GENESIS 24
24
Rebeka ta ka kongwa a ninge omwalikadi waIsak
1Ndele pefimbo olo Abraham okwa kulupa, nomafiku aye a ninga mahapu, nOmwene okwe mu nangeka noupuna mwaaishe. 2Opo nee Abraham okwa lombwela omupiya elenga lakula lomeumbo laye, ou a pashukila oinima yaye aishe, ndele ta ti: “Eke loye li shitika koshi yetundji lange; 3onda hala u anene nge kOmwene Kalunga keulu nedu nokutya, ove uha kongele omumwange omwalikadi movana oukadona vOvakaanan ovo ndi li mokati kavo. 4Ndelenee inda koshilongo shetu nokepata letu u ka kongele omumwange Isak omwalikadi.” 5Opo nee omupiya okwe mu pula ta ti: “Omwalikadi ngeenge ina hala okuuya naame moshilongo eshi, ondi na okushunifa mbela omumwoye koshilongo shinya wa dja?” 6Ndele Abraham okwe mu nyamukula ta ti: “Likelela shili opo uha shunife vali omumwange kwinya. 7Omwene Kalunga keulu, ou a kufa nge meumbo latate nomoshilongo omo nda dalelwa naau a popya naame nokwa anena nge neendjovo edi: ‘Oludalo loye ohandi ke li pa edu eli,’ ote ke ku tetekelifa omweengeli waye ndele ove ou na okweetela ko omumwange omwalikadi. 8Ndelenee omwalikadi ngeenge ina hala okuuya, nena owa mangululwa kokwaana kwoye kwaame. Ove ino shunifa ashike omumwange kwinya.” 9Opo nee omupiya okwa shitika eke laye koshi yetundji laAbraham, omwene waye, ndele okwe mu anena moshinima eshi.
10Ndele omupiya okwa kufa eengamelo omulongo domeengamelo domwene waye ndee okwa ya e na oinima i lili noi lili iwa i na ondilo yomoinima yomwene waye. Ye okwa fikama ndele okwa ya kuMesopotamia, koshilando shaNahor. 11Neengamelo okwe di twifa eengolo pondje yoshilando pomufima umwe, etango longuloshi, mefimbo tuu olo ovalikadi tave uya okuteka omeva, 12ndele ye ta ti: “Omwene Kalunga kaAbraham omwene wange, monife nge elao nena ndele fila onghenda omwene wange Abraham. 13Ame ohandi kala ofika apa pomufima fimbo ovana oukadona voonakukala moshilando tave uya okuteka omeva. 14Nashi ningwe hano: Okakadona aka handi ka lombwela hai ti: ‘Ehenifa oshiyuma shoye, ndi nwe mo,’ ngeenge ka nyamukula taka ti: ‘Nwa, ame ohandi ka nwefa yo eengamelo doye,’ nena okakadona oko, oko wa nunina omupiya woye Isak, nosho ngaha ame hai ka shiiva, nokutya Ove owa fila onghenda omwene wange.”
15Ye fimbo ina mana okupopya, Rebeka okwe uya po. Ye omona okakadona kaBetuel, omona waMilka, omwalikadi waNahor ondenge yaAbraham. Ye oku na oshiyuma kepepe laye. 16Ndele okakadona aka oka li kawa, inaka kumwa komulumenhu nandenande. Ndele ko oka kulukila momufima ndele taka teke oshitoo shako ndele oka aluka mo. 17Opo nee omupiya okwa endelela ndele ta ti: “Pe nge ndi nwe mo moshiyuma shoye omeva manini.” 18Ndele ko oka nyamukula taka ti: “Nwa mo, omwene wange.” Opo nee oshiyuma oke shi kululila diva momake aye ndee oke mu pa a nwe. 19Eshi ke mu pa okunwa oka tya: “Ame ohandi ka xwiila yo neengamelo doye, di nwe di kumwe.” 20Opo nee oshiyuma oke shi tila diva metemba ndele ka tondoka, ka shuna vali momufima ka ka teke, ndele ka xwiila eengamelo daye adishe. 21Omulumenhu okwe ka tala, a kumwa a mwenenena nokwa hala a shiive ngeenge Omwene okwe mu monifa tuu ondjila i na elao.
22Ndele eengamelo eshi da nwa da kumwa, omulumenhu okwa kufa olinga yoshingoldo, youdjuu wetata losekeli, noivela ivali yokomaoko yoshingoli, i fike peesekeli omulongo, 23ndele ta ti: “Ove omona okakadona kalyelye? Lombwele nge. Meumbo laxo omu na onhele tu nangale mo?” 24Ndele ko oke mu nyamukula taka ti: “Ame omona okakadona kaBetuel, omona waMilka ou e mu dala naNahor. 25Ndele ko oke mu lombwela vali taka ti: Meumbo letu omu na omwiidi neendja dasha, nonhele yokunangala.” 26Opo nee omulumenhu okwe linyongamena a twa oshipala shaye poshi ndee okwa ilikana Omwene 27neendjovo edi: “Omwene Kalunga kaAbraham, omwene wange na hambelelwe, osheshi Ye ina anyena omwene wange ouwanghenda noudiinini waye. Omwene okwa endifa nge nondjila ei yokeumbo lamumwaina womwene wange.”
28Opo nee okakadona oka tondoka, ka ka hepaulule meumbo laina eshi sha ningwa. 29Ndele Rebeka okwa li e na omumwaina edina laye Laban. Ndele Laban okwa lotokela komulumenhu kwinya komufima. 30Osheshi ye eshi a mona olinga noivela komaoko amumwaina nokwa uda eendjovo damumwaina Rebeka nokutya ope na omulumenhu ou a popya naye, ye okwa ya komulumenhu, fimbo ye a li ofika natango peengamelo pomufima, 31ndele ta ti: “Ila meumbo, ove omunangekwa noupuna wOmwene! Oshike u li ofika pondje, manga ame nda longekida eumbo nonhele yo yeengamelo?” 32Ndele omulumenhu okwe uya meumbo. Laban okwa mangulula eengamelo, ndele te di pe oikulya. Opo nee okwa etela omupiya waAbraham novalumenhu ava va li pamwe naye omeva okukosha eemhadi davo. 33Opo nee vo ove mu etela eendja. Ndele ye ta ti: “Ame itandi li fimbo inandi tonga eenghundwa dange.” Ndele ye okwa nyamukula: “Popya hano.”
34Opo nee ye okwa tya: “Ame omupiya waAbraham. 35Ndele Omwene okwa nangeka noupuna omwene wange unene, okwe mu yambapaleka unene, ndele okwe mu pa eedi neengobe, oshisiliveli noshingoldo, ovapika ovalumenhu novapika ovakainhu, neengamelo neendongi. 36Ndele Sara, omwalikadi womwene wange okwa dalela omwene wange omona omumati moukulupe waye. Ndele omwene wange okwe mu pa ashishe osho e kwete. 37Ndele ye okwa anifa nge ndele ta ti: ‘Ove ino kongela omumwange omwalikadi moukadona vOvakaanan, ovo ndi li moshilongo shavo. 38Ndelenee ou na okuya keumbo latate nokepata letu nokukongela omumwange omwalikadi oko.’
39“Opo nee nda pula omwene wange: ‘Omwalikadi ngeenge ina hala okuuya pamwe naame.’ 40Ndele ye okwa nyamukula nge: ‘Omwene, moipafi yaye ame nda kala nokweenda, ota ka tuma omweengeli waye pamwe naave, ndele Ye ote ku monifa elao mondjila yoye, opo u shiive okweetela omumwange omwalikadi mepata letu nomeumbo latate, 41opo nee ove wa manguluka keano we li anena nge, ngeenge to uya kepata letu; ndele vo ngeenge inava hala oku mu ku pa, opo nee wa manguluka keano we li anena nge.’
42“Ame onde uya nena komufima ndele handi ti: ‘Omwene, Kalunga kaAbraham, omwene wange, ngeenge owa hala okumonifa nge elao mondjila yange, 43ame handi kala ofika apa pomufima, nashi ningwe ngaha: Moukadona ava tave uya okuteka, ngeenge onda lombwele po kamwe hai ti: Pe nge ndi nwe mo omeva manini moshitoo shoye, 44ndee ko taka nyamukula nge taka ti: Nwa mo ove mwene ndele neengamelo doye ohandi di xwiile, ou omwalikadi, Omwene e mu nunina omona womwene wange.’ 45Ame fimbo inandi mana natango okulipopila momutima wange, Rebeka okwe uya noshitoo shaye kepepe ndee ta kulukile komufima ndele ta teke. Opo nee ame nde mu lombwela: ‘Pe nge ndi nwe mo!’ 46Ndele ye okwa kulula diva oshitoo shaye kepepe ndele ta ti: ‘Nwa mo, nohandi ka xwiila eengamelo doye.’ Ndele ame onda nwa mo, nokwa xwiila yo eengamelo. 47Opo nee nde ka pula ndele handi ti: ‘Ove omona walyelye?’ Ndele ko oka nyamukula: ‘Omona okakadona kaBetuel, omona waNahor, ou e mu dalelwa kuMilka.’ Opo nee nda tula olinga keyulu lako noivela yokomaoko komaoko ako, 48ndele ame onde linyongamena nokutwa oshipala poshi koshipala shOmwene Kalunga kaAbraham, omwene wange, ou a endifa nge nondjila ya yuka opo ndi monene omona womwene wange, omona okakadona kamumwaina womwene wange. 49Nye ngeenge omwa hala okumonifa omwene wange onghenda noudiinini, shi lombweleni nge. Nongeenge hasho, lombweleni nge, opo ndi shiive okuya kolulyo ile kolumosho.”
50Opo nee Laban naBetuel ova nyamukula ndele tava ti: “Oshinima eshi osha dja kOmwene. Fye itatu dulu okupopya kwoove nande owii ile ouwa. 51Rebeka oye ou e li ofika koshipala shoye, mu kufa po, indeni, opo ye a ka ninge omwalikadi womona womwene woye, ngaashi Omwene a tonga.” 52Ndele omupiya waAbraham eshi a uda eendjovo davo, ye okwe linyongamena poshi koshipala shOmwene. 53Opo nee omupiya okwa longolola oinima oisiliveli noingoldo noikutu, nde te i pe Rebeka. Komumwaina nokuina ye okwa yandja omilongelo di na ondilo. 54Ndele vo ova lya nova nwa, ye novalumenhu ava va li pamwe naye, ndele ova nangala oufiku oo. Vo eshi va penduka ongula inene, ye ota ti: “Lekeleni nge ndi ye komwene wange.” 55Ndelenee mumwaina naina tava ti: “Okakadona naka kale pufye efiku limwe ile omafiku omulongo, opo mu dule okuya.” 56Ndelenee ye okwe va nyamukula ta ti: “Inamu kelela nge, osheshi Omwene okwa monifa nge elao mondjila yange. Lekeleni nge ndi shiive okushuna komwene wange.” 57Opo nee vo tava ti: “Natu ifaneni okakadona, koovene ka pulwe.” 58Ndele vo ova ifana Rebeka ndele tave mu pula: “Owa hala okuya pamwe nomulumenhu ou?” Ndele ye okwa nyamukula: “Heeno.” 59Opo nee vo ova lekela mumwaina Rebeka nomuyakuli waye pamwe nomupiya waAbraham novalumenhu vaye. 60Ndele vo ova nangeka noupuna Rebeka ndele tava ti kuye:
“Omumwameme, mwoove namu dalwe
omayovi omilongo,
noludalo loye nali nangale moshivelo shovanaita naave.”
61Opo nee Rebeka nomuyakuli waye ove lilongekida nova londa keengamelo nokushikula omulumenhu. Osho ngaha omupiya okwa kufa Rebeka ndele okwa shuna.
62Ndele Isak okwe uya langhele puBeer-Lahai-Roi, osheshi ye okwa kala moshilongo shokoumbangalanhu. 63Ndele Isak okwa ya a ka endaenda komaalala etango longuloshi. Ndele ye eshi a yelula omesho aye okwa mona eengamelo tadi uya. 64Rebeka yo okwa yelula omesho aye nokwa mona Isak. Opo nee ye okwa londoloka kongamelo, 65ndele ta ti komupiya: “Omulumenhu olyelye ou te tu shakeneke mealala?” Nomupiya okwa nyamukula ta ti: Oye mwene wange. Opo nee Rebeka okwa kufa oshikaiwa ndele okwe liuvika. 66Opo nee omupiya okwa hepaululila Isak ashishe eshi a ninga. 67Ndele Isak okwe mu twala monduda yaina Sara, ndele okwa tambula Rebeka, ndele okwa ninga omwalikadi waye. Ndele ye okwa li e mu hole. Osho ngaha Isak a hekelekwa kefyo laina.
Currently Selected:
GENESIS 24: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
