Mateus 16
16
Ovafarisai mava pula etangan̯eko
(Mark. 8:11-13; Luk. 12:54-56)
1Iya Ovafarisai nOvasadukai ve ya kuJesus oku mu lola, ve mu pula, e ve yulikile etangan̯eko ndimali dhi meulu.#Mat. 12:38; Luk. 11:16 2Iya ye we ve yaka ha tyaa: “Okawiiwii aka wile pohi mu popya amamu tyaa: ‘Kaku natja ombula, mena lyokutya eulu lya thilaele,’ 3komuhuka hamu tyaa: ‘Ndino maku ya ombula yongandavila, mena lyokutya eulu lya thilaele, ko ku na omakaka omandholodhi.’ Mu tji i vala okutangan̯eka himatji ya keulu, atjaa omatangan̯eko omaluvedhe kamu e koneke. 4Kula n̯e evi, ovayoni wolukupo, mamu taendha etangan̯eko, iya kaamu pewa etangan̯eko limo, olyo ndyoka vala olyaJona.” Jesus we ve thiaa po ha i.#Mat. 12:39; Luk. 11:29
Ontathi yOvafarisai
(Mark. 8:14-21)
5Ovalongwa hiva yauka tjikoohinya, va dhimba okuya nomingome. 6Iya Jesus we ve heela ha tyaa: “Lungamen̯i, n̯e mu tale nawa ontathi yOvafarisai noyOvasadukai.”#Luk. 12:1
7Wo ve lipula hava tyaa: “Ngweendele okuhatu dhile nomingome.”
8Iya Jesus wa iwa omalipulo awo, ha tyaa: “Vantu n̯e wokaitavelo okanunu omena lyatji mamu popi okutya kamu na tja omingome? 9Nan̯i nanapano kamu yuvite? Kaamu thipaluka omingome mbinya vitano mbimba pele ovantu omayovi atano, mwa ongedhele odhombwe ngapi dhambyaa hupile po?#Mat. 14:17-21 10Ne omingome hembinya epanduvali mbimba pele ovantu omayovi ane, mwa ongedhele odhombwe ngapi dhambyaa hupile po?#Mat. 15:34-38 11Omena lyatji hihamu yuvite okutya ame híme popi ouhunga nomingome? Iya lungamenen̯i ontathi yOvafarisai noyOvasadukai!”
12Kon̯ima ovalongwa va ka tyaa nawa okutya Jesus ka tile, ngava lungamene ontathi yomingome, nan̯i wa li ama tya ngava lungamene elongo lyOvafarisai nOvasadukai.
Petrus ma hipulula Jesus
(Mark. 8:27-30; Luk. 9:18-21)
13Iya Jesus hiee ya motjit̯indwalongo tjaKesarea-Filippi, wa pula ovalongwa ve ha tyaa: “Ovantu va tya Omuna wOmuntu aan̯i?”
14Ovalongwa ve mu yaka hava tyaa: “Ovantu vamo va tya oJohannes Omutjatji, iya vamo va tya oElia, navamo uke va tya oJeremia, ne yuumo owomovaprofeti.”#Mat. 14:1-2; Mark. 6:14-15; Luk. 9:7-8
15Ye we ve pula ha tyaa: “Iya n̯e mu ntya, aame an̯i?”
16Simon Petrus we mu yaka ha tyaa: “Oove Messias, OmunwaKalunga omunamwenyo.”#Joh. 6:68-69
17Jesus we mu yaka ha tyaa: “Simon yaJona, umunalao, mena lyokutya hamuntu e ku holololele soka, iya oTate nguu li meulu. 18Iya me ku heele wo okutya oove Petrus, kewe hendi oko me ka tungila eongalo lyandje, net̯o kaali ka kala nodhonkono okupon̯a eongalo lyandje. 19Iya me ke ku pa odhosapi dhotjilongo tjeulu, atjihe himo kutu kombanda yohi, nomeulu matji ka kutwa, himo kutulula kombanda yohi, nomeulu matji ka kutululwa.”#Mat. 18:18; Joh. 20:23
20Iya wa ilikin̯a ovalongwa ve okutya háva heele omuntu noumo okutya ye oye e li Messias.
Jesus ma popi okutatethwa kwe net̯o lye
(Mark. 8:31—9:1; Luk. 9:22-27)
21Okudha mpoka Jesus wa uta okuthitululila ovalongwa ve okutya u tha okuya koJerusalem, a ka tatethwe omatatetho omengi kovanene nokovayambethi ovanene nokovalongiveta. Ye ma ka dhipawa, iya etango etyatatu ma ka imunwa kout̯e.
22Iya Petrus we mu n̯anga, he mu twala pokampengi, ha utu oku mu anda, ha tyaa: “Muhona, Kalunga me tji tjaele, ovipuka hembi koo vi ningilwa.”
23Iya Jesus wa piluluka, ha heele Petrus ha tyaa: “Satana, dha po pwaame! Ove mo mpa oluvinda, mena lyokutya koo soko ovipuka vyaKalunga, iya nan̯i mo soko ovipuka vyountu.”
24Iya Jesus wa heela ovalongwa ve ha tyaa: “Andaa pe na nguma hala okundandula, nge lidhimbe ye omwene, ye a tjinde omutjaakano we, a ndandule.#Mat. 10:38; Luk. 14:27 25Iya nguma hala okuhupitha omwenyo we, me u keketha, iya nguma keketha omwenyo we mena lyandje, me u mono.#Mat. 10:39; Luk. 17:33; Joh. 12:25 26Matji popile tji omuntu okutumba ouye auhe, ye ha keketha omwenyo we? Ne omuntu ma yandja tji mpaeli, a yowole omwenyo we? 27Iya Omuna wOmuntu me ke ya metumbalo lyaIhe pamo novaengeli ve. Ye ma ka thuta omuntu auhe hitji lithike povilinga vye.#Eps. 62:12; Mat. 25:31; Rom. 2:6 28Ame me mu heele otjatjili okutya pe na vamo muhemba mbava kulama hempa mbahamava lolo et̯o, tainkolo háveya mona Omuna wOmuntu, ame ya notjilongo tje.”
Currently Selected:
Mateus 16: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
