MRK 1
1
मरु भुमीला सेवा इचांग येशुनदी तैयारी — 1:1-13
बाप्तिस्मा शेशेतोड योहान इंगा वानदी संदेश
1परमेश्वर कोडकु येशु ख्रिस्तन शुभवर्तमानदी इदी सुरवात उंडाद.
2यशया संदेष्टान ग्रंथला राशीनेलेका,
“सुड, निन ना दुतनी नी मुंदारकी आंपतान,
वाड, नी इचांग दावा तैयार शेशी;
3मरु भुमीला घोषणा शेशेतोनदी आवाज आय्या,
‘प्रभुनदी दावा तैयार शेयना, वानदी दावा सरळ शेयना.’”
4दान लेकाने योहान वच्या, वाड मरु भुमीला बाप्तिस्मा इद्दु इंगा पापला क्षमा इचांग पश्चात्ताप बाप्तिस्माद घोषणा शेयदु. 5आंता यहुदिया प्रांत इंगा यरुशलेम शहरकेल शेंगेम मंदी योहान तिकुड वच्चीर. वार स्वताय पापलु स्वीकार शेशी वान तीकेल यार्देन वंकाला बाप्तिस्मा तिस्कुनीर. 6योहान वंट्या यंडकालकेल बनाशीने बट्टाल फेटकुंदु. वान नडमुलाक तोलुद पट्टा उंड्या इंगा वाड मिडताल इंगा आडवी तेन्या तिनदु. 7वाड घोषणा शेशी आंदु, “ना काना पण महान इल्ला यवाड तरी वगाड ना यंकाटेल वच्चेतोड उंडाड इंगा निन वंगी वान बुटलाद दाराम इडशे लायकीक पण लेन. 8निन तर मिद बाप्तीस्मा नेळाता शेस्तान पण वाड मिद बाप्तिस्मा पवित्र आत्माता शेशी.”
येशुनदी बाप्तिस्मा
9आ दिनमुलाला इल्ला आय्या की, येशुड गालील प्रांतकेल नासरत नगर लोन्केल वच्ची यार्देन वंकाला योहान शेयता येशुड बाप्तिस्मा तिस्कुन्या. 10येशुड नेळा लोन्केल फैनिक वच्या, लगेच मोडाम उघडाशा इंगा पवित्र आत्मा वान मिंदा कबुतर लेका दिगतुनाद, इल्ला वानकी कमशा. 11आप्पुड स्वर्ग लोन्केल आवाज वच्या की, “नु ना प्रिय कोडकु उंडाव, नी बद्दल निन आनंदीत उंडान.”
येशुनदी परीक्षा
12मंग आत्मा येशुन लगेच मरु भुमीलोंग येका फोया. 13शैतान वानदी परीक्षा सुशेताप्पुड वाड जंगलला नलपाय नाड निलच्या. वाड जंगली प्राणीला नडमा उंड्या. इंगा स्वर्गदुतलु वच्चीगास वानदी सेवा शेयदुर.
गालीलला इंगा दान आजुबाजुक येशुनदी सेवा — 1:14—8:30
14योहाननी फट्टीनेंका, येशुड गालील प्रांतला वच्या इंगा परमेश्वर राज्यद शुभवर्तमानदी प्रचार शेशा. 15वाड आन्या, “वेळ पुर्ण आयनेद उंडाद, परमेश्वरदी राज्य देगार वच्चीनाद, पश्चात्ताप शेयना इंगा सुवार्ता मिंदा विश्वास फेटना.”
पहिला शिष्यलान फिल्चकाम
16येशुड गालील सरोवर देगार फोयेताप्पुड शिमोन इंगा वान तम्मुड अंद्रियान सरोवरला जाळी येशेताप्पुड सुशा, येनटीक की वार मिल फट्टेतोर उंडीर. 17येशुड वारनी आन्या, “ना यंका दांडा आंटे निन मिमलान मनसुलान फट्टेतोर बना मततान.” 18मंग वार लगेच जाळी इडशीगास वान यंका नडशेदेंक आंटीर. 19आंदुकेल रवा मुंदार फोईनेंका वानकी जब्दीन कोडकु याकोब इंगा वान तम्मुड योहान इर जहाजला जाळील शिंगार शेशेताप्पुड कमशीर. 20वाड लगेच वारनी फिलच्या; इंगा वार मना आब्बान जब्दीन नोकरला जताक जहाजला इडशी वान यंका यल्लीर.
कफर्णहुमलोन सभास्थानला येशुड शिक्षण इस्ताड इंगा अशुद्ध आत्मा तिस्ताड
21मंग येशुड इंगा वान शिष्यल कफर्णहुम नगरकी फोईर, इंगा लगेच येशुड शब्बाथ दिनमुनाड यहुदी सभास्थानला फोईगास शिक्षण इच्चेदेंक आंट्या. 22वाड नेरपु तर वार चकीत आय फोईर, येनटीक की येशुड नियमशास्त्रला शिक्षकला लेका नेरपाकुंडु, तर पुर्ण अधिकारता वारकी नेरपु. 23आ वेळला यहुदी सभास्थानला अशुद्ध आत्मा आंटीने वगा मनशी उंड्या, वाड शेंगेम बेग्गे कीरली आन्या, 24“नासरतोड येशु नु मा नडमा येनटीक फडताव? नु माद नाश शेशेदेंक वच्चीनाव येम? नु यवार उंडाव नाक यरका उंडाद, यवाड परमेश्वर पवित्र मनशी वाड नुये उंडाव.” 25पण येशुड वान धमकाय मती आन्या, “तेप्पांग उंड इंगा इन लोन्केल यल्ली फो.” 26“मंग अशुद्ध आत्मा वान फिनड्या इंगा आदी बेग्गे कीरलीगास वान लोन्केल यल्ली फोया.” 27आंता मंदी चकीत आय्यीर इंगा वगामेगारनी आडगेदेंक आंटीर, “इदी येम उंडाद? इदी तर कोत्ता उपदेश उंडाद. इंगा अधिकारता वाड अशुद्ध आत्मालकी पण आज्ञा शेस्ताड इंगा आय वानदी इंटाय!” 28इंगा येशुन बद्दलदी इदी माटा लगेच गालील देगार आन्नी तीकुड फैलाशी फोया.
शेंगेम बिमारोरनी शिंगार शेशेद
29येशुड इंगा वान शिष्यल यहुदी सभास्थान लोन्केल यल्लीर इंगा लगेच योहान इंगा याकोब जताक शिमोन इंगा अंद्रिया इर इल्लुक फोया. 30शिमोन आत्ता जडमुता मंचाम मिंदा फडीन्या. आप्पुड वाड लगेच येशुनकी दान बद्दल शप्या. 31आप्पुड वाड दान देगार फोई शेई फट्टी दान लेप्या इंगा दांदी जडमु दिगी फो इंगा आदी वारदी सेवा शेशेदेंक आंट्या. 32मापसार आंटे सूर्य मुन्गीनेंका मंदी आंता बिमार इंगा दैयाल फट्टीनोरनी वान देगार यकोचीर. 33इंगा नगरलोन शेंगेम मंदी दरवाजा मुंदार जमा आय फोईर. 34वाड अलग-अलग रोगलाता बिमारील उंडीने मंदीन शिंगार शेशा इंगा शेंगेम मंदी लोन्केल दैयाल तिशा. पण वाड दैयालनी माटलाडा नियालेद येनटीक की आय वान ओळखायदु.
एकांतला येशुनदी प्रार्थना
35मंग वाड नस्कुला मोबू उंडीनाप्पुडे लगेच यल्या इंगा एकांतला फोई प्रार्थना शेशा. 36शिमोन इंगा वान जताक यवार उंडीर वार येशुन फुडकेदेंक आंटीर, 37इंगा वाड शिक्कीनेंका वार वान आनीर, “मिम आंदार निन्नु फुडकुदुम.” 38आप्पुड येशुड वारनी आन्या, “मनाम देगार उळलाक फदाम, आंटे नाक आंदु पण उपदेश शेया दावाला दिनिचांग मनाम इंगोगो तीकुड फदाम येनटीक की दिनिचांग निन इंदुक यल्ली वस्तीन.” 39मंग वाड आंता गालील प्रांतला वार सभास्थानला लोंग फोई उपदेश शेस्का इंगा दैयाल तिस्का तिरग्या.
येशुड कुष्ठरोग्याल शिंगार शेस्ताड
40दान बाद वगा कुष्ठरोगी मनशी येशुन देगार वच्या इंगा वान मुंदार मोकाळलु टेकाशी वाड स्वतान शिंगार शेशेदेंक वान विनंती शेशा. वाड येशुन आन्या, “नीद इच्छा उंटे तर नन्नु शुद्ध शेशेदेंक नु समर्थ उंडाव.” 41येशुनकी वान मिंदा दया वच्या, वाड शेय मुंदारकी शेशी वान मुट्ट्या इंगा आन्या, “नाद इच्छा उंडाद नु शुद्ध का.” 42इंगा लगेच वानदी कुष्ठ यल्ली फोया इंगा वाड शुद्ध आय्या. 43येशुड वानकी चेतावनी इच्ची आंप्या. 44इंगा आन्या, “सुड, दिन बद्दल यवारकी येमीच शप्पाक, पण फोईगास स्वतान याजककी सुपी इंगा वारकी साक्ष कावाला दिनिचांग नु स्वतः शुद्धी इचांग मोशेड आज्ञा इच्चीने लेका अर्पण शेय.” 45पण वाड आंदुकेल यल्ली फोया इंगा घोषणा शेशी इदी बातमी इंता पसरा मत्या की येशुनकी मोकळा पणता शहरला फोवा दाकुंदु, दिनिचांग वाड मरु भुमीला निलच्या तरी आन्नी तीकेल मंदी वान तीकुड वच्चेद इडवा कुंदुर.
Currently Selected:
MRK 1: WNT
Highlight
Share
Compare
Copy
Want to have your highlights saved across all your devices? Sign up or sign in
