MAT 5
5
कोंडा मिंदुडदी प्रवचन
1वगा नाड यप्पुड येशुड मंदीद गर्दी सुशा आप्पुड वाड कोंडा मिंदीक यक्या, इंगा वाड वारकी नेरपेदेंक आंदु किंदा कुसन्या वान शिष्यल वान देगार वच्चीर.#मत्तय 15:29; मार्क 3:13; योहान 6:3-15. 2मंग वाड वार जताक इदी माटलाडी वारकी नेरपेदेंक आंट्या. वाड आन्या.
धन्य वचन
3 “यवार आत्माता ‘गरीब’ वार धन्य उंडार,
येनटीक की स्वर्गद राज्य वारदे उंडाद.
4 ‘यवार शोक शेस्तार’, वार धन्य उंडार,
येनटीक की ‘परमेश्वर वारकी शांती इच्ची.’
5 ‘यवार नम्र उंडार’ वार धन्य उंडार,
येनटीक की ‘वारकी पृथ्वी मिंदा हक्क शिक्की.’
6 यवार इमानदारीता जगाशेद इच्छा फेटतार वार धन्य उंडार,
येनटीक की परमेश्वर वारदी इच्छा पुर्ण शेशी.
7 यवार दयाळु उंडार वार धन्य उंडार,
येनटीक की परमेश्वर वार मिंदा दया शेशी.
8 यवार अंतकरणता शुद्ध वार धन्य उंडार,
येनटीक की वार परमेश्वरनी सुशार.
9 यवार शांती स्थापित शेस्तार वार धन्य उंडार, येनटीक की वारनी परमेश्वर बिळ्ळु आन्यार.
10 मंची फनुल शेशे इचांग यवारदी छळ आयनाद वार धन्य उंडार,
येनटीक की स्वर्गद राज्य वारदे उंडाद.
11 यप्पुड मंदी मीर ना शिष्य उंडार आंका मिद अपमान शेस्तार इंगा त्रास इस्तार इंगा मी विरुद्धला आन्नी प्रकारी वाईट लबाड माटलाडतार आप्पुड मीर धन्य उंडार. 12आनंद इंगा उल्लास शेयना, येनटीक की मी इचांग स्वर्गला फेद्दा प्रतिफळ उंडाद, येनटीक की मिकाना पहिला यवार संदेष्ट्याल उंडीर वारकी पण वार इल्ले त्रास इच्चीनीर.
उप्पु इंगा यलगु
13 मीर इ दुन्यामलोन मंदी इचांग उप्पु लेका उंडार, पण जर उप्पुद रोसपणा फोया तर आदी इंगा यल्ला रोस शेया वच्ची? आदी तर मुंदारकी यादुच फनीक फडांदे फक्त फेकेशेदेंक इंगा मनशी काळा किंदा तोक्के फनीक निलची. 14मीर इ आंता दुन्यामलोन मंदी इचांग यलगु लेका उंडार; कोंडा मिंदा उंडीनेद नगर दागी शकायाद. 15मंदी दिव्वा आंची आदी गंपा किंदा दाशी फेट्टार, पण आदी दिव्वा फेट्टे जागाला फेटतार आंटे आदी दिव्वा इंटल्योन्टोर आंता मंदीक यलगु इस्ताद. 16मिद यलगु मंदी मुंदार इल्ला चमकाया निंडा की वार मी मंची फनुल सुडाला इंगा मी परमेश्वर आब्बानदी यवाड स्वर्गला उंडाड वानदी प्रशंसा शेयाला.
नियमशास्त्र पुर्ण आय्येद
17 मोशेन नियमशास्त्र इंगा संदेष्ट्यालदी भविष्यवाणी रद्द शेशेदेंक निन वच्चीनान इल्ला विचार शेयाकुंडा; निन आय रद्द शेशेदेंक लेद तर आय पुर्ण शेशेदेंक वच्चीनान. 18येनटीक की निन मिक खरेम शपतान, मोडाम इंगा पृथ्वी नाश आय्यी, पण आंताच पुर्ण आय्यी नंताक, नियमशास्त्र लोनदी वगा काना लेकाते मात्रा रद्द काक फोई. 19दिनिचांग यवाड पण इ शिन्ना आज्ञा लोन्केल वगाटाना आज्ञा तेंपी इंगा दान लेका मंदीक नेरपी वान स्वर्ग राज्यला शेंगेम शिन्नावोड आन्यार; पण यवाड आय पाळाशी इंगा नेरपी वान स्वर्ग राज्यला महान आन्यार. 20दिनिचांग निन मिक शपतान, नियमशास्त्र शिक्षकलु, शास्त्री इंगा परुशी इ मंदी न्यायीपण काना मिद न्यायीपण जास्त आय्यी नंताक स्वर्ग राज्यला मिद प्रवेश काक फोई.
शिट्टु इंगा खुन शेशेद दंड
21 ‘खुन शेयाक इंगा यवाड पण खुन शेस्ताड वाड न्यायालयला सजा इचांग योग्य ठराशी,’ इल्ला नियमशास्त्रला मना पुर्वजलाक शप्पीनेद उंड्या, इदी मीर इनीनार. 22पण निन तर इल्ला आंटान, की यवाडाना यवारदी पण (उत्तेंगाने) शिट्टु शेशी वाड न्यायालयला शिक्षा इचांग पात्र आय्यी; यवाडाना यवारनी आना, ‘अरे तिक्कावोडा,’ इल्ला आनी वाड फेद्दा सभाला शिक्षा इचांग पात्र आय्यी इंगा यवाडाना यवारनी आना, ‘अरे मुर्ख,’ इल्ला आनी वाड नरक आग्गी शिक्षा इचांग पात्र आय्यी. 23दिनिचांग नु नीद अर्पण वेदी मिंदा अर्पण शेशेदेंक यकोचेताप्पुड यवाराना विरुद्ध नी मनला येमाना उंडाद इल्ला जर निक आंदु ध्यानाम वच्या, 24तर नीद अर्पण आल्ले वेदी मुंदार फेट इंगा नी दावाता वापस फो इंगा पहिला वान जताक एकी शेय इंगा वापस वच्ची नीद अर्पण वेदी मिंदा अर्पण शेय. 25न्यायालयकी फोयेताप्पुड दावाताने नी शत्रु जताक एकी शेय, इल्ला कावाराद की नी शत्रु निन्नु न्यायाधीश शेतल्या इच्ची, न्यायाधीश निन्नु शिपाईला शेतल्या इच्ची इंगा नु जेलला फड्याव. 26निन नीक खरेम शपतान यप्पुड नंताक आन्नी दुडलु फिटायाव आड नंताक नु दांटल्योन्केल इडाके फोयाव.
व्यभिचार बद्दल शिक्षण
27 ‘व्यभिचार शेयाकुंडा,’ इल्ला नियमशास्त्रला शप्पीनेद उंड्या इदी मीर इनीगास उंडार, 28पण निन तर मिक इदी शपतान, यवाडाना यादाना आंडीदान तीकुड कामवासनाता सुस्ताड वाड मना अंतकरणला दान जताक व्यभिचार शेशीनाडुच; 29जर नी उजवा कन्नु निन्नु पाप शेशेदेंक मजबूर शेस्ते तर आदी तिशी फेकेस्काड; येनटीक की नीद आंता शरीर नरकला येशेदेंक दावाला दिन पेक्षा नी वगा अवयवदी नाश कावाला इदी नी इचांग शिंगार उंडाद. 30नीद तिनेद शेय जर निन्नु पाप शेशेदेंक मजबुर शेस्ते तर आदी तेंपी फेकेस्काड; येनटीक की नीद आंता शरीर नरकला फडाला, दिन पेक्षा नी वगा अवयवदी नाश कावाला इदी नी इचांग शिंगार उंडाद.
सोडचिट्ठी बद्दल शिक्षण
31 ‘यवाराना स्वता वडतीन इडस्काडताड तर वाड दानकी सोडचिट्ठी इयाला’ इदी पण नियमशास्त्रला शप्पीनेद उंड्या. 32निन तर मिक शपतान की, यवार पण स्वता वडतीन व्यभिचार शिवाय इंगोगो कारण इचांग इडस्काडताड, वाड दान व्यभिचारीनी शेस्ताड इंगा यवाड पण इल्ला इडशीने वडती जताक फेंडली शेस्कुंटाड वाड पण व्यभिचार शेस्ताड.
वटु बद्दल शिक्षण
33 इंगा 'खोटा वटलु येस्कुनाक' तर 'मना वटलान परमेश्वर मुंदार खरेम शेय' आंका नियमशास्त्रला पुर्वजलाक शप्पीनेद उंड्या, इदी मीर इनीनेद उंडाद. 34पण निन तर मिक शपतान वटु येस्कुनाके उंडा; स्वर्गद लेद, येनटीक की आदी परमेश्वरदी सिंहासन उंडाद; 35पृथ्वीद पण येस्कुनाकुंडा, येनटीक की आदी वानदी काळ फेट्टेद जागा उंडाद; यरुशलेमदी पण येस्कुनाकुंडा येनटीक की आदी महाराजाद नगरी उंडाद. 36नी नत्तीद पण वटु येस्कुनाक, येनटीक नु नीद वगा यंडका तेल्लाद लेकाते नल्लाद शेशी शकायाव. 37तर मिद माटा, हुं तर हुं लेद तर लेद इंते बेक; दिन काना जास्त येम पण मीर माटलाडतार आदी आ शैतान तीकेल उंडाद.
बदला तिस्कुनाकुंडा
38 ‘कन्नु बद्दल कन्नु’ इंगा ‘फन्नु बद्दल फन्नु’ इल्ला नियमशास्त्रला शप्पीनेद उंड्या, इदी मीर इनीनेद उंडाद.#निर्गम 21:24; लेवी 24:19-20; अनुवाद 19:21. 39पण निन तर मिक शपतान, वाईट मनशीद विरोध शेयाकुंडा. पण यवाडाना नी मंची शंपाक मतताड, वान तीकुड इंगोगोट शंपा शेय; 40यवाडाना नी मिंदा दोष आंची नीद आंगी तिस्कुनेदेंक सुस्ताड तर वान नीद चादर पण तिस्कुनानी; 41इंगा यवार पण निन्नु बळजबरी फट्टी वगा किलोमीटर येका फोते वान जताक रोंड किलोमीटरलु फो. 42यवार पण नी देगार येमाना आडगुते वानकी इ इंगा यवाडाना नी तीकेल उसना आडगेदेंक सुस्ते वान तीकुड बेन्नु तीप्पाक.
प्रेम इंगा सिद्धता
43 ‘नु नी शेजाऱ्यान मिंदा प्रेम शेय इंगा नी शत्रुद कोफाम शेय’, इल्ला नियमशास्त्रला शप्पीनेद उंड्या, इदी मीर इनीनार. 44पण निन तर मिक शपतान, मीर मी शत्रु मिंदा प्रेम शेयना इंगा यवार मिक त्रास इस्तार वार इचांग प्रार्थना शेयना. 45दिनिचांग की, मीर मी स्वर्गलोन परमेश्वर आब्बान कोडकु कावाला; येनटीक की वाड दुष्ट मंदी मिंदा इंगा शिंगार मंदी मिंदा वानदी सुर्य उगाय मतताड इंगा नितीमान इंगा अनितीमान मंदी मिंदा वाना केडपुताड. 46येनटीक की यवार मी मिंदा प्रेम शेस्तार वार मिंदा मीर पण प्रेम शेस्तार तर मिक परमेश्वर तीकेल येम प्रतिफळ शिक्की? जकातदारलु पण इल्ले शेस्तार का लेद? 47इंगा मीर फक्त मी मंदीके दंडाम शेस्ते तर दांटल्या विशेष इदी येम शेस्तार? यहुदी लेनोर मंदी पण आल्ले शेयार येम? 48दिनिचांग यल्ला मी स्वर्गीय परमेश्वर आब्बाड परिपुर्ण उंडाड आल्ले मीर पण परिपुर्ण कांडा.
Currently Selected:
MAT 5: WNT
Highlight
Share
Compare
Copy
Want to have your highlights saved across all your devices? Sign up or sign in
