2 Ovakorinto 10
10
Paulus ma popile otjilinga tje
1Aame omwene Paulus me mu ilikin̯a, ame ngumu tya ndjimukata, andaa ndji li pun̯e, iya ndjimbandhi, andaa hí li pun̯e. Me mu kumbu mena lyouwa nolweembya lwaKristus. 2Me mu kumbu okutya hime ya kun̯e, ahamamu ndhin̯ikidha, ndji ye nouvandhi ngahi ndji tji i okutya me ulu okukala ahe na owoma kovantu mbamave tu thimbaele okutya tu kala monkalo yopauye. 3Iya nandaku tiwa tu li mouye, nt̯e katu na ovita ngouye hiuu na ovita. 4Omauta ngamatu undapetha motjilwa hehi haouye hembu, iya omauta aKalunga ngaa kola, ngamatu pewa kuKalunga, maa han̯auna po odhondjuwo dhokuholamwa nodhombata dhovithithi. 5Matu han̯auna po okulinoma akuhe huku kondjetha okwiiwa Kalunga, nomalipulo aehe matu e kutu, hatu e ningi okutya a tyee kuKristus. 6N̯e amamu yulike okutya mamu tee, okutya nant̯e twe lilongekedha okuyumaneka omuntu auhe nguhama tee.
7Talen̯i ovipuka ngahi mavi moneka, andaa pe na ngume litya owaKristus, nge lipule uke. Ngaye hiee li owaKristus, nant̯e wo tuvaKristus. 8Ame nandaku tiwa ndji na hime litangele unene, me litangele ouhunga nodhonkono dhetu ndhitwa pewa kuMuhona, iya oku mu tunga, haku mu han̯auna, ame híme ka t̯ithwa ohon̯i. 9Ame híme hala ndji ngale me mu tilitha nomikanda vyandje. 10Iya vamo va popya amava tyaa: “Omikanda vyaPaulus vi na odhondaka dhodhonkono, dho dha kola, iya ye omwene ae ya hempa, otjingone, nodhondaka dhe kadhi na otjilinga.” 11Ovantu mbave li nyahoka, ngava koneke okutya hitwa soneka momikanda vyetu, ahatu li pun̯e, otjo tu li nomovilinga vyetu, natu li pun̯e.
12Iya nt̯e katu lolo okulitwaa ne okuliyeleka novantu mbave litanga. Iya wo kave na tja odhondunge. Ve liyeleka notjiyeleketho tjawo ovene, have liyeleke puwo ovene. 13Iya nt̯e kaatu litanga okupon̯a potjiyeleketho mpatwa tuwa, iya matu litanga notjiyeleketho soka Kalunga hiee tu twiila po, opo tu thike kun̯e. 14Iya kaatu lavelele kokule unene ngambahamatu thiki kun̯e, iya nt̯e twe mu etela ondaka ombwa yaKristus. 15Iya nt̯e kaatu litangele ovilinga mbyaa undapwa kuvamo. Iya tu na ekevelelo ndyoka, eitavelo lyen̯i himali kulu, nant̯e movilinga mbyoka mbitwa undapa, tu kule mokati ken̯i, 16opo tu teethe ondaka ombwa kovilongo vimo tjikoohehinya nan̯e, ahamatu kala amatu litangele ovilinga mbyaa undapwa lukulu, hoka nt̯e huhatu undapele.
17Iya omusonekwa ngahi mau tyaa: “Iya ngume litanga, nge litangele muMuhona.”#Jer. 9:24 18Iya omuntu ngume thevelwa Muhona, onguhame litumbaleke omwene, iya onguma tumbalekwa kuMuhona.
Currently Selected:
2 Ovakorinto 10: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.