Lukas 17
17
Omatyoletho
(Mat. 18:6-7,21-22; Mark. 9:42)
1 Jesus wa heela ovalongwa ve ha tyaa: “Iya kaatji tjiiwa, omatyoletho a kale ahamae ya, atjaa utatyei ngume e eta! 2Nguma tyoletha kamo komuhembu oununu, we thewa okukutilwa ekunkwa mothingo, ye ha yumbwa melunga. 3Iya liyungen̯i n̯e ovene!
“Omukwen̯i andaa wa lundha, mu pukulula. Andaa we liteyulula, mu ithila po.#Mat. 18:15 4Andaa wa lundha kwoove ovikando epanduvali metango, ye he ya kwoove oku ku heela ha tyaa: ‘Mbe liteyulula,’ mu ithila po.”
Eitavelo
5 Ovayapostoli va heela Muhona hava tyaa: “Tu wedhela eitavelo.”
6Muhona we ve heela ha tyaa: “Ngaile mu na eitavelo ndii lithike pombuto yotjitho tjosinapi, ngai mamu heele omukuyu hembu hamu tyaa: ‘Dhikuka po, u litwike melunga,’ ngai mau mu tee.
Otjilinga tjomupika
7“Omupika woye andaa wa dhi kokupulula ne kokulitha, mo tya nge ye monganda dhivadhiva a lye? 8Aai, iya mo mu heele ho tyaa: ‘Ngotji ntwiile po ovikulya, ove u dhale nawa, u nkalele, tainkolo ame li otjo me nu, tjau atjaa ove kon̯ima u lye, ove u nwe.’ 9Omupika ngoka ma pandulwa mena lyokutya wa undapa ovipuka mbyoka mbyaa heelwa? Kaa pandulwa. 10Iya nan̯e wo amwa undapa ovipuka avihe mbimwa heelwa, tyen̯ii: ‘Nt̯e tuvapika vala vanyahinya, mena lyokutya twa undapa vala soka hitwa thele okuundapa.’ ”
Ovavedhi wotjilundu omulongo mava velulwa
11Iya tainkolo va li amava i koJerusalem, Jesus wa yatakana pokati kaSamaria naGalilea. 12Hiaa i kokalongo kamo, ovalumentu wotjilundu omulongo ve mu wan̯en̯eka, hava kulama kokule, 13hava wololoka hava tyaa: “Jesus, Muhona, tu t̯ila onkenda.”
14Jesus hiee ve mono, we ve heela ha tyaa: “Enden̯i, mu ke liyulikithe kovayambethi.” Tainkolo va li amava i, va veluka.#Lev. 14:1-32
15Iya umo owomuwo hiaa mono okutya wa veluka, wa tjuna kuJesus, ha tumbaleke Kalunga nondaka onene. 16We lisata pohi podhompadhi dhaJesus, he mu pandula. Iya omulumentu ngoka wa li Omusamaria. 17Jesus wa popya ha tyaa: “Mbava velulwa kava ombele omulongo? Iya omoovi ve li pi? 18Kaku monekele uke noumo ngwaa tjuna, ongendi ndjika aiika oyo ya tjuna vala okutumbaleka Kalunga?” 19Jesus we mu heela ha tyaa: “Kulama, enda, eitavelo lyoye lye ku velula.”
Okuya kwotjilongo tjaKalunga
(Mat. 24:23-28,37-41)
20 Ovafarisai va pula Jesus okutya otjilongo tjaKalunga matji ya nalun̯i. Ye we ve yaka ha tyaa: “Otjilongo tjaKalunga hatjipuka soka himatji ya amamu tji mono. 21Kaaku tiwaa: ‘Taa tuutuu, tji li hempa’ ne ‘Tji li hempenya,’ mena lyokutya otjilongo tjaKalunga tji li mun̯e.”
22Jesus wa heela ovalongwa ve ha tyaa: “Omatango mae ke ya, katango mamu ka hala okumona etango limo lyOmuna wOmuntu, atjaa kaamu ke li mona. 23Mamu ka heelwa okutyaa: ‘Taa tuutuu, u li hempa’ ne: ‘U li hempenya.’ Hámu i ko, n̯e hámu ve landula. 24Iya matji ka ngala olukeno amalu kene, lu vyadhuka kodhontyo dheulu katee kodhontyo odhonkwawo, Omuna wOmuntu otjo ma ka kala metango lye. 25Iya olutenga Omuna wOmuntu u tha okwiihamethwa unene, ha yekelwahi kekula hendi.
26“Ngahi tja li pomatango aNoa, otjo matji ka kala wo pomatango Omuna wOmuntu.#Gen. 6:5-8 27Ovantu va li ava lya, va nwa, va kupa, wo va kupitha, katee etango ndyoka Noa a hita mondjuwowato. Iya ethundja lye ya, hali ve han̯auna po avehe.#Gen. 7:6-24 28Otjo tja li wo pomatango aLot. Ovantu va li ava lya, ava nwa, va landa, wo hava landetha, va lima, wo hava tungu.#Gen. 18:20—19:25 29Iya etango ndyoka Lot hiaa dhiluka moSodom, pa loka omulilo nodhompawe dhomulilo mbwaa dha meulu, hau ve han̯auna po avehe. 30Omuna wOmuntu katango ma ka hololoka, otjo matji ka kala hinyahi.
31“Etango ndyoka ngoka nguma vadhwa kombanda yondjuwo, kaa ka heluka okupitila ovipuka vye mondjuwo. Nanguma vadhwa motjana, há tjuna monganda, a ka pitile mo tja.#Mat. 24:17-18; Mark. 13:15-16 32Thipaluken̯i omukadhintu waLot.#Gen. 19:26 33Ngoka nguma taendha okuhupitha omwenyo we, me u keketha, iya ngume u keketha, me ke u hupitha.#Mat. 10:39; 16:25; Mark. 8:35; Luk. 9:24; Joh. 12:25 34Me mu heele okutya otjit̯iku soka ovantu vavali mava ka vadhwa moluntu lumo, umo ma ithwa po, omukwawo he thiwa po. 35Ovakadhintu vavali mava ka vadhwa amava tu, umo ma ithwa po, omukwawo he thiwa po. 36[Ovalumentu vavali ava vadhwa motjana, umo ma tambulwa nomukwawo me thiwa po.]”
37Ovalongwa ve mu pula hava tyaa: “Muhona, opi humaku ka ningilwa ovipuka hembi?”
Ye we ve yaka ha tyaa: “Hoka huku na omutuntu, oko ku onganena odhonkuvi.”
Currently Selected:
Lukas 17: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
