GAL 5
5
विश्वासता जगाशेद इंगा स्वातंत्र्य — 5:1—6:18
1इ स्वातंत्र्य इचांग ख्रिस्तड मनालनी मुक्त शेशीनाड आंका मीर टीकाशी उंडना इंगा वापस दासत्व जु किंदा दाकुंडा. 2सुडना, निन पौल मिक इदी शपतान की, मीर जर सुंता शेस्कुंटीर तर मिक ख्रिस्त तीकेल येमीच फायदा काक फोई. 3येनटीक की सुंता आयने प्रत्येक मनशीक निन वापस चेतावनी इच्ची शपतान की, वाड पुर्ण नियमशास्त्र पाळायदेंक मजबुर उंडाड. 4मीर यवार नियमशास्त्रता नितीमान ठराशेद इच्छा फेटतार मीर ख्रिस्त तीकेल इंगा परमेश्वर कृपा तीकेल धुराम आय फोयनार, 5पण परमेश्वरदी आत्माता मनाम, विश्वासता आ नितीमत्वद आशा फट्टी दावा सुस्तुनाम. 6ख्रिस्त येशुला सुंता आयते का काकुंटे दिनदी येमीच महत्व लेद; महत्व उंडाद तर फक्त विश्वासदी याद प्रेमता फनी शेस्ताद. 7मीर तर शिंगार ख्रिस्ती जीवन जगायदुर; इप्पुड मीर सत्य मिंदा नडवाराद आंका मिमलान यवार थांबाय मतनार? 8मिमलान यवाड फिल्चीनाड आ परमेश्वरदी इल्ला शिकवन लेद, 9“रव्वासा खमीर पुर्ण फिस्कीने फिंडीन खमीर शेस्काडताद.” 10नाक मी बद्दल प्रभुला खात्री उंडाद की, मीर इंगोगोट विचार शेयाक फोयार, पण यवाड मिमलान यरपीस्तुनाड वाड यवाडाना उंटे परमेश्वर वानकी दंड इच्ची. 11इप्पुड हे आक्का तम्मुळ्ळालाला, निन जर इप्पुड नंताक सुंताद उपदेश शेस्तुनान, तर नाद छळ येनटीक आयतुनाद? आल्ला उंटे तर क्रुस इचांग याद विरोध आयताद आदी समाप्त आयतुन्या. 12यवार मी दिंटल्या अस्थिरता उत्पन्न शेस्तार वार स्वतान नपुंसक शेस्काडीन्टे बागा आयतुन्या.
13येनटीक की आक्का तम्मुळ्ळालाला, मिमलान स्वातंत्र्य इचांग फिल्चेदेंक वच्चीनाद. तरी आ स्वातंत्र्यता देह वासनालकी संधी इयाकुंडा. पण प्रेमता वगामेगारदी सेवा शेयना. 14येनटीक की, “यल्ला स्वता मिंदा आल्ले नी शेजारी मिंदा प्रेम शेय.” इ वक्का वचनला आंता नियमशास्त्र पुर्ण आयताद. 15पण मीर जर वगामेगारनी कोरकुतार इंगा तिनेस काडतार, तर मीर वगामेगारदी नाश शेयाराद आंका सावधान उंडना.
पवित्र आत्माद मार्गदर्शन.
16दिनिचांग निन मिक शपतान, पवित्र आत्मा लेका नडना, आंटे मीर देहवासना पुर्ण शेयाक फोयार. 17येनटीक की देहवासना तर पवित्र आत्मा विरुद्ध उंडाद इंगा पवित्र आत्मा देहवासना विरुद्ध उंडाद; इर इद्दार पण वगामेगार विरुद्ध उंडार, दिनिचांग मीर येम पण शेशेदेंक सुस्तार आदी शेशी शकायार. 18मीर जर पवित्र आत्मा प्रेरणाता नडस्तार तर मीर नियमशास्त्र अधिन लेर. 19इप्पुड देहस्वभावी फनुल प्रकट उंडाय, आंटे व्यभिचार, घान फनुल, कामातुरपना, 20मुर्तीपुजा, जादुटोणा, वैर, जगडाम, इर्ष्याम, कोफाम, विरोध, फुट, गट, 21द्वेष, सराय तागेद, दंगल इंगा इटला लेका इंगा; इटला बद्दल निन यल्ला पहिला शप्पीन्टीन आल्ले इप्पुड पण शपतान की, इ माटलु शेशेतोरकी परमेश्वर राज्यद वतन शिक्काक फोई. 22पण पवित्र आत्मा तीकेल उत्पन्न आय्येय फळलु इ उंडाय: प्रेम, आनंद, शांती, सहनशीलता, ममता, चांगुलपणा, इमानदारी इंगा 23नम्रता इंगा इंद्रियदमन; इटला विरुद्ध यादुच नियमशास्त्र लेद. 24यवार ख्रिस्त येशुला उंडार वार शारीरिक भावनाल इंगा वासनाल जताक देहस्वभावनी क्रुस मिंदा खिळाशीनार.
25मनाम जर पवित्र आत्मा सामर्थ्यता जगास्ताम तर मनाम आत्मा प्रेरणाताने नडवाला. 26मनाम घमंडी आय्यी, वगामेगारनी चिडाया मताराद इंगा वगामेगारदी इर्ष्याम शेयाराद.
Currently Selected:
GAL 5: WNT
Highlight
Copy
Compare
Share
Want to have your highlights saved across all your devices? Sign up or sign in