1CO 2
2
पौलदी प्रचार
1हे आक्का तम्मुळ्ळालाला, यप्पुड निन मी तीकुड वस्तीन आप्पुड निन परमेश्वरदी रहस्य#2:1 परमेश्वरदी रहस्य परमेश्वर बद्दल साक्ष मनशी ज्ञानता लेकाते शिंगार भाषण शेशी शप्पेदेंक दालेद. 2येनटीक की मी नडमा उंडीनाप्पुड फक्त येशु ख्रिस्त इंगा वाड पण क्रुस मिंदा खिळाशीनोड, दिन इडशी यादुच माटाद ज्ञान नाक निल्वाराद इल्ला निन पक्का निश्चय शेशीनान. 3इंगा निन मी तीकुड अशक्त, यरस्का इंगा थरथर नडगुका मनशीलेका वस्तीन. 4नाद संदेश इंगा प्रचार मनशी ज्ञानता भुलायामते माटाता लेकुंड्या पण आत्मा इंगा दान सामर्थ्य तीकेल उंड्या. 5दिनिचांग की, मिद विश्वास मनशी ज्ञान मिंदा लेद तर परमेश्वर सामर्थ्य मिंदा उंडाला.
आत्मिक ज्ञान
6तरी पण, यवार आत्मिक रुपता पक्का उंडार वारकी मिम ज्ञानुय माटलु शपताम पण आदी ज्ञान इ दुन्यामदी लेद इंगा इ युगलोन्टोर नाश आय्येतोन यादुच अधिकारीद पण लेद. 7पण परमेश्वरदी रहस्यमय ज्ञान मिम शपताम आदी दाशी फेटनेद उंड्या, आदी परमेश्वर युग काना पहिला मना सन्मान इचांग नेमाशी फेटनेद उंड्या. 8इदी ज्ञान इ युगलोन यादुच अधिकारीक यरका लेकुंड्या येनटीक की जर वारकी यरका उंटे, तर वार गौरवी प्रभुन#2:8 गौरवी प्रभुन सर्वशक्तिमान प्रभु, सामर्थ्यशाली प्रभु, यवाड आन्नी माटलाला सिद्ध उंडाड. क्रुस मिंदा खिळाया कुंटुनीर. 9पण पवित्र शास्त्रला इल्ला राशीनेद उंडाद,
“येम कन्नु सुडालेद,
गुम्मा इना लेद इंगा
मंदी मनला पण दालेद,
आदी परमेश्वर वान मिंदा प्रेम शेशेतोर इचांग तैयार शेशीनाड.”#यशया 64:4; 65:17.
10पण परमेश्वर आद्दे माटलान पवित्र आत्माता मनाक प्रकट शेशीनाड, येनटीक की आत्मा आन्नी माटलान इड नंताक की परमेश्वरान रहस्यमयी माटलान पण फुडकुताद. 11येनटीक की, मनशी आत्मान इडशी मनशी माटलु जानाशेतोड इंगोगोड या मनशी उंडाड? आल्ले परमेश्वर आत्मान इडशी परमेश्वरी माटलु यवारुच जानाशी शकायाड. 12इंगा इप्पुड मनाक दुन्याम लोनदी आत्मा शिकालेद, पण आदी आत्मा शिकीनाद याद परमेश्वर तीकेल उंडाद. दिनिचांग की, आय आन्नी माटलु याय परमेश्वर मनाक फुकटला इच्चीनाड, आदी मनाक तेल्वाला. 13येनटीक की, इ माटलु मनशी ज्ञानता नेरपीने माटलाता मिम आनाम, पण आत्मा नेरपीने आत्मिक माटलान उपयोगला यकोची आत्मिक माटलाद स्पष्टीकरण शेशी आंटाम. 14दुन्यामलेका नडशेतोड मनशी परमेश्वर आत्माय माटलु स्वीकार शेयाड येनटीक की, आय वानकी मुर्खपणाय माटलु वाटास्ताय इंगा वाड आय तेल्ची शकायाड, येनटीक की आटलान आत्माताने ओळखाशेद उंटाद. 15यवाड आत्मिक उंडाड वाड तर आन्नी माटलु ओळखास्ताड पण वान यवारुच ओळखाशी शकायार. 16येनटीक की पवित्र शास्त्रला इल्ला राशीनेद उंडाद,
“प्रभुनदी मन यवाड गुरतु फटनाड? यवाड वानकी नेरपी?”#यशया 40:13.
येनटीक की, मनाक तेलस्ताद की ख्रिस्तद याद मन उंडाद आदी मना देगार उंडाद.
Currently Selected:
1CO 2: WNT
Highlight
Share
Compare
Copy
Want to have your highlights saved across all your devices? Sign up or sign in