ROM 8
8
पवित्र आत्माता नडवाला
1दिनिचांग, इप्पुड येशु ख्रिस्तला उंडीनोरकी दंडाज्ञा लेद. वार पापी स्वभाव लेका लेद तर पवित्र आत्मा लेका नडस्तार. 2येनटीक की, ख्रिस्त येशुला उंडीनेद जीवनदी पवित्र आत्माद नियम मनालनी पाप इंगा साव नियम केल स्वतंत्र शेशीनाद.#कलस्से 2:14; २करिंथ 3:17-18; गलती 5:18. 3येनटीक की फय कमजोर उंडाद आंका याद फनी नियमशास्त्र शेशी शकायाक फो, दान परमेश्वर शेशा आंटे स्वता कोडकुन मना पापला इचांग बलिदान आय्येदेंक आंपी, फयला पापकी दंडाज्ञा इच्या. 4दिनिचांग की मनाम या पापी स्वभाव लेका लेद पण पवित्र आत्मा लेका नडस्ताम, दानता मना दिंटल्या नियमशास्त्रद आज्ञा पुर्ण कावाला. 5येनटीक की पापी स्वभाव लेका नडशेतोर पापी माटला मिंदा मन आंचतार; पण पवित्र आत्मा लेका नडशेतोर आत्मिक माटला मिंदा मन आंचतार. 6पापी स्वभाव मिंदा मन आंचेद इदी साव उंडाद पण आत्मा मिंदा मन आंचेद जीवन इंगा शांती उंडाद. 7येनटीक की पापी स्वभाव मिंदा मन आंचेद इदी परमेश्वर विरुद्ध फोयेद उंडाद; येनटीक की वाड परमेश्वर नियम अधिन लेड इंगा आय्यी पण शकायाड. 8दिनिचांग यवार पापी स्वभाव लेका नडस्तार वार परमेश्वरनी आनंदीत शेशी शकायार. 9पण मी दिंटल्या जर परमेश्वरदी आत्मा उंडाद, तर मीर पापी लेर, पण आत्मिक उंडार येनटीक की ख्रिस्तद आत्मा जर यवाराना लोना लेद तर वाड वान मनशी लेड.#8:9 परमेश्वरदी आत्मा इंगा ख्रिस्तद आत्मा आंटे पवित्र आत्मा उंडाद 10पण जर मी दिंटल्या ख्रिस्त उंडाड, तर शरीर पाप इचांग सच्ची फोयनेद उंडना, पण आत्मा नितीमत्व इचांग जित्ता उंडाद. 11इंगा जर परमेश्वरदी आत्मा याद येशुन सच्चीनोर लोन्केल लेप्या मी लोना उंडाद, तर याद ख्रिस्त येशुन सच्चीनोर लोन्केल लेप्या, वाडे मी नाश आय्ये शरीरनी वान आत्माता याद मी लोना उंडाद जित्ता पण शेशी.
12दिनिचांग हे आक्का तम्मुळ्ळालाला, मनाम पापी स्वभावकी कर्जदार लेम, की दान लेका नडवाला. 13येनटीक की मीर जर पापी स्वभाव लेका जगाशार तर मीर सच्यार, पण मीर पवित्र आत्माता शरीरी फनुल मतेस्ते तर मीर जित्ता उंड्यार.
परमेश्वर बिळ्ळु
14येनटीक की परमेश्वरदी आत्मा यंता मंदीन नडपीस्ताद वार परमेश्वर बिळ्ळु उंडार. 15येनटीक की मिक दासदी आत्मा शिक्कालेद, की वापस परमेश्वरकी येरस्कुनाला; पण दत्तकदी आत्मा शिक्कीनाद, यादानता मनाम 'हे अब्बा, हे यब्बा' इल्ला आनीगास परमेश्वरनी फिलस्ताम. 16आदी पवित्र आत्मा मना आत्मा जताक स्वता साक्ष इस्ताद की, मनाम परमेश्वर बिळ्ळु उंडाम. 17इंगा, जर बिळ्ळु उंडाम तर वारीस पण उंडाम, परमेश्वर वारीस इंगा ख्रिस्तन जताक वारीस उंडाम. आंटे वान जताक मनाद दुख सहन शेस्ते तर वान जताक आदरला पण भागीदार कावाला.
प्रकट आय्येद वैभव
18नाक खात्री उंडाद की, इ वर्तमान काळलोनी दुखल इंगा संकटलु याद आदर परमेश्वर मनाक इच्ची, दान मुंदार येमीच लेव. 19येनटीक की, सृष्टी पण शेंगेम आशाता परमेश्वर बिळ्ळाद प्रकट आय्येद दावा सुस्तुनाद. 20येनटीक की परमेश्वर येम पण बनायमत्या, दानदी किंमत दिनिचांग कमी कालेद की दानदी स्वताद इच्छा उंड्या, तर दिनिचांग आय्या की परमेश्वर इल्ला कानीच्या. पण वगा आशा उंडाद, 21सृष्टी पण आ दिनमुद दावा सुस्तुनाद, यप्पुड दानकी साव लोन्केल सुटकारा शिक्की, परमेश्वर बिळ्ळाद गौरवी स्वतंत्र शिक्की. 22येनटीक की मनाक यरका उंडाद की, आंता सृष्टी इप्पुड नंताक तडपास्तुनाद इंगा दुःख सहन शेस्तुनाद, यल्ला वगा आंडीद बिडाक जन्म इच्चेताप्पुड तडपास्ताद. 23इंगा फक्त सृष्टीने लेद, पण यवारकी आत्माद पहिला फळ शिक्कीनाद इल्ला मनाम पण, स्वता दत्तक तिस्कुनेद, आंटे मना शरीरकी सुटकारा शिक्केद दावा सुशेताप्पुड, मनाम पण मना मनला तडपास्तुनाम. 24येनटीक की, मनाक आशाता तारण शिक्कीनाद; पण कमशेद आशा पण आशा लेद, येनटीक की याद माटा कमस्ताद दानदी यवारकी आना आशा उंटाद येम? 25पण याद माटा मनाक कमसाद दानदी मनाक आशा उंटाद, आंका मनाम दम्मु फट्टी दानदी दावा सुस्ताम.
पवित्र आत्माद मदत
26आल्ले मना कमजोरीला पवित्र आत्मा पण मनाक मदत शेस्ताद, येनटीक की मनाम प्रार्थना या माटा इचांग शेयाबेक इदी मनाक यरका लेद. पण याय माटलाडी शकायाम इल्लोन माटला इचांग कण्हास्केन पवित्र आत्मा स्वता मना इचांग मध्यस्थी शेस्ताद. 27इंगा, यवाड अंत:करणलु फुडकुताड वानकी पवित्र आत्माद मन यरका उंडाद, येनटीक की आदी परमेश्वर मंदी इचांग परमेश्वर इच्छा लेका मध्यस्थी शेस्ताद. 28येनटीक की मनाक इदी यरका उंडाद की, यवार परमेश्वर मिंदा प्रेम शेस्तार, यवार वान योजनालेका फिल्चीनोर उंडार वार इचांग आन्नी माटलु कुडी, वारदी शिंगारे शेस्ताय.#यिर्मया 29:11; उत्पत्ती 50:20; फिलिपी 1:6. 29येनटीक की वानकी यवार बद्दल पहिलाने यरका उंड्या वार वान कोडकु प्रतिरुपला प्रकट कावाला आंका वाड वारनी पहिलाने निवड पण शेशा. आंटे वाड आंदार आक्का तम्मुळ्ळा लोन्केल फेद्दावोड कावाला. 30इंगा वाड यवारनी पहिला निवडाशा वारनी वाड फिलच्या इंगा वाड यवारनी फिलच्या वारनी वाड नितीमान पण ठरायमत्या इंगा वाड यवारनी नितीमान ठरायमत्या, वाड वारदी आदर पण शेशा.
परमेश्वरदी प्रेम
31मंग इ माटला बद्दल मनाम येम आनाला? जर परमेश्वर मना तीकुड उंडाड, तर मंग मना विरुद्ध यवाड उंडाड? 32इंगा यवाड स्वता कोडकुन वान इचांग फेट्टान्दे, मना आंदार इचांग इचकाड्या, वाड मनाक वान जताक आन्नी माटलु येनटीक इयाक फोई? 33परमेश्वर निवडाशीने मंदी मिंदा यवार दोष आंच्यार? परमेश्वरे उंडाड यवाड वारनी नितीमान ठराय मतताड. 34दंडद आज्ञा इच्चेतोड यवाड उंडाड? यवाड येशु ख्रिस्त सच्ची फोया, हुं, यवाड सच्चीनोर लोन्केल लेपेदेंक वच्या इंगा यवाड परमेश्वर मंची शेय तीकुड आंटे आदर जागाला कुसनीनोड उंडाड, वाड मना इचांग मध्यस्थी शेस्तुनाड. 35ख्रिस्तन प्रेम केल मनालनी यवार अलग शेशार? संकटलु का दुखलु, छळ, आकाल का नग्नता, विपत्ती लेकाते तलवार शेशी येम? 36यल्ला की पवित्र शास्त्रला राशीनेद पण उंडाद की,
“हे परमेश्वर मिम नी इचांग धीन्नाम साव यरपुला उंटाम,
मिम वध आय्ये मेंढऱ्याल लेका कोल्चेदेंक वच्चीनाम.”#स्तोत्रसंहिता 44:22.
37पण यवाड मना मिंदा प्रेम शेशा, वान तीकेल इ आन्नी माटलाला मनाम महाविजयी उंडाम. 38येनटीक की नाक नक्की यरका उंडाद की, साव लेकाते जीवन, स्वर्गदुत लेकाते अधिकार, इप्पुडी माटलु लेकाते वच्चे माटलु लेकाते सामर्थ्य, 39लेकाते उंची लेकाते खोली लेकाते इंगोगोट याद पण निर्मिती याद मना प्रभु येशु ख्रिस्तला उंडाद परमेश्वर प्रेम केल मनालनी अलग शेशी शकायाक फोई.
Currently Selected:
ROM 8: WNT
Highlight
Share
Compare
Copy
Want to have your highlights saved across all your devices? Sign up or sign in
