2 Ovakorinto 12
12
Omamoneko nomaholololo aPaulus
1Ame me litanga, nandaku tiwa hí na hime nganyana. Napano me utu okupopya ouhunga nomamoneko nomaholololo ngamba holololelwa kuMuhona. 2Ame ndji i omulumentu omulanduli waKristus, napano pa piti odhombula omulongo nane, ye hiaa kaulwa, ha twalwa meulu lyopeuluulu, ame hí tji i okutya wa kaulwa olutu ne ombepo, Kalunga oye e tji i. 3Iya ndji tji i, omulumentu oye e li ye tuu hengu, andaa wa kaulwa olutu ne ombepo, ame hí tji i, Kalunga oye e tji i. 4Wa kaulwa po, ha twalwa mOparadisa moka mwaa tyaa ovipuka mbihavi tjiiwa okutumbulwa, omuntu ke vi pelwe oku vi popya. 5Mena lyomulumentu hengu, me litanga, iya híme litanga ame omwene, nkwai me litangele ovipuka hembi mbyaa ndjulikila okutya ame ndjitjingone. 6Iya ngaile me hala okulitanga, ngai himuhima, mena lyokutya ngai me popi otjatjili. Iya me tji yetha, opo hápa kala nguma ntjokele pontyo muhiee lwete mwaame ne hiee yuvite.
7Iya okutya opo hé linomene omamoneko omanene, mba tuwa okuya molutu lwandje, omweengeli waSatana a ntone unene, opo hé linomo. 8Mena lyotjipuka hehi mba kumba Muhona tutatu, tji ndjethe. 9Iya ye wa ntjeela ha tyaa: “Et̯ilonkenda lyandje lye ku hulu, mena lyokutya odhonkono dhandje odhonene unene movantu mbave li ovingone.” Iya ame mbe hulukwa, me litangele oungone wandje, opo ndji kale meameno lyodhonkono dhaKristus. 10Iya nyahoka mbe hulukilwa okukala moungone, momapenyo, movipo, momatatetho nomomaudheu mena lyaKristus. Iya andaa ndjitjingone, okutya nyahoka ndji na odhonkono.
Otjiho tjaPaulus mena lyeongalo
11On̯e mwa ndhin̯ikidha ndji ngale omuhima. Ame mba thele okupopilwa kun̯e. Iya ame hí pon̯enwe kovayapostoli ven̯i hembenya ovanene, nandaku tiwa aame omuntu vala. 12Iinga kombinga imo ovipuka mbimavi yulike okutya ndjimuyapostoli mwe vi longwa nelikambulithilo enene, vya ningwa movilingatangan̯eko, movilingakumithi nomovilingankono. 13Opi mpamwa ningwa navi okupon̯a omaongalo amo ngae li po? Nkwai ohihe mu tatethele, he mu kumbu, mu mpopile. Alikana, ndjithila ndjen̯i po epuko hendi.
14Taa tuutuu, hehi otjikando otjityatatu, ame mbe lilongekedha okuya kun̯e, híme hala oku mu twika omutenge, mena lyokutya híme hala ovipuka vyen̯i, me hala n̯e ovene. Iya odhondele hawo va ungulila ovanene emona, iya ovanene owo va ungulila odhondele. 15Iya ame me ka yandja nehuluko atjihe soka hindji na tjo, me ke liyandja wo omwene mena lyomienyo vyen̯i, opo ndji mu popile. Andaa ndji mu hole unene, n̯e mamu ka kala amu ntjole kanunu?
16Iya ngatji tye nyahoka, ame hí mu twikile omutenge nokanunu. Iya omuntu umo ma ulu okutya mba li novineya, mbe mu enda movineya. 17Aan̯i owomovalumentu mbamba tuma kun̯e ngwee mu kengelela? 18Ame mba ilikin̯a Titus, e mu valulile po pamo nomukwetu umo. Mamu ulu tuu okutya Titus we mu kengelela? Nt̯e naye katu kalele mpaeli mombepo imo, okulandula ondjila imo?
19Pamo mu soka okutya oluvedhe aluhe tu kala vala amatu lipopile kotjipala tjen̯i? Hatjo, nt̯e tu popya vala soka Kristus hima hala tu popye kotjipala tjaKalunga. Vakwetu ovahivilikwa, atjihe soka himatu ningi, matu tji ningi okutya tu mu popile. 20Ame me tila okutya pamo hime ya kun̯e, me mu vadha ahamu li ngahi me hala. Iya nan̯e wo pamo mamu ka mbadha andji li ngahi hámamu hala. Ame me tila okutya pamo me ke mu vadha amu na omalutangu, onki, oluyuma, okuliyapauka, okulikuminina, omalwaambo, ovithithi, okulinoma nokungwangwana. 21Ame me tila okutya hime ke ya uke kun̯e, Kalunga kandje ma ka ndinga omununu movipathi vyen̯i, me ka lila omihodhi mena lyovantu ovengi mboka mbava lundha lukulu, atjaa kave liteyululile, va dhe mosilo, mokuhelitjaela movihulo nomovihulo ovivi mbiva undapa.
Currently Selected:
2 Ovakorinto 12: DBNT
Highlight
Copy
Compare
Share
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.