ACT 16
16
लुस्र इंदुक फोई तीमथ्यड पौलनी भेटास्ताड
1मंग पौल दर्बे इंगा लुस्र इंदुक किंदीक वच्या; इंगा सुडना, आंदु तीमथ्य फेरोड यवाडो वगा शिष्य उंड्या; वान आम्मा यहुदी विश्वासीद उंड्या, पण वान आब्बाड ग्रीक उंड्या. 2तीमथ्यनदी लुस्रलोन इंगा इकुन्यालोन विश्वासी मंदी जताक शिंगार माटलाडकम उंड्या. 3तीमथ्यड वान जताक दावाला इल्ला पौलदी इच्छा उंड्या; आप्पुड आ जागाला यवार यहुदी मंदी उंडीर वार इचांग वाड वान तिस्केन वानदी सुंता शेशा; येनटीक की वान आब्बाड ग्रीक उंडाड इदी आंदारकी यरका उंड्या.
4आप्पुड वार नगरला लोन्केल फोयेताप्पुड आंदुड मंदीक यरुशलेम शहरलोन प्रेषितलु इंगा आब्बागार ठरायमतीने नियमलान पाळायदेंक शपका फोईर. 5दिनिचांग मंडळील विश्वासला मजबुत आय्या इंगा संख्याला धीन्नाम वाढास्का उंड्या.
पौलदी दृष्टांत
6यंकसार आशिया प्रांतला वचन शप्पेदेंक वारनी पवित्र आत्मा लेद आन्या आंका वार फुग्रीया इंगा गलतिया इ प्रांतला लोन्केल फोईर. 7इंगा मुसिया प्रांत नंताक वच्ची नेंका बिथुनिया प्रांतलोंग फोयेद वार प्रयत्न शेशीर; पण येशुन आत्मा वारनी फोनीयालेद. 8मंग वार मुसिया देगाटेल फोई त्रोवस शहरकी फोईर. 9आंदु मोब्बुला पौलकी इल्ला दृष्टांत फड्या की, मासेदोनियाला यवाडोतरी वगा मनशी नीला फडी वानकी विनंती शेस्तुनाड की, “इक्काड मासेदोनियाक वच्ची माक मदत शेय.” 10वानकी इल्ला दृष्टांत फडीनेंका आ मंदीक सुवार्ता शप्पेदेंक परमेश्वर मोमलान फिल्चीनाड इल्ला समजाशी मिम मासेदोनियाक लगेच फोयेद विचार शेस्तीम.
पौल मासेदोनियालोन फिलिप्पैक फोयताड
11आप्पुड त्रोवसकेल जहाजला कुसनी मिम सरळ समथ्राकेस बेटकी फोयतीम इंगा इंगोगो नाड नियापुलीस शहरकी फोयतीम. 12आंदुकेल फिलिप्पै शहरकी फोयतीम; आदी मासेदोनिया लोनदी मुख्य नगर उंडी आंदु रोमन मंदीद वस्ती उंडाद, आ नगरला मिम काही नाळ निलस्तीम. 13मंग शब्बाथ दिनमुनाड मिम नगर बैटीक वंका कंटामकी, इंदु प्रार्थना आयतुंटाद इल्ला समजाशी आंदु फोई कुसुंटीम; इंगा या आंड्योर आंदु जमा आयनीर वार जताक माटलाडेदेंक आंटतीम. 14आंदु लुदिया फेरुद वगा आंडीद उंड्या; आदी थुवतीरा नगरदी उंडी जांभळा बट्टाल आम्मदु; आदी परमेश्वरदी सेवा शेयदु, आदी माद भाषण इन्या; प्रभुड दानदी अंतकरण इल्ला तैयार शेशा की पौल माटला तीकुड आदी लक्ष इच्या. 15मंग दानदी इंगा दान गोनगोतदी बाप्तिस्मा आयनेंका आदी इल्ला विनंती शेशा की, “निन प्रभुन मिंदा विश्वास फेटतान इल्ला जर मीर मानास्तार तर ना इल्काडा वच्ची निलना.” दान आग्रह इचांग आदी विनंती माक मान्य शेय्या बेक आय्या.
पौल इंगा सिलाड जेलला
16मंग इल्ला आय्या की, मिम प्रार्थना शेशे जागा मिंदीक फोयेताप्पुड वगाट दुष्टात्मा आंटीनेद आनबिडा माक कमशा, दान फयला वद्दु, इंगा आदी भविष्य शप्पी दान मालकलाक शेंगेम दुडलु कमाशी इद्दु. 17आदी पौल इंगा मा यंका वच्ची बेग्गे आन्या, “इ मंदी परात्पर परमेश्वर दास उंडार, यवार मनाक तारणदी दावा शपतार.” 18इल्ला आदी शेंगेम नाळागला शेयदु; मंग पौलकी शेंगेम वाईट वाटाशा इंगा वाड यंकाक तिरगी आ दुष्टात्मान आन्या, “येशु ख्रिस्त फेरता निन नीक आज्ञा इस्तान की, नु दिंटल्योन्केल यल्ली फो.” इंगा आदी लगेच यल्ली फोया. 19मंग मना कमाईद आशा फोया इल्ला सुशी दान मालकुल पौलनी इंगा सिलान फट्टी अधिकारीला तीकुड जग्गुका फोईर. 20इंगा वार वारनी अधिकारीला मुंदार नीला फडामती आनीर, “इ मंदी यहुदी उंडी मा नगरकी त्रास इस्तार. 21इंगा मिम रोमन मंदीक याद रिती रिवाज स्वीकार शेशेद इंगा मानाशेद योग्य लेद आदी इर शपतार.” 22आप्पुड मंदी वार विरुद्ध लेशीर इंगा अधिकारील वारी बट्टाल शिंचेशीर इंगा वारकी छडील मत्तेद आज्ञा इच्चीर. 23मंग शेंगेम मतीनेंका वारनी जेलला येशी वार जेल नायककी वारनी बंदोबस्तला फेट्टेद आज्ञा इच्चीर. 24वानकी इल्ला आज्ञा शिक्कीनेंका वाड वारनी जेलला येशी वारी काळ खोडाला अटकायमत्या.
25निम्मा मोब्बुला पौल इंगा सिलाड प्रार्थना शेशेताप्पुड इंगा फदुल फाडी परमेश्वरदी स्तुती शेशेताप्पुड बाकी कैदील वारदी इनदुर. 26आप्पुड एकाएकी इल्ला फेद्दा भुकंप आय्या की जेलुद जोता हालाशी फोया, इंगा लगेच आन्नी कवाडलु उघडाशी फोया इंगा आंदारी साखळील तेगी फोया. 27आप्पुड नायक लेशीगास जेलुय कवाडलु उघडाशीनेय सुशी; इंगा कैदील फारी फोयनार इल्ला विचार शेशी वाड तलवार तिशी स्वतान मतेस्तुन्या. 28इंताटला पौल बेग्गे कीरली आन्या नु स्वताक येमीच नुकसान शेस्कुनाक; येनटीक की मिम आंदार इंदे उंडाम. 29मंग दिवा यकोची वाड लोनीक फारका फोया, नडगुका-नडगुका पौल इंगा सिलानी काळ मोक्या. 30इंगा वारनी बैटीक तिशी आन्या “साहेब, नाद तारण कावाला आंका निन येम शेयाबेक?” 31वार आनीर, “प्रभु येशुन मिंदा विश्वास फेट आंटे नीद इंगा नी गोनगोतदी तारण आय्यी.” 32वार वानकी इंगा वान इंटल्योन्टोरकी प्रभुनदी वचन शप्पीर. 33मंग आ मोब्बुला आप्पुड वाड वारनी देगार तिस्केन वारी जखमलु कडग्या; इंगा आप्पुडे वाड इंगा वान इंटल्योन्टोर आंदार बाप्तिस्मा तिस्कुनीर. 34इंगा वाड वारनी इल्लुक येका फोई रोट्या तिना मत्या इंगा परमेश्वर मिंदा विश्वास फेट्टी वाड इंगा वान इंटल्योन्टोर मंदी आनंद शेशीर.
35फद्दु फुट्टीनेंका अधिकारील शिपाईलान आंपी शप्पीर की, “आ मनसुलान इडस्काड.” 36आप्पुड जेललोन नायक पौलकी इदी बातमी शप्या की, “मिमलान इडवाला आंका अधिकारील आदेश आंपीनार; तर इप्पुड शांतीता फोंडा.” 37पण पौल वारनी आन्या, “मिम रोमन मंदी उंडीगास अपराधी ठरायांदे वार मोमलान आंदार मुंदार मत्ती जेलला येशीर इंगा इप्पुड वार मोमलान दोंगातारला आंपतुनार येम? इदी जमायाक फोई; तर वार स्वता वच्ची मोमलान बैटीक तीयाला.” 38मंग शिपाईल इदी बातमी अधिकारीलाक शप्पीर, आप्पुड वार रोमन उंडार इदी इनी वार यरस्कुनीर. 39इंगा वार वच्ची वारकी समजाय मतीर; इंगा वारनी बैटीक तिशी वारकी नगर लोन्केल यल्ली फोयेद विनंती शेशीर. 40मंग वार जेललेल यल्लीगास लुदियादानन इल्लुक फोईर, आंदु तम्मुळ्ळान भेटाशी वार वारकी प्रोत्साहन इच्चीर इंगा आंदुकेल यल्ली फोईर.
Currently Selected:
ACT 16: WNT
Highlight
Share
Compare
Copy
Want to have your highlights saved across all your devices? Sign up or sign in
