Mateus 4

Jesus ma lolwa kuSatana

(Mark. 1:12-13; Luk. 4:1-13)

1Iya Jesus wa twalwa kOmbepo yaKalunga mokuti, a ka lolwe komudiapoli.#Heb. 2:18; 4:15 2Iya Jesus hiee litjaela ovikulya ovitenya omilongo vine novit̯iku omilongo vine, héya lya tja, wa li aa t̯i ondjala. 3Omutyolethi we ya kuye, he mu heele ha tyaa: “Andaa oove OmunwaKalunga, heela omawe henga, a tjituke omingome.”

4Iya Jesus we mu yaka ha tyaa: “Kwa sonekwa amaku tiwaa: ‘Hakomungome awiika omuntu ma ulu okukala nomwenyo, iya okondaka aihe ndjimai dhi motjinyo tjaKalunga.’ ”#Deut. 8:3

5Okudha mpoka omudiapoli wa twala Jesus kotjitungwalongo otjidhilikwa, he mu londeke kohulo yotempeli, 6ha tyaa: “Andaa oove OmunwaKalunga, lombokela pohi, mena lyokutya kwa sonekwa okutyaa:

‘Ye ma heele ovaengeli ve,

ve ku tjinde momawoko awo,

opo hó putala mewe.’ ”#Eps. 91:11-12

7Jesus we mu yaka ha tyaa: “Kwa sonekwa wo okutyaa: ‘Hó lolo Muhona Kalunga koye.’ ”#Deut. 6:16

8Omudiapoli wa twala uke Jesus kondundu onde unene, he mu yulikile ovilongo avihe vyomouye netumbalo lyavyo, 9he mu heele ha tyaa: “Avihe hembi me ku pa vyo, andaa mo ntwikile odhongolo, ho ntumbaleke.”

10Jesus we mu heela ha tyaa: “Satana, dha po, mena lyokutya kwa sonekwa okutyaa: ‘Muhona Kalunga koye u tha oku mu tumbaleka, oye vala aika wa thele okuundapela.’ ”#Deut. 6:13

11Iya omudiapoli we mu yetha, tjau, ovaengeli have ya kuJesus, have mu popile.

Jesus ma utu okuteetha

(Mark. 1:14-15; Luk. 4:14-15)

12Iya Jesus hiaa tee okutya Johannes wa yedhililwa mokaliwoso, wa tjuna koGalilea.#Mat. 14:3; Mark. 6:17; Luk. 3:19-20 13Jesus wa dhiluka moNasaret, ha ka kala koKapernaum, hitji li pontyo yelunga, povilongo vyaSebulon novyaNaftali,#Joh. 2:12 14odhondaka ndhaa popiwa komuprofeti Jesaja opo dhi hwithilwe po ndhimadhi tyaa:

15“Otjilongo tjaSebulon notjaNaftali, put̯a pelunga,

tjikoohehinya tjaJordan moGalilea yovapaani,#Jes. 9:1-2

16otjiwan̯a hitja kala met̯iku,

tja mona otjiten̯i otjinene,

nahembenya mbava li ava kala motjilongo nomomudhile wet̯o,

otjiten̯i tje ve tungatele.”

17Iya mpoka Jesus opo a utila okuteetha ha tyaa: “Liteyululen̯i, mena lyokutya otjilongo tjeulu tje ya popedhi.”#Mat. 3:2

Jesus ma ithana ovahwee vane

(Mark. 1:16-20; Luk. 5:1-11)

18 Jesus hiaa li ama lamba kontyo yelunga lyaGalilea, wa mona ovalilanduli vavali, Simon nguu tiwa oPetrus nomunitje Andreas, va li amava yumbu owaanda melunga, mena lyokutya va li ovahwee wodhohi. 19Jesus we ve heela ha tyaa: “Ndandula ndjen̯i, ame me mu ningi ovahwee wovantu.” 20Dhivadhiva va thiaa po omawaanda, have mu landula.

21Hiaa hweene komeho, wa mona ovalilanduli vavali ovakwawo, Jakob nomunitje Johannes, oomunkwaSebedeus. Wo va li mowato pamo naihe Sebedeus, amava pampa omawaanda awo. Iya Jesus nawo we ve ithana. 22Iya dhivadhiva va thiaa po ihe nowato, have mu landula.

Jesus ma velula ovavedhi

(Luk. 6:17-19)

23 Jesus wa endaenda moGalilea atjihe, ha longo ovantu modhosinagoga dhawo, ha teetha ondaka ombwa yotjilongo tjaKalunga, ha velula omitjithi avihe nomauvela aehe mokati kovantu.#Mat. 9:35; Mark. 1:39 24Etumbuko lye lya handjana motjilongo tjaSiria atjihe. Ovantu ve mu etela ovavedhi avehe mbava li nomauvela ngae lili nangae lili noviihamo, nahemba mbava li nodhondemoni, nowovintonya, nambava vela otjinteya, avehe he ve velula. 25Owingi wovantu owomoGalilea nowomoDekapolis nowomoJerusalem nowomoJudea novatjikoohehinya tjaJordan, ve mu landula.

Currently Selected:

Mateus 4: DBNT

Highlight

Copy