ACT 8
8
ख्रिस्ती मंदीद छळ इंगा वारदी पांगा पांग
1शौल स्तेफननी मतेशेदेंक सहमत उंड्या. आबदनोटे यरुशलेम शहरलोन मंडळीद शेंगेम छळ सुरु आय्या, प्रेषितलान इडशी इंगोगोर आंदारुच विश्वास फेट्टेतोर शिष्यल यहुदीया इंगा शोमरोन प्रांतला, पांगाशी फोईर. 2काही धार्मिक मंदी स्तेफननी बुडशीर इंगा वान इचांग वार शेंगेम येडशीर. 3पण शौल ख्रिस्तन मंडळीद छळ शेशेद चालु शेशा; वाड इल्लु इल्लुक फोदु इंगा विश्वास फेटेतोर मनसुलान इंगा आंड्योरनी फट्टी जग्गुका येका फोदु, इंगा जेलला येयदु.
पवित्र आत्मा तीकेल प्रेषितलाद यहुदीया इंगा शोमरोनलोनदी सेवाकार्य — 8:4—12:25
शोमरोनला फिलिप्पदी प्रचार
4आप्पुड यवार विश्वास फेटेतोर आन्नी तीकुड पांगाशीनीर, वार यंदुक पण फोदुर आंदु सुवार्ता शपदुर. 5फिलिप्प शोमरोन प्रांतलोन वगा शहरकी फोया, वाड ख्रिस्तन बद्दल घोषणा शेशा आंदुटोर मंदी फिलिप्पी माटलु इनीर,. 6फिलिप्प याय चिन्हल शेयदु इंगा याय माटलु वारकी शपदु, आय वार लक्ष इच्ची इनदुर. 7येनटीक की यवारकी अशुद्ध आत्माल आंटीन्या वार दिंटल्योन्केल आय बेग्गे कीरली बैटीक यल्ली फोया; इंगा आंदु शेंगेम लंगड्योर इंगा लकवा आंटीने मंदी शिंगार आय्यीर. 8दिनिचांग आ शहरलोन मंदी शेंगेम आनंदीत आय्यीर.
शिमोन जादुगर
9शिमोन फेरोड वगा मनशी आ नगरला निलदु, वाड जादु-टोना शेशी शोमरोन प्रांतलोन मंदीन आश्चर्य चकीत शेयदु इंगा स्वतान शेंगेम फेद्दावोड समजायदु. 10इंगा शिन्नावोरकेल फेद्दावोर नंताक आंता मंदी वानदी सन्मान शेयदुर, इंगा आंदुर, “परमेश्वरदी महान शक्ती इल्ला यवारनी आंटार वाडे इ मनशी उंडाड.” 11वाड शेंगेम नाळाकेल मंदीन वान जादुता चकीत शेशी फेट्टीन्या, आंका मंदी वानदी इनदुर. 12पण यप्पुड परमेश्वरदी राज्य इंगा येशु ख्रिस्तन फेर बद्दल फिलिप्प आ मंदीक सुवार्ता शप्या आप्पुड वार वान मिंदा विश्वास फेट्टीर, आप्पुड मन्सुल, आंड्योर आंदारुच बाप्तिस्मा तिस्कुनीर. 13आप्पुड शिमोन पण विश्वास फेट्या: इंगा वानदी बाप्तिस्मा आयनेंका, वाड फिलिप्प जताक निलचेदेंक आंट्या; इंगा चमत्कारलु इंगा अद्भुत चिन्हल आय्येताप्पुड सुशी, शिमोन आश्चर्यता चकीत आय फोया.
शोमरोनला पेत्र इंगा योहान
14यरुशलेम शहरलोन प्रेषितलु इदी इनीर की शोमरोनला मंदी परमेश्वर वचननी स्वीकार शेशीनार, आंका पेत्रन इंगा योहाननी प्रेषितलु शोमरोनलोन मंदी तीकुड आंपीर. 15मंग पेत्र इंगा योहान आंदुक वच्चीर, आप्पुड वार शोमरोनलोन विश्वासी मंदीक पवित्र आत्मा शिक्काला आंका, प्रार्थना शेशीर. 16इ मंदीद फक्त प्रभु येशुन फेरता बाप्तिस्मा आयन्या, पण पवित्र आत्मा इप्पुड नंताक यवार मिंदाच दिगा लेकुंड्या. 17मंग पेत्र इंगा योहान इर वार नत्ती मिंदा शेईल फेट्टीर, इंगा वारकी पवित्र आत्मा शिक्या. 18आप्पुड शिमोन सुशा की, प्रेषितलु शेईल फेट्टीर आंटे मंदीक पवित्र आत्मा शिकताद, इदी सुशी शिमोन प्रेषितलाक दुडलु इच्ची आन्या. 19“निन यवान मिंदा शेय फेट्यान वानकी पवित्र आत्मा शिक्की, इल्ला अधिकार नाक पण इंडा.” 20पेत्र शिमोननी आन्या, “नीद इंगा नी दुडलाद नाश कावाला; येनटीक की परमेश्वरदी दान नु दुडलाता कोन्कुनेद विचार शेस्ती.” 21इ फनीला नु मा जताक उंडी शकायाव, येनटीक की नीद अंतकरण परमेश्वर मुंदार शिंगार लेद. 22दिनिचांग इ वाईट माटा इचांग पश्चात्ताप शेय, प्रभुनकी प्रार्थना शेय, कदाचित नी मनलोन विचारलान वाड क्षमा शेशी. 23येनटीक की निन सुस्तुनान की नु शेद इर्ष्यामता निंडीनोड उंडाव इंगा नु पाप बंधनला उंडाव. 24शिमोन उत्तर इच्या, नुये ना इचांग प्रभुन देगार प्रार्थना शेय की याय माटलु नु नाक शपती, दांटल्योन्केल यादुच ना मिंदीक दावाराद. 25मंग पेत्र इंगा योहान स्वताद साक्ष मंदीक इच्ची, “प्रभुनदी वचन शप्पीनेंका वार यरुशलेम शहरकी वापस वच्चीर, वापस वच्चेताप्पुड दावाला वार शेंगेम शोमरोनी उळाला सुवार्ता शप्पीर.”
फिलिप्प इंगा कुश देशामटोड अधिकारी
26परमेश्वर दुत फिलिप्प जताक माटलाड्या इंगा आन्या, “लेय इंगा यरुशलेम शहरकेल गाजा शहर तीकुड फोयताद आ दावाता दक्षिण तीकुड फो.” आदी दावा रेगीस्तान लोन्केल फोताद. 27मंग वाड लेशा. इंगा फोया, दावाला वानकी वगाड इथिओपियाटोड वगा मनशी भेटाशा, आ मनशी षंढ उंड्या, वाड इथिओपियालोन कांदके रानी दान मंत्री इंगा खजिनदार उंड्या. वाड यरुशलेम शहरकी उपासना शेशेदेंक फोयन्या. 28इप्पुड वाड वापस फोयेताप्पुड वान रथला कुसनी यशया संदेष्ट्यानदी पुस्तक वाचायदु. 29पवित्र आत्मा फिलिप्पनी आन्या, “आ रथ देगार फो.” 30मंग फिलिप्प आ रथ देगार फारका फोया, आप्पुड वाड वान यशया संदेष्ट्यानदी पुस्तक वाचाशेताप्पुड इन्या, इंगा वान आडग्या, “नु येम वाचास्तुनाव आदी निक तेलस्तुनाद येम?” 31वाड आन्या, “याड नंताक नाक यवाडाना इदी समजायमती शप्पाड आड नंताक नाक यल्ला तेल्ची?” इंगा वाड फिलिप्पकी रथलोंग यक्की वान देगार कुसनेदेंक शप्या.
32पवित्र शास्त्र लोन्केल याद भाग वाड वाचायदु आदी इदी उंड्या, “बली इचांग येका फोये मेंढऱ्या लेका वाड उंड्या; लोकर कोशेतोन मुंदार शांत उंडे कोकरु लेका वाड शांत उंड्या, वाड वानदी नोर तेरवालेद: 33वानदी अपमान आय्येताप्पुड वानकी न्याय शिक्कालेद: इंगा वान पिढीद वर्णन यवार शेशार? येनटीक की पृथ्वी मिंदुडदी वानदी जीवन संपाय मतेदेंक वच्चीनाद.”#यशया 53:7-8. 34आ खजिनदार फिलिप्पनी आन्या, “कृपा शेशी नाक शप, संदेष्ट्याड इदी यवार बद्दल आंटाड? स्वता बद्दल आंटुनाड, की इंगोगोन बद्दल?” 35मंग फिलिप्प माटलाडेद चालु शेशा; इंगा इद्दे शास्त्र भागकेल सुरुवात शेशी वानकी येशुन बद्दल सुवार्ता शप्या. 36वार इद्दार प्रवास शेशेताप्पुड. वार वगा इल्लोन जागा देगार वच्चीर यंदु नेळ उंड्या; आप्पुड अधिकारी आन्या, “सुड, इंदु नेळ उंडाय; नाक बाप्तिस्मा तिस्कुनेदेंक येम अडचण उंडाद?” 37फिलिप्प आन्या, जर नु पुर्ण मनता विश्वास फेटते तर तिस्कुनी शकास्ताव, वाड उत्तर इच्या, येशु ख्रिस्त परमेश्वर कोडकु उंडाड इल्ला निन विश्वास फेटतान. 38इंगा खजिनदार रथ थांबाय मतेद आज्ञा इच्या, मंग फिलिप्प इंगा खजिनदार इद्दार पण दिगी नेळालोंग फोईर, इंगा फिलिप्प वानदी बाप्तिस्मा शेशा. 39वार यप्पुड नेळा बैटीक वच्चीर, आप्पुड प्रभुनदी आत्मा फिलिप्पनी धुराम येका फोया; इंगा आ खजिनदारकी फिलिप्प वापस कमसाक फो, पण वाड खजिनदार मुंदारकी आल्ले शेंगेम आनंदता प्रवास शेस्का इल्लुक फोया. 40निन अजोत नगरला उंडान. इल्ला फिलिप्पकी कमशा इंगा मुंदारकी फोयेताप्पुड याय-याय उळ आंट्या आ आन्नी उळाला वाड सुवार्ता शप्या, मंग वाड कैसरीया शहरकी फोया.
Currently Selected:
ACT 8: WNT
Highlight
Share
Compare
Copy
Want to have your highlights saved across all your devices? Sign up or sign in
