ROM 11
11
परमेश्वर इस्राएल मंदीद पुर्ण त्याग शेयालेद
1दिनिचांग निन आडगुतान की, परमेश्वर वान मंदीन इडस्कानाड येम? अजिबात लेद, येनटीक की निन पण इस्राएलटोड उंडान, अब्राहाम बिळ्ळा लोन्केल, बन्यामीन वंश लोन्टोड उंडान. 2पहिलाने निवडाशीने वान मंदीन परमेश्वर इडस्काडा लेद. पवित्र शास्त्रला एलीया संदेष्ट्यान बद्दल येम राशीनेद उंडाद इदी मिक यरका लेद येम? वाड परमेश्वर देगार इस्राएल मंदी विरुद्ध इल्ला विनंती शेस्ताड की, 3वाड आन्या, “हे प्रभु, वार नी संदेष्ट्यालनी मतेशीर इंगा नी वेदीलान केडपेस्काडीर; इंगा नी मिंदा विश्वास शेशेतोड निन वक्काडे निलचीनान इंगा इप्पुड वार नाद जेम तिस्कुनेदेंक सुस्तुनार.”#1 राजे 19:10-14. 4पण परमेश्वर तीकेल वानकी येम उत्तर शिक्या? “यवार बआल मुर्ती मुंदार मोकाळलु टेकायालेद, इल्ला सात हजार मंदीन निन ना इचांग वाचायमती फेट्टीनान.” 5दान लेकाने इ इप्पुड पण, परमेश्वर कृपाता निवडाशीनोर काही मंदी बाकी उंडार. 6इंगा जर कृपाता उंडार, तर शिंगार फनुलाता लेर; जर शिंगार फनुलाता उंडार तर कृपा इदी कृपा निलवालेद.
7मंग येम? इस्राएल मंदी जे फुडकुदुर आदी वारकी शिक्कालेद, पण निवडाशीनोरकी आदी शिक्या इंगा बाकी मंदी मनलान कठोर शेशेदेंक वच्या. 8येनटीक की पवित्र शास्त्रला येम राशीनेद उंडाद आदी बरोबर राशीनेद उंडाद की, “परमेश्वर वारकी इ दिनमु नंताक सुस्तीद आत्मा इच्चीनाड; वार सुडाराद इल्ला कंडलु इंगा वार इनाराद इल्ला गुम्माल इच्चीनाड.”#यशया 6:9-10; 29:10.
9इंगा दाविद राजाड वार बद्दल इल्ला प्रार्थना शेशीन्या की,
“वारदी वंटा वार इचांग जाळी इंगा फासा,
इंगा तटराय इंगा प्रतिफळ कावाला.
10वार सुडाराद आंका वार कंडलु गुड्डी कावाला,
इंगा नु वारदी बेन्नु नेहमी वगामत.”
11मंग निन आडगुतान की, इस्राएललोन मंदी लेयाराद आंका वार फडीर येम? अजिबात लेद. पण वार अविश्वास इचांग वार फडीर आंका यहुदी लेनोर मंदीक तारण शिक्या, दिनिचांग की वारकी जळन कावाला. 12जर इस्राएल मंदीद अविश्वास यहुदी लेनोर इचांग आशिर्वाददी कारण आय्या, तर यप्पुड इस्राएल मंदी परमेश्वर तीकुड तिरग्यार, आप्पुड यहुदी लेनोर मंदी इचांग यंता जास्त शिंगार आय्यी?
गैर यहुदी मंदीद तारण; कलम आंचेद उदाहरण
13पण मीर यवार यहुदी लेनोर उंडार, निन मिमलान माटलाडतुनान. यल्ला, की निन यहुदी लेनोर मंदी इचांग प्रेषित उंडान तर, निन ना सेवाद घमंड शेस्तान. 14दिनिचांग की निन यल्ला पण शेशी ना यहुदी मंदीक इर्ष्याम यकोची वार दिंटल्योन्केल काही मंदीद तारण शेयाला. 15येनटीक की जर इस्राएल मंदीद त्याग आंटे दुन्यामलोन मंदी जताक परमेश्वरदी समेट उंडाद तर वारदी स्वीकार आंटे साव लोन्केल जित्ता आय्येद लेद येम? 16येनटीक की पहिला पेडा जर पवित्र उंडाद तर आंता गोळा पण पवित्र उंडाद इंगा जर मुळ पवित्र उंडाद तर डांकील पण पवित्र उंडाय. 17इंगा जर जैतुन शट्टुद वगा डांक तेम्पेदेंक वच्या, इंगा नु आडवी जैतुन शट्टुद फांदी उंडी, निन्नु दांटल्या कलम शेशी जोडशेदेंक वच्या इंगा नु आ जैतुन शट्टुलोन पौष्टिक मुळ्ळा भागीदार आयनाव 18तर आ डांकील बद्दल घमंड शेयाक इंगा जरी नु घमंड शेस्ती तरी नु मुळ्ळाक लेद तर मुळ्ळु नीक आधार इच्चीनाय, इदी माटा मरवाक. 19मंग नु आन्याव की, नन्नु कलम शेशी जोडवाला आंका डांकील तेम्पीर. 20इदी खरेम उंडाद, आय अविश्वास इचांग तेम्पेदेंक वच्या इंगा नु विश्वास इचांग मजबुत उंडाव, दिंटल्या घमंड शेयाक. पण येरपु फेट; 21येनटीक की, जर परमेश्वर असली डांकीलान इडवालेद तर वाड निन्नु पण इडवाक फोई. 22तर नु परमेश्वरदी दया इंगा छाटास्काम सुड. यवार फडीर वारदी छाटणी, पण, नु जर दयाला निलस्ते तर नी मिंदा दया आय्यी; लेकाते, निन्नु पण छाटाशेदेंक वच्ची. 23इंगा आय तेम्पीने डांकील पण जर अविश्वासला निल्वाकुंटे तर कलम शेशी जोडशेदेंक वच्यार; येनटीक की परमेश्वर वारनी कलम शेशी जोडशी शकास्ताड. 24येनटीक की जर निन्नु आडवी जैतुन लोन्केल कोशी, जर निसर्ग विरुद्ध, शिंगार जैतुनकी कलम शेशी जोडशीनाड, तर याय नैसर्गिक डांकील उंडाय आय, यंता विशेष शेशी, आटला जैतुनलाने कलम शेशी जोडशेदेंक दाक फोई येम?
आंदार इचांग परमेश्वरदी दया
25हे आक्का तम्मुळ्ळालाला, इल्ला कावाराद की मीर स्वतान हुशार समजाशार, दिनिचांग नाद इच्छा लेद की, मीर इ रहस्य बद्दल अज्ञानी उंडाला. आदी इल्ला की, यहुदी लेनोर मंदीद पुर्ण रितीता ख्रिस्तला प्रवेश आय्यी नंताक इस्राएलदी वगा भाग इल्ले कठोर निलची.
26इंगा आंता इस्राएल मंदीद इल्ले तारण आय्यी येनटीक की पवित्र शास्त्रला इल्ला राशीनेद उंडाद की,
“सियोन#11:26 सियोन यरुशलेम शहर लोन्केल वगाड तारण शेशेतोड वच्ची,
इंगा याकोब वंश लोन्केल अनिती धुराम शेशी.
27इंगा निन वारी पापलु क्षमा शेशान.
आप्पुड नाद वार जताक इदी करार आय्यी.”#यशया 43:25-26; 27:9; 59:20-21; यिर्मया 31:33-34.
28यहुदी मंदी सुवार्ता मिंदा विश्वास फेट्टालेद आंका परमेश्वर शत्रुल आय फोईर, इद्दे मी यहुदी लेनोर इचांग फायदाद कारण आय्या, पण परमेश्वर वार मिंदा प्रेम शेस्ताड येनटीक की वाड वारनी पहिला निवडाशीन्या इंगा इद्दे वार पुर्वजलाक वाड अभिवचन इच्चीन्या. 29येनटीक की परमेश्वरदी कृपादान इंगा पाचारण बदलायाद. 30येनटीक की यल्ला पहिला मीर परमेश्वरदी आज्ञा तेम्पुदुर पण इप्पुड यहुदी मंदी आज्ञा तेम्पीर आंका मी मिंदा दया आयनाद. 31आल्ले इप्पुड वार आज्ञा तेम्पतुनार; आंटे मी मिंदुड दया इचांग वार मिंदा पण दया कावाला. 32येनटीक की परमेश्वर आंदारनी आज्ञा तेम्पीर आंका कोंडाशी फेट्टीनाड दिनिचांग की वाड आंदार मिंदा दया शेयाला.
33आहाहा! परमेश्वर बुद्धीद इंगा ज्ञानदी संपत्ती यंता लोत उंडाद? वानदी न्याय यंता अतर्क्य उंडाद? इंगा वानदी दावा यंता अगम्य उंडाद? 34येनटीक की पवित्र शास्त्रला राशीनेद उंडाद की;
“प्रभुनदी मन यवार गुरतु फटनार?
लेकाते वानकी सल्ला इच्चेतोड यवाड उंड्या?#यशया 40:13.
35लेकाते यवाड वानकी पहिला इच्चीनाड इंगा दानदी फेड शेशी तिस्कुनी इल्ला यवाड उंडाड?”#यशया 41:11.
36येनटीक की आन्नी माटलु परमेश्वर देगाटेल, वान तीकेले, इंगा वान इचांगे उंडाय; वानकी युगानयुग गौरव उंडाला. आमेन.
Currently Selected:
ROM 11: WNT
Highlight
Share
Compare
Copy
Want to have your highlights saved across all your devices? Sign up or sign in
