LUK 1
1
येशुनदी जन्म इंगा सुरुवातीद जीवन — 1:5—2:52
प्रस्तावना
1या माटलाद माक पक्का खात्री आयनाद, आय माटलु यवार पहिलाकेल सुशेतोर इंगा वचनटोर सेवक उंडीर, 2वार आय यल्ला नाक सोपाशी इच्चीर आदी आल्ले अनुक्रमता राशेद फनी शेंगेम मंदी शेतल्या तिस्कुन्नार. 3दिनिचांग हे थियफिल महाराज, निन आन्नी माटलाद बोड्ड्याकेल शिंगार शोध शेशीनेंका नाक पण इदी बागा वाटाशा की, इ आन्नी घटनाल बद्दल निक अर्थपुर्ण माहिती रायाला. 4दिनिचांग की या माटलाद शिक्षण मनाक शिक्कीनाद दानदी सत्य मनाक पुर्णपणे यरका कावाला.
बाप्तिस्मा शेशे योहान जन्मद भविष्य
5यहुदीया प्रांतोड राजा हेरोद इन दिनमुलाला, जखऱ्या फेरोड यवाडो याजक उंड्या. वाड अबीया याजक घरानाटोड उंडी वान वडती अहरोन वंश लोनदी उंड्या इंगा दान फेर अलीशिबा उंड्या. 6वार इद्दार परमेश्वरदी यरपु फेट्टेतोर उंडीर इंगा परमेश्वर आन्नी आज्ञालदी इंगा विधीलाद निर्दोषलेका पालन शेयदुर. 7पण वारकी बिडा लेकुंड्या, अलीशिबाद गोड्डु उंड्या इंगा वार इद्दार पण मुसल्योर आयनीर.
8मंग इल्ला आय्या की, वाड वान बारी नुसार परमेश्वर मुंदार याजकदी फनी शेशेताप्पुड, 9याजकला रितीलेका परमेश्वर भवनला धुपाम काल्चेदेंक चिट्ट्याल येशी वानदी निवड शेशेदेंक वच्या.#निर्गम 30:7. 10इंगा आंता मंदीद समुदाय धुपाम कालचेताप्पुड बैट्या प्रार्थना शेस्केन नीला फडीन्या. 11आप्पुड परमेश्वर दुत, धुपवेदी मंची शेय तीकुड नीला फडीनोड वानकी कमशा. 12वान सुशी जखऱ्याड यरस्कुन्या. 13पण परमेश्वर दुत वान आन्या, जखऱ्या यरस्कुनाक, येनटीक की नीद प्रार्थना इनेदेंक वच्चीनाद इंगा नी वडती अलीशिबादान तीकेल निक कोडकु आय्यी, नु वानदी फेर योहान फेट. 14इंगा आप्पुड निक आनंद इंगा उल्लास आय्यी इंगा वान जन्मता शेंगेम मंदी खुश आय्यार. 15येनटीक की वाड परमेश्वर कंडलाला महान आय्यी इंगा वाड अंगुरदी रस इंगा सराय यप्पुडुच तागाक फोई इंगा वाड आम्मा कडपुला उंडी आप्पुडे पवित्र आत्माता निंडीनोड उंडी.#इफिस 5:18; शास्ते 13:4-5. 16वाड इस्राएल संतानलोन शेंगेम मंदीन, वार प्रभु परमेश्वर तीकुड तिप्पी. 17इंगा परमेश्वर मंदीन तैयार शेशी, आब्बागारी मनलु वार बिळ्ळा तीकुड तिप्पी इंगा या बिळ्ळु आज्ञाल मानायार वारनी नितीमान आज्ञाला येका वच्ची प्रभुन इचांग तैयार शेशीने मंदीन नीला फडामती, वाड एलीयान आत्माता इंगा सामर्थ्यता वार मुंदार नडशी.#मलाखी 4:5-6. 18इंगा जखऱ्याड स्वर्गदुतनी आन्या, “इदी आय्यीच आंका निन यल्ला विश्वास फेटदुन? येनटीक की निन तर मुसल्योड उंडान इंगा ना वडती पण मुसलीद उंडाद.” 19आप्पुड स्वर्गदुत वानकी उत्तर इच्या, “निन परमेश्वर मुंदार नीला फडेतोड गब्रीयल उंडान इंगा नी जताक माटलाडेदेंक इंगा निक सुवार्ता शप्पेदेंक नन्नु आंपेदेंक वच्चीनाद.#दानिएल 8:16; 9:21. 20सुड, इदी आय्यी नंताक निक माटलाडा दाक फोई इंगा नु मुक्योड निलच्याव येनटीक की नाय माटलु याय योग्य वेळला पुर्णपणे खरेम आय्यी, आ माटला मिंदा नु विश्वास फेट्टालेद.” 21आप्पुड जखऱ्यानदी दावा सुशेतोर मंदीक वाड परमेश्वर भवनला इंता शप येनटीक निलच्या आंका दिनदी नवल वाटाशा. 22वाड बैटीक वच्ची नेंका वानकी वार जताक माटलाडा दाकुंदु. आप्पुड वारकी तेलच्या की, परमेश्वर भवनला वाड दृष्टांत सुशीनाड. वाड वारकी इशारालता समजाय मतदु पण वाड आल्ले मुक्योड निलच्या. 23मंग इल्ला आय्या की वान सेवाद वेळ पुर्ण आयनेंका वाड इल्लुक फोया. 24काही नाळ आयनेंका वान वडती अलीशिबाद रंजलमनशी निलच्या इंगा आय्यीद नेलाल दोक्केन निलच्या, आदी आन्या, 25मंदीला आय्येद नाद अपमान धुराम शेशेदेंक प्रभुड ना तीकुड सुशा इंगा आप्पुड वाड ना इचांग इल्ला शेशा.#उत्पत्ती 30:23.
कुंवारी मरीया दानकी स्वर्गदुतदी संदेश
26अलीशिबाद यप्पुड आर नेलालदी रंजलमनशी उंड्या परमेश्वर गब्रीयल स्वर्गदुतनी गालील प्रांतलोन नासरेथ फेर उरुक, 27वगा कुंवारीदान तीकुड आंप्या. दानदी दाविद घरानालोन योसेफ जताक इड्याम आयन्या इंगा आ कुंवारीदानदी फेर मरीया उंड्या. 28स्वर्गदुत दान तीकुड वच्चीगास आन्या, दंडाम! नी मिंदा परमेश्वरदी शेंगेम कृपा आयनाद. प्रभुड नी जताक उंडाड. 29पण आदी वान माटलाता यरस्कुन्या इंगा इ दंडामदी अर्थ येम उंडी दिनदी दानकी नवल वाटाशा. 30स्वर्गदुत दान आन्या, “मरीये, यरस्कुनाक, परमेश्वर नी मिंदा कृपा शेशीनाड. 31सुड! नु रंजलमनशी आय्याव इंगा निक कोडकु आय्यी वान फेर नु येशु फेट.#यशया 7:14. 32वाड महान आय्यी इंगा वान महान परमेश्वर कोडकु आन्यार इंगा प्रभु परमेश्वर वानकी वान आब्बानदी दाविददी सिंहासन इच्ची.#स्तोत्रसंहिता 132:1; यशया 9:6-7. 33वाड याकोब घरानाद मिंदा युगानयुग राज्य शेशी इंगा वान राज्यद अंत यप्पुडुच काक फोई.”#2 शमुवेल 7:12-16; इफिस 1:8; दानिएल 2:44. 34आप्पुड मरीयाद स्वर्गदुतनी आन्या, इदी यल्ला आय्यी? येनटीक की नाक मनशी यरका लेड. 35स्वर्गदुत दान आन्या, पवित्र आत्मा नी मिंदा वच्ची इंगा महान परमेश्वरदी सामर्थ्य नी मिंदा सावली शेशी इंगा दिनिचांग या पवित्र बिडाद जन्म आय्यी, वान परमेश्वर कोडकु आन्यार. 36सुड, नी गोनगोतला अलीशिबाद पण मुस्लीद उंडी रंजलमनशी उंडाद इंगा दान कडपुला कोडकु उंडाड इंगा यादान गोड्डु आंदुर आदी इप्पुड आर नेलालदी रंजलमनशी उंडाद. 37येनटीक की परमेश्वरकी यादुच माटा अशक्य लेद.#मत्तय 19:26; यिर्मया 32:27. 38मरीयाद आन्या, खरेमे “निन प्रभुन दासी उंडान, नु यल्ला आंटी आल्ले कावाला.” मंग स्वर्गदुत आंदुकेल यल्ली फोया.
मरीयाद अलीशिबादान भेटास्ताद
39आ दिनमुलाला मरीयाद लेशा इंगा लगालगा यहुदिया प्रांतलोन कोंडाल दावाता वगा नगरकी फोया. 40आदी जखऱ्यान इंटल्योंग फोया इंगा अलीशिबा दानकी अभिवादन शेशा. 41यल्ला मरीया दानदी अभिवादन अलीशिबाद इन्या दान कडपुलोन बिडा उडी मत्या इंगा अलीशिबाद पवित्र आत्माता निंडी फोया. 42आदी बेग्गे आवाज शेशी आन्या, “आंड्योरला नु धन्य उंडाव इंगा नी कडपुलोन फळ धन्य उंडाद. 43ना प्रभुन आम्मा ना तीकुड दावाला इदी मान नाक यंदुकेल?” 44यप्पुड नी अभिवादनदी आवाज ना गुम्मा मिंदा फड्या, आप्पुड ना कडपुलोन बिडा आनंदता उडी मत्या 45यवार विश्वास फेट्टीर आदी धन्य उंडाद, येनटीक की याय माटलु प्रभुड दानकी शप्या आय पुर्ण आय्यी?
मरीया दानदी स्तोत्र
46मरीयाद आन्या,
“नाद आत्मा प्रभुन महान मानास्ताद,
47इंगा परमेश्वर यवाड ना ताराशेतोड उंडाड,
वान इचांग नाद आत्मा आनंदीत आयनाद.#1 शमुवेल 2:1.
48येनटीक की वाड वान दासी दानदी दैन्य परिस्थिती सुशीनाड.#1 शमुवेल 1:11; लूक 1:42; मलाखी 3:12.
इप्पुडनोट आन्नी पिढ्याल नन्नु धन्य आनी.
49येनटीक की यवाड सर्वसमर्थ परमेश्वर उंडाड
वाड ना इचांग फेद्दा फनी शेशीनाड;
इंगा वानदी फेर पवित्र उंडाद.
50यवार वानदी यरपु फेटतार#स्तोत्रसंहिता 103:17.
वार मिंदा वानदी दया पिढ्यान पिढ्याल उंडी
51वाड वान शेयता सामर्थी फनुल शेशीनाड;
यवार घमंडी अंतकरणटोर उंडार
वारदी वाड पांगा पाग शेशीनाड.#2 शमुवेल 22:28; स्तोत्रसंहिता 89:10.
52वाड राज्य शेशेतोरनी
वार सिंहासन मिंदकेल जग्गी तिशीनाड
इंगा गरीबोरनी उंच शेशीनाड.#1 शमुवेल 2:7; ईयोब 5:11; स्तोत्रसंहिता 113:7-8.
53वाड आकाल आयने मंदीन उत्तम पदार्थलाता तृप्त शेशीनाड.#1 शमुवेल 2:5; स्तोत्रसंहिता 107:9.
इंगा धनवानोरनी उत्ता शेतलाता वापस आंपीनाड.
54वाड वान दयाद नेहमी ध्यानाम शेशी
वान सेवक इस्राएलदी मदत शेशीनाड.#स्तोत्रसंहिता 98:3; यशया 41:8-9.
55यल्ला वाड मना पुर्वजलाक आंटे अब्राहामकी
इंगा वान संतानलाक अभिवचन इच्चीन्या.”#उत्पत्ती 22:17; मीखा 7:20.
बाप्तिस्मा शेशेतोन योहानदी जन्म
56अलीशिबादान जताक मुड नेलाल निलचीनेंका मरीयाद दान इल्लुक वापस फोया.
57अलीशिबा दानदी बांती आय्येद वेळ आयनेंका, आदी वगा मोगाबिडाक जन्म इच्या. 58प्रभुड दान मिंदा फेद्दा दया शेशीनाड, इदी दान शेजाऱ्याल इंगा नातेवाईकलु इनीर इंगा वार दान आनंदला सहभागी आय्यीर. 59मंग इल्ला आय्या की, योड नाळाक बिडाद सुंता शेशेदेंक वार वच्चीनाप्पुड वान आब्बान फेर मिंदा वार बिडाद फेर पण जखऱ्या फेटेतोर उंडीर.#उत्पत्ती 17:12; लेवी 12:3. 60पण वान आम्मा उत्तर इच्या, “लेद, तर वानदी फेर योहान फेट्टेद उंडाद.” 61वार दान आनीर, नी गोनगोतला इ फेरोर यवारुच लेर. 62यंकसार वार वान आब्बान इशारा शेशी आडगीर, वानदी फेर येम फेट्टाला, इल्ला नीद इच्छा उंडाद 63आप्पुड वाड राशेदेंक पाटी आडग्या इंगा, वानदी फेर योहान उंडाद, इल्ला राशा आप्पुड वार आंदारकी दिन मिंदकेल शेंगेम नवल वाटाशा. 64आद्दे वेळला वानदी नोर उघडाशा इंगा वानदी न्यालका मोकळा आय्या इंगा वाड माटलाडेदेंक आंट्या इंगा परमेश्वरकी धन्यवाद इच्चेदेंक आंट्या. 65आप्पुड आंदार शेजारोर यरस्कुनीर इंगा आंता यहुदीया प्रांतला आंदार इ माटलु माटलाडेदेंक आंटीर. 66यवार इदी इनीर वार आंदार मनला विचार शेशेदेंक आंटीर, वार आनीर, इ बिडा मुंदारकी यवाड आय्येतोड उंडाड? प्रभुड वान जताक उंडाड इल्ला वार लक्षला वच्या.
जखऱ्यानदी स्तोत्र
67वान आब्बाड जखऱ्याड पवित्र आत्माता निंड्या इंगा वाड पण भविष्यवाणी शेशा; वाड आन्या,
68“इस्राएल प्रभु परमेश्वरदी, स्तुती उंडाला,
येनटीक की वाड मना मंदीत भेट तिस्कुन्या
इंगा मंदीद किंमत इच्ची सुटका शेशीनाड.#स्तोत्रसंहिता 111:9; 41:13.
69वाड वान सेवक दाविद इन गोनगोत लोन्केल
मना इचांग सामर्थशाली तारणहार इच्चीनाड.#स्तोत्रसंहिता 132:17; यिर्मया 30:9.
70इदी प्रभुड वान पवित्र संदेष्ट्याल तीकेल युग सुरवातकेल शप्पीनाड.
71यवार मा शत्रुल उंडार इंगा यवार मा मिंदा कालतार
वार शेतल्योन्केल सुटका शेशेद अभिवचन वाड माक इच्या.#स्तोत्रसंहिता 106:10.
72मा पुर्वजला मिंदा दया सुपेदेंक वाड इदी आंता शेशेतोड उंडाड
इंगा वान पवित्र करारदी ध्यानाम फेट्टेतोड उंडाड,
73इदी करार वगाट अभिवचन उंड्या
याद वाड मना पुर्वज अब्राहामकी इच्चीन्या.
74आदी इल्ला की, मीर मी शत्रुला शेतल्योन्केल इडीगास,
75ना मुंदार पवित्रपणे इंगा नितीमत्वता आयुष्यभर नाद सेवा यरस्कुनांदे शेशार,
इल्ला निन शेशान.
76हे बिडा, निन्नु परात्पर परमेश्वर संदेष्टा आन्यार
येनटीक की प्रभुनदी दावा तैयार शेशेदेंक वान मुंदार नडशाव.
77दिनिचांग की, वान मंदीक वार पापला क्षमाता तारणदी अनुभव शिक्काला.
78परमेश्वर दया इचांग स्वर्गीय दिनमुद फद्दु फुट्टी
इंगा साव दट्टाम साटला यवार जगास्तुनार वार मिंदा यलगु फडी.
79दान तीकेल यवार मोब्बुला उंडार
इंगा साव साटला कुसनीनार वारकी यलगु इच्चेदेंक
इंगा माय काळलु शांती दावाक आंचेदेंक
दिनमुद फद्दु फुट्टामती माद भेट तिस्कुनी.”#यशया 58:8; 60:1-2; 9:2.
80मंग वाड बिडा वाढास्केन फोया इंगा आत्माला सामर्थ्यशाली आय्या. इस्राएल मंदीक प्रकट आय्ये दिनमु नंताक वाड मरु भुमीला निलच्या.
Currently Selected:
LUK 1: WNT
Highlight
Share
Compare
Copy
Want to have your highlights saved across all your devices? Sign up or sign in
