Mateus 12

Jesus oye e li Muhona wEsabati

(Mark. 2:23-28; Luk. 6:1-5)

1Potembu ndjoka Jesus wa yatakana movyana metango lyEsabati. Ovalongwa ve va t̯ile ondjala, hava utu okupweya otiliku, hava li.#Deut. 23:25 2Iya Ovafarisai hive tji mono, va heela Jesus hava tyaa: “Taa tuutuu, ovalongwa woye mava ningi soka hitja tjaelwa okuningwa mEsabati.”

3Iya Jesus we ve yaka ha tyaa: “Kamu tangele nan̯i soka David hiaa ningile, hiaa li aa t̯i ondjala, ye omwene novantu ve?#1 Sam. 21:1-6 4Ye wa hita mondjuwo yaKalunga, ha li omingome mbyaa yambwa Kalunga, mbyoka mbyaa tjaelwa okutya ye hé vi li, namboka mbava li naye háve vi li, kakele vala kovayambethi aveika.#Lev. 24:9 5Ne kamu tangele oveta yaMoses, ovayambethi hiva lundha oveta yEsabati motempeli, iya kava pelwe onkali?#Num. 28:9-10 6Iya me mu heele okutya nguka nguu li hempa, wa pon̯a otempeli. 7Iya ngaile mwa li amu i himatji tyaa: ‘Onkenda me hala, hamayambo,’ ngai kaamu koyo mbahave na hiva lundha.#Hos. 6:6; Mat. 9:13 8Iya Omuna wOmuntu oye e li Muhona wEsabati.”

Omulumentu ngwaa lemana okuwoko

(Mark. 3:1-6; Luk. 6:6-11)

9Iya Jesus wa dha ko hoka, he ya kosinagoga yawo. 10Mwa li omulumentu ngwaa lemana okuwoko. Ovafarisai opo ve tjiiwe oku mu vela ombedhi, ve mu pula hava tyaa: “Okuvelula mEsabati tja itavelwa?”

11Iya Jesus we ve heela ha tyaa: “Iya mun̯e tji kala vi, andaa omuntu u na ondhu imo, hai wile metoto etango lyEsabati, kee i kambula, he i nana mo?#Luk. 14:5 12Iya omuntu wa valela unene okupon̯a ondhu. Iya okuundapa ouwa metango lyEsabati otjo tja itavelwa.” 13Jesus wa heela omulumentu hengu ha tyaa: “Onyonona okuwoko kwoye.”

Ye we ku onyonona, haku lemanuka, haku ngala okukwawo. 14Iya Ovafarisai va pita mo mosinagoga, hava ka tompola ouhunga naJesus, opo ve tjiiwe oku mu dhipaa.

Omuntu waKalunga

15 Jesus hiee tji nongonoka, wa dha ko hoka. Ovantu ovengi ve mu landula, ye he ve velula avehe. 16We ve londola, opo háve mu hololola, 17odhondaka ndhaa popiwa komuprofeti Jesaja opo dhi hwithilwe po ndhimadhi tyaa:

18“Taa tuutuu,

omuntu wandje ngumba holowola,

omuhivilikwa wandje,

omwenyo wandje nguwa hopa,

me mu pa Ombepo yandje,

iya ma ka teethela oviwan̯a

ekoyo ndyaa vyuuka.#Jes. 42:1-4

19Kaa tanguna, ye kaa uyu,

ondaka ye kaai teeka momivanda.

20Otjingenge hitja tanduka,

kee tji nyanyauna,

nolamba ndyaa undungala,

kee ke dhimi,

katee ma twala ouvyuuki mouton̯i.

21Oviwan̯a mavi ke liun̯ika mena lye.”

Jesus naBelsebul

(Mark. 3:20-30; Luk. 11:14-23)

22Iya Jesus wa etelwa omulumentu ngwaa li nondemoni, omupot̯i, ye nguha popi, he mu velula. Omuhapopi wa popya, ye he ku mono. 23Iya owingi wovantu auhe we kumwa hau tyaa: “Nguka mpaeli haye e li Omuna waDavid?”

24Iya Ovafarisai hive tji tee, hava tyaa: “Odhondemoni me dhi ta mo kodhonkono dhaBelsebul, omunene wodhondemoni.”#Mat. 9:34; 10:25

25Iya Jesus wa li ae i omalipulo awo, ha tyaa: “Otjilongo atjihe himatji lit̯ile onki otjene, matji teka po, nondolopa ne onganda aihe ndjimai lit̯ile onki oyene, kaai kala po. 26Iya Satana andaa ma ta mo Satana omukwawo, iya ye he lit̯ile onki omwene, otjilongo tje matji kala po vi? 27Iya ame andaa odhondemoni me dhi ta mo naBelsebul, ovanwen̯i mave dhi ta mo naan̯i? Iya ovanwen̯i mave mu koyo. 28Iya ame andaa odhondemoni me dhi ta mo nOmbepo yaKalunga, okutya otjilongo tjaKalunga tje ya kun̯e.

29“Ne aan̯i nguma ulu okuya monganda yomulumentu nguu na odhonkono, he mu pundu ovipuka vye? Olutenga nkwai me tji mu kutu, kon̯ima opo ma ulu okupunda onganda ye.

30“Ngoka nguhe li pamo naame, ma nkondjetha, nangoka nguhama ongedha pamo naame, ma han̯auna.#Mark. 9:40 31Iya me mu heele okutya onkali nepenyo alihe ovantu mave li ithilwa po, iya okupenya Ombepo Ondhilikwa koo ithilwa po. 32Iya nguma popi ondaka ndjimai kondjetha Omuna wOmuntu, ma ithilwa po, iya ngoka nguma popi ondaka ndjimai kondjetha Ombepo Ondhilikwa, kaa ithilwa po mouye hembu nomouye mbumau ya.#Luk. 12:10

Omuti novinyango vyawo

(Luk. 6:43-45)

33“Omuti andaa omuwa, novinyango vyawo oviwa, ne andaa omuti omuvi, novinyango vyawo ovivi, mena lyokutya omuti u dhimbukilwa kovinyango vyawo.#Mat. 7:20; Luk. 6:44 34Luyumuko n̯e lwodhonyoka, mamu ulu vi okupopya ouwa, n̯e ovene amu li ovavi? Iya otjinyo tji popya hitje yula momutima.#Mat. 3:7; 15:18; 23:33; Luk. 3:7; 6:45 35Omuntu omuwa u hololola ovipuka vye oviwa, nomuntu omuvi u hololola ovipuka vye ovivi.

36“Iya me mu heele okutya ondaka aihe, ndjihai na otjilinga, ovantu ndjimava popi mave ke i pulwa etango lyekoyo. 37Iya odhondaka dhoye odho madhi ku koyetha okutya ove omuvyuuki ne u na ombedhi.”

Ovantu mava pula etangan̯eko

(Mark. 8:11-12; Luk. 11:29-32)

38Iya vamo owomovalongiveta nowomOvafarisai ve mu yaka hava tyaa: “Mulongethi, nt̯e matu hala u tu yulikile etangan̯eko.”#Mat. 16:1; Mark. 8:11; Luk. 11:16

39Iya Jesus we ve yaka ha tyaa: “Kula n̯e evi, ovayoni wolukupo, mamu taendha etangan̯eko, iya kaamu pewa etangan̯eko limo, olyo ndyoka vala olyomuprofeti Jona.#Mat. 16:4; Mark. 8:12 40Iya ngaJona hiaa li medhimo lyohi onene yomomeva ovitenya vitatu novit̯iku vitatu, iya Omuna wOmuntu otjo ma ka kala mohi meheke ovitenya vitatu novit̯iku vitatu.#Jona 1:17 41Ovalumentu vaNineve mava ka imuka kout̯e pamo nekula hendi metango lyekoyo, iya mave ke mu pa onkali, mena lyokutya wo ve liteyululile keteetho lyaJona. Iya taa tuutuu, hengu nguu li hempa, wa pon̯a Jona.#Jona 3:5 42Omukadhintu ohamba yokomakumbinda otjilongo ma ka imuka kout̯e pamo nekula hendi metango lyekoyo. Iya me ke li pa onkali, mena lyokutya ye wa dhile kodhontyo dhouye, he ya okuteelela ounongo waSalomo, iya taa tuutuu, hengu nguu li hempa, wa pon̯a Salomo.#1 Hamb. 10:1-10; 2 Hip. 9:1-12

Okutjuna kwombepo ombi

(Luk. 11:24-26)

43“Iya ombepo ombi amai dhi mo momuntu, i endaenda momakuti muhamu na omeva okutaendha oluvedhe lwokuthuva, iya ahai lu mwene, 44mai tyaa: ‘Ame me tjuna monganda yandje, mumba dhile.’ Iya aye ya mo, mai vadha ahamu na nguu li mo, mwa kombwa, mo mwa ningwa nawa. 45Iya mai i, hai ka eta odhombepo odhonkwawo epanduvali, odhombi oku i pon̯a, hamo dhi ya okukala. Iya onkalo yomulumentu hengu pehulilo mai ka kala ombi okupon̯a oyolutenga. Iya ekula hendi evi otjo mali ka ningwa.”

Ina yaJesus novanitje ovalumentu

(Mark. 3:31-35; Luk. 8:19-21)

46Iya Jesus tainkolo a li ama popi nowingi wovantu, ina novanitje ovalumentu va li ava kulama pondje, amava hala okupopya naye. 47Umo we mu heela ha tyaa: “Iya taa tuutuu, nyoko novanitjoye ve li pondje, mava hala okupopya naove.”

48Iya Jesus wa yaka ngwee mu heela ha tyaa: “Meme aan̯i, novanitjandje owaan̯i?” 49Wa yulika okuwoko kwe kovalongwa ve ha tyaa: “Taa tuutuu, meme novanitjandje hoowomba! 50Iya auhe ngoka nguma hwithile po ehalo lyaTate nguu li meulu, oye e li meme, ye oye e li omunitjandje nompandjandje.”

Currently Selected:

Mateus 12: DBNT

Highlight

Copy