MAT 15
15
मनशीद परंपरा इंगा येशुनदी शिक्षण
1काही वेळ आयनेंका यरुशलेम शहरकेल काही परुशी मंदी इंगा नियमशास्त्रला शिक्षकलु येशुन तीकुड माटलाडेदेंक वच्चीर, 2इंगा आडगीर “नी शिष्यल आब्बा-तातागारी परंपराल#15:2 आब्बा-तातागारी परंपराल यहुदी परंपरा लेका जर यवाराना अशुद्ध वस्तुलान मुटते तर वान अशुद्ध इंगा परमेश्वर आराधना इचांग अयोग्य मानायदुर. दिनिचांग वार आब्बा-तातागार परंपरा लेका वारकी तिना काना मुंची शेतुल-काळ कडगाने बेक आव्वु. येनटीक पाळायार? येनटीक नी शिष्यल तिना काना मुंची शेईल कडगार.” 3पण येशुड वारकी उत्तर इच्ची आन्या, “मीर मी परंपराल इचांग परमेश्वरदी आज्ञा येनटीक तेंपतार?
4 येनटीक की परमेश्वर शप्पीनाड, की ‘नी आम्मा-आब्बानदी मान फेट इंगा यवाड पण मना आम्मा-आब्बान बद्दल वाईट माटलाडताड, वान जेमफडा मत्ताला.’#निर्गम 20:12; 21:17; अनुवाद 5:16.
5 पण मीर आंटार, ‘यवाड पण आब्बान लेकाते आम्मान आनी की, नाक नीक येम पण मदत इच्चेद उंड्या, आदी निन परमेश्वरकी अर्पण शेशीनान.’ 6वार परमेश्वरदी नियमशास्त्र तेम्पतुनार की मना आब्बानदी इंगा आम्माद सन्मान शेयाराद. इल्ला मीर मी इल्लोन परंपरालता परमेश्वरदी वचन रद्द शेशीनार.
7 अरे ढोंग्यालाला, मी बद्दल यशया संदेष्ट्याड बरोबर शप्पीनाड. वाड आंटाड:
8 इ मंदी, नोरता नाद सन्मान शेस्तार.
पण वारदी अंतकरण ना देगाटेल धुराम उंडाद.#यशया 29:13.
9 इंगा वार मन्सुलाद नियम मनाद धर्मतत्त्व आंका नेरपुतार
इंगा इल्ले नाद उपासना शेस्तार.”
शुद्ध शेशेय माटलु
10आप्पुड येशुड मंदीन देगार फिल्ची वारनी आन्या, “नाद माटा इनना इंगा तेल्चकोंडा.” 11“याद तिनीनेद-तागीनेद नोरता लोनीक फोयताद आदी मनशीन अशुद्ध शेय्याद, पण याय माटलु नोरता बैटीक येलताय आय्ये मनशीन अशुद्ध शेस्ताय.”#मत्तय 12:34. 12यंकसार शिष्यल वान देगार वच्ची वान आनीर, “परुशी मंदी यप्पुड इदी इनीर आप्पुड वार कोफाम फडीर इदी निक यरका उंडाद येम?” 13पण वाड उत्तर इच्ची आन्या, “प्रत्येक शट्टु याद ना स्वर्गलोन आब्बाड आंचालेद आदी बोड्ड्याकेल तेम्पेदेंक वच्ची. 14वार बद्दल चिंता शेयाकुंडा. वार गुड्ड्योरकी दावा सुपीचेतोर उंडार. जर वगा गुड्ड्योड इंगोगो गुड्ड्योनकी दावा सुपेदेंक प्रयत्न शेशा तर इद्दार पण गुंताला फड्यार.” 15इदी इनी पेत्र येशुन आन्या, “हे प्रभुजी माक इदी दृष्टांत स्पष्ट शेशी शप.” 16येशुड वारनी आडग्या, “मीर इप्पुड पण अज्ञानी उंडार येम? 17येम पण मीर तिंटार आदी आंता कडपुलोंग फोयताद इंगा बैलीक शेशेताप्पुड बैटीक यल्ली फोयताद. इदी मिक इप्पुड पण तेल्वाद येम? 18पण याय माटलु नोरता बैटीक येलताय आय्ये अंतकरण लोन्केल वस्ताय इंगा आय्ये मनशीन अशुद्ध शेस्ताय. 19येनटीक की वाईट विचार, खुन, जारकर्म, व्यभिचार, दोंगा, खोटा साक्ष इंगा बदनामी अंतकरण लोन्केल बैटीक येलताय. 20इ माटलु मनशीन अशुद्ध शेस्ताय. पण शेईल कडगांदे तिन्या की मनशी अशुद्ध काड.”
यहुदी लेनेद आंडीदानदी विश्वास
21यप्पुड येशुड गालील प्रांत लोन्केल यल्ली सोर इंगा सिदोन शहर तीकुड फोया. 22आप्पुड वगा कनानी आंडीद आ भाग लोन्केल येशुन तीकुड वच्ची कीरली विनंती शेशा, “हे प्रभु, दाविद राजान कोडका, ना मिंदा दया शेय. ना कुतुरकी दैयाम शेंगेम त्रास इस्तुनाद.” 23पण येशुड दानकी येमीच उत्तर इयालेद, आप्पुड वान शिष्यल वच्ची वानकी विनंती शेशीर, “दान आंपकाड, येनटीक की आदी मा यंका येडस्का वस्तुनाद.” 24पण येशुड थांबाशी उत्तर इच्या, “नन्नु परमेश्वर फक्त इस्राएल वंशलोन फाम फोयने मेंढऱ्याल तीकुड आंपीनाड.” 25पण आदी आंडीद येशुन देगार वच्या, आदी येशुन मुंदार काळ-शेतलु जोडशा इंगा आन्या, “हे प्रभु, नाक मदत शेय.” 26पण वाड आन्या, “बिळ्ळाद रोट्या तिस्केन कुक्कालकी येशेद शिंगार लेद.” 27आदी आंडीद आन्या, “हुं प्रभु, पण तरी पण कुक्काल मना मालकुन तल्यालोनदी सल्लीनेद खरकाटा तिंटाय.” 28आप्पुड येशुड दानकी उत्तर इच्ची आन्या, “बिडा, नीद विश्वास फेद्दाद उंडाद. यल्ला नीद इच्छा उंडाद आल्ले निक शिक्काला.” इंगा आद्दे वेळला दान कुतुर बागा आय फो.
शेंगेम बिमारोरनी बागा शेशेद
29यंकसार येशुड सोर इंगा सिदोन शहर लोन्केल यल्ली गालील सरोवर देगार वच्या इंगा येशुड कोंडा मिंदीक यक्की आंदु कुसन्या. 30इदी सुशी शेंगेम मंदी वान देगार वच्चीर, वार मना जताक लुळ्योर, लंगड्योर, गुड्योर, बहिऱ्योर इंगा शेंगेम मंदीन यकोचीनीर इंगा वार आ बिमार मंदीन येशुन काळा देगार फेट्टीर. आप्पुड वाड वारनी बागा शेशा. 31मुक्योर माटलाडदेंक आंटीर, लुळ्योर बागा आय्यीर, लंगड्योर नडशेदेंक आंटीर, गुड्ड्योर सुशेदेंक आंटीर. इदी सुशी मंदी चकीत आय फोईर इंगा वार इस्राएल परमेश्वरदी गौरव शेशीर.
चार हजार मंदीक तिना मतेद
32दान बाद येशुड वान शिष्यलान वान देगार फिल्ची आन्या, “नाक मंदी मिंदा दया वस्तुनाद येनटीक की वार इबद मुड नाळाकेल ना जताक उंडार इंगा वार देगार इप्पुड येमीच तिनेदेंक लेद, वारनी उपाशी आंपेद नाद इच्छा लेद येनटीक की वार दावाता कमजोर आय्यी शकास्तार.” 33शिष्यल वान आनीर, “इंतोट मंदीद आकाल आरपेदेंक इन्नोट रोट्याल इ मरु भुमीला मनाक यंदुकेल शिक्की?” 34आप्पुड येशुड आन्या, “मी देगार यन्नी रोट्याल उंडाय?” वार आनीर, “मा देगार फक्त योड रोट्याल उंडाय इंगा काही शिन्नाय मिल उंडाय.” 35इंगा वाड मंदीन भुमी मिंदा कुसनेदेंक आज्ञा शेशा. 36इंगा आय योड रोट्याल इंगा मिल तिस्केन वाड परमेश्वरकी धन्यवाद इच्या इंगा आय रोट्याल तेंपी-तेंपी शिष्यलकी इच्या शिष्यल मंदीक इच्चीर. 37आप्पुड वार आंदार तिनी तृप्त आय्यीर इंगा वार मिल्गीने तुकडालता निंडीनेय योड फुटकाल जमा शेशीर. 38इंगा तिनेतोर, आंड्योरनी इंगा बिळ्ळान इडशी चार हजार मन्सुल उंडीर. 39यंकसार वाड मंदीन सागेशी नावला कुसनी मगदन शहर लोन्केल फोया.
Currently Selected:
MAT 15: WNT
Highlight
Share
Compare
Copy
Want to have your highlights saved across all your devices? Sign up or sign in
