MAT 8
8
येशुड वगा कुष्ठरोग्यान बागा शेस्ताड
1येशुड मंदी जताक माटलाडीनेंका कोंडा मिंदकेल किंदीक दिग्या आप्पुड मंदीद गर्दी वान यंका फोयेदेंक आंट्या. 2आप्पुड अचानक, वगा कुष्ठरोगी#8:2 कुष्ठरोगी शब्दावली सुडना वान देगार वच्ची वंगीगास वानकी नमन शेशा इंगा आन्या, “हे प्रभु, नीद इच्छा उंटे तर नु नन्नु शुद्ध शेशी शकास्ताव.” 3आप्पुड येशुड शेय मुंदारकी शेशी वान मुट्ट्या इंगा आन्या, “नाद इच्छा उंडाद, नु शुद्ध का;” इंगा लगेच वानदी कुष्ठरोग फोईगास वाड बागा आय्या. 4मंग येशुड वान आन्या, “सुड, इदी यवारकी शप्पाक; तर फोई स्वतान याजककी सुपी इंगा मोशेन आज्ञा लेका अर्पण शेय. दिनिचांग की मंदीक नु शिंगार आयनेद साक्ष पटायाला.”#लेवी 14:2,32.
रोमी शताधीपती नोकरनी बागा शेशेद
5मंग येशुड कफर्णहुम शहरला वच्ची नेंका वगा रोमी शताधीपती#8:5 शताधीपती शंभर सैनिकला नेता वान देगार वच्या इंगा वानकी विनंती शेशी आन्या, 6“प्रभुजी, ना नोकर अपंग आय्यी शेंगेम तकलीफला इंटल्या फडीनोड उंडाड.” 7येशुड वान आन्या, “निन वच्ची वान बागा शेस्तान.” 8पण शताधीपती उत्तर इच्या, “हे प्रभु, नु ना इल्लुक दावाला दीन योग्य निन लेन; पण नु फक्त नोरता माटलाड आंटे ना नोकर बागा आय्यी. 9येनटीक की निन पण वगा अधिकारी उंडी ना शेय किंदा शिपाईल उंडार. निन वगान 'फो' आंटीन की वाड फोयताड, इंगोगोन ‘दा’ आंटीन की वाड वस्ताड इंगा ना नोकरनी ‘इदी शेय’ आंटीन की आदी वाड शेस्ताड.” 10इदी इनी येशुनकी आश्चर्य वाटाशा इंगा वान यंका वच्चेतोर मंदीन वाड आन्या, “निन मिक खरेम शपतान, नाक इ यहुदी लेने मनशीलेका पुर्ण इस्राएल देशला ना मिंदा इंता विश्वास शेशेतोड मनशी कमसा लेद. 11निन मिक शपतान की, पुर्व तीकेल, पश्चिम तीकेल, उत्तर तीकेल इंगा दक्षिण तीकेल वच्यार इंगा स्वर्ग राज्यला अब्राहाम, इसहाक इंगा याकोब जताक तिनेदेंक कुसन्यार; 12पण यहुदी मंदीन बैटुड अंधकारला येशेदेंक वच्ची, आंदु येडशेद इंगा फंडलु तिनेद नडशी.” 13मंग येशुड शताधीपतीन आन्या, “इल्लुक फो, नु यल्ला विश्वास फेटनाव आल्ले निक शिक्की.” इंगा वान नोकर आद्दे वेळला बागा आय्या.
पेत्र आत्ता इंगा शेंगेम रोग्याल
14मंग येशुड पेत्रन इल्लुक फोया इंगा वान आत्तान जडमुला मंचाम मिंदा फडीनेद सुशा. 15आप्पुड वाड दान शेईन मुट्ट्या इंगा लगेच दानदी जडमु दिगी फोया; मंग आदी लेशीगास वानदी सेवा शेशेदेंक आंट्या.
16मंग फद्दु मुनगेताप्पुड शेंगेम दुष्टात्माल आंटीनोरनी मंदी येशुन देगार यकोचीर; आप्पुड वाड दैयालनी फक्त वान शब्दता फारा मत्या इंगा आंता बिमार मंदीन बागा शेशा.
17“वाड स्वता माय कमजोरील तिस्कुन्या इंगा माय रोगलु तिस्काड्या,” इल्ला जे यशया संदेष्ट्यानद्वारे शप्पीनेद उंड्या आदी पुर्ण कावाबेक आंका इल्ला आय्या.#यशया 53:4.
येशुन शिष्य आय्येद अट
18मंग येशुड वान आजुबाजुक शेंगेम मंदीद गर्दी उंडाद इल्ला सुशी वान शिष्यलाक गालील सरोवर आतुक फोयेद आज्ञा इच्या. 19वार फोयेदेंक तैयार आयदुर आप्पुड वगा मोशेन नियमशास्त्र शिक्षक वच्ची वान आन्या, “गुरुजी, नु यंदुक पण फोयाव आंदुक निन नी यंका वच्यान.” 20येशुड वान आन्या, “लांडगालकी गुफाल इंगा मोडामलोन गुवालकी इंडलु उंडाय, पण मनशी कोडकुक#8:20 मनशी कोडकुक प्रभु येशुनदी स्वता बद्दल शप्पेद वगा माटा वानदी आंका आनेदेंक जागा लेद.” 21मंग वान शिष्यल लोन्केल वगाड वान आन्या, “हे प्रभु, पहिला नन्नु इल्लुक फोनी. ना आब्बाड सच्चीनेंका, निन वान बुडशान इंगा निन वच्ची नी शिष्य बनाशान.” 22पण येशुड वान आन्या, “नु ना यंका दा इंगा यवार आत्मिक रुपता सच्ची फोयनार वारनी सच्चीनोरनी बुडवानी.”
सुटुर घालीन शांत शेशेद
23मंग वाड नावला यक्की नेंका वान शिष्यल पण वान यंका यक्कीर. 24आप्पुड सरोवर दाटेताप्पुड, समुद्रला इंता फेद्दाद सुटुरघाली लेशा की आदी नाव लाटलाता मुनगेदेंक आंट्या; पण येशुड फंडकुंड्या. 25आप्पुड शिष्यल वान देगार वच्ची वान लेपी आनीर, हे प्रभु, मोमलान वाचायमत. मिम मुनगुतुनाम. 26वाड वारनी आन्या, “हे अल्पविश्वासी, मीर येनटीक यरस्कुंटुनार?” मंग वाड लेशा इंगा घालीन इंगा समुद्रन धमकाय मत्या. इंगा लगेच आंता एकदम शांत आय्या. 27आप्पुड शिष्यलाक शेंगेम आश्चर्य वाटाशा इंगा वार वगामेगारनी आनीर, “इड यल्ला मनशी उंडाड की सुटुरघाली इंगा समुद्र पण इनदी आज्ञा इंटाय.”
दैयालनी फंदुला खांडला आंपेद
28यप्पुड येशुड आतुक गदरेकर देशलोंग फोया वानकी इद्दार दैयाल फट्टीनोर मन्सुल कबर लोन्केल बैटीक यल्लेताप्पुड भेटाशा; आय इंता भयंकर क्रुर उंड्या की आ दावाता यवारकी पण फोवा दाकुंदु. 29आप्पुड सुडना, वार येशुन सुशीन नग्रेम कीरलीगास आनीर, “हे परमेश्वर कोडका, नु नडमा येनटीक फडताव? नु नेमाशीने वेळ काना पहिला माक त्रास इच्चेदेंक इंदुक वच्चीनाव येम?” 30आप्पुड आंदु वार देगाटेल धुराम जागाला फंदुलाद फेद्दाद खांड मेसदु. 31दिनिचांग आय दैयाल वानकी विनंती शेशा की, जर नु मोमलान तीस्ते तर आ फंदुला खांडला मोमलान आंपकाड. 32येशुड वारनी आन्या, “फोंडा,” मंग आय यल्ली आ फंदुला लोना दुर्या; इंगा सुडना, आदी आंता खांड फारका फोई कंटाम मिंदकेल सरोवरला उडी मती मुनगी सच्ची फोया. 33इदी सुशी आय फंदुल मेपेतोर नगरलोंग फारीर इंगा वार फोईगास दैयाल फट्टीने मन्सुला बद्दल आयनेद आंताच शप्पीर. 34आप्पुड इल्ला आय्या की, आंता नगरला निलचेतोर मंदी येशुन भेटाशेदेंक फोईर इंगा वार वानकी नगर बैटीक यल्ली फोयेद विनंती शेशीर.
Currently Selected:
MAT 8: WNT
Highlight
Share
Compare
Copy
Want to have your highlights saved across all your devices? Sign up or sign in
