GENESIS 44
44
Josef ta yeleke ovamwaxe
1Opo nee Josef okwa lombwela elenga leumbo laye ndele ta ti: “Yadifa omakutu ovalumenhu oikulya i fike paenghono davo dokuhumbata, ndele tula mo oimaliwa yakeshe kombada mekutu laye, 2neholo lange loshisiliveli pamwe noimaliwa yoilya yaye ou na oku li tula meni, kombada mekutu longhelo.” Ndele ye okwa ninga ngaashi a lombwelwa kuJosef. 3Hano ongula, eluwa opo tali tende, ova lekela ovalumenhu neendongi davo. 4Vo ova pita mo moshilando. Inava ya natango kokule opo nee Josef okwa lombwela elenga leumbo laye ndele ta ti: “Lilongekida u shikule ovalumenhu. Ndele ngeenge we va hange va pula: ‘Omolwashike mwa alula ouwa nowii? Omwa vakela mo shike eholo lange loshisiliveli? 5Oshinima osho tuu osho omwene wange ha nwine mo nomo ha tale mo alushe oiholekwa? Nye omwa ninga nai, eshi mwa ninga ngaha.’ ”
6Ndele ye okwe va hanga nokwe va lombwela eendjovo tuu odo. 7Opo nee vo ova tya kuye: “Omolwashike omwene wetu ta popi eendjovo da tya ngaha? Eshi oshi li kokule nafye, tu ninge ngaha. 8Tala, oimaliwa inya twa hangele meni kombada momakutu etu otwe i alula medu laKaanan noku i ku shunifila, fye ohatu dulu ngahelipi ngeno okuvaka oshisiliveli ile oshingoldo meumbo lomwene woye? 9Ou, mokati kovapiya voye, ta hangika e na eholo olo oku na okufya, nafye atushe ohatu ningi ovapika vomwene wetu.” 10Opo nee ye okwa tya: “Eewa, nashi kale ngaashi mwa tonga. Ou ta hangwa nalo ota ningi omupika wange, ndelenee nye omwa manguluka.” 11Opo nee vo, keshe umwe, ova tula omakutu avo divadiva poshi ndele keshe umwe okwa mangulula ekutu laye. 12Ndele ye okwa konga, a hovela pomukulunhu nokwa xulila ponghelo. Eholo ola monika mekutu laBenjamin.
13Opo nee vo va pombaula oikutu yavo, keshe umwe okwa londeka omutengi kondongi yaye, ndele vo va shuna koshilando. 14Ndele Juda okwe uya pamwe novamwaxe meumbo laJosef, fimbo natango ye a kala mo, ndele vo ova wila eombe koshipala shaye. 15Opo nee Josef okwe va pula ta ti: “Oshike hano mwa ninga? Inamu shiiva nokutya, omulumenhu ngaashi ame, ohandi dulu okushiiva, kape na omalimbililo.” 16Ndele Juda okwa pula ta ti: “Fye ohatu dulu okupopya shike komwene wetu? Ohatu ti shike? Onashike hatu dulu okulipopila? Kalunga okwa holola okunyona kwovapiya voye. Tala, fye ovapika vomwene wetu, fye naau a hangwa neholo.” 17Ndele ye okwa tya: “Oshinima osho nashi kale kokule naame, ndi ninge ngaha. Omulumenhu ou a hangwa neholo oye aeke ta ka ninga omupika wange. Ndelenee nye indeni nombili kuxo.”
18Opo nee Juda okwa ehena kuye ndele ta ti: “Akutu, omwene wange, omupiya woye na itavelwe okupopya ondjovo imwe momatwi omwene wange; ino handukila omupiya woye, osheshi ove ou li ngaashi Farao. 19Omwene wange okwa pulile ovapiya vaye ndele ta ti: ‘Nye omu na tuu xo ile omumwaxo?’ 20Ndele fye otwa nyamukula omwene wetu twa tya: ‘Fye otu na tate a kulupa. Nomona omunyasha, ou a dalwa moukulupe, ndelenee mumwaina okwa fya. Ndele oye aeke a fyaala po kuina, naxe oku mu hole.’ 21Opo nee ove wa lombwela ovapiya voye: Mu eteni kwaame ndi shiive oku mu tala. 22Ndele fye otwa nyamukula omwene wetu: ‘Omona ita dulu okufiya po xe, osheshi ngeenge te mu fii po, xe ota fi.’ 23Opo nee ove wa lombwela ovapiya voye: ‘Onghelo yeni ngeenge itai uya pamwe nanye, itamu ka mona vali oshipala shange.’ 24Ndele fye eshi twa fika kutate, omupiya woye, ndele twe mu hepaululila eendjovo domwene wetu, 25tate okwe tu lombwela: ‘Indeni ko vali mu ke tu landele eendja.’ 26Ndelenee fye twa tile: ‘Fye itatu dulu okuya ko ngeenge katu li nonghelo yetu. Osheshi itatu ka mona oshipala shomulumenhu winya, ngeenge onghelo kai po pufye.’ 27Ndele tate, omupiya woye, okwe tu lombwela: ‘Nye omu shi shii nokutya omwalikadi wange okwa dalela nge ounona vavali, 28umwe okwa dja po pwaame, ndele ame onda tile: “Oshili, ye okwa nyanyaulwa, okwa nyanyaulwa!” Ndele fiyo onena inandi mu mona. 29Ngeenge tamu kufa po yo ou pwaame, ndele ta hangika koshiponga opo nee tamu ka twala eexwiki dange deenghwakutoka noluhodi moshovafi.’ 30Ame ngeenge handi i kutate, omupiya woye, ndele omona ke po pufye, 31ota ka fya, ngeenge ita mono omona e li pufye osheshi omwenyo waxe owa kanyatela shili kuye. Novapiya voye otava ka twala eexwiki domupiya woye deenghwakutoka noluhodi moshovafi. 32Osheshi omupiya woye okwe litula ponhele yomona koshipala shatate, ndele ame onda tile: ‘Ngeenge itandi mu alula kwoove, ame ohandi ka kala ndi na etimba koshipala shoye mokukala kwange akushe.’ 33Itavelela hano omupiya woye a kale ponhele yomona omupika womwene wange. Ndele efa omona a ye pamwe navamwatate, 34osheshi ame ohandi dulu ngahelipi okuholoka kutate, omona ngeenge ke po pwaame? Ame itandi ka dula okutala oluhodi lidjuu tali ka hanga tate!”
Currently Selected:
GENESIS 44: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
