EXODUS 9
9
Ehandukilo etitano: Oudu woimuna
1Omwene okwa lombwela vali Moses a ye kuFarao e mu lombwele: “Omwene Kalunga kOvaheberi ota ti ngaha: ‘Lekela ovanhu vange va dje mo, va shiive okulongela nge. 2Osheshi ove ngeenge to anye oku va lekela, ndele to va kelele natango, 3tala, eke lOmwene tali ka hanga oimuna yoye ei i li moixwa, neenghambe neendongi neengamelo neengobe needi; tadi kwatwa koudu mudjuu. 4NOmwene ota ka tongola pokati koimuna yOvaisraeli noimuna yOvaegipiti, paha fye nande oshimwe shomwaai yOvaisraeli.’ ” 5NOmwene okwa tula po efimbo, ndele okwa tya: “Efiku lomongula Omwene te shi ningi moshilongo ashishe.” 6NOmwene okwe shi ninga efiku la shikula olo: Oimuna aishe yOvaegipiti oya fya. Ndelenee moimuna yOvaisraeli inamu fya nande shimwe. 7NaFarao okwa tuma ko a ka shiive, ndele tala, moimuna yOvaisraeli inamu fya nande oshimwe. Ndelenee omutima waFarao wa li mukukutu ye ina lekela ovanhu va dje mo.
Ehandukilo etihamano: Oidinda
8Omwene okwa lombwela vali Moses naAron ta ti: “Kufeni ko omute wefiya omake eni avali e yadi, naMoses ne u undile pombada keulu moipafi yaFarao, 9ndele ou otau ka ninga oshilemo shondwi kombada yedu alishe laEgipiti, tau ka eta mo oidinda idjuu muyo tamu di otwila movanhu nomoimuna moshilongo ashishe shaEgipiti.” 10Osho hano va kufa omudilombiya mefiya ndele va holoka koshipala shaFarao, naMoses e u ekela pombada keulu. Opo nee ou wa shituka oidinda i notwila movanhu nomoimuna. 11Neemhule inadi shiiva okuholoka koshipala shaMoses molwoidinda. Osheshi oidinda ya li yo meemhule nomOvaegipiti aveshe. 12Ndelenee Omwene okwa kukutika omutima waFarao, ehe va pwilikine, ngaashi Omwene a lombwela Moses.
Ehandukilo etiheyali Eemhawe
13Omwene okwa lombwela vali Moses a penduke ongula inene e lilongekide okuholoka koshipala shaFarao, e mu lombwele a tye: “Omwene Kalunga kOvaheberi ta ti ngaha: ‘Lekela ovanhu vange va shiive okulongela nge. 14Osheshi paife eshi Ame ohandi ka tuma omahepeko ange aeshe kombada yoye mwene nokovapiya voye aveshe nokovanhu aveshe voye, opo va shiive nokutya, kombada yedu alishe kape na umwe ngaashi Ame. 15Osheshi hanga nda yelula eke lange kwoove nokovanhu voye mu hangike koudu wolutapo, nosho ove wa dimwa po ngeno kombada yedu, 16ndelenee Ame nde ku efa u kale po, opo ndi shiive okumonifa eenghono dange mwoove, edina lange opo li udifwe kombada yedu alishe. 17Natango ove ho linenepekele oshiwana shange nokwaanya shiha dje mo. 18Tala mongula pefimbo tuu eli, Ame ohandi ka lokifa eemhawe didjuu inadi monika nale muEgipiti kokudja efiku olo ekanghameno lasho la tulwa po fiyo opaife. 19Tuma ko hano oimuna yoye naashishe u shi kwete poluhaela, i twalwe keenhele dokuyaama. Ovanhu aveshe noinamwenyo aishe ei i li pondje poluhaela; naai inai twalwa meenhele dokuyaama, eemhawe tadi i loko ndele tai fi.’ ” 20Vamwe vomovapiya vaFarao ava hava tila ondjovo yOmwene, ova twala ovapika vavo noimuna yavo meengulu, 21ndelenee ava inava yavala ondjovo yOmwene ova efa ovapika vavo noimuna yavo i kale moixwa.
22Opo nee Omwene okwa lombwela Moses ndele ta ti: “Nana eke loye keulu, eemhawe opo tadi ka loka moshilongo ashishe shaEgipiti, kombada yovanhu noinamwenyo nokombada yoimeno aishe yomoixwa moshilongo shaEgipiti.” 23Ndele Moses okwa yelula onhaili yaye keulu, nOmwene okwa eta po endundumo neemhawe nokwa tuma omundilo kombada yedu. NOmwene okwa lokifila edu laEgipiti eemhawe. 24Ndele pa li pe neemhawe didjuu, nomundilo wa xwama efimbo alishe mokati keemhawe; da tya ngaha inadi hanga edu laEgipiti nghee ovanhu va kala mo. 25Neemhawe da denga ashishe eshi sha li poluhaela medu alishe laEgipiti, ovanhu noinamwenyo. Nosho yo eemhawe da denga oimeno aishe yomomapya, nomiti adishe domomufitu da teywa po. 26Ashike moshikandjo Gosen, omo Ovaisraeli va kala, eemhawe inadi monika.
27Opo nee Farao okwa ifana Moses naAron ndele ta ti kuvo: “Ame nda nyona paife. Omwene Ye omuyuki, ndelenee fye novanhu vange tu netimba. 28Ilikaneni Omwene, osheshi endundumo laKalunga neemhawe da ninga dihapu unene. Opo nee handi mu lekele, itamu pumbwa okukala po vali.” 29Opo nee Moses te mu lombwela: “Shamha nda pita mo moshilando ame ohandi ka yelula omake ange kOmwene; endundumo tali ka mwena neemhawe itadi loko vali. Opo u shiive nokutya, edu olOmwene. 30Ndelenee ondi shii nokutya, ove novapiya voye natango tuu inamu tila Omwene Kalunga.” 31Ndele omindele nomahangu a nyonaunwa po, shaashi omahangu a li a kutumika nomindele da li da eta eenhemo. 32Ndelenee oilyavala nomakunde inaa nyonauka po, shaashi oo a xuuninwa okumena. 33Osho hano Moses a pita mo moshilando, a dja puFarao nokwa yelula omake aye kOmwene. Nendundumo neemhawe oda sheka nodula inai loka vali kedu. 34Farao eshi a mona odula neemhawe da sheka, nendundumo la mwena, okwa nyona vali nokwa kukutika omutima waye, ye mwene novapiya vaye. 35Heeno, omutima waFarao okwa li mukukutu onghee ina lekela Ovaisraeli, va dje mo, ngaashi Omwene a lombwela Moses.
Currently Selected:
EXODUS 9: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
