2CO 11
11
करिंथ लोन्टोर विश्वासयोग्यता इचांग चिंता
1नाद इच्छा उंडाद की, मीर नाद रवा मुर्खपणा ना इचांग सहन शेयाला. पण आदी मीर सहन शेस्तुनारच. 2येनटीक की निन परमेश्वर आवेशता मी बद्दल आवेशी उंडान, निन मिद ख्रिस्तन जताक इड्याम शेशीनान, दिनिचांग की, मिमलान वगा शुद्ध आनबिडा लेका ख्रिस्तक समर्पित शेयाला. 3पण नाक यरपु उंडाद की यल्ला हव्वान फाम कपट शेशी फसाय मत्या आल्ले मी विचारलु यल्ला तरी बिघडाशी आय ख्रिस्तद शुद्ध भक्ती इंगा सरळपण दिनकेल भ्रष्ट कावाराद. 4येनटीक की, जर यवाडाना मी देगार वच्ची यादाना इंगोगो येशुनदी प्रचार शेस्ते, यवानदी प्रचार मिम शेयालेद; लेकाते मिक शिक्काले लेकुंड्या इल्लोनदी इंगोगो आत्मा मीर स्वीकार शेस्तार लेकाते मीर स्वीकार शेयालेद इल्ला इंगोगो सुवार्तान मीर स्वीकार शेस्तार तर मीर वारदी सहन शेस्तार.
5पण नाक वाटास्ताद निन अतिश्रेष्ठ प्रेषितला काना कमी लेन. 6निन भाषण शेशे दिंटल्या अशिक्षित उंटे तरी ज्ञानला लेन. मिम इदी मिक आन्नी माटलाला प्रगट शेशीनाम.
खोटा प्रेषितलु इंगा छळ
7मीर लोत कावाला आंका निन स्वतान किंदीक शेस्तीन आंटे निन परमेश्वरदी सुवार्ता मिक फुकट शपतीन दिंटल्या निन पाप शेस्तीन येम? 8मिद सेवा शेशेदेंक निन इंगोगो मंडळी तीकेल दान तिस्केन वारनी लुटासतीन दिनिचांग की निन येमी पण शेशी मिद सेवा शेशी शकायाला. 9इंगा यप्पुड निन मी देगार उंटीन आप्पुड नाक कमी फडीन्या तरी पण निन यवारकी भोरु कालेद येनटीक की मासेदोनिया प्रांतकेल या तम्मुळ्ळु वच्चीनीर वार नाद गरज भागाय मतीर इंगा पहिला भोरु कालेद आंका भविष्यला पण निन यप्पुडुच मिक भोरु काक फोयान. 10खरेमे ख्रिस्तद सत्य ना लोना उंडाद आंका निन शपतान की, पुर्ण अखया प्रांतला यवाडुच निन दिन मिंदा शेशे अभिमानकी विरोध शेयाक फोई. 11इंगा येनटीक शेशी? येनटीक की निन मी मिंदा प्रेम शेयान येम? परमेश्वरकी यरका उंडाद की, निन मी मिंदा प्रेम शेस्तान.
12इंगा निन येम शेस्तान आदी निन शेस्का उंड्यान दिनिचांग की, आ बाकीचे प्रेषितलाक घमंड शेशेद इंगा इदी आनेद यादुच कारण लेवाराद की वार आल्ले फनी शेस्तार यल्ला मिम शेस्ताम. 13येनटीक की इल्ला मंदी खोटा प्रेषितलु उंडार, वार फसाय मते फनुल शेशेतोर उंडार, यवार स्वता ख्रिस्तन प्रेषित आय्येद ढोंग शेस्तार. 14इंगा दिंटल्या आश्चर्य लेद येनटीक की शैतान पण तेजस्वी दुतदी#11:14 तेजस्वी दुतदी शैतान मंदीन फसाय मतेदेंक शिंगार कमशेद नाटक शेस्ताड रुप धारण शेस्ताड. 15वान सेवकलु पण नितीमान सेवकदी रूप धारण शेस्तार दिनिचांग दांटल्या आश्चर्य वाटाशे लेका येमीच लेद, वारदी शेवट वार फनुला लेका आय्यी.
खरेम प्रेषित रुपला पौलदी दुख
16निन इंगा आंटान यवारुच नन्नु मुर्ख समजायाराद, पण जर मीर समजास्ताद तर यल्ला मुर्खद आल्ला नाद स्वीकार शेयना. दिनिचांग की निन रवा घमंड शेशी शकायाला. 17इप्पुड निन जे इदी माटलाडतुनान आदी प्रभुनदी आज्ञा लेका माटलाडाक वच्चीनान. तर वगा मुर्खलेका घमंडता इंगा विश्वासता माटलाडतुनान. 18यल्ला शेंगेम मंदी शारीरिक माटला बद्दल घमंड शेस्तार, आल्ले निन पण घमंड शेशान.
19मीर समझदार उंडार तर मुर्ख मंदीद आनंदता सहन शेस्तार! 20येनटीक की यप्पुड यवाडाना मिमलान दास बनाय मतकुंटाड लेकाते मिद छळ शेस्ताड लेकाते मिमलान फसाय मतताड लेकाते स्वतान फेद्दावोड शेस्ताड लेकाते मी मुती मिंदा मतताड तरी पण मीर वारदी सहन शेस्तार.
21नाक शिग्गु आयताद जर यवाडाना आंटाड निन दिंटल्या घमंड शेस्तान तर निन पण दांटल्या घमंड शेस्तान. इदी निन मुर्खलेका माटलाडतुनान.
22वार इब्री उंडार येम? निन पण उंडान. वार इस्राएली उंडार येम? निन पण उंडान. वार अब्राहाम बिळ्ळु उंडार येम? निन पण उंडान. 23वार ख्रिस्तन सेवकलु उंडार येम? (निन इदी पागल लेका आंटान) निन वार काना जास्त उंडान, निन शेंगेम कठीण फनी शेशीनान. नेहमी-नेहमी तुरुंगला फोदुन, शेंगेम देब्बाल तिंटीन, शेंगेम तुकुल सच्चेदेंक मुंदारकी फोयतीन, दिनिचांग निन पण जास्त उंडान. 24आय्यीद तुकुल निन यहुदी अधिकारीला तीकेल एकोनचाळीस कोड्याल तिंटीन. 25मुड तुकुल कट्ट्याता तिंटीन, वगातुक नन्नु राळाता मत्तीर, मुड तुकुल नाद जहाज फगली फो, मोकळा समुद्रला निन वगा मोब्बु इंगा फगुल उंटीन. 26ना नेहमी प्रवास शेयदुन, वंकाल प्रवासला धोका उंड्या. दोंगाल तीकेल धोका उंड्या. नाक ना स्वता मंदी तीकेल धोका उंड्या. यहुदी लेनोर मंदी तीकेल, इंदु शहरला धोका उंड्या. कोंडाल प्रदेशला धोका उंड्या. समुद्रलोन धोकाल उंड्या, विश्वास फेटेतोर खोटा तम्मुळ्ळा तीकेल धोका उंड्या. 27निन शेंगेम कष्ट शेस्तीन इंगा घम्माम गाळास्तीन इंगा शेंगेम तुकुला जागरण शेस्तीन. निन आकाल इंगा दुपाक यरका लेद. शेंगेम तुकुल निन उपाशी, सलीला बट्टाल लेन्दे निलस्तीन, 28इ आन्नी माटलान इडशी धीन्नाम ना मिंदा आन्नी मंडळीला बद्दलदी चिंता उंडाद. 29यवाराना कमजोर आयते तर निन कमजोर कान येम? इंगा यवाराना पापला फडते, तर नाक दुख काद येम?
30जर नाक अभिमान शेशेद उंटे तर निन ना कमजोर माटला बद्दल अभिमान शेशान. 31प्रभु येशुन परमेश्वर इंगा आब्बाड, यवानदी नेहमी मनाम स्तुती शेयाबेक, वानकी इदी यरका उंडाद की निन खोटा माटलाडाक वच्चीनान. 32यप्पुड निन दिमिष्क नगरला उंटीन, तर अरीतास राजाड नेमाशीने अधिकारी नन्नु फट्टेदेंक दिमिष्क नगर मिंदा पहारेदार फेट्टीन्या. 33पण नन्नु डाल्याला कुसनामती मिंदुड खिडकी लोन्केल किंदीक इडशीर इंगा वान शेतल्योन्केल निन निस्टास्तीन.
Currently Selected:
2CO 11: WNT
Highlight
Copy
Compare
Share
Want to have your highlights saved across all your devices? Sign up or sign in