Mateus 21

Jesus ma i koJerusalem

(Mark. 11:1-11; Luk. 19:28-40; Joh. 12:12-19)

1Iya hive ya popedhi naJerusalem, ve ya poBetfage, pOndundu yomiholivi. Iya Jesus wa tuma ovalongwa vavali, 2he ve heele ha tyaa: “Enden̯i kokalongo hake li komeho, iya dhivadhiva mamu ka mona ombulu ndjii na ombulona, ndjaa kutwa, dhi kutululen̯i, mu dhi ete kwaame. 3Iya andaa pe na ngume mu pula, tyen̯ii: ‘Muhona me dhi hepa,’ iya omuntu ngoka, me dhi yandja dhiva.”

4Iya hehi tja ningwa, opo odhondaka ndhoka ndhaa popiwa komuprofeti dhi hwithilwe po, hiaa popya ha tyaa:

5“Heelen̯i tjaSion mu tyee:

‘Taa tuutuu, Ohamba yoye mai ya kwoove,

aye linunupike, aya kavile kombulu,

iya ombulona yombulu ndjii undapethwa.’ ”#Sak. 9:9

6Ovalongwa va ya, hava ningi ngahi va heelwa kuJesus. 7Va eta ombulu nombulona, iya va twaa ko omidhalo vyawo komiongo vyadho, iya hako a kavilila. 8Iya engundwa en̯ingi lya yala omidhalo vyawo mondjila, vamo hava tete ovitho komiti, have vi yala mondjila.#21:8 have vi yala mondjila: Okuyala omidhalo ne ovitho mondjila onteto yawo okutumbaleka ohamba. 9Iya owingi wovantu mboka mbava li komeho nambava li amave mu landula, va wololoka hava tyaa: “Hosianna MunwaDavid! Nga tumbalekwe hengu ngume ya mena lyaMuhona! Hosianna Owokombandambanda!”#Eps. 118:25-26

10Iya Jesus hiee ya moJerusalem, otjitungwalongo atjihe tja yandhumuka hatji tyaa: “Aan̯i ngu?”

11Owingi wovantu wa yaka hau tyaa: “Hengu oJesus, omuprofeti owomoNasaret moGalilea.”

Jesus motempeli

(Mark. 11:15-19; Luk. 19:45-48; Joh. 2:13-22)

12 Jesus wa hita motempeli, ha ta mo ovantu avehe mbava li amava landetha nambava li amava landele motempeli. Wa yundulila pohi ovitaafula vyovapimpi novipundi vyovalandethi wodhonguti. 13Jesus we ve heela ha tyaa: “Kwa sonekwa okutya ondjuwo yandje ya thele okwiithanwa ondjuwo yokukumbila, iya n̯e mwe i ningi eleva lyovapundi.”#Jes. 56:7; Jer. 7:11

14Iya ovapot̯i novingolomena ve ya kuJesus motempeli, ye he ve velula. 15Iya ovayambethi ovanene novalongiveta va yumana hiva mono ovilingakumithi mbyaa ninga, nodhondele himava wololoka motempeli himava tyaa: “Hosianna, MunwaDavid!”

16Wo va heela Jesus hava tyaa: “U yuvite tuu hemba himava popi?”

Jesus we ve yaka ha tyaa: “Iinga, n̯e nan̯i kamu tangele nokanunu hikwa tiwaa: ‘Movinyo vyodhondele novyoupepe ove we lilongekedhela ehiviliko.’ ”#Eps. 8:2

17We ve thiaa po, ha dhi motjitungwalongo, ha i koBetania, otjit̯iku soka oko a ka lala.

Omukuyu mau thingwa

(Mark. 11:12-14,20-24)

18Omuhuka omunene Jesus hiaa li ama tjuna kotjitungwalongo, wa li aa t̯i ondjala. 19Iya wa mona omukuyu pontyo yondjila, ha i ko, atjaa ke na hiaa mona ko, kakele vala komatho aeika. Iya Jesus we u heela ha tyaa: “Koo ka ma uke omakuyu katee apehe.” Omukuyu wa t̯a dhiva.

20Ovalongwa hive tji mono, va li ave kumwa, hava tyaa: “Omukuyu wa t̯i vi dhiva?”

21Jesus we ve yaka ha tyaa: “Otjatjili, me mu heele okutya ngaile mu na eitavelo, n̯e ahamamu limbililwa, ngai kaamu ulu okuninga vala hitja ningwa omukuyu, iya mamu ulu wo okuheela ondundu hendji hamu tyaa: ‘Dha po, liyumba melunga,’ matji ningwa.#Mat. 17:20; 1 Kor. 13:2 22Ovipuka avihe mbimamu pula amamu kumbu neitavelo, mamu vi pewa.”

Jesus ma pulwa etumino lye

(Mark. 11:27-33; Luk. 20:1-8)

23Iya Jesus hiaa hiti motempeli, ovayambethi ovanene novanene wotjiwan̯a ve ya kuye, tainkolo a li ama longo ovantu. Ve mu pula hava tyaa: “Ovipuka hembi u vi ninga ketumino patji? Aan̯i ngwee ku pa etumino hendi?”

24Jesus we ve yaka ha tyaa: “Naame wo me mu pula epulo limo, andaa mwe li ntjeele, naame wo me mu heele okutya ovipuka hembi ndji vi ninga ketumino patji. 25Etjatjo lyaJohannes lya dha pi? Lya dha meulu ne omovantu?”

Wo va tompola puwo ovene hava tyaa: “Nditwa tyaa: ‘Omeulu,’ mpe me tu pula okutyaa: ‘Omena lyatji hihamu mu itavelele?’ 26Iya nditwa tyaa: ‘Lya dha movantu,’ matu tila owingi wovantu, mena lyokutya ovantu avehe va itavela okutya Johannes wa li omuprofeti.” 27Iya wo va yaka Jesus hava tyaa: “Katu tji i.”

Jesus naye we ve yaka wo ha tyaa: “Naame híme mu heele okutya ovipuka hembi ndji vi ninga ketumino patji.”

Eeli lyovadhantu vavali

28 Jesus wa twikila ko ha tyaa: “Iya n̯e mamu tya vi? Kwa li omulumentu umo ngwaa li novana ovadhantu vavali. Wa ya komunene watjo, ha tyaa: ‘Ndino munwandje, enda motjuundo tjandje tjomivinyu, u ka undape.’ 29Omuna we mu yaka ha tyaa: ‘Híme i.’ Iya kon̯ima wa lundulula omalipulo e, ha i. 30Iya ihe we ya komununu watjo, he mu heele ngahi a ombo aa heele omukwawo. Omununu watjo wa yaka ha tyaa: ‘Eewa taa, me i,’ atjaa ahama i. 31Oun̯i po puhemba vavali, ngwaa undapa ngahi tja li amatji hala ihe?”

Ve mu yaka hava tyaa: “Owolutenga.”

Jesus we ve heela ha tyaa: “Otjatjili me mu heele okutya ovathendelethi nomakunga mae ke mu tenga okuya motjilongo tjaKalunga. 32Iya Johannes we ya kun̯e oku mu yulikila ondjila youvyuuki, atjaa n̯e kamu mu itavelele. Iya ovathendelethi nomakunga ve mu itavela. Iya kon̯ima himwe tji mono, kamu liteyululile, n̯e hiaa popya kamu tji itavelele.”#Luk. 3:12; 7:29-30

Ovaundapi ovavi womotjuundo tjomivinyu

(Mark. 12:1-12; Luk. 20:9-19)

33 Jesus wa twikila ko ha tyaa: “Teelelen̯i eeli ekwawo. Kwa li omulumentu umo omwene wonganda. Wa twikile omivinyu motjuundo tje, he tji umbu olumbo, ha tha mo otjikolelo,#21:33 otjikolelo: Otjitoto hitji tuwa omutemba wokukolela ovinyu. ha tungu mo ondjuwo ndjaa ya pokatangaulu, ha undike mo ovantu, tjau ye ha ka valula.#Jes. 5:1-2 34Otembu yokupya hiye thiki, omwene wotjuundo wa tuma ovapika ve kumbava undikwa otjuundo, ve mu pe ovinyango vye mbyaa thele okupewa. 35Ovaundikwa va kambula ovapika ve, umo ve mu tona, umo ve mu dhipaa, nomukwawo ve mu dhipaa nomawe. 36Iya omwene wotjuundo wa tuma ko uke ovapika ovengi okupon̯a owolutenga. Iya ovaundikwa ve ve ninga ngahi va ninga owolutenga. 37Iya kon̯ima wa ka tuma ko omuna, ha tyaa: ‘Omunwandje mave ke mu tumbaleka.’ 38Iya ovaundikwa hiva mono omuna, ve liheela hava tyaa: ‘Hengu oye e li ompinga, tu mu dhipaen̯i, epingo lye li ninge po olyetu.’ 39Ve mu kambula, have mu yumbu kotjila tjotjuundo, have mu dhipaa.

40“Iya omwene wotjuundo ae ya, ovaundikwa mboka me ve ningi vi?”

41Ve mu yaka hava tyaa: “Omwene wotjuundo ma han̯auna po ovantu mboka ovavi, notjuundo tjomivinyu me tji pa ovaundikwa vamo mbamave ke mu pa ovinyango otembu yavyo yokupya aye thiki.”

42Jesus we ve yaka ha tyaa: “Nan̯i kamu tangele omisonekwa hembi mbimavi tyaa:

‘Ewe ndyoka ovatungi ndiva yekelahi,

lya ninga ewe ndyaa tumbala okupon̯a omawe aehe.

Hehi tja ningwa kuMuhona,

tjo otjikumithi momeho etu’?#Eps. 118:22-23

43“Iya mena lyanyahi me mu heele okutya otjilongo tjaKalunga mamu tji nyekwa, hatji pewa ovantu mbava tyaa Kalunga. 44Auhe ngoka nguma putala mewe hendi, ma teka, nangoka nguma li wile, mali mu nyanyauna.”

45Iya ovayambethi ovanene nOvafarisai hiva tee omaeli e, va li ave yuvite okutya Jesus owo a li ama popi. 46Va li amava hala okukambula Jesus, atjaa va li amava tila owingi wovantu, mena lyokutya ovantu va itavela okutya Jesus wa li omuprofeti.

Currently Selected:

Mateus 21: DBNT

Highlight

Copy