सहार रआ ठँव एनोन डीही रे बतिसमा एमयान दोहोनय, चितानतआचि होन्डे अगम दाअ् दोहोलेना, जोटोः होड़कु वेज् कोते बतिसमा अँगाव यान दोहोनाकु। 24#मती 14:3; मर 6:17; लुका 3:19,20नोआँ दुखमा जोहन जेहेल रे अदेरी एतेन पहिल रआ हके।

25होंडे जोहन रेनकु चेला जोटोः मियड् जहुदी रआ तला रे सुधोः बारे रे रेना-टेटा लेनाकु। 26जोटोः हुँकू जोहन एडे वेज कोते कथा लआकु, “ओय गुरु, जे होड़ जरदन नाय रआ होन होर अमः सुधाय दोहोलेना, जोटोः जेकर बारे अमः गोवाही एम दोहोलाअम; ञेलेमी, हुँनि बतिसमा एम यतेअय, जोटोः गोटे हुँनि एडे सेनोगोनाकु।” 27जोहन कथा रुवाड़ लअय, “जब तक होड़ तआ सिरमा एतेन का ओवय, तब तक हुँनि चितानहों एरोय ञम सकावलेए। 28#जोह 1:20आपे दो इञः रेनपे गोवाही हके, चि इञः कथा दोहोलअञ, ‘इञः मसी न लगे, बदे इञः हुँनि एतेन पहिल बिदा तदिञाय।’ 29कनियाँ, दुलहा रेनि ही हके, बदे दुलहा रेनि लोखंदा जे साथे तींगु कोते हुँनि रअय अयुमा, दुलहा रआ दुखमा ते अगम खुसोअय, इञः रआ खुसी नेंका इदानआँ जोटोः पुरायना। 30नोआँ जरुरीआ चि हुँनि बढावोः जोटोः इञः घटावोः।”

31जे तेंग एतेन वेजोअय हुँनि गोटा एतेन तेंग रिया; जे ओत एतेन वेजोअय हुँनि ओत रेनि हके, जोटोः ओत रआ ही दुखमायय जे सिरमा एतेन वेजोअय, हुँनि गोटा एतेन तेंग रीया। 32जे चितानहों हुँनि ञेल लअय जोटोः परमेसर एतेन अयुम लअय, हिना ही दुखमायय; बकिन ओके हुँनि रआ गोवाही ककु गरहानेए। 33जे हुँनि रआ गोवाही गरहानेअकु, हुँकू नोआँ दुखमा रे मारका लगाव केदाकु चि परमेसर सनारीआय। 34चितानतआचि जेके परमेसर बिदा तदिया, जोटोः परमेसर रआ ही दुखमायय; चितानतआचि परमेसर हुँनि तआ आतमा भरपुर ओवायय। 35#मती 11:27; लुका 10:22परमेसर बबा अपन होपोन ते तुली दुलारेए, जोटोः हुँनि गोटा जीनिस हुँनि रआ अती रे एम केदय। 36जे परमेसर रेनि होपोन एडे सारीयोओय, का अन्तोः अवला जीवन हिनी रआ हके; बदे जे परमेसर रेनि होपोन रआ काय मनावओ, हुँनि जीवन एरोय ञेल लेए, बदे परमेसर रआ कयरव हुँनि तेंग रे दोहोना।

Currently Selected:

जोहन 3: BIX

Highlight

Copy

Compare