EPH 3
3
परमेश्वर गुप्त रहस्यद प्रकटीकरण
1इद्दे कारण इचांग निन पौल मी यहुदी लेनोर इचांग ख्रिस्त येशुन बंदी उंडान. 2परमेश्वर वान कृपाता मी इचांग नाक याद जिम्मेदारी इच्चीनाड, दान बद्दल मीर इनीन्याला; 3यल्ला नाक प्रगटीकरनता सत्यद रहस्य तेलच्या दान बद्दल निन रव्वासा पहिलाने राशीनान. 4यप्पुड मीर आदी वाचाशार आप्पुड ख्रिस्तन रहस्य बद्दल नाद ज्ञान मिक तेल्ची, 5आदी रहस्य यला इप्पुड वान आत्माता वान पवित्र प्रेषितलाक इंगा संदेष्ट्यालकी प्रकट आय्या, आल्ले आदी इंगोगो पिढीलोन मन्सुला बिळ्ळाक शप्पेदेंक दालेकुंड्या. 6आदी रहस्य इदी उंडाद की, यहुदी लेनोर मंदी येशु ख्रिस्तला सुवार्ताता वारसदार इंगा वगा फयलोन्टोर अवयवलु उंडार इंगा अभिवचनकी भागीदार उंडार.
7परमेश्वर वान सामर्थी प्रभावता याद कृपादान नाक इच्चीन्या आंका निन आ शुभवर्तमान सेवक आयतीन. 8जरी निन परमेश्वर मंदीला आंदार काना शिन्नावोड उंडान तरी निन ख्रिस्तन अगम्य समृद्धीद सुवार्ता यहुदी लेनोरकी शप्पाला इदी कृपादान नाक इच्चीनेद उंडाद,#१करिंथ 15:9. 9इंगा या परमेश्वर आंताच बनायमत्या वाड सुरुवातकेल याद रहस्य दाशी फेट्टीन्या आदी यल्ला फनी शेस्ताद इदी आंता मंदीक निन प्रगट शेयाला. 10दिनिचांग की इप्पुड मंडळी तीकेल सत्ताधीशलाक इंगा मोडामलोन शक्तीलाक परमेश्वरदी अलग-अलग प्रकारदी ज्ञान तेल्वाला. 11परमेश्वर सनातन काळ केल याद उद्देश वान मनला फेट्टीन्या, आदी वाड मना प्रभु येशु ख्रिस्त तीकेल पुर्ण शेशीनाड. 12ख्रिस्तला विश्वास इचांग मनाम हिम्मतता इंगा भरोसाता परमेश्वर देगार वच्ची शकास्ताम. 13दिनिचांग, निन विनंती शेस्तान, मी इचांग नाक जे त्रास आयतुनाद दानिचांग मीर हिंमत हारायाकुंडा येनटीक की इदी त्रास मी गौरव कावाला आंका उंडाद.
विश्वासी मंदी इचांग प्रार्थना
14-15दिनिचांग निन परमेश्वर आब्बान मुंदार मोकाळलु टेकाशी प्रार्थना शेस्तान, यवाड स्वर्गला इंगा पृथ्वी मिंदा आन्नी वंशलान निर्माण शेशी आटलाक फेर इच्चीनाड. 16वान गौरवी समृद्धीता वाड मिक आदी इयाला, परमेश्वर आत्माता मिक सामर्थ्य शिक्की मीर मी लोनुड मनशीला बलवान कावाला. 17इंगा निन प्रार्थना शेस्तान की विश्वासता ख्रिस्त मी अंतकरणला निलवाला दिनिचांग की, मी मुळ्ळु इंगा जोता प्रेम मिंदा टीकाशी उंडाला. 18दिनिचांग की, यवार परमेश्वर मंदी उंडार वार सोबत ख्रिस्तन प्रेमदी रुंदी, लांबी, उंची इंगा खोली यंता उंडाद इदी मीर समजाशी तिस्कुनाला. 19आंटे मिक तेल्वाला की ख्रिस्तद महान प्रेम याद आंदारनी यंकाक येस्ताद, दिनिचांग की मीर परमेश्वर पुर्णताता परिपुर्ण कावाला.#कलस्से 2:3.
20इंगा इप्पुड परमेश्वर यवाड वान सामर्थ्यता मना नडमा फनी शेस्ताड इंते लेद तर मनाम येम आडगुताम इंगा विचार शेस्ताम दान काना जास्त फनी शेशेदेंक सामर्थी उंडाड, 21वानकी मंडळीला इंगा ख्रिस्त येशुला पिढ्यान पिढ्याल नंताक युगानयुग गौरव उंडाला. आमेन.
Currently Selected:
EPH 3: WNT
Highlight
Copy
Compare
Share
Want to have your highlights saved across all your devices? Sign up or sign in