EXODUS 3

Moses ta ifanwa kuKalunga

1Ndele Moses okwa lifa oimuna yaxemweno Jetro, omupristeli waMidian. Ndelenee efiku limwe ye eshi a twalele oimuna langhele kwinya kouninginino wombuwa, okwe uya komhunda yaKalunga nokutya Horeb. 2Opo nee omweengeli wOmwene okwe mu lihololela momutemo womundilo moshixwa sheno. Ndele ye eshi a tala ko shili, oshixwa sheno osha xwama omundilo, ndelenee inashi lungwina po komundilo! 3Ndele Moses ta ti: “Onda hala ndi ehene ko popepi ndi tale emoniko eli linene, omolwashike oshixwa sheno itashi lungwina po.” 4Omwene eshi a mona ta ehene po e shi tale, Kalunga okwe mu ifana, ta popi moshixwa sheno ta ti: “Moses, Moses!” Ndele ye ta nyamukula: “Aame ou!” 5Ndele Ye ta ti: “Ino ehena oku. Dula ko eenghaku keemhadi doye, osheshi onhele apa u li ofika oyo edu liyapuki.” 6Ye ta ti vali: “Aame Kalunga kooxo, Kalunga kaAbraham, Kalunga kaIsak naKalunga kaJakob.” Opo nee Moses okwa uvika oshipala shaye, osheshi okwa tila okutala Kalunga.

7NOmwene ta ti: “Ame onda mona okuhepekwa kwoshiwana shange, eshi shi li muEgipiti. Naame onda uda onghuwo yavo omolwovafininiki, heeno, ondi wete oudjuu wavo. 8Onghee nde uya poshi, ndi va kulile mo meke lOvaegipiti, nondi va twale medu linya, medu liwa nola mbwalangadja, medu li yadi omashini nomaadi eenyiki, medu omo Ovakaanan nOvaheti nOvaamori nOvaperesi nOvahevi nOvajebusi ve li mo. 9Ndele paife tala, onghuwo nekemo lOvaisraeli oya fika kwaame. Nonda mona yo ehepeko nalo Ovaegipiti tave va hepeke. 10Hano inda ko, Ame ohandi ku tumu kuFarao, u pitife mo muEgipiti oshiwana shange Ovaisraeli.” 11Ndelenee Moses okwa lombwela Kalunga ta ti: “Aame omushike ndi ye kuFarao, nondi pitife mo Ovaisraeli muEgipiti?” 12Ndele Ye ta nyamukula: “Ame ohandi ka kala pamwe naave, naashi tashi ningi edidiliko kwoove nokutya, Ame nde ku tuma ko: ove eshi wa pitifa mo oshiwana muEgipiti, vo otava ka longela Kalunga komhunda tuu ei.”

13Opo nee Moses okwa lombwela Kalunga ta ti: “Ndelenee ame ngeenge handi i kOvaisraeli ndele handi va lombwele: ‘Kalunga kooxo okwa tuma nge kunye,’ ndele tava pula nge: ‘Olyelye edina laye?’ Ohandi va nyamukula shike?” 14Ndele Kalunga ta ti kuMoses: “Aame tuu Ame. U nokunyamukula Ovaisraeli u tye ngaha: ‘Aame tuu Ame,’ a tuma nge kunye.” 15Opo nee Kalunga okwa lombwela vali Moses ta ti: “Odo u noku di shiivifila Ovaisraeli: ‘Omwene Kalunga kooxo, Kalunga kaAbraham naKalunga kaIsak naKalunga kaJakob okwa tuma nge kunye.’ Olo edina lange fiyo alushe nalo Ame handi ifanwa kepupi fiyo okepupi. 16Inda ko u shivile ko ovakulunhu vOvaisraeli noku va lombwela: ‘Omwene, Kalunga kooxo okwe liholola kwaame, Kalunga kaAbraham, kaIsak nokaJakob.’ ” Ndele okwa tya: “Oshili Ame ohandi mu pashukile noku mu kalela noshisho nokutala eshi tashi mu ningilwa muEgipiti. 17Onghee hano onda tokola mwaame kutya: ‘Ame onda hala oku mu pitifa mo moudjuu womuEgipiti noku mu twala medu lOvakaanan nolOvaheti nolOvaamori nolOvaperesi nolOvahevi nolOvajebusi, moshilongo shi yadi omashini nomaadi eenyiki.’

18“Ndele vo otave ke ku uda. Opo nee nye novakulunhu vOvaisraeli mu nokuya kohamba yaEgipiti, nomu noku i lombwela: ‘Omwene Kalunga kOvaheberi okwe tu shakeneka. Hano tu lekela paife, fye tu ka ende omafiku atatu kombuwa tu ka yandjele Omwene Kalunga ketu omayambo.’ 19Ndelenee Ame ondi shi shii nokutya, ohamba yaEgipiti itai mu lekele nande tai fininikwa keke li neenghono. 20Ndele Ame ohandi ka nanena kombada yaEgipiti eke lange nohandi ke va monifila oikumwifa nomadidiliko aa handi ka ningila ko, opo nee ye ote mu lekele mu dje mo.

21“Ndele oshiwana eshi Ame ohandi ke shi filifa onghenda kOvaegipiti, opo ngeenge tamu ka dja mo, itamu ka dja mo hamakasha, 22ndelenee keshe omwalikadi e nokweehela omushiinda shaye naava ve li meumbo laye oinima oisiliveli noingoldo noikutu. Ndele nye otamu i humbatifa ovana veni ovamati noukadona; nosho ngaha tamu ka kufa oihakanwa kOvaegipiti.”

Currently Selected:

EXODUS 3: OKYB

Highlight

Copy