1 Ovakorinto 2
2
Etumwalaka ouhunga naKristus ngwaa papelwa komutjaakano
1Vakwetu, ame himbe ya kun̯e, hí dhile nodhondaka dhouthewe ne dhounongo oku mu teethela otjiholekwa tjaKalunga. 2Ame mba tokola ndji kale ahame iwa tja mokati ken̯i kakele vala okwiiwa Jesus Kristus, ngwaa papelwa komutjaakano. 3Ame himbe ya kun̯e, mba li noungone nowoma, ame teketa unene.#Ovil. 18:9 4Epopyo lyandje neteetho lyandje kalya li olyodhondaka dhounongo nodhokuhekela, iya lya li olyodhonkono dhOmbepo yaKalunga, 5eitavelo lyen̯i opo háli ka kulama mounongo wountu, iya li kale modhonkono dhaKalunga.
6Ounongo hembu me u popi vala pumbava kula pambepo, haunongo wopauye hembu ne wovatumini mbava tumina ouye hembu, mboka mbamava anda. 7Iya ounongo hembu mbume popi, ounongo waKalunga, mbwaa holekelwe. Kalunga we u twaa po ae lukulu, ouye tainkolo ahau ko, u ile etumbalo lyetu. 8Ovatumini wouye hembu kape na tja noumo nguu i ounongo hembu, kave u i, ngaile ve u i, ngai kava papelele Muhona wetumbalo komutjaakano. 9Iya ngahi kwa sonekwa okutyaa:
“Otjipuka hihatji monekele,
nahihatji teekele,
nahihatji dhile momutima womuntu,
Kalunga otjo a longekedhela mbave mu hole.”#Jes. 64:4
10Iya Kalunga we tu holololela tjo okupitila mOmbepo ye. Ombepo i thongonona ovipuka avihe noviholekwa ovinene vyaKalunga. 11Iya aan̯i nguu i hitji li momuntu? Ombepo yomuntu omwene oyo vala aiika i i hitji li muye. Otjo tji li wo, kape na nguu i hitji li muKalunga, kakele vala Ombepo yaKalunga oyene oyo i i hitji li muKalunga. 12Nt̯e katu pelwe ombepo youye hembu, iya twa pewa Ombepo ndjaa dha kuKalunga, opo tu iwe ovipuka avihe Kalunga mbyee tu pa otjali.
13Ovipuka hembi mbimatu popi, kaatu popi odhondaka dhomounongo wountu, iya matu popi odhondaka ndhaa dha melongo lyOmbepo yaKalunga. Ovipuka vyopambepo matu vi thitululile mbave na Ombepo yaKalunga. 14Iya omuntu vala kaa ulu okutambula ovipuka mbimavi dhi kOmbepo yaKalunga. Kee vi tee, mavi mu ningile owoova, mena lyokutya ovipuka vyopambepo mavi teeka vala kovantu wopambepo. 15Omuntu wopambepo ma koneke ovipuka avihe, ye kaa konekwa komuntu noumo. 16Omusonekwa mau tyaa:
“Aan̯i nguu i omalipulo aMuhona?
Aan̯i nguma ulu oku mu longa?”
Iya nt̯e tu na omalipulo aKristus.#Jes. 40:13
Currently Selected:
1 Ovakorinto 2: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.