MRK 3
3
शब्बाथ दिनमुनाड शेय यंडीने मनशीक बागा शेस्काम
1मंग येशुड इंगोगो शब्बाथ दिनमुनाड सभास्थानलोंग फोया, आंदु शेय यंडीनोड मनशी उंड्या. 2येशुन मिंदा आरोप शेशेदेंक कारण शिक्काला आंका काही मंदी शब्बाथ दिनमुनाड येशुड आ मनशीन बागा शेस्ताड की लेद इदी सुदेंक वान मिंदा बारीक नजर फेटनीर. 3येशुड यंडीने शेय मनशीन आन्या, “लेय इंगा मंदी मुंदार नीला फड.” 4मंग वाड वारनी आन्या, “शब्बाथ दिनमुनाड शिंगार शेशेद बरोबर उंडाद का वाईट शेशेद, जेम वाचाय मतेद का जेम तिस्कुनेद दिंटल्योन्केल येम बरोबर उंडाद?” पण वार आंदार तेप्पांग उंडीर. 5मंग वाड वार कठोर मन इचांग दुखी आय्यी वारनी कोफामता सुशा इंगा आ मनशीन आन्या, “नीद शेय मुंदारकी सरळ शेय,” वाड शेय मुंदारकी शेशा इंगा वाड बागा आय्या. 6आप्पुड परुशील यल्ली फोईर इंगा लगेच वान यल्ला जेमफडा मतेशेद दिन बद्दल हेरोदी मंदी जताक येशुन विरुद्ध योजना शेस्का कुसनीर.
गर्दी येशुन यंका फोकाम
7मंग येशुड वान शिष्यला जताक गालील सरोवर तीकुड फोया, गालील इंगा यहुदिया प्रांतकेल फेद्दाद गर्दी वान यंका-यंका वच्या. 8यरुशलेम शहर, इदोम प्रांत, यार्देन वंका आतकुड प्रदेशलेल, सोर इंगा सिदोन शहर देगार प्रदेशलेल फेद्दाद समुदाय, वाड याय फेद्दा फेद्दाय फनुल शेदू आटला बद्दल इनी वान देगार वच्चीर. 9मंग गर्दी इचांग चेंदाशी फोवाराद आंका येशुड स्वता शिष्यलान जहाज तैयार शेशेदेंक शप्या. 10येनटीक की वाड शेंगेम मंदीन बागा शेशीन्या दिनिचांग यवारकी रोग ग्रस्त उंडीर वार वान फट्टेदेंक वान फय मिंदा फडदुर. 11इंगा यप्पुड अशुद्ध आत्माल येशुन सुदु आप्पुड वार वान मुंदार किंदा फडी कीरलुदु की, “नु परमेश्वर कोडकु उंडाव!” 12पण वाड वारकी कडक चेतावनी इद्दु की नन्नु प्रकट शेयाकुंडा.
बारा प्रेषितलाद निवड
13मंग येशुड कोंडा मिंदीक फोया इंगा वानकी यवार शिष्यल बेकुंडीर? वारनी वाड वान तीकुड फिलच्या इंगा वार वान देगार वच्चीर. 14आप्पुड वाड बारा मंदीद निवड शेशा वारकी वाड प्रेषित इदी फेर इच्या. वाड वारदी दिनिचांग निवड शेशा की, वार वान जताक उंडाला इंगा वारनी इंगोगो जागाला उपदेश शेशेदेंक आंपाला. 15इंगा वारकी दैयाल तिशेद अधिकार उंडाला. 16आप्पुड येशुड इ बारा मंदीद निवड शेशा इंगा वाड शिमोनकी पेत्र फेर इच्या. 17जब्दीन कोडकु याकोब इंगा याकोब तम्मुड योहान वारकी वाड बोआनेर्गेश, आंटे गर्जना कोडकु इदी फेर इच्या. 18अंद्रिया, फिलिप्प, बर्थलमय, मत्तय, थोमा, अल्फीन कोडकु याकोब, तद्दय, शिमोन कनानी 19इंगा यहूदा इस्कर्योत यवाड यंकसार येशुन फट्टीच्या.
येशुड इंगा बालजबुल
20मंग येशुड इल्लुक वच्या आप्पुड इंता मंदी जमा आयनीर की वार रोट्या पण तिनी शकायाक फोईर. 21यप्पुड वान इंटल्योन्टोर मंदी दिन बद्दल इनीर आप्पुड वार वान फट्टेदेंक फोईर येनटीक की वाड पागल आयनाड इल्ला वारदी आनकाम उंड्या. 22इंगा यरुशलेम शहरकेल वच्चीनोर नियमशास्त्र शिक्षकलु आंदुर की, वान लोना बालजबुल उंडाड इंगा वाड दैयाल सरदार मदतता दैयाल तिस्ताड. 23मंग येशुड वारनी वान देगार फिल्ची दाखलाता शप्पेदेंक आंट्या, “शैतान शैताननी यल्ला तिशी शकास्ताद? 24जर यादाना राज्यला फुट फड्या तर आदी राज्य टीकाशी शकायाद. 25जर यादाना इंटल्या फुट फड्या तर आदी इल्लु पण टीकाशी शकायाद. 26जर शैतान स्वताक विरोध शेस्ताड इंगा वान दिंटल्याने फुट फडतुनाद तर वाड टीकाशी शकायाड, इंगा वाड खतम आय फोई. 27यवाड पण बलवान मनशी इंटल्या दुरी वानदी मालमत्ता लुटाशी शकायाड. पहिला आ बलवान मनशीन कट्टाबेक, आप्पुडे वाड वानदी इल्लु लुटाशी शकास्ताड.”
28निन मिक खरेम शपतान की, “मंदीद आन्नी पापलाद इंगा परमेश्वर निंदाद क्षमा आय्यी. 29जर यवाड पण पवित्र आत्माद निंदा शेशी, वानकी यप्पुडुच क्षमा शिक्काक फोई इंगा आ मनशी सार्वकालिक पाप इचांग दोषी उंडी.” 30येशुड इल्ला आन्या येनटीक की वान लोना अशुद्ध आत्मा उंडाद इल्ला वार वान बद्दल आंदुर.
येशुन आम्मा इंगा तम्मुळ्ळु
31आप्पुड येशुन आम्मा इंगा तम्मुड वच्चीर इंगा बैट्या नीला फडीर वानकी निरोप आंपी वान फिल्चीर. 32मंदीद समुदाय येशुन गोलुंग कुशींड्या, वार वान आनीर, “नी आम्मा इंगा नी तम्मुड बैट्या नीद दावा सुस्तुनार.” 33येशुड वारकी उत्तर इच्या, “ना आम्मा इंगा तम्मुळ्ळु यवार उंडार?” 34मंग वाड वान देगार कुसनीनोर तीकुड सुशी आन्या, “सुडना! ना आम्मा इंगा ना तम्मुळ्ळु इर उंडार. 35येनटीक की यवार पण परमेश्वर इच्छा लेका नडस्तार वारे ना तम्मुळ्ळु, ना शेल्यांलु इंगा ना आम्मागार उंडार.”
Currently Selected:
MRK 3: WNT
Highlight
Share
Compare
Copy
Want to have your highlights saved across all your devices? Sign up or sign in
