ROM 6
6
पाप इंगा न्याय — 6:1—8:39
पाप इचांग सच्चीनोड, परमेश्वर इचांग जित्ता
1तर इप्पुड मनाम येम आनाला? परमेश्वरदी कृपा जास्त शिक्काला आंका मनाम पाप शेस्का उंडाला येम? 2अजिबात लेद! मनाम यप्पुड पाप इचांग सच्ची फोयनाम, तर मंग दिन मुंदारकी दांटल्या यल्ला निलच्याम? 3लेकाते मनाम आंदार यंता मंदी ख्रिस्त येशुला बाप्तिस्मा तिस्कुंडाम, मनाम वान सावला बाप्तिस्मा तिस्कुंडाम इदी मिक यरका लेद येम? 4दिनिचांग मनाम वान साव बाप्तिस्माता वान जताक बुडशेदेंक वच्चीनाम, आदी दिनिचांग की यल्ला ख्रिस्त परमेश्वर आब्बान सामर्थ्यता सच्चीनोर लोन्केल लेपेदेंक वच्या, आल्ले मनाम पण कोत्ता जीवन लेका नडवाला.
5येनटीक की यल्ला मनाम वान सावला कुडतीम वगाट आयनाम. आल्ले वान पुनरुत्थानला पण वान जताक वगाट आय्याम. 6मनाक यरका उंडाद की मना दिंटल्योन्टोड पापी स्वभावटोड मनशी ख्रिस्त जताक क्रुस मिंदा खिळाशेदेंक वच्या, दिनिचांग की पापी स्वभावदी शरीर लोन्केल नाश कावाला इंगा मनाम दिन मुंदारकी पाप दास कावाराद. 7येनटीक की यवाड सच्ची फोयनाड वाड पाप प्रभाव लोन्केल मुक्त आयनाड. 8दिनिचांग मनाम जर ख्रिस्तन जताक सच्ची फोयनाम, तर मनाम वान जताक जगाशाम इल्ला मनाक विश्वास उंडाद. 9येनटीक की मनाक यरका उंडाद की, सच्चीनोर लोन्केल लेशीनोड ख्रिस्त वापस सय्याक फोई. वान मिंदा सावदी अधिकार अजिबात लेद. 10येनटीक की ख्रिस्त सच्ची फोया वाड पाप इचांग वगातुके सच्ची फोया, पण इप्पुड जित्ता उंडाड वाड परमेश्वर इचांग जित्ता उंडाड. 11आल्ले मीर पण मी पापला इचांग सच्चीनोर पण परमेश्वर इचांग ख्रिस्त येशुला स्वतान जित्ता समजायना.
12दिनिचांग पापनी मी सच्चीने फय मिंदा राज्य शेयानीया कुंडा, इल्ला कावाराद की मीर दान वासनाल अधिन कावाला. 13इंगा मीर मी फयलोन अवयवलान वाईट माटला इचांग पापकी समर्पण शेयाकुंडा. पण मीर स्वतान सच्चीनोर लोन्केल जित्ता आयनोर इल्ला समजाशी मी अवयवलान शिंगार फनुल शेशेदेंक परमेश्वरकी इचकाडना. 14आप्पुड मी मिंदा पापदी अधिकार नडवाक फोई येनटीक की मीर नियमशास्त्र अधिन लेम, पण कृपा अधिन उंडार.#रोम 5:17; 6:18-19.
नितीमत्व दास
15तर येम आय्या? मनाम नियमशास्त्र अधिन लेम तर कृपा अधिन उंडाम, आंका मनाम पाप शेस्केन उंडाला येम? अजिबात लेद. 16मिक यरका लेद येम की यवारदी आज्ञापालन शेशेदेंक मीर स्वतान दासलेका इचकाडतार वान दास आयतार; पाप उंटे यादानदी परिणाम साव उंडाद लेकाते आज्ञापालन यादानदी परिणाम नितीमत्व उंडाद. 17पण परमेश्वरकी धन्यवाद येनटीक की मीर पापकी दास उंटीर, पण मीर याद शिक्षा स्वीकार शेस्तीर दानदी मीर मनता पालन शेस्तार.
18इंगा पापकेल मुक्त आय्यी नितीमत्व दास आयतीर. 19निन मी शारीरिक कमजोरी इचांग मन्सुला लेका माटलाडतुनान येनटीक की यल्ला मीर मी अवयवलान अशुद्धला इंगा वाईट माटला दास आय्येदेंक इच्चीन्टीर आल्ले इप्पुड मी अवयवलान पवित्र आय्येदेंक नितीमत्व दास आय्येदेंक परमेश्वरकी इचकाडना.
20येनटीक की यप्पुड मीर पाप दास उंटीर, आप्पुड मीर नितीमत्व तीकेल स्वतंत्र उंटीर. 21इप्पुड मिक या माटलाद शिग्गु आयताद आटलाता मिक आप्पुड याद फळ शिक्या? येनटीक की आ माटलाद परिणाम तर साव उंडाद. 22पण इप्पुड पापकेल स्वतंत्र आय्यी मीर परमेश्वर दास आय्यीने इचांग, मिक पवित्रीकरन इदी फळ उंडाद इंगा परिणाम सार्वकालिक जीवन उंडाद. 23येनटीक की पापदी पगार साव उंडाद, पण परमेश्वर कृपा इचांग मनाक प्रभु येशु ख्रिस्तला सार्वकालिक जीवन उंडाद.
Currently Selected:
ROM 6: WNT
Highlight
Share
Compare
Copy
Want to have your highlights saved across all your devices? Sign up or sign in
