ACT 26
26
अग्रीप्पान मुंदार पौल शेशीनेद भाषण
1अग्रीप्पाड पौलनी आन्या, “नु नी बद्दल माटलाडी शकास्ताव.” आप्पुड पौल वानदी शेय फैनिक शेशी स्वता बचावला माटलाड्या. 2अग्रीप्पा महाराज, निन स्वतान धन्य समजास्तान दिनिचांग की यहुदी मंदी नी मुंदार ना विरुद्धला आंचीने आरोपलाद उत्तर इच्चेद नाक इबद संधी शिक्या. 3विशेष आंटे, यहुदी मंदी रितीरीवाजलु इंगा प्रश्नल निक यरका उंडाय, दिनिचांग निन निक विनंती शेस्तान की नाय माटलु धीर्यामता इनी तिस्कुनाला.
4निन जवान उंटीन आप्पुडनोट नाद जीवन ना प्रांतला इंगा यरुशलेम शहरला यल्ला जगास्तीन इदी आंता यहुदी मंदीक यरकाने उंडाद. 5वार नन्नु पहिलाकेल गुरतु फटतार इंगा वारदी इच्छा उंटे तर निन वगा परुशी आंटे यहुदी धर्मलोन वगा कट्टर गटलोन सभासद इ नाताता यल्ला जगास्तीन दीन बद्दल वार साक्ष इच्ची शकास्तार. 6इंगा इप्पुड परमेश्वर मा पुर्वजलाक याद अभिवचन इच्चीन्या दान आशा इचांग नाद कारवाई आयतुनाद; 7आदी अभिवचन पुर्ण आय्येद आशा फट्टी, मा बारा वंशल परमेश्वरदी सेवा मोब्बुफगुल पुर्ण मनता शेस्का वच्चीनार, महाराज, आद्दे आशा फट्टीने इचांग ना मिंदा यहुदी मंदी आरोप येशीनार. 8मीर यंता मंदी इंदु उंडार मिक इदी विश्वास फेट्टेदेंक येनटीक असंभव वाटास्ताद की परमेश्वर सच्चीनोरनी जित्ता शेस्ताड. 9नासरेथकर येशुन फेर विरुद्धला येम पण शेया वच्ची आदी निन शेशान इल्ला नाक पण वाटायदु. 10इंगा खरेमे निन इल्ला यरुशलेम शहरला शेस्तीन, येनटीक की मुख्य याजकला तीकेल नाक आल्ला अधिकार शिक्कीन्या, दिनिचांग निन शेंगेम परमेश्वर संतलान जेलला येस्तीन इंगा आ संत मंदीद जेम तिस्कुनेदेंक वच्या, वार विरुद्धला निन नाद सहमती इस्तीन. 11शेंगेम सभास्थानलाला निन वारकी शिक्षा इस्तीन इंगा परमेश्वर विरुद्धला जबरदस्तीता परमेश्वरदी निंदा शेशेदेंक शपतीन, निन वारदी छळ शेशेदेंक बैटुड शहरलाक पण फोदुन.
12वगा नाड दिमिष्क शहरकी फोयेदेंक मुख्य याजकलु नाक अधिकार इंगा परवानगी इच्चीर आप्पुड महाराज. 13दावाला मद्याना निन इंगा ना जताक उंडीने नालुग मंदी आजुबाजुक निन स्वर्गलोनदी यलगु चमकाशेद सुस्तीन, आदी यलगु सुर्य यलगु काना पण शेंगेम फेद्दाद उंड्या. 14मिम आंदार किंदा भुमी मिंदा फडी फोयतीम इंगा इब्री भाषाला ना जताक माटलाडेताप्पुड वगा आवाज निन इंटीन, आदी आवाज आन्या, “शौल, शौल, नु नाद छळ येनटीक शेस्ताव? कुशिंग कट्ट्यान तन्नेद नी इचांग हानिकारक उंडाद.” 15इंगा निन आंटीन, “प्रभु, नु यवाड उंडाव?” प्रभुड उत्तर इच्या, “निन येशुड उंडान, यवानदी नु छळ शेस्तुनाव. 16इप्पुड लेय इंगा नीला फड! दिनिचांग निन निक दर्शन इच्चीनान की निन्नु ना सेवक आंका निवडायाला इंगा येम पण निक सुपतीन इंगा येम सुप्यान दान साक्षीदार निन्नु ठराय मताला. 17निन निन्नु आ इस्राएल मंदी तीकेल इंगा यहुदी लेनोर मंदी तीकेल वाचाय मत्यान यवार तीकुड निन निन्नु दिनिचांग आंपतुनान. 18की नु वारी कंडलु उघडायाला इंगा वार मोब्बु लोन्केल यल्ली यलगु तीकुड इंगा शैतान अधिकार लोन्केल परमेश्वर तीकुड तिरगाला, इंगा वारकी पापलाद क्षमा शिक्काला इंगा ना मिंदा विश्वास फेट्टी पवित्र आयने मंदी जताक वतन शिक्काला.”
19दिनिचांग, अग्रीप्पा महाराज नाक याद स्वर्गीय दृष्टांत आय्या, दानदी निन आज्ञाभंग शेयालेद. 20पण पहिलातुक दिमिष्क लोन्टोर मंग यरुशलेम शहर लोन्टोर, यहुदिया प्रांत लोन्टोर आंदारकी इंगा यहुदी लेनोरकी पण प्रभुन वचनदी साक्ष इस्तीन, वार पश्चात्ताप शेशी, परमेश्वर तीकुड तिरगाला इंगा पश्चात्तापकी शोभाशी इल्ला फनुल शेय्याला इल्ला निन वारकी शपतीन. 21दिनिचांग निन परमेश्वर भवनला उंडीनाप्पुड काही यहुदी मंदी नन्नु फट्टीर इंगा जेमता मतेशेद प्रयत्न शेशीर. 22पण परमेश्वर नाक मदत शेशा दिनिचांग निन इंदु नीला फडीनान इंगा शिन्नावोर फेद्दावोर आंदार मुंदार साक्ष इस्तुनान, येम पण मुंदारकी आय्येद उंड्या, दिन बद्दल संदेष्ट्याल इंगा मोशेड येम शप्या दान इडशी निन इंगोगोट शप्पान. 23वार आनीनीर की परमेश्वर अभिषिक्त यवाड ख्रिस्त वाड दुख सहन शेशी इंगा सच्चीनोर लोन्केल लेपेदेंक वच्ची वाड पहिला उंडी, यवाड यहुदी मंदीक इंगा यहुदी लेनोरकी पण परमेश्वर यलगुद घोषणा शेशी.#यशया 40.
24पौल स्वता बचाव संबंधला माटलाडतुन्या आप्पुड फेस्त वान कीरली आन्या, “पौल, नु पागल उंडाव येम, जास्त ज्ञान इचांग नु पागल आयनाव.” 25पौल उत्तर इच्या, “फेस्त महाराज, निन पागल कालेद; तर याय माटलु खरेम उंडाय इंगा योग्य उंडाय, आटला बद्दल निन माटलाडतुनान. 26इंदु हजर उंडीने महाराजकी दीन बद्दल शिंगार माहिती उंडाद इंगा दिनिचांग निन वान मुंदार माटलाडी शकास्तान, वान देगाटेल यायीच माटलु दागालेव, इल्ला नाक खात्रीता उंडाद, निन इदी आंटुनान, येनटीक की इदी माटा यादाना कोपर्याला कालेद. 27अग्रीप्पा महाराज, संदेष्ट्याल येम राशीनार दान मिंदा नीद विश्वास उंडाद येम? नीद दान मिंदा विश्वास उंडाद.” इदी नाक यरका उंडाद. 28आप्पुड अग्रीप्पाड आन्या, “इंता कमी वेळला ख्रिस्ती आय्येदेंक नु नाद मन तिप्पी शकाशाव इल्ला निक वाटास्ताद येम?” 29पौल उत्तर इच्या, “कमी वेळला आन लेकाते जास्त वेळला आन, निन यल्ला उंडान आल्ला फक्त नुये लेद तर इबद यवार-यवार इंदु कुसनी नाय माटलु इंटुनार वार आंदार, फक्त नन्नु कट्टीने इ साकळीलान इडशी, ना लेका विश्वास फेटेतोर कावाला, इल्ला नाद परमेश्वरकी प्रार्थना उंडाद.”
30मंग राजाड, बर्णिका, राज्यपाल इंगा वार जताक कुसनीनोर, आंदार लेशीर. 31वार न्यायालय लोन्केल बैटीक यल्लीनेंका वगामेगारनी माटलाडेदेंक आंटीर, वार आनीर, “इ मनशी इल्ला तर येमीच शेयालेद, येनटी इचांग इनकी तुरुंगवास लेकाते सच्चेद शिक्षा इयाला.” 32अग्रीप्पाड फेस्तन आन्या, “इ मनशी कैसर तीकुड न्याय आडगा लेकुंटे, तर वाड इडी शकास्तुन्या.”
Currently Selected:
ACT 26: WNT
Highlight
Share
Compare
Copy
Want to have your highlights saved across all your devices? Sign up or sign in
