1CO 7
7
फेंडलीद सिद्धांत — 7:1-40
फेंडलीद प्रश्न
1इप्पुड आय माटलु या माटला बद्दल मीर पत्रला राशीन्टीर इप्पुड आटलाद उत्तर निन इस्तान; मनशी इचांग इदी बागा उंडाद की वाड आंडीदान जताक संबंध फेट्टाने राद. 2पण व्यभिचारकेल वाचाशेदेंक प्रत्येक मनशीक वडती इंगा प्रत्येक आंडीदानकी मोगुड उंडाला. 3मोगुड वडतीक दानदी हक्क इयाला; इंगा आल्ले वडती पण मोगुनकी. 4वडतीक दान फय मिंदा अधिकार लेकुंटाद, पण मोगुनकी उंडाद; इंगा आल्ले मोगुनकी पण वान फय मिंदा अधिकार लेकुंटाद, पण वडतीक उंटाद. 5मीर वगामेगारनी इडशी निलवाकुंडा, पण मिक प्रार्थनाक वेळ शिक्काला आंकेन वगामेगार संमतीता काही वेळ इचांग धुराम निलना इंगा वापस वगाट कांडा दिनिचांग की, शैतान मी असंयम इचांग मिमलान मोहला केडपाराद. 6पण निन इदी संमती आंकेन शपतान, आज्ञा आंकेन लेद. 7नाद इच्छा इल्ला उंडाद की, आंता मंदी ना लेका फेंडली शेस्कुनांदे उंडाला पण प्रत्येक व्यक्तीक परमेश्वर तीकेल विशेष दानलु शिक्कीनाय. वगानकी वगा प्रकारे निलचेद इंगा इंगोगोनकी इंगोगो प्रकारे निलचेद.
फेंडली कानोर इचांग सल्ला
8दिनिचांग आंदार फेंडली कानोर इंगा विधवा आंड्योर बद्दल आंटान की, वार इचांग इल्ले उंडेद शिंगार उंडाद यल्ला निन उंडान. 9पण जर वारकी दम यल्लाकुंटे तर वार फेंडली शेस्कुनाला; येनटीक की वासनाल काले पेक्षा शिंगार उंडाद फेंडली शेस्कुनेद. 10इंगा फेंडली आयनोरकी निन आज्ञा इस्तान, (निन लेद तर प्रभुड आज्ञा इस्ताड ) की वडती मना मोगुन इडवाराद इंगा मोगुड पण वडतीन इडवाराद 11पण, जर मीर अलग पण आयते तर फेंडली शेस्कुनाराद आल्ले निलवाला इंगा मना मोगुन जताक वापस समेट शेस्कुनाला इंगा मोगुड पण वडतीन इडवाराद. 12पण इंगोगोरकी इदी प्रभुड शप्पालेद, पण निन शपतान की, जर यादाना विश्वासी तम्मुन वडती विश्वास फेट्टाकुंटे इंगा वान जताक निलचेदेंक दानदी संमती उंटे तर वाड दान इडवाराद. 13इंगा या विश्वासी आंडीदान मोगुड विश्वास फेट्टाकुंटे इंगा वानदी दान जताक निलचेदेंक संमती उंटे तर आदी वान इडवाराद. 14येनटीक की, विश्वास फेट्टानोड मोगुड वडती इचांग पवित्र आयताड इंगा विश्वास फेट्टान्नेद वडती मोगुन इचांग पवित्र आयताद, लेकाते मी बिळ्ळु बिस्काल अशुद्ध उंटुनीर पण वार इप्पुड पवित्र उंडार. 15पण यवाड विश्वास फेट्टाड इडशी फोयान आंटाड तर वान फोनिंडा; येनटीक की यादुच तम्मुड इंगा शेल्याल इल्लोन बाबतीत बंधनला लेद. पण परमेश्वर मनालनी शांतीला निलचेदेंक फिल्चीनाड. 16येनटीक की हे वडती, इदी निक यल्ला यरका उंडाद की, नु नी मोगुनदी तारण शेशाव? इंगा हे मोगुडा, इदी निक यल्ला यरका उंडाद की, नु नी वडतीद तारण शेशाव?
परमेश्वर फिल्चीने लेका नडना
17तर यल्ला प्रभुड प्रत्येक वगानकी फंची इच्चीनाड, इंगा यल्ला परमेश्वर प्रत्येक वगान फिल्चीनाड, आल्ले वाड नडवाला. निन आन्नी मंडळीलाक इल्ले आज्ञा इस्तान 18वगाड सुंता आय्यीने मनशी परमेश्वर तीकेल फिल्चीनोड उंटे? तर वाड सुंताद चिन्ह खोडायाराद. यवानदी सुंता कालेद इल्लोन मनशी परमेश्वर तीकेल फिल्चीनोड उंटे? वाड सुंता शेस्कुनाराद. 19येनटीक की ना सुंताद येमाना महत्व उंडाद इंगा ना बेसुंताद येमाना महत्व उंडाद; पण परमेश्वर आज्ञालदी पालन शेशेदे आंता उंडाद. 20विश्वासी आल्ले निलवाला यल्ला वारनी परमेश्वर फिल्चीन्या, यप्पुड वार ख्रिस्त येशुन मिंदा विश्वास फेट्टीर. 21जर नु गुलाम उंडीनाप्पुड फिल्चेदेंक वच्चीनाव? तर चिंता शेयाक; पण निक स्वंतत्र आय्येद उंटे तर दानदी उपयोग शेय. 22येनटीक की यवाड गुलाम उंडीनाप्पुड प्रभुला फिल्चीनोड उंडाड वाड प्रभुला स्वतंत्र मनशी उंडाड; आल्ले यवाड स्वतंत्र उंडीनाप्पुड फिल्चीनोड उंडाड वाड ख्रिस्तन दास उंडाड. 23परमेश्वर मिमलान किंमत इच्ची कोन्केन तिस्कुंडाड, आंका मीर मन्सुला दास काकुंडा. 24हे आक्का तम्मुळ्ळालाला, यवाड या स्थितीला फिल्चीनोड उंडाड वाड आद्दे स्थितीला परमेश्वर जताक निलवाला.
फेंडली संबंधित प्रश्नलाय उत्तरलु
25इप्पुड फेंडली कानोर इचांग नाक प्रभुन तीकेल यादुच आज्ञा शिक्कालेद; पण, विश्वासयोग्य निलचेदेंक यवान मिंदा प्रभुड दया शेशीनाड इल्ला निन वगाड उंडान आंका निन संमती इस्तान. 26नाक वाटास्ताद की, इप्पुड परिस्थितीलोन संकटलान सुशी इदी बागा उंडाद की यवाड यल्ला उंडाड वाड आल्ले उंडाला. 27जर निक वडती उंडाद तर अलग आय्येद प्रयत्न शेयाक. जर निक वडती लेद तर नु नी इचांग वडती फुडकाक. 28पण जरी नु फेंडली शेस्कुंटे तर नु पाप शेयालेद; इंगा कुंवारी आनबिडा फेंडली शेस्कुंटे तर आदी पाप शेयालेद; पण इल्लोन्टोरकी दुन्यामला शारीरिक दुखलु आय्यी इंगा इल्लोन शारीरिक दुखलु मिक कावाराद इल्ला नाद इच्छा उंडाद. 29पण तम्मुळ्ळालाला निन इदी आंटान की, इदी वेळ रव्वा उंडाद. इप्पुड, यवारकी वडतुल उंडाय वार वडती लेने लेका बतकाला; 30इंगा येडशेतोर येडवाक वच्चीनार इल्ला, यवार आनंद शेस्तार वार आनंद शेयानोर लेका इंगा यवार कोन्केन तिस्कुंटार वार इल्ला उंडाला की वार देगार येमीच लेद. 31इ दुन्याम जताक व्यवहार शेशेतोर इल्ला उंडाला की दुन्यामटोर कावाराद येनटीक की इ दुन्यामदी रिती इंगा व्यवहारलु बदलास्का फोयताय. 32नाक इल्ला वाटास्ताद मीर दुन्यामलोन वासनाललेल मुक्त उंडाला. यवाड फेंडली कालेनोड उंडाड वाड प्रभुन जताक संबंधित माटलाला, आंटे मनाम प्रभुन यल्ला संतुष्ट शेशाम दिनदी काळजी शेस्ताड; 33पण यवाड फेंडली आयनोड उंडाड वाड दुन्यामलोन माटलाद, आंटे वडतीन यल्ला संतुष्ट शेयाला दिनदी काळजी शेस्ताड. 34इल्ला वारी भागलु आयताय यवार फेंडली कानोर इंगा कुंवारी आनबिळ्ळु उंडार वार मना फयला इंगा आत्माला यल्ला पवित्र उंडाला, इल्लोन प्रभुन माटला बद्दल चिंता शेस्तार; पण याद फेंडली आयनेद उंडाद आदी दुन्याम माटलाद, आंटे मना मोगुन यल्ला संतुष्ट शेयदुन दिनदी काळजी शेस्ताद. 35इदी निन मी फायदा इचांगे आंटान, मिमलान फसाय मताला आंकेन लेद; पण मीर विचलित कावांदे प्रभुन सेवाला आंटी उंडाला आंकेन शपतान. 36जर यवारकी आना इल्ला वाटास्ताद की, वाड वान आनबिडाद हक्क मतेस्तुनाड, इंगा यवारदी फेंडलीद वय यल्ली फोयतुनाद इंगा गरज पण उंडाद, तर यल्ला वानदी इच्छा उंडी आल्ला वाड शेयाला, दिंटल्या येमीच पाप लेद, वाड फेंडली शेस्कुनाला. 37पण यवाड फेंडली शेस्कुनेद लेद इल्ला निर्णय तिस्कुन्नाड, यवानकी येमीच गरज लेद इंगा यवाड वान इच्छा मिंदा अधिकार फेटताड इंगा इल्ला यवाड मना कुतुरनी कुंवारी फेट्टेद मनला ठराय मतनिन्टे तर वाड शिंगार शेस्ताड. 38दिनिचांग यवाड मना कुंवारी आनबिडाद फेंडली शेशी इस्ताड वाड बागा शेस्ताड; पण यवाड फेंडली शेशीयाड वाड शेंगेम शिंगार शेस्ताड. 39फेंडली आयने आंडीदान मोगुड जित्ता उंडाड आड नंताक आदी वान जताक कट्टीनेद उंडाद, पण जर दान मोगुड सच्ची फो तर, फक्त प्रभुला विश्वासी मनशी जताके दानदी इच्छा उंटे तर दानकी वाटाशी वान जताक आदी फेंडली शेस्कुनी शकास्ताद. 40पण आदी जर फेंडली शेस्कुनांदे निलच्या तर, नाद मत इल्ला उंडाद, आदी आंडीद शेंगेम आशिर्वादीत आय्यी इंगा निन मानास्तान की, ना लोना पण परमेश्वरदी आत्मा उंडाद.
Currently Selected:
1CO 7: WNT
Highlight
Share
Compare
Copy
Want to have your highlights saved across all your devices? Sign up or sign in