ACT 10
10
कर्नेलकी दृष्टांत
1कर्नेल फेरोड मनशी कैसरीयाला निलदु, वाड इटलीक फेर सैन्यदलला शताधीपती उंड्या. 2कर्नेल इड भक्तीमान उंडी वान परिवार जताक परमेश्वरदी यरपु फट्टेतोड उंड्या; वाड गरीबोरकी शेंगेम दान इद्दु इंगा वाड नेहमी परमेश्वरकी प्रार्थना शेयदु. 3वगा नाड मद्याना मुड वागेताप्पुड कर्नेलकी दृष्टांतला स्पष्टपणे कमशा, की वगाड परमेश्वर दुत वान तीकुड वच्या इंगा वान आन्या, “हे कर्नेला!” 4कर्नेल परमेश्वर दुत तीकुड सुशी यरस्कुन्या इंगा आन्या, “येम उंडाद प्रभु?” परमेश्वर दुत कर्नेलनी आन्या, “परमेश्वर नीद प्रार्थना इनीनाड, इंगा याय माटलु नु गरीबोरकी इच्चीनाव, आय परमेश्वर सुशीनाड इंगा परमेश्वरकी नीद ध्यानाम उंडाद.” 5नु यापो उरुक मंदीन आंप इंगा शिमोन फेरोन मनशीन यवान पेत्र पण आंटार फिल्चको. 6वाड तोलुद धंदा शेशेतोन शिमोन इल्काडा निलस्तुनाड, यवानदी इल्लु समुद्र कंटामकी उंडाद. 7कर्नेलनी माटलाडीनेंका परमेश्वर दुत यल्ली फोया मंग कर्नेल वान इद्दार नोकरलान इंगा वगा धर्मशील शिपाईन फिल्चकुन्या.
पेत्रक दृष्टांत
8कर्नेल इ मुग्गुरकी आयनेद आंताच शप्पी वारनी यापोक आंप्या. 9इंगोगो नाड, आ मन्सुल यापो उर देगार वच्चीर, आदी मद्यानदी वेळ उंड्या, आद्दे वेळला प्रार्थना शेशेदेंक पेत्रड माडी मिंदीक फोया. 10पेत्रक आकाल आयन्या, वानकी येमाना तरी तिनेद मन आय्या, वार पेत्र इचांग तिनेद तैयारी शेशेताप्पुड पेत्र बेशुद्ध आय फोया. 11इंगा वान मुंदार मोडाम उघडाशीनेद इंगा वगा फेद्दा सुक्का लेका नालुंग कोपर्याल फट्टी इडशीनेद वगा चादर पृथ्वी मिंदीक दिगतुनाद इल्ला दृष्टांत वानकी कमशा. 12दांटल्या पृथ्वी मिंदुडी आन्नी प्रकारी नडशेय प्राणील, रेंगाशेय इंगा मोडामला यगरेय पक्षील उंड्या. 13मंग वगा आवाज पेत्रड इन्या, “हे पेत्र, लेय; दिंटल्योनदी यादु पण प्राणीन मतेशी तिन.” 14पण पेत्र आन्या, “निन इल्ला यप्पुडुच शेयाक फोयान, प्रभु याद अशुद्ध इंगा अपवित्र उंडाद इल्ला यादुच तिंडी निन यप्पुडुच तिनालेद.”#लेवी 11:1-47; यहेज्केल 4:14. 15पण आदी आवाज वान इंगा आन्या, “परमेश्वर इ माटलु शुद्ध शेशीनाड, आटलान अशुद्ध आनाक.” 16इल्ला मुड तुकुल आय्या; मंग आदी चादर मोडामलोंग तिस्कुनेदेंक वच्या.
17पेत्र यरस्केन इ दृष्टांतदी अर्थ येम उंडी आंका विचार शेशेदेंक आंट्या, आप्पुड या मंदीन कर्नेल आंपीन्या, वारकी शिमोनदी इल्लु कमशा इंगा वार कवाड देगार नीला फडीर. 18वार आडगीर, “शिमोन पेत्र इंदे निलस्ताड येम?” 19पेत्र इ दृष्टांत बद्दल विचार शेशेताप्पुड, आत्मा वान आन्या, “सुड, मुग्गुर मन्सुल निन्नु फुडकुतुनार. 20लेय इंगा पायऱ्याल दिगी किंदीक फो, येनटीक की निने वारनी आंपीनान, येमीच शक शेयांदे वार जताक फो.” 21मंग पेत्र किंदीक आ मन्सुला तीकुड फोया, इंगा आन्या, “मीर यवारनी फुडकुतुनार वाड निने उंडान मीर इंदुक येनटीक वच्चीनार?” 22आ मन्सुल आनीर, “वगा पवित्र स्वर्गदुत निक आमंत्रण इच्चेदेंक कर्नेलकी शप्पीन्या कर्नेल इड शताधीपती उंडाड, वाड नितीमान मनशी उंडाड इंगा वाड परमेश्वरदी उपासना शेस्ताड, आंता यहुदी मंदी वानदी आदर शेस्तार, निन्नु इल्लुक फिल्ची नी माटलु इनाला इल्ला स्वर्गदुत वानकी शप्पीनाड.”
23पेत्र वारनी लोनीक फिल्चकुन्या इंगा मोब्बुलाला मुक्काम शेशेदेंक शप्या, इंगोगो नाड पेत्र तैयार आय्या इंगा आ मुग्गुर मन्सुला जताक फोया, यापो इंदुड काही तम्मुळ्ळु पण पेत्र जताक फोईर. 24इंगोगो नाड पेत्र कैसरीया शहरकी वच्या, कर्नेल वानदी दावा सुदु, वाड वान परिवारलोन मंदीन इंगा मित्रलान पण वान इल्काडा जमा शेशीन्या. 25यप्पुड पेत्र लोनीक फोया, आप्पुड कर्नेल वानकी भेटाशा, कर्नेल वानी काळ मोक्की वानकी आदरता नमन शेशा. 26पण पेत्र आन्या, “नीला फड, निन नी लेकाने मनशी उंडान.” 27पेत्र वान जताक माटलाडका इंटल्योंग फोया इंगा लोना शेंगेम मंदी जमा आयनोर वानकी कमशीर. 28पेत्र आ मंदीन आन्या, “मिक इदी यरका उंडाद की, वगा यहुदी मनशी यहुदी लेने मनशी इल्लुक फोयेद लेकाते वान जताक संबंध फेट्टेद इदी यहुदी नियमला विरुद्ध उंडाद, पण परमेश्वर नाक सुपीच्चीनाड की, निन इंगोगो मंदीन अशुद्ध लेकाते अपवित्र मानायाराद. 29दिनिचांग यप्पुड इ मंदी नन्नु फिल्चेदेंक वच्चीर, आप्पुड निन वार जताक वादविवाद शेयालेद, इप्पुड, कृपा शेशी नाक शपना, की मीर नन्नु इंदुक येनटीक फिलस्तीर?”
30कर्नेल आन्या, “नालुंग नाळाकाना मुंची, इद्दे वेळला आंटे मद्याना मुड वागता निन ना इल्काडा प्रार्थना शेयदुन, अचानक वगा मनशी ना मुंदार नीला फड्या, वाड लखलखीत चमकदार बट्टाल फेटकुन्न्या.” 31आ मनशी आन्या, “कर्नेल परमेश्वर नीद प्रार्थना इनीनाड, इंगा याय माटलु नु गरीबोरकी इच्चीनाव, आय परमेश्वर सुशीनाड इंगा परमेश्वरकी नीद ध्यानाम उंडाद. 32दिनिचांग यापो इ शहरकी काही मंदीन आंप इंगा शिमोन पेत्रन फिल्चको, पेत्रड तोलुद धंदा शेशेतोन शिमोन इल्काडा निलस्तुनाड इंगा वानदी इल्लु समुद्र देगार उंडाद. 33आप्पुड निन लगेच निक निरोप आंपतीन, इंगा नु इंदुक वस्ती इदी शेंगेम शिंगार शेस्ती, इप्पुड माक येम पण शप्पेद प्रभुड निक आज्ञा इच्चीनाड, आदी इनेदेंक मिम आंदार इंदु परमेश्वर मुंदार जमा आयनाम.”
पेत्रद भाषण
34पेत्र माटलाडेदेंक चालु शेशा नाक इप्पुड इदी खरेमे तेल्चीनाद की, “परमेश्वरकी प्रत्येक मनशी सारखाने उंडाड.#अनुवाद 10:17; 2 इतिहास. 35प्रत्येक जातीला यवाड पण वानदी भक्ती शेस्ताड इंगा योग्य आदी शेस्ताड, वानदी परमेश्वर स्वीकार शेस्ताड, मनशी या देशलोन्टोड उंडाड, इदी महत्वद लेद. 36परमेश्वर इस्राएल मंदीन माटलाड्या, परमेश्वर वारकी सुवार्ता शप्या की, येशु ख्रिस्त तीकेल यवाड आंदार प्रभु उंडाड, शांती दुन्यामलोंग वच्चीनाद.”
37“आंता यहुदीया प्रांतला येम आय्या इदी मी आंदारकी यरका उंडाद, दानदी सुरुवात योहान मंदीक बाप्तिस्मा बद्दल गालील प्रांतला याद संदेश इच्या, दानता आय्या. 38नासरेथलोन येशुन बद्दल मिक यरका उंडाद, परमेश्वर वानदी पवित्र आत्माता इंगा सामर्थ्यता अभिषेक शेशा, येशुड आन्नी तीकुड मंदी इचांग शिंगार माटलु शेस्का फोया, या मंदी लोना दुष्ट आत्माल उंड्या वारनी येशुड शिंगार शेशा, येनटीक की परमेश्वर वान जताक उंड्या.#यशया 61:1. 39येशुड पुर्ण यहुदीया प्रांतला इंगा यरुशलेम शहरला येम-येम शेशा आय आन्नी माटलु मिम सुस्तीम इंगा मिम वान साक्षीदार उंडाम, पण वार येशुन कट्ट्या क्रुस मिंदा टांगाशी मतेशीर.#अनुवाद 21:22-23. 40पण परमेश्वर तिसरा दिनमुनाड वान जित्ता शेशा इंगा येशुन मंदीक स्पष्ट सुप्या. 41पण आंदारुच येशुन सुडालेद, परमेश्वर यवारनी पहिलाने साक्षीदार आंका निवडाशीन्या, वारे वान सुशीर, आ साक्षीदारलु मिम उंडाम येशुड सच्चीनोर लोन्केल लेशीनेंका मिम वान जताक तिंटीम तागतीम. 42येशुड माक ‘मंदीक उपदेश शेशेदेंक शप्या, की जित्ता उंडीनोरदी इंगा सच्चीनोरदी न्याय शेशेदेंक परमेश्वर वान निवडाशीनाड’ इदी शप्पेद वाड माक आज्ञा शेशा. 43यवाड पण येशुन मिंदा विश्वास फेटताड, येशुन फेरला परमेश्वर आ मनशी पापलाद क्षमा शेशी, आंदार संदेष्ट्याल आंटार की इदी खरेम उंडाद.”
यहुदी लेनोर मिंदा पवित्र आत्मा दिगताद
44पेत्र इदी माटलाडेताप्पुडे वान माटलु इनेतोर मंदी मिंदा पवित्र आत्मा दिग्या. 45सुंता आयनोर यहुदी विश्वासी मंदी यवार पेत्र जताक वच्चीनीर, वारकी इदी सुशी नवल वाटाशा, की यहुदी लेनोर मिंदा पण पवित्र आत्माद दान कोम्मारीच्चेदेंक वच्चीनाद. 46इंगा यहुदी लेनोर मंदीन अलग-अलग भाषा माटलाडेताप्पुड इंगा परमेश्वरदी स्तुती शेशेताप्पुड यहुदी मंदी इनीर. 47मंग पेत्र आन्या, “इ मंदीक नेळाता बाप्तिस्मा इच्चेदेंक मनाम लेद आनी शकायाम, यल्ला मनाक शिक्या, आल्ले इरकी पण पवित्र आत्मा शिक्कीनाद.” 48दिनिचांग पेत्र कर्नेलदी, वान परिवारलोन मंदीद इंगा मित्रलाद येशु ख्रिस्त फेरता बाप्तिस्मा शेशेद आज्ञा इच्या, मंग पेत्र इंगा काही नाळ वार जताक निलवाला आंका आ मंदी वानकी विनंती शेशीर.
Currently Selected:
ACT 10: WNT
Highlight
Share
Compare
Copy
Want to have your highlights saved across all your devices? Sign up or sign in
