MAK 13
13
Na’ayen Po’ohug doog la Saɣuŋ yela Deŋ yina
1Yezu n da zɛ’ɛl Na’ayen po’ohug doog la ni yit na la, U nya’andolib la nkɔ̃ da yel U yii, <<Behimaa, Pa’ala, lan kugekãra ni mɛkãra n ŋwala!>>. 2Ka Yezu bɔ’ɔh u yii, <<i nyɛ mɛkãra waa? Kugese’a ka ba zaŋ mɛ la ni dikɔ̃ mi kun ti paɣɛl ditaraan zugo, a zã’ã nan ti gbirig dɔ’ teŋ.>>
3Ɔŋ n da zĩ Olif zɔɔr la zugu Na’ayen po’ohug doog la yakin la, Pita, Gemis, Geon ni Andiru da bɔ’ɔh U ŋmɛɣe ŋmɛɣe yii, 4<<Yelim ti, sankan ma’a ka ŋwala wa nan iŋe, ka dããl koni n nan ti yi na pa’an yi ŋwala wa be ni yi la iŋ mi?>> 5Ka Yezu pĩ’ĩl yet ba yii, <<Mi’in ka da bahin ka so pã’ãh ya ka ya tuuge. 6Nirib berigu nan tana Mam wo’or zugu yet yii, <Mam a la Yezu!> Ba nan pã’ãh nirib zɔ’ɔ zɔ’ɔ ka ba tuu. 7Yan ti wom zaba tehin ni zaba vulinvugit, da bahin ka ya yam ŋma’ara, ka laa wa a la se’el n nan ba’ahin iŋ, ka ba’ahug la saŋa nan pu paage. 8Teh nan ti dɔɔ zaba ni teh, yizut nan ti dɔɔ zaba ni yizut, teh zɔ’ɔ zɔ’ɔ nan ti miim, kom nan ti lu ka makir ka’a. Ŋwala wa nan a la yeletoot la pĩ’ĩlug saŋa.
Sããhug Yela Deŋ yina
9<<Mi’in yi yam mɛŋ la, ba nan zaŋ ya te kpɛ’ɛnam, ka ba bo’ ya Geunam po’ohug dobibih la poŋi; ya nan ti zɛ gɔmenanam ni nakãra tɔɔn yi ba gãk ya Mam zugu, ka la a maan tet ba. 10La a la pɛ̃rigir yi Na’ayen yela la nan paa teh zã’ã yiiga. 11Ba n ti tar ya tã gãkir na, da fabin ni bam n nan bɔ’ɔh ya ka ya tɔɣɔ se’em, amaa yel mi la yelehun se’eb ka ya dɛ’ɛ sankaŋa ma’a la, den zugu, la ka la yam n nan tɔɣɔra, ka la a la Vo’ohun Som Sii la n tɔɣɔt. 12Sɔ̃ɔ̃g nan dɔ̃r sɔ̃ɔ̃g ka ba ko’ u, ka ba’ nan dɔ̃r bii, biih nan dɔɔ gbiriri ni ba dɔɣɛrib hali ka ba ti ko’ ba; 13ba zã’ã nan yaa ya Mam wo’or zugu. Amaa so n ti yaŋ ŋmib dol paa di ba’ahug nan nyɛ fããgir.
Bonkihug
14Ya n ti nyɛ ka bonkihug zɛ zĩse’e n pu narin yi la bee (ya seba n kaan la bɔk ma), seba woo n be Geudiya teŋ la zom do zɔya zut. 15So n yaɣa gɔhuk zugu da sigi yi u zaŋ se’el bee u kpɛ̃ doogin; 16ka so n be poogin da leb kul yirin yi u zaŋ u fuugo. 17Sabaab nan ti paa pɔɣɛpoohedem ni bompɔɣɔse’eh n tar biih ka ba mɔɣɛt dabih aŋ poŋi. 18Po’oh mi yi yel ãã wa da ti it sapalug saŋa. 19Ka dabih ãã wa ni, namihekãt se’eog n nan ti paa nirib la nan a se’eog n nan pu tabel iŋe, hali zaŋit Na’ayen N da naam teŋa pĩ’ĩlug saŋa na la ti paa zina, ku taab kun le malegun iŋ ya’aha. 20Ka Daan la n da pu ŋmaagin dabih aŋ bahin nii, so kun pɛ̃ɛ̃gin nii; la mi a la seba ka U lɔɔ la zugo, ka U sirig dabiha la bah. 21Ka so n ti yel i sankaŋ la yii, <Behimaa, Fããt la n ŋwala!> bee <Behimaa, Un la ha!> da sakin yi la a seraa. 22Den zugo, niriseba nan ti tana maɣat yi bam a la Krista la bee Na’ayen nɔdɛ’ɛhirib la, ba nan yi na tomit toonnyalema ka yet yela berigu yi ba pã’ãh ya ka ya tuu, hali ni seba ka U poɣun lɔɔ la. 23Mi’in ka gur; Mam poɣun yel ya se’el woo.
Asaal Dawɔɔ la Lebig na yela
24Ka dabih aŋ poŋi, namihug dabiha la n ti gaat,
wuntɛɛŋ nan sob
ka ŋmarik kun nɛɛgira,
25ka ŋmarebibih zɛ’ɛl saazugu lut na,
ka saazugu ni u paŋ la zã’ã miimit.
26Niŋa ka ba pana nan nyɛ 'Asaal Dawɔɔ la ka U dol sangbana kenna ni pankãt ni pɛ̃k. 27U nan ti pana tom U malekanam ka ba dolih teŋa loɣa anaahi la zã’ã laɣah seba woo ka Na’ayen lɔɔ teŋa ni saazugu la.
Nkaŋ maɣahir la n pa’an se’el
28<<Zamih mi yam ka su'un beh nkaŋ maɣahira ni: ka nkaŋ yila n ti buhit vamɛla ya mi yi sigir lɛm mi. 29Yela mɛŋ nɔɔ, ya n ti nyɛ ka yel ãã wa it yam baŋim yi Asaal Dawɔɔ la lebig na la lɛm mi, hali ka la kun wuuge. 30N yet ya la yelemɛŋir yi, zomaaŋ kãã kun ba’ahe lan ka la ŋwala wa woo ti iŋ gaat mii. 31Saazugu ni teŋ nan ba’ah, ka Mam yelehum ma kun maan ba’ahe.
So pu mi Dabihir bee Saŋa laa
32<<Amaa so pu mi di daar bee saŋa laa, hali malekanam la n be saazugu ha la bee Dawɔɔ la zã’ã pu mi’i, la n ka Ba’ la ma’a. 33Beh mi ka maahemit ka ya pu mi’ se’em ma’a ka la nan tanaa. 34La a aa buraa n yɛ kateŋ ka zaŋ u yir gu’ul u da’aba ka tɔ̃r ba ba tooma ba tooma, ka yel u zanɔgut la yi u behum ka gur u lebig na. 35Yela la ya mi’ ka gur behit fassi, se’el n so la, ya pu mi’ se’em ma’a ka yidaan la nan leb naa. U tɔ’ɔn leb zaanɔɔr na, bee wo’ontasoo, bee beogin wo’oŋ wo’oŋ bee be-nkãhug. 36Ɔŋ n ti di’i leb na, la som yi u da nyɛ ya ka ya gbihira; 37se’el ka Mam yet ya wa N yeta nir woo: <Behimi!> >>
Currently Selected:
MAK 13: MTY
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
