ACT 22
22
पौलदी भाषण
1हे ना आक्का तम्मुळ्ळालाला इंगा आब्बागारलाला, नाद उत्तर इनना, याद निन इप्पुड मी मुंदार इस्तुनान. 2वाड मना जताक इब्री भाषाला माटलाडतुनाड इदी इनी वार शांत आय्यीर, आप्पुड वाड आन्या.
3निन तर यहुदी उंडान, नाद जन्म किलकीयालोन तार्स नगरला आय्या इंगा इंदे निन शिन्नावोडकेल फेद्दावोड आयतीन इंगा गमलीयेल काळा देगार कुसनी नाक मना पुर्वजला नियमशास्त्रद शिक्षण कडक रितीता शिक्या इंगा यल्ला मीर आंदार इबद परमेश्वर इचांग उत्साहीत उंडार आल्ले निन पण उंटीन. 4निन इ दावा मिंदा नडशेतोर मनसुलान इंगा आंड्योरनी कट्टी जेलला येशी, आ मंदीक सच्ची नंताक त्रास इस्तीन. 5दिन बद्दल महायाजक इंगा आंदार आब्बा तातागार पण ना साक्षी उंडार; निन वार तीकेले पत्र तिस्केन दिमिष्कलोन तम्मुळ्ळा तीकुड फोदुन; दिनिचांग की, यवार आंदु उंडीर वारनी पण कट्टी यरुशलेम शहरकी शिक्षा इच्चेदेंक येका दावाला. 6मंग इल्ला आय्या की, फोता-फोता निन दिमिष्क शहर देगार पोहचास्तीन आप्पुड आंटे मद्यान वेळला मोडामलेल ना आजुबाजुक वगाट फेद्दाद यलगु चमकाशा. 7आप्पुड निन भुमी मिंदा फडी फोयतीन इंगा “शौल, शौल, नाद छळ येनटीक शेस्ताव?” इल्ला आवाज ना जताक माटलाडेताप्पुड निन इंटीन. 8निन आडगुतीन, प्रभु, नु यवाड उंडाव? वाड नन्नु आन्या, “या नासोरी येशुनदी नु छळ शेस्ताव वाड निने उंडान.” 9आप्पुड ना जताक यवार उंडीर वारकी यलगु कमशा, पण ना जताक माटलाडेतोनदी आवाज वार इना लेद. 10मंग निन आंटीन, प्रभु निन येम शेयदुन? प्रभुड नन्नु आन्या, “लेशी दिमिष्कलोंग फो; आंदु निक आदी आंताच शप्पेदेंक वच्ची, येनटी इचांग निन्नु निवडाशेदेंक वच्चीनाद.” 11आ यलगु तेज इचांग नाक कमसाकुंदु; आंका ना जता गंगुल नाद शेय फट्टी नन्नु दिमिष्ककी येका फोईर.
12मंग हनन्या फेरोड वगा मनशी उंड्या, वाड नियमशास्त्र लेका नितीमान उंड्या इंगा इंदु निलचेतोर आंता यहुदी मंदी वान बद्दल शिंगार माटलाडदुर. 13वाड ना देगार नीला फडी नन्नु आन्या, शौल तम्मुडा, इक्काड सुड, आद्दे वेळला निन वान तीकुड फैनिक सुस्तीन. 14आप्पुड वाड आन्या मना पुर्वजला परमेश्वर निन्नु दिनिचांग निवडाशीनाड की, वानदी इच्छा येम उंडाद आदी नु तेल्ची तिस्कुनाला; इंगा आ नितीमान मनशीन सुडाला इंगा वान नोटल्योनदी आवाज इनाला. 15येनटीक की नु सुस्ती इंगा इंटी दान बद्दल नु आंता मंदी मुंदार वान साक्षीदार आय्याव. 16तर इप्पुड वेळ येनटीक आंचताव? लेय, बाप्तिस्मा तिस्को इंगा वानदी फेर तिस्केन नी पापलान कडगेसकाड.
17मंग इल्ला आय्या की, निन यरुशलेम शहरकी वच्ची नेंका, परमेश्वर भवनला प्रार्थना शेशेताप्पुड निन बेसुध आय फोयतीन. 18आप्पुड निन प्रभुन सुस्तीन; वाड नन्नु आन्या, “लग्गान शेय, इंगा लगेच यरुशलेम शहरकेल यल्ली फो; येनटीक की वार ना बद्दल इच्चीनेद नीद साक्ष स्वीकार शेयाक फोयार.” 19आप्पुड निन आंटीन, प्रभु, वारकी यरका उंडाद की, निन नी मिंदा विश्वास फेटेतोरनी जेलला येशी प्रत्येक सभास्थानला वारनी मत्तुदुन. 20नी साक्षीदार स्तेफनदी रक्तपात आय्या आप्पुड निन आंदु नीला फडी वार जताक सहमत उंटीन इंगा वान मत्तेतोरी बट्टाल सांभाळीद्दुन. 21आप्पुड प्रभुड नन्नु आन्या, “फो निन निन्नु यहुदी लेने मंदी तीकुड धुरा धुराम आंप्यान.”
रोमन नागरिक आंका उंडीनेद पौलदी हक्क
22इ माटा नंताक मंदी वानदी इनीर; मंग वार कीरलुका आनीर, इल्लोन मनशीन दुन्यामला जित्ता फेट्टाकुंडा, इड बतके लायकीक लेड. 23वार कीरलुकेन इंगा वारी बट्टाल फय लोन्केल तिशी हवाला धुम्मु यगरा मतेदेंक आंटीर. 24आप्पुड सरदार शिपाईलाक शप्या, पौलनी चाबुकता मतना, दिनिचांग की मंदी पौल विरुद्ध येनटीक कीरलुतुनार इदी सरदारकी यरका शेशेद उंड्या. 25इंगा वार वान वादीता कट्टीर, आप्पुड वान देगार उंडीने शताधीपतीन पौल आन्या, “रोमन मनशीन, दोषी ठरायांदे, मत्तेद कायदेशीर उंडाद येम?” 26इदी इनीगास शताधीपती सरदार देगार फोई आन्या, नु इदी येम शेस्तुनाव? वाड रोमी मनशी उंडाड. 27आप्पुड सरदार वान देगार वच्ची वान आडग्या, “नाक शप, नु रोमन उंडाव येम?” वाड आन्या, “हुं.” 28सरदार उत्तर इच्या, “निन रोमन नागरिकत्वद हक्क शेंगेम दुडलु इच्ची कोन्कुन्नान.” पौल आन्या, “निन तर फुट्टीननोट रोमन उंडान.” 29आप्पुड यवार वानदी चौकशी शेशेतोर उंडीर वार लगेच यंकाक सरकाशीर इंगा सरदारकी शेंगेम यरपु आय्येदेंक आंट्या, यप्पुड वानकी इदी यरका आय्या की वाड रोमन नागरिक उंडाड इंगा वाड कट्टी फेटनाड.
यहुदी नेताल मुंदार पौलदी भाषण
30यहुदी मंदी वान मिंदा याद आरोप आंचीनीर आदी येम उंडाद दिनदी खात्री कावाला आंका सरदार मनला उंड्या, आंका वाड इंगोगो नाड वान मोकळा शेशा इंगा महायाजकलाक इंगा आंता न्यायसभाक वगातळा जमा आय्येद हुकुम इच्ची पौलनी किंदीक येकेन वच्ची वान वार मुंदार नीला फडामत्या.
Currently Selected:
ACT 22: WNT
Highlight
Share
Compare
Copy
Want to have your highlights saved across all your devices? Sign up or sign in
