Mateus 8

Jesus ma velula omulumentu wotjilundu

(Mark. 1:40-45; Luk. 5:12-16)

1Iya Jesus hiaa heluka kondundu, owingi wovantu we mu landula. 2Iya omulumentu wotjilundu we ya kuye, ha twike odhongolo, he mu heele ama tyaa: “Muhona, andaa mo hala okumbelula, mo tji ulu.”

3Jesus wa yela okuwoko kwe, he mu t̯in̯i ha tyaa: “Ame me hala, veluka.” Iya dhivadhiva ouvela we wotjilundu wa veluka. 4Iya Jesus we mu heela ha tyaa: “Taa tuutuu, hó tji heele omuntu noumo. Iya enda, u ke liyulikithe komuyambethi, ove u ka yandje otjali kotempeli ngaMoses hiaa heele, tji ve ningile oumbangi okutya ove wa veluka.”#Lev. 14:1-32

Jesus ma velula omuntu womunene wovakwavita

(Luk. 7:1-10)

5Iya Jesus hiee ya moKapernaum, omunene wovakwavita we ya kuye, he mu kumbu 6ha tyaa: “Muhona, omuntu wandje wa vela otjinteya, u li mondjuwo, wa mona ovihuna unene.”

7Jesus we mu heela ha tyaa: “Me ya, ndji ke mu velule.”

8Omunene wovakwavita we mu yaka ha tyaa: “Muhona, ame hí thevelwe, u ye mondjuwo yandje, popya vala nondaka, omuntu wandje ma veluka. 9Iya ame naame wo ndjimuntu omutuminwa, ndji na ovakwavita mbave li kohi yandje. Ndji heela omuntu he tyaa: ‘Enda,’ ye ha i, nomukwawo he tyaa: ‘Indjo,’ ye he ya, nomupika wandje ndji mu heela he tyaa: ‘Undapa otjontumba,’ he tji undapa.”

10Jesus hiee tji tee, we kumwa, ha heele mbave mu landula ha tyaa: “Me mu heele otjatjili, moIsrael híya mona mo noumo nguu na eitavelo enene ndii lithike hempa. 11Iya ame me mu heele okutya ovantu ovengi mave ke ya okudha koutjilo nokoutokelo, hava ka lya pamo naAbraham naIsak naJakob motjilongo tjeulu.#Luk. 13:29 12Iya ovana wotjilongo tjeulu mava ka yundulilwa pondje met̯iku, moka mumamu ka kala otjililo nelikweyo lyomayoo.”#Mat. 22:13; 25:30; Luk. 13:28 13Jesus wa heela omunene wovakwavita ha tyaa: “Enda, ngahi wa itavele, ngatjo u ningilwa.”

Omuntu we wa veluka powola yatjo vala ndjoka.

Jesus ma velula inaivi yaPetrus novavedhi ovengi

(Mark. 1:29-34; Luk. 4:38-41)

14 Jesus hiee ya monganda yaPetrus, wa vadha mo inaivi yaPetrus ae li momala, ama vele elema. 15Jesus we mu yaka mokuwoko, elema hali dhi mo. Ye wa kulama, ha twiile po Jesus ovikulya.

16Iya okawiiwii hika wile pohi, ovantu ovengi mbava li nodhondemoni, va etwa kuJesus. Odhombepo odhombi we dhi ta mo nondaka. Ovavedhi avehe we ve velula, 17opo dhi hwithilwe po ndhoka ndhaa popiwa komuprofeti Jesaja hiaa tyaa: “We litwika omiihamo vyetu, nomitjithi vyetu we vi tjinda.”#Jes. 53:4

Jesus ma pukulula ovalanduli ve

(Luk. 9:57-62)

18 Jesus hiaa mono owingi wovantu mbwee mu onganene, wa heela ovalongwa ve, va yaukile tjikoohehinya. 19Iya omulongiveta umo we ya, he mu heele ha tyaa: “Mulongethi, ame me hala oku ku landula apehe mpamo i.”

20Jesus we mu heela ha tyaa: “Odhombandje dhi na omalungi, novidhila vyokeulu vi na oviyuwo, iya Omuna wOmuntu ke na mpama thuvitha omutwe we.”

21Iya umo owomovalongwa ve, we mu heela ha tyaa: “Muhona, olutenga ndekela ndje, ndji ka pake tate.”

22Jesus we mu heela ha tyaa: “Ndandula ndje, yetha ovat̯e va pake ovat̯e vawo.”

Jesus ma nyimitha ombepo yomakuthikuthi

(Mark. 4:35-41; Luk. 8:22-25)

23Iya Jesus wa londa mowato, novalongwa ve ve mu landula. 24Iya melunga mwa tukuka ombepo onene yomakuthikuthi, owato wa li amau hala okuya nomeva. Iya Jesus wa li aa lala. 25Ovalongwa va ya puye, have mu imuna po, hava tyaa: “Muhona, tu hupitha, matu i nomeva!”

26Jesus we ve heela ha tyaa: “Vaitaveli wokaitavelo okanunu, mwa tilile tji?” Ye wa kulama, ha anda ombepo nelunga, havi nyimi, havi tya thiluu.

27Ovantu ve kumwa hava tyaa: “Omuntu patji ngu, nguu teeka kombepo nokelunga?”

Jesus ma velula ovalumentu vavali mbava li nodhondemoni

(Mark. 5:1-20; Luk. 8:26-39)

28Iya hiee ya tjikoohinya motjilongo tjOvagadara,#8:28 Ovagadara: Ovagergesa momisonekwa vimo, Ovagerasa momisonekwa vimo. ovalumentu vavali mbava li nodhondemoni, va dha modhombila dhomaleva, hava wanene naJesus. Ovalumentu mboka va li ovatilithi unene, iya kape na tja noumo ngwaa li ama ulu okweenda mondjila ndjoka. 29Iya va wololoka hava tyaa: “Jesus OmunwaKalunga, mo tu halele tji? We ya huno oku tu tatetha, tainkolo otembu háiye thika?”

30Iya kokule ngahunya kwa li otjuunda otjinene tjovingulu mbyaa li avya yala. 31Odhondemoni dha kumba Jesus hadhi tyaa: “Andaa mo tu lamba mo, tu tuma motjuunda tjovingulu.”

32Jesus we dhi heela ha tyaa: “Enden̯i!” Iya dha dha mo muwo, hadhi i movingulu. Iya otjuunda atjihe tjovingulu tja thothonoka okudha kekomo, hatji liyumbu melunga, hatji i nomeva.

33Ovat̯ita wovingulu va ka inkola, hava i kondolopa oku ka hipulula ovipuka hembi avihe novyovantu mbave na odhondemoni hiva ningwa. 34Iya ondolopa aihe ya kongoloka okuya okutala nokuwanena naJesus. Iya hive mu mono, ve mu kumba, a dhe mo motjilongo tjawo.

Currently Selected:

Mateus 8: DBNT

Highlight

Copy