Luk 10
10
Nir-pihiyopoi la Toomir la
1Ŋwala n da ba'ah la, Daan la da lɔɔ la nir seba mi pihiyopoi tom ba bayi, bayi yi ba gaat U tɔɔn keŋ tense'eh woo ka U da tar putẽ'ẽr yi U keŋ la. 2U da yel ba yii, <<Dii la zaŋir zɔ'ɔ mi, ka seba n nan tom la n pɔ'ɔ; yela zugu, yel mi daan la n a poog la daan la, yi u ke ka ntomirib tana pa'ah. 3Ya kemma. Beh mi, Mam tomit ya mi a aa pebibih n gɛ̃rigit ni ngbeya la. 4Da zãlin potamaan, bee tapɔk, bee taɣaraa; da po'ohin so n be sɔr la zugo.
5Ya n ni kpɛ̃ yise'er woo, ya n po'ohum ba yii, <Suma'ahum be yidee ni!> 6Ka so m be ni ka sak po'ohuga, ya suma'ahum la nan be u sa'ani; amaa la n ka yela, bu nan leb ya sa'ani na. 7Kpelim mi yiden ni, dit ka ŋwũũt se'el woo ka ba te ya, se'el n so la, ntomit woo nar yi u dɛ'ɛ wɔɔt. Da lɔhirin yɛ'ɛ.
8Ya n keŋ teŋ ni, ka nirib la dɛ'ɛ ya saan, di mi se'el woo ka ba te ya; 9teb mi ba'anam seba n be ni la, ka yel ba yii, <<Na'ayen tensoŋ so'olum la tana lɛm ni ya?>> 10Ka sanse'e woo ka ya n kpɛ̃ teŋ ni ka ba pu dɛ'ɛ yaa, yi mi ka ni do pala zut ka yel yii, 11<Hali ya teŋ ntan la n poɣum puk ti nɔba wa, ti kpa'ah ba bah pa'an yi ti gɛ̃ mi ni ya. Baŋ mi dee la wa: Na'ayen so'olum la tã la pɔ̃riga na.> 12Mam yet ya mi wa, daan den daar la, la daa nan a ma' ma' Sodom teŋ la ni gaat tenkaŋ.
Bɔɔ nan paa Tense'eh n pu sak tɛɛgire
13Bɔɔ nyɛ yam, Korazin! bɔɔ paa yam Befesayida! Yelenyalinse'a ka ya nyɛ wa Taya ni Sidon dem n da nyɛɛn na aŋ taab, ba da naan ki'ihin ba yelebe'et wunse'erin ha zĩ ni bora fut ni tampɛ̃ɣɛlum. 14Amaa gãkir la ni daan nan a sɔ̃sɔ̃ tet Taya ni Sidon gaat yam. 15Ka yam Kapanaum, yam nan kpɛ̃ tensoŋaa? Aai, ba nan tar ya sigi wɔɔrin.
16<<So woo n womihit ya, womihira Mam, ka so woo n zaɣah ya, zaɣah la Mam, ka so n zaɣah Mam, zaɣah la so n tom Mam na la?>>
Nirib pihiyopoi la lebig na la yela
17Nirib pihiyopoi la da leb mi na ni popeelum, yet yii, <<Daana, I wo'or zugu hali kolekpãbɛ'ɛh sak te ti mi!>>
18U da yel ba yii, <<Mam nyɛ sitaana ka u zɛ'ɛl Na'ayen zugu lut na a aa saa n nyak la. 19Wol mi nii, Mam te ya kpe'eoŋ yi ya nɔɔt bombɛ'ɛh ni nah, ka ya dindem paŋ kum nyaŋ bik yaa, se'el ka' nan daam yaa. 20Ni yela mɛŋ, da nyɛɛmirin yi kolekpãbɛ'ɛh sakit ya nɔya, ka toɣun nyɛɛm mi yi ya wo'ora golih dɔ tensoŋin ha?>>
Yezu Nyɛɛm mi
21Sankaŋ la nɔɔ, Yezu da nyɛɛm ni Vo'ohun Som Sii la poŋi ka yel yii, <<N te I tooma, M Ba'a, saazugu ni teŋ Daana, se'el n so la, Nyɛ sɔɣɛ yel ãã la wa yam ni mi'ilim dem sa'ani ka nɛɛ a te bibibih; ẽẽ, M Ba'a, ŋwala wa pa'al yi I tom la I sũũr M bɔɔt se'em la.
22Mam Ba' la zaŋ se'el woo te M mi; ka so pu mi Dawɔɔ la n a so'o, la n ka Ba' la ma'a, bee Ba' la n a so'o, la n ka Dawɔɔ la ma'a ni so ka Dawɔɔ la lɔɔ yi U pirig pa'ale?>>
23Ka Un da ŋmɛrig tɔ U nya'andolib la, Yezu da yel ba ma'a yii, <<Kamaalug be ni yam n nyɛt se'el la! 24M yet ya mi yi nɔdɛ'ɛhirib berigu ni nanam da bɔɔt yi ba nyɛ yam n nyɛt se'el la, ka pu nyɛɛ, ka mi da bɔɔt yi ba wom yam n womit se'el la, ka pu wom?>>
Samaariya teŋ Nivosoŋ la Maɣahir la
25Nila nila wara-mi'it da dɔɔ zɛ'ɛl yi U mak Yezu. Ka yel yii, <<Pa'ala,>> mam nan iŋ la yela ka nyɛ vom kum ba'ah la?>>
26Ka U yel u yii, <<Lan n golih dɔ wara la ni? Lan ka i kaan niŋa?>>
27Ka u lebih yii, <<Nɔŋim i Daan Na'ayen la ni i sũũr zã'ã, ni i sii ni i paŋ ni putẽ'ẽr zã'ã; ka nɔŋ i taraan a aa i mɛŋ la?>>
28Ka Yezu yel u yii, <<I lebihug la a ntɔɔ, iŋim yela, ka i nan vo?>>
29Un da bɔɔt yi u te u mɛŋ boot la, u da le bɔ'ɔh Yezu yii, <<Ka ɔn n a mam taraana?>>
30Yezu lebih yii, <<Buraa n da zɛ'ɛl Geruzalɛm yɛ Geriko, ka da lu naɣayi fããrih nu'uhin, ba da ŋmɛ u ka fã u se'el woo, ka bah u ka u a nan kpi. 31La da ti mak mi ka Malemadaan dol niŋa yɛ gat, ka un da nyɛ u la, u da lɔk mi keŋ gaat. 32Yela nɔɔ, ka Levi nir mi da paa ni, nyɛ u ka gaat. 33Amaa Samaariya teŋ nir mi da paa na nyɛ u, ka zo u nimbɔ̃'ɔ̃g. 34U da paa u sa'ani zaŋ daam duuh u nɔra la, ka zaŋ kpaam ma' ka bob a somma. U pana da zaŋ u yaɣɛl u boŋ zugu tar u keŋ saam yir, te behit u. 35Ka beog n da yelig la, u da zaŋ ligiri n a dabiha ayi wɔɔt, te so n behit yir la ka yel u yii, <<Wolim u zugu somma ka man ti leb na n nan wɔ sam-se'er woo ka i nyɛ la.
36Nirib batã wa poŋi, ba ɔni ka nyɛ tẽ'ẽh yi, u a taraan tet nira ka naɣayiih fã wa?>>
37<<Ka u yel yii, <<So n zo u nimbɔ̃'ɔ̃g la?>>
Ka Yezu yel u yii, <<Kem ti iŋ yela nɔɔ?>>
Yezu limih Maata ni Mɛɛri gɔɔm
38Bam n da dɛ'ɛ sɔr yɛ la, U da kpɛ̃ tembil se'e ka bompɔk n bɔɔn Maata da dɛ'ɛ U saan kpɛ̃'ɛ̃h u yir. 39U sɔ̃ɔ̃g mi n da be, bɔɔn Mɛɛri, so n da zĩ kpɛ Daan la nɔba bɔba ka womihit se'el ka U yet la. 40Amaa la da womit Maata mi ni tooma la n da zɔ'ɔ se'em nar yi u tom la; Ka u da tana bɔ'ɔh Yezu yii, <<Daana, la pu pak I ni n sɔ̃ɔ̃ga n bah tooma wa zã'ã te mam ma'a waa? Yelim u ka u soŋum?>>
41Ka Daan la da lebih u yii, <<Maata, Maata, yela zɔ'ɔ zɔ'ɔ n daamit i; 42ka yel dikɔ̃ ma'a n pak, Mɛɛri lɔɔ la yelesomir la, ka so kun nyaŋ dɛ'ɛ di u sa'anii?>>
Currently Selected:
Luk 10: MTY
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
