Markus 3
3
Omulumentu ngwaa lemana okuwoko
(Mat. 12:9-14; Luk. 6:6-11)
1Iya Jesus wa ya uke mosinagoga, moka mumwa li omulumentu ngwaa lemana okuwoko. 2Ovantu mboka mbava li mo, va li amave mu talele, andaa me mu velula mEsabati, opo ve tjiiwe oku mu vela ombedhi. 3Jesus wa heela omulumentu ngwaa lemana okuwoko ha tyaa: “Kulama komeho yovantu.” 4We ve pula ha tyaa: “Otjitji hitja itavelwa okuningwa metango lyEsabati, okuundapa ouwa ne okuundapa ouvi, okuhupitha omwenyo ne okudhipaa?”
Wo va nyima vala. 5Jesus we ve tala nomadhinge, ye he ve etethele mo onkenda, mena lyokutya omitima vyawo vya li omikukutu. Wa heela omulumentu hengu ha tyaa: “Onyonona okuwoko kwoye.” Ye we ku onyonona, haku lemanuka. 6Ovafarisai va pita mo mosinagoga, hava utu dhivadhiva okutompola novantu mboka mbava li ava ama kuHerodes, opo ve tjiiwe okudhipaa Jesus.
Owingi wovantu pontyo yelunga
7 Jesus wa ya novalongwa ve kontyo yelunga lyaGalilea. Owingi wovantu mbwaa dha moGalilea we mu landula. Iya nowomoJudea, 8nowomoJerusalem, nowomoIdumea natjikoohehinya tjaJordan nowomovilongo vyaTiro naSidon ve ya kuJesus, mena lyokutya va tyaa ovipuka mbyaa undapa. 9Jesus wa heela ovalongwa ve, ve mu longekedhele owato popedhi, mena lyokutya pa li ovantu ovengi, opo have mu thin̯a.#Mark. 4:1; Luk. 5:1-3 10Jesus wa velula ovantu ovengi, mboka mbava li nomauvela awo va hweena otjo mave liyundulile kuye, opo ve mu t̯in̯e. 11Odhombepo odhombi hidhe mu mono, dhe lit̯imika po kotjipala tje, dho hadhi popile peulu hadhi tyaa: “Oove OmunwaKalunga!”
12Jesus wa anda nodhonkono odhombepo odhombi, opo hadhi mu hololola.
Jesus ma holowola ovalongwa omulongo navavali
(Mat. 10:1-4; Luk. 6:12-16)
13 Jesus wa londa kondundu, ha ithana mboka mbama hala, ve ye kuye. 14Ye wa holowola omulongo navavali, va kale puye, he ve luku ovayapostoli, opo e ke ve tume, va ka teethe, 15wo va kale nodhonkono dhokuta mo odhondemoni.
16Mboka omulongo navavali mbaa holowola, hoowomba: OSimon, ngoka Jesus ngwaa luka Petrus, 17oJakob yaSebedeus nomunitje Johannes, mboka Jesus mbaa luka Boanerges, ena hendi mali tyaa: Ovalumentu mbava ngala etitimo lyombula, 18naAndreas naFilippus naBartolomeus naMateus naTomas naJakob yaAlfeus naTaddeus naSimon Omukanana 19naJudas Iskariot, ngoka ngwee mu weleleka.
Jesus naBelsebul
(Mat. 12:22-32; Luk. 11:14-23; 12:10)
20Okudha mpoka Jesus wa ya koyawo, owingi wovantu wa onganene uke, okutya Jesus novalongwa ve kave tjiivilwe uke okulya. 21Ovawo hive tji tee, va ya ko ve ke mu kambule, mena lyokutya va li amava tyaa: “Ma vele epamba.”
22Iya ovalongiveta mbava dhile koJerusalem va tyaa: “U na Belsebul, odhondemoni me dhi ta mo kodhonkono dhomunene wodhondemoni.”#Mat. 9:34; 10:25
23Jesus we ve ithana va hweene kuye, he ve heele momaeli ha tyaa: “Satana ma ulu vi okuta mo Satana? 24Otjilongo andaa matji lit̯ile onki otjene, otjilongo soka kaatji kala po. 25Onganda ndjimai lit̯ile onki oyene, onganda ndjoka kaai kala po. 26Iya Satana andaa me likondjetha omwene, ye he lit̯ile onki, kaa ulu okukala po, ma hulu.
27“Okutya kape na tja nguma ulu okupunda onganda yomulumentu nguu na odhonkono, e mu nyeke ovipuka vye. Olutenga nkwai me tji mu kutu, kon̯ima opo ma ulu okupunda onganda ye.
28“Ame me mu heele okutya odhonkali adhihe nomapenyo aehe nandaku tiwa e lithike pi, ovantu mava ulu oku e ithilwa po. 29Iya nguma penye Ombepo Ondhilikwa, kaa ithilwa po onkali ye katee apehe, iya ma kala nonkali yaapehe.”#Luk. 12:10 30Jesus hehi we tji popila, mena lyokutya ovantu hava tya, u na ombepo ombi.
Ovawo va Jesus vatjatjili
(Mat. 12:46-50; Luk. 8:19-21)
31Ina yaJesus novanitje ovalumentu ve ya, hava kulama pondje. Hava tumu ontumwa i mu ithane. 32Iya owingi wovantu wa kala pohi hau mu onganene, hava heele Jesus hava tyaa: “Taa tuutuu, nyoko novanitjoye ve li pondje, mave ku taendha.”
33Jesus we ve yaka ha tyaa: “Meme novanitjandje owaan̯i?” 34Iya hiaa tala mowingi wovantu mbwaa li awe mu onganene, ha tyaa: “Taa tuutuu, meme novanitjandje hoowomba! 35Meme nomunitjandje nompandjandje omuntu ngoka nguma hwithile po ehalo lyaKalunga.”
Currently Selected:
Markus 3: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.
