Lûkə 17
17
Álí bwə mɔ a bwə̌ Wubî
1Yésuwə a pɔŋí bawútú bá mɔ nána, “Nyí lɔ́lí ɛ bî nána misam ámə́ mí bwə bâʼ álí kfún á wubî mí lɔ́lí nyə́ ɛ bwəlan. Ndé ɛbómán na ani awə̌ a bwəlí ka mí bwə́lan! 2Ɛ́ bá bwǎm nána bá tfúl lilɛ́ línə̂n á líbɔʼ lí mɔ ani bá shwá mɔ́ á mbô ɛnə̂n átin, na nána a bwə̂ bǎn bá nyə bán bá bwə wubî. 3Áfánikə̌ nyí nǔŋ púndá.
Njí mwǎn-n-nyǎ n wə a bwəlí wə wubî, ɛ dfûl mɔ́ ɛ pɔ̂ŋ mɔ́ nána yǔm ɛ́yə́ a bwəlíní ɛ́ lɔ́liyǎ. Njí a yəmbí liwusɛ́ lí mɔ ti a pəlání nlə́m m mɔ, laksɛ́ mɔ́. 4Njí a bwəlí wə wubî bitî shyǎmbɛ bǔntɛ́, ti a timbí bitî shyǎmbɛ álí yɔ́m wə̂ nána ɛ láksɛ mɔ́, á byábá nána, ‘M mə̌ ɛ pəlan’, ɛ lɔlí mɔ́ ɛ laksɛ.”
Dúbɛ lí kɔ́ŋiyǎ
5Bawútú-bálí-lúman bá pɔ́ŋí Sáŋgúwə́ nána, “Bwə̌ dúbɛ lí sə lí kpú. 6Sáŋgúwə́ a pushú bɔ́ nána, Njí nyí wɔ́ŋí dúbɛ álə́ lí kɔ́ŋí ká ngə mbvum ɛ́tə́kə̂n, ní nyí púl ɛ pɔ̌ŋ ɛju ɛ́ wushá ɛ́yín nána, ‘Á ɛju ɛ́ bwə̌ gvǔb wəmə̌n, ɛ shûm wəmə̌n á mbô ɛnə̂n átin’, ti wú wúkání nyə́.”
Ɛbulú ɛ́ mɔ a ndutu
7Sí nûŋ nána nyə́ mɔ a nfɔ́ a wɔ́ŋí mɔ a ndutu awə̌ a kǐ ɛ́ kfwaŋ ndfukú, tɔ a kǐ ɛ tátí mílɔngi. Njí a fí á ɛ́bulú, yə̌ ɛ́ pɔŋní mɔ́? Ɛ́ pɔŋ mɔ́ nána, “‘Pǎʼ ɛ shúmán fánán ɛ dyá lidyá,’ 8Tɔ ɛ́ pɔŋ mɔ́ nána, ‘Bunsán mî lídyá ɛ shum lɔ́ á tíbili, tyə́ fánán á nsaŋ n nyǔ ɛ́ myə kə́ŋkə́ŋ n mâ álí dyá na álí mwá, ti á mbís ɛ púndá wə pə́ ɛ́ tiŋgání ɛ dyá, ɛ mwá?’ 9Nyí pɔ̂ŋ mi njí á kɛ́sí mɔ a ndutu ani á ɛ́tútú nána a bwəlí ɛbulú ɛ́ mɔ? 10Ɛ́ dí mulimlim na nyə́ njí nyí mə́ ɛ bwə mísə́sə̌n ámə́ bá pɔŋíní nyə́ nána nyí bwə̂, nyí lɔ́lí ɛ byá nána, ‘Si dí wɔ̂ babwəla bá ndutu, ɛbulú ɛ́ sə yɔ́ wɔ̂ sí bwə́líní.’”
Yésuwə a pwisí baʼ bá ákúnyə dyǔm
11Ngə Yésuwə a bílíní ɛ kə á Jerúsálɛmə, a bílí ɛ túm á nji ɛ nji ɛ ɛkumbu ɛ́ Samáriya na ɛkumbu ɛ́ Gálilî. 12Ngə a kwílíní á nkí ntə́kə̂n nfɔ́, a tání baʼ dyǔm ábə́ akúnyə a bílíní ɛ taki. Bá tyə́bí kfwáŋ, 13ti bá fə́mí ɛsakí nána, “A Yésuwə, a Sísə́, sûn wú sə́ likini!” 14Yésuwə a míní bɔ́, ti a pɔŋí bɔ́ nána, “Nyí kə́ á baprîsə, nyí lúfú bɔ́ nyǔ ɛ nyə.” Ngə bá bílíní ɛ kə, nyǔ ɛ́ bɔ ɛ́ sáŋí. 15Nfɔ́ á bɔ́ baʼ dyǔm a míníní nána mú mə́ ɛ pwǐ, a timbí, a kɛsíyá Dyǔ na ngɔli ɛnə̂n. 16A kfúndí á mákwi má Yésuwə, á sákáníyá mɔ́. Mɔ ani a bílí mɔ a Samáriya. 17Yésuwə a kɔndɛ́ mɔ́ nána, “Ngáʼ baʼ dyǔm bɔ́ m pwisíní? Á bání libvu bá dí fə́? 18Yə̌ ɛ́ bwə́lí nána, nkən mɔ́mə̌n nfɔ́ a timbí álí sákán Dyǔ?” 19Ti Yésuwə a pɔŋí mɔ́ nána, “Tyə́ ámǐn, ɛ kə̂. Dúbɛ́ lí wə lí pwisí wə.”
Li paʼ lí janiya lí Dyǔ
20Duŋgu lí Bafárisî bá kɔ́ndɛ́ Yésuwə nána, Njá púndá Janiya lí Dyǔ lí paʼní? Yésuwə a pɔŋí bɔ́ nána, Janiya lí Dyǔ lí sə̌ ɛ́ paʼ a nyai ɛ nji ɛyə̌ bá lɔ́líní lɔ́ ɛ mín, 21Tɔ mɔ ká nfɔ́ á byá nána, “Tátí, lɔ́ lín, tɔ̌, ‘Lɔ́ línání.’ Ǎ yě, Janiya lí Dyǔ lí dí á wutitîn wú nyə.” 22Ti a pɔ́ŋí bawútú bá mɔ nána, Madû má paʼ ámə́ nyí nəŋní nána nyí mín, ká bǔn bufɔ́, ngə Mwǎn a Mɔnyuŋ á lúfúní nyǔ ɛ́ mɔ, ndé nyí sî míná mɔ́. 23Bá pɔ̌ŋ nyə́ á púndá ɛni nána, “Mɔ́ aníní,” tɔ “Mɔ́ anín,” Ndé nyí si láŋgán bɔ́. 24Á ɛ́tútú nána ngə mwɛ́nɛ nǎn túmní, ti n nwáŋí libubɛ pɛsi ɛnín na ɛníní, nâ pə́ ɛ́ bání bǔn ábə́ Mwǎn a Mɔnyuŋ á paʼní. 25Ndé a lɔlí ɛ taʼ jǐta kəkə, kə́ŋkə́ŋ nyɔnyi ɛ baʼ bá ɛ́tɛ̂n bá báŋ mɔ́ á nyǔ. 26Ngə ɛ bílíní á púndá ɛ Nówa, nâ pə́ ɛ́ bání á púndá ɛ Mwǎn a Mɔnyuŋ. 27Baʼ básə́sə̌n bá bílí ɛ dyá lídyá, bá bílí ɛ mwá mîm, bumân bá bílí balân ɛ gvwə́, balân bá bílí ɛkə á mágvwə́, kə́ŋ ti á bǔn ábə́ Nówa a kwilíní á bwálu búnə̂n búnə̂n átin, ti mbvu ɛ jwɛ, mashɛ́n má lwínjí ti má búlú bɔ́ baʼ básə́sə̌n. 28Mulimlim ná pə́ ɛ bílíní á púndá ɛ́ Lɔ̂tə. Baʼ básə́sə̌n bá bílí ɛ dyá lidyá, bá bílí ɛ mwá mîm, bá bílí ɛ yǎn, bá súmbá pə́, bá bílí ɛ wún byə̌m na bá lúŋá pə́ mandáʼ. 29Ndé á bǔn ábə́ Lɔ̂tə a falúní á nkí n Sódom, mulimlim m bǔn bû, mwǐ na makákan má mwǐ bá fí á wúdya wú Dyǔ ngə mbvú, ti má búlú baʼ bâ básə́sə̌n. 30Nâ ɛ́ bání á bǔn ábə́ Mwǎn a Mɔnyuŋ á lúfúní nyǔ ɛ́ mɔ.
31“Á bǔn bû mɔ awə̌ a dí á nlú ndáʼ ámǐn ɛ́yə́ wudi wú mɔ wú díní á ndáʼ átin, a sî tákiyǎ nyǔ ɛ́ mɔ álí shul áshí álí nǔŋ lɔ́. Mulimlim, mɔ awə̌ a dí a ndfukú a sî tákiyǎ nyǔ ɛ́ mɔ álí tîm á ndáʼ. 32Nyí káni yǔm ɛ́yə́ ɛ́ bwə́lání mwalân n Lɔ̂tə. 33Ká njá awə̌ a kání álí shuŋgɛ́ lúŋgɛ́ lí mɔ, ǎ bɔ́lɔ́n lɔ́. Ká njá awə̌ a bɔ́lɔ́ní lúŋgɛ́ lí mɔ ǎ shuŋgɛ́ lɔ́. 34Á mbálɛ, baʼ bábɛ̂ bá nali á wúti wufɔ́ á wudû átin, bá nǔŋ nfɔ́, bá mákú aníní. 35Balân bábɛ̂ bá tiyákí lidyá, bá nûŋ nfɔ́, bá makú nfɔ́.” 36#17:36 Dungu lí kâti ɛ́ wusúwə ɛ́ bándí njɔŋ 36 Baʼ bábɛ̂ baʼ bá á ndukú. Bá nɔŋ nfɔ́, bá makú a níní. 37Bawútú bá kɔ́ndɛ́ mɔ́ nána, “A Sáŋgúwə́, áfə́ á mû n bwəlání?” Yésuwə a pushú bɔ́ nána, “Ká áfə́ mbimba n díní áwə́ kúmbí ɛ́ shwínjáni.”
Currently Selected:
Lûkə 17: bwt
Highlight
Copy
Compare
Share
Want to have your highlights saved across all your devices? Sign up or sign in
