Lukas 7
7
Jesus ma velula omupika womunene wovakwavita
(Mat. 8:5-13)
1Iya Jesus hiaa mana okuheela ovantu odhondaka hendhi adhihe, wa ya koKapernaum. 2Kwa li omunene wovakwavita ngwaa li nomupika we ngwaa li ama vele, ye ngwaa li popavi. Omunene wovakwavita wa li ae hole unene omupika we. 3Hiaa tee Jesus, wa tuma ko ovanene wOvajuda kuye oku mu kumba, e ye okuvelula omupika we. 4Hemba hive ya kuJesus, ve mu kumba nodhonkono hava tyaa: “Omunene wovakwavita wa thele okupopilwa kwoove, 5mena lyokutya u hole otjiwan̯a tjetu, ye we tu tungila osinagoga.”
6Iya Jesus wa ya pamo nawo. Tainkolo héye thika popedhi nonganda, omunene wovakwavita wa tuma ko omapanga e, e ke mu heele a tyee: “Muhona, hó liulithwa uke, mena lyokutya ame hí thevelwe, u ye mondjuwo yandje. 7Ame mbe litala okutya hí thevelwe okuya kwoove. Popya vala nondaka, omuntu wandje ma veluka. 8Iya ame naame wo ndjimuntu omutuminwa, ndji na ovakwavita mbave li kohi yandje. Ndji heela omuntu he tyaa: ‘Enda,’ ye ha i, nomukwawo he tyaa: ‘Indjo,’ ye he ya, nomupika wandje ndji tyaa: ‘Undapa otjontumba,’ he tji undapa.”
9Jesus hiee tji tee, we mu kuminwa, ha pilukile kowingi wovantu mbwee mu landula, ha tyaa: “Me mu heele okutya moIsrael híya mona mo nguu na eitavelo enene ndii lithike hempa.”
10Odhontumwa hidha tjuna konganda, dha vadha omupika aa veluka.
Jesus ma imuna kout̯e ondele omudhantu womuhepe
11Kon̯ima yanyahoka Jesus wa ya kondolopa ndjii tiwa oNain, ovalongwa ve nowingi wovantu va enda pamo naye. 12Hiaa thiki popedhi nomuvelo wondolopa, otjivimbi tja tjindwa mo, omuna omudhantu, ongunga yaina ngwaa li omuhepe. Owingi wovantu owomondolopa we mu thindikila. 13Muhona hiee mu mono, we mu etethela mo onkenda ha tyaa: “Hó lili.” 14Wa hweena ko, ha t̯in̯i kotjintali, ovatjindi hava kulama. Jesus ha tyaa: “Mukwe, me ku heele okutya imuka po.” 15Omut̯e wa imuka po, ha utu okupopya. Jesus we mu pa ina.
16Avehe va kambulwa kontilo, hava tumbaleke Kalunga hava tyaa: “Omuprofeti omunene wa hololoka mokati ketu, Kalunga we ya okutala ovantu ve.”
17Omipopyo hembi ouhunga naJesus vya handjana moJudea atjihe nopoulaanganda apehe.
Odhontumwa dhaJohannes Omutjatji
(Mat. 11:2-19)
18Johannes ovalongwa ve ve mu hipululila ouhunga novipuka hembi avihe. 19Ye wa ithana ovalongwa ve vavali, he ve tumu kuMuhona, ve ke mu pule okutyaa: “Ngukwa tiwa me ya, oove ne ngatu kevelele umo?”
20Ovalumentu hembenya hive thiki kuJesus, va popya hava tyaa: “Johannes Omutjatji we tu tumu kwoove, tu pule okutyaa: ‘Ngukwa tiwa me ya, oove ne ngatu kevelele umo?’ ”
21Powola yatjo tuu ndjoka Jesus wa velula ovantu ovengi komauvela, koviihamo nokodhombepo odhombi, ovapot̯i ovengi we ve twikulula. 22Iya Jesus we ve yaka ha tyaa: “Enden̯i, mu ka hipululile Johannes mbimwa mono nambimwa tee okutya ovapot̯i va twikuluka, ovilema mavi ende, owovilundu va veluka, odhompolo dha thituluka, ovat̯e mava imunwa kout̯e, ovathona mava teethelwa ondaka ombwa.#Jes. 35:5-6; 61:1 23Iya omunalao onguhama ndimbililwa.”
24Odhontumwa dhaJohannes hidha dhi po, Jesus wa uta okuhipululila owingi wovantu ouhunga naJohannes ha tyaa: “Mokuti mwa ile oku ka tala tji? Onenge ndjimai pukwapukwa kombepo? 25Iya mwa ka talele tji? Mwa ka talele omulumentu ngwaa dhala omidhalo omiwa vyomalesu? Taa tuutuu, mbava dhala omidhalo omiwa, mbave li mouwa, va kala modhombala. 26Iya mwa ka talele tji? Mwa ka talele omuprofeti? Iinga, me mu heele okutya ye wa pon̯a omuprofeti. 27Oye e li ye hengu ngwaa tiwaa:
‘Taa tuutuu, ame me ka tuma ontumwa yandje, nguma tenge,
ye ngoka ngume ke ku longekedhela ondjila,
tainkolo ove hóye ya.’#Mal. 3:1
28Me mu heele okutya movantu mbava yumukwa kovakadhintu kamu na tja omunene ngwaa pon̯a Johannes, iya omununu kovakwawo avehe motjilongo tjaKalunga oye e mu pon̯a.”
29Ovantu avehe novathendelethi wo hive mu teelele, va itavela okutya Kalunga omuvyuuki, ve litjatjetha etjatjo lyaJohannes.#Mat. 21:32; Luk. 3:12 30Ovafarisai novalongiveta va tomba ontanto yaKalunga ndjee ve ningila, atjaa kava itavelele okutjatjwa kuJohannes.
31Jesus wa twikila ko ha tyaa: “Iya ovantu vekula hendi me ve yeleke natji? Va ngala tji? 32Va ngala odhondele mbava kala pohi pomalandethelo, amave liwololoka hava tyaa:
‘Twe mu hakelele, n̯e kamu dhanene,
hatu imbi oviimbo vyomikoti, n̯e kamu lilile.’
33Iya Johannes Omutjatji hiee ya, ka lile omungome, ye ka nwine ovinyu, n̯e hamu tyaa: ‘U na ondemoni.’ 34Omuna wOmuntu hiee ya, wa lya, ye ha nu, n̯e hamu tyaa: ‘Taa tuutuu ngwaa tunda, onkolwe, epanga lyovathendelethi novalundhi.’ 35Iya ounongo waKalunga wa holololwa kovantu avehe mboka mbave u itavela.”
Jesus monganda yaSimon Omufarisai
36Umo owomOvafarisai wa ithana Jesus, va lye pamo naye. Jesus wa ya konganda yOmufarisai, ha kala pohi, hava li. 37Iya mondolopa moka mwa li omukadhintu umo ngoka ngwaa kala moulundhi. Hiaa tee okutya Jesus u li monganda yOmufarisai ma li, wa eta otjivavelo tjomadhi,#Mat. 26:7; Mark. 14:3; Joh. 12:3 38ha hweene kon̯ima yaJesus podhompadhi dhe, ama lili. Wa uta okututika odhompadhi dhaJesus nomihodhi vye, he dhi theta nodhondjutji dhe dhokomutwe. Wa hupita odhompadhi dhaJesus, he dhi vaveke omadhi ngaa pepa. 39Omufarisai ngoka ngwee mu ithana, hiee tji mono, we lipopila momutima we ha tyaa: “Nguka ngaile omuprofeti, ngai wa iwa okutya omukadhintu hengu ngwee mu t̯in̯i omutji, ye u li vi, okutya omulundhi.”
40Jesus we mu yaka ha tyaa: “Simon, ndji na hime hala oku ku heela.”
Simon ha tyaa: “Mulongethi, popya.”
41Jesus we mu heela ha tyaa: “Kwa li omulevalethi umo wodhombongo ngwaa levaletha ovantu vavali odhongele. Umo wa levalele odhondenari omathele atano, nomukwawo omilongo vitano. 42Iya hiva li ahave na tja himava thutu, we ve ithila po aveevali. Oun̯i atjaa puhemba vavali nguma ka kala ae mu hole okupon̯a omukwawo?”
43Simon wa yaka ha tyaa: “Ngundhe ongwaa ithilwa po odhingi.”
Jesus ha tyaa: “Wa koyo nawa.” 44Iya wa pilulukila komukadhintu, ha heele Simon ha tyaa: “Omukadhintu hengu u mu lwete? Ame mbe ya monganda yoye, ove ku mpele omeva okulikoha kodhompadhi. Iya omukadhintu hengu wa tutike odhompadhi dhandje nomihodhi, he dhi theta nodhondjutji dhe. 45Ove ku ntjupitile, iya omukadhintu hengu ka petukile okuhupita odhompadhi dhandje nkee e dhile mo. 46Ove ku vavekele omutwe wandje omadhi, iya omukadhintu hengu wa vaveke odhompadhi dhandje omadhi ngaa pepa. 47Iya me ku heele okutya wa ithilwa po odhonkali dhe odhingi, iya wa hololola ohole on̯ingi. Ngoka ngwaa ithilwa po odhonunu, u na ohole onunu.”
48Jesus wa heela omukadhintu ha tyaa: “Odhonkali dhoye dha ithwa po.”
49Ovantu mboka mbava li amava li naJesus va uta okulipula hava tyaa: “Nguka aan̯i nguma itha po odhonkali?”
50Jesus wa heela omukadhintu ha tyaa: “Eitavelo lyoye lye ku hupitha. Enda nouwa.”
Currently Selected:
Lukas 7: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
