GENESIS 26
26
Isak muGerar
1Oshilongo osha hangika kondjala ya shikula ondjala inya yopomafiku aAbraham. Onghee Isak okwa tembuka, a ya kuAbimelek, ohamba yOvafilisti, kuGerar. 2NOmwene okwe mu lihololela ndele ta ti: “Ino ya kuEgipiti. Kala medu olo Ame handi ke ku ulikila. 3Kala ngaashi omunailongo moshilongo eshi, ndele ame ohandi ka kala pamwe naave; noludalo loye ohandi ke li pa oilongo ei. Ame ohandi ka wanifa eano nde li anenene xo Abraham. 4Ndele Ame ohandi ka hapupalifa oludalo loye li fike peenyofi dokeulu, noludalo loye ohandi ke li pa oilongo ei, nomoludalo loye oiwana aishe yokombada yedu otai ka nangekwa noupuna. 5Osheshi Abraham okwa pwilikina ondaka yange nokwa diinina omalombwelo ange noipango yange neenghedimhango dange neemhango dange.”
6Osho ngaha Isak a kala muGerar.
Isak naAbimelek
7Ndele ovalumenhu vomoshilongo osho eshi ve mu pula omwalikadi waye, ye okwa nyamukula ta ti: “Ye omumwameme.” Osheshi ye okwa li a tila okutya: “Ye omwalikadi wange”, osheshi pamwe ovalumenhu vomoshilongo osho otave mu dipaa molwaRebeka. Osheshi Rebeka okwa li muwa. 8Ndele ye eshi a kala ko efimbo lile, Abimelek, ohamba yOvafilisti, okwa talela mekende, ndele ta mono Isak ta danauka naRebeka omwalikadi waye. 9Ndele Abimelek okwa ifana Isak ndele ta ti: “Tala, ye mboli omwalikadi woye! Omolwashike wa tile: ‘Ye omumwameme?’ Ndele Isak okwe mu nyamukula ta ti: ‘Heeno, ame onda diladila kutya pamwe handi ka dipawa molwaye.’ ” 10Ndele Abimelek okwa tya: “Owe tu ninga nee ngahelipi ngaho? Ngeno opa li umwe womovanhu vetu a nangala nomwalikadi woye, ngeno owa eta etimba kombada yetu!” 11Opo nee Abimelek okwa yandja ondaka kovanhu vaye, ndele ta ti: “Ou ta kumu omwalikadi womulumenhu ou, ota ka fya doshilielela.”
Oupuna waIsak tau eta eemhata
12Isak okwa kuna moshilongo shinya, ndele mudo olo okwa teya oilya lwefele, osheshi Omwene okwe mu nangeka noupuna. 13Nomulumenhu ou okwa ehena komesho moupuna nokwa weda ko oupuna koupuna, fiyo a ninga oshipuna shinene. 14Ye okwa li e na eedi neengobe novapiya vahapu, onghee Ovafilisti ve mu fila efupandubo. 15Ndele omifima adishe odo da xupilwe kovapiya vaxe, momafiku axe Abraham, Ovafilisti ove di fufila ndele tave di yada edu.
16Opo nee Abimelek okwa lombwela Isak ta ti: “Dja po pufye, osheshi ove wa punapala, u tu dule.” 17Opo nee Isak okwa dja po opo nokwa onga onhanda mefilu laGerar nomo a kala. 18Ndele Isak okwa xupulula omifima odo da xupwa momafiku axe Abraham, naado Ovafilisti va fufila konima yefyo laAbraham, ndele te di luku ngaashi xe e di lukile. 19Ndele fimbo ovapiya vaIsak tava xupu mefilu, ova mona ofifiya i na omeva taa kunguluka. 20Ndele ovafita vomuGerar ova twa eemhata novapiya vaIsak ndele tava ti: “Omeva aa oetu.” Onghee hano ye okwa luka omufima ou Esek, shaashi oko va li tava tu eemhata naye. 21Opo nee vo va xupa omufima umwe, nomolwao vo va twa yo eemhata. Onghee hano e u luka Sitna. 22Opo nee vo va dja po opo, ndele va ka xupa omufima umwe, ndele wo inave u twila eemhata. Onghee ye e u luka Rehobot ndele ta ti: “Heeno, paamha Omwene e tu pa onhele ya mbwalangadja ndele hatu dulu okuhapupala moshilongo.”
23Opo ye a lunduluka po apa ndele ta i kuBerseba. 24Nomoufiku tuu ou Omwene okwe liholola kuye ndele ta ti: “Aame Kalunga kaxo Abraham. Ino tila, osheshi Ame ondi li pwoove. Nohandi ke ku nangeka noupuna ndele handi ka hapupalifa oludalo loye omolwaAbraham, omupiya wange.” 25Opo nee ye okwa tungila ko oaltari ndele ta ifana edina lOmwene, ndele ta diki ko eefaila daye. Novapiya vaIsak va xupa ko omufima.
26Opo nee Abimelek a dja kuGerar e uya kuye pamwe naAhussat, kaume kaye, naPikol, ondjai yaye. 27Ndele Isak okwe va pula ta ti: “Omolwashike mwe uya kwaame eshi tamu tondo nge nomwa taataa nge punye?” 28Opo nee vo va nyamukula: “Fye otwe shi mona naanaa nokutya, Omwene oku li pamwe naave. Onghee hano fye otwa diladila pa kale eudafano lopakwaana pokati ketu nanye. Fye tu ningeni ehangano: 29Nye inamu tu ningila owii nande owasha, ngaashi yo fye inatu ku kuma, noinatu ku ningila sha shii, ouwa auke ndele hatu ku lekele nombili. Ove ou li shili omunangekwa noupuna wOmwene.” 30Opo nee ye okwe va telekela oshitelekela. Ndele vo ova lya nova nwa. 31Ndele ongula inene va penduka ndele va anenafana eano. Opo nee Isak e va lekela, ndele vo ova dja po puye nombili. 32Mefiku tuu olo ovapiya vaIsak ove uya kuye ndele tave mu hepaululile nokutya ova xupa omufima ndele tava ti kuye: “Fye twa mona omeva.” 33Ndele ve u luka Seba. Onghee hano oshilando shinya hashi ifanwa Berseba fiyo onena eli.
Esau ta hombola
34Esau eshi a wanifa omido omilongo nhee okwa hombola Judit, omona okakadona kaBeeri, Omuheti naBasmat, omona okakadona kaElon, Omuheti. 35Ndele vo ova etela Isak naRebeka oudjuu muhapu.
Currently Selected:
GENESIS 26: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
