GENESIS 46
46
Jakob ta tembukile kuEgipiti
1Ndele Israel okwa fikama neumbo laye alishe ndele okwa fika kuBerseba. Ndele okwa yambela Kalunga kooxe Isak omayambo. 2Ndele Kalunga okwa lombwela Israel memoniko oufiku ndele ta ti: “Jakob, Jakob!” Ndele ye a nyamukula: “Aame ou!” 3Opo nee Ye okwa tya: “Aame Kalunga, Kalunga kooxo. Ino tila okuya kuEgipiti, osheshi oko handi ke ku ningila oshiwana shinene. 4Ame ohandi ka ya pamwe naave kuEgipiti, naame mwene ohandi ke ku alula ko vali. Ndele Josef ote ke ku fifikinifa omesho oye.” 5Opo nee Jakob okwa dja po puBerseba. Novana vaIsrael va londeka xe Jakob, nounona vavo novalikadi vavo momatemba, oo Farao e va tumina e ke mu tale. 6Ndele vo ova ongela oimuna yavo noinima yavo, ve lilikolela muKaanan, ndele va fika kuEgipiti, Jakob ye mwene noludalo laye alishe, 7ovana vaye ovalumenhu novakainhu novatekulu vaye nepata laye alishe ye e li twala muEgipiti.
Oludalo laIsrael
8Omadina Ovaisraeli ava ve uya kuEgipiti oyaa: Jakob novana vaye oshiveli shaye okwa li Ruben. 9Novana ovamati vaRuben: Henok naPallu naHesron naKarmi. 10Novana ovalumenhu vaSimeon: Jemuel naJamin naOhad naJakin naSohar naSaul, omona womwalikadi Omukaanan. 11Novana ovamati vaLevi: Gerson, Kohat naMerari. 12Novana ovamati vaJuda: Er naOnan naShela naPeres naSera. Ndelenee Er naOnan ova fila medu laKaanan. Novana ovamati vaPeres ova li Hesron naHamul. 13Novana ovamati vaIsaskar: Tola naPua naJasub naSimron. 14Novana ovamati vaSebulon: Sered naElon naJagleel. 15Ovo hano ovana ovamati vaLea, ye e va dalela Jakob muPaddan-Aram pamwe nomona okakadona Dina. Aveshe kumwe ovana ovamati noukadona vaye ova li omilongo nhatu navatatu.
16Novana ovamati vaGad: Sifjon naHaggi, Suni naEsbon, Er naArodi naAreeli. 17Ovana vaAsser: Jimna naJisva naJisvi naBeria naSera, omumwaina omukainhu. Novana ovamati vaBeria: Eber naMalkiel. 18Ovo ovana ovamati vaSilpa, ou Laban e mu pa omona waye Lea. Ndele ye okwa dalela Jakob ovana ava omulongo navahamano.
19Ovana ovamati vaRakel, omwalikadi waJakob: Josef naBenjamin. 20Ndele Josef okwa dalelwa muEgipiti Manasse naEfraim, ava Asenat, omona waPotifera, omupristeli womuOn, e mu dalela. 21Novana ovamati vaBenjamin: Bela naBeger naAsbel, Gera naNaeman, Egi naRos, Muppim naHuppim naArd. 22Ovo ovana ovamati vaRakel e va dalela Jakob, aveshe kumwe ovanhu omulongo navane.
23Nomona omumati waDan: Husim. 24Novana ovamati vaNaftali: Jakseel naGuni naJeser naSillem. 25Ovo ovana ovamati vaBilha, ou Laban e mu pa omona waye Rakel. Ndele ye okwe va dalela Jakob, aveshe kumwe ovanhu vaheyali.
26Ava va tembukila kuEgipiti pamwe naJakob ndele ava va dja momatundji aye, aveshe kumwe ova li omilongo hamano navahamano. Ovalikadi vovana vaJakob inava valelwa mo. 27Novana ovamati vaJosef ava ve mu dalelwa muEgipiti ova li ovana vavali. Ovanhu aveshe vomepata laJakob, ava ve uya kuEgipiti, ove li omilongo heyali.
Eshakeno laJosef naxe
28Ndele ye okwa tetekelifa Juda kuJosef, e mu lombwele ondjila yokuGosen. Ndele vo ova fika medu laGosen. 29Opo nee Josef okwa manga etemba laye, nokwa ya kuGosen a ka shakene naxe Israel. Ndele ye eshi a fika kuye, okwe mu dingatela mofingo nokwa lilila lule mofingo yaye. 30Ndele Israel okwa tya kuJosef: “Paife handi dulu okufya, eshi nda mona oshipala shoye, eshi u na omwenyo natango.” 31Opo nee Josef okwa lombwela ovamwaxe novakwao vaxe ta ti: “Ame ohandi i ndi ka shiivifile Farao ndele handi ti kuye: ‘Ovamwatate neumbo latate eli la li medu laKaanan ole uya kwaame. 32Ndele ovalumenhu vo ovafita veedi, osheshi vo ova li ovafita voimuna, ndele vo ova etelela eedi davo neengobe davo naashishe ve kwete.’ 33Ndele Farao ngeenge te mu ifana ndele ta pula ta ti: ‘Oshilonga sheni oshashike?’ 34Nye nyamukuleni, tamu ti: ‘Ovapiya voye ova kala ovafita voimuna okudja kounyasha wavo fiyo opaife, fye otu li ngaashi ootate,’ opo mu shiive okukala muGosen. Osheshi omufita keshe woimuna oye oixuna, momesho Ovaegipiti.”
Currently Selected:
GENESIS 46: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
