Lûkə 18
18
Ŋganú ɛ nkfwís a mwalân awə̌ ǎ kásí mikáʼ
1Ti Yésuwə a pɔŋí bawútú bá mɔ ŋganú álí lúfú bɔ́ nána bá lɔ́lí ɛ káni ɛtîtɛ́, nána nlə́m n lɔ́liyǎ bɔ́ ɛ kfwəli á líbum. 2A byábí nána, “Nkásiya a mikáʼ a bílí á nkí nfɔ́. A bíliyǎ ɛ́ báŋ Dyǔ, a bíliyǎ pə́ ká baʼ ɛ bə̌ ɛdúbɛ́. 3Nkfwís a mwalân a bílí á nkí mû awə̌ a bílí ɛ kə á mɔ ani ɛtîtɛ́. Ɛtîtɛ́ a bílí mɔ́ ɛ pɔ̌ŋ nána, ‘Sǐ mɔʼ nfɔ́ sí wɔ́ŋí kɔkɔʼ. Káyísí sə́ ndé ɛ bwə̂ mi n wɔ́ŋ njɔm á muká mû.’ 4Ɛ́ dyɛ́ átin, nkásiya a mikáʼ ani á púshuwǎ ɛ́ bwə̌ ká yǔm. Ndé á mbís ɛ púndá a byábání mɔ́mə̌n nána, ‘Ká ngə bɔŋ bú Dyǔ bú shiyaní mí, ká ngə n sɛní baʼ ɛ bə̌ ɛdúbɛ́, 5ndé á ɛ́tútú nána nkfwís anínán ǎ takí mî n káyísí muká mû, m bə mɔ́ njɔm. Njí n bwə́liyǎ nâni, a sî makúwá álí taki mi.’” 6Ti Yésuwə a kǐ á wusú álí byá nána, “Nyí wúkí yǔm ɛ́yə́ nkásiya a mikáʼ a mbî ani awə̌ a bíyǎ Dyǔ a byábíní? 7Ɛ́ shiyǎ mbálɛ nána Dyǔ lí nyítí mbakú ɛ mbâ á baʼ bá mɔ ábə́ bá jiyán mɔ́ liwúnjan bǔntɛ́ wudû na lisín? Á fɛn púndá álí wúnján bɔ́? 8Nǎn pɔ́ŋ nyə́ nána, á nyítí mbakú ɛyə̌ ɛ lɔlɔ́ní bɔ́ shám shám. Ndé á púndá ɛyə̌ Mwǎn a Mɔnyuŋ á paʼní pə́, á púl ɛ́ mín baʼ ábə́ bá wɔ́ŋí dúbɛ á nkínshíyə̌?”
Ŋganú ɛ mɔ a Fárisî na nkuwá-á-táks
9Yésuwə a pɔŋí pə́ ŋganú ɛnín tɛ́ŋgɛnɛ baʼ ábə́ bá bílí ɛ kaní nána bɔ́ bá tyə́bí sîm á wusú wú Dyǔ litúm baʼ bápə́pə̂. 10Ti Yésuwə a pɔŋí bɔ́ nána, Bǔn bufɔ́ baʼ bábɛ̂ bá kǐ á Tɛ́mpɛl álí bə makáni. Nfɔ́ a bílí mɔ a Fárisî aníní nkuwá-a-táks.
11“Mɔ a Fárisî a tyə́bí ámǐn, á kániya, á byábá á nlə́m m mɔ átin nána, ‘N sákání wə Dyǔ nána n shiyǎ ngə baʼ bápə́pə̂, ábə́ bá dfúmbɛ́ byə̌m, ábə́ bá bə́bí milə́m, na ábə́ bá bwə ndúmán. N sákání wə nána n shiyǎ ngə nkuwǎ-a-táks anínán. 12N dyɛ njɛ á makáni átin madû mábɛ̂ á Sɔ́ndi tɛ́. Yǔm tɛ́ ɛ́yə́ n kwísíní n ka yɔ́ átin bitî dyǔm, ti n bəkí wə likaʼ lifɔ́.’
13Ndé nkuwǎ-a-táks ani a tyə́bí kfwáŋ, a púliyǎ ká ɛ wɛ̌n nlú m mɔ álí tátí ámǐn, a bándí ɛkɛ́ ɛ́ mɔ á wulə́m wú mɔ, ti a byábí nána, ‘Dyǔ, wú mî likini. N dí mɔ a mbî!’ 14Ti Yésuwə a pɔŋí bɔ́ nána, N pɔ̌ŋ nyə́ nána, nkuwá-a-táks a timbí á ndáʼ ɛ́ mɔ ngə mɔ awə̌ a sáŋí á wusú wú Dyǔ. Á ɛ́tútú nána, mɔtɛ́ awə̌ a pusí nyǔ ɛ́ mɔ, bá shulí mɔ́. Ndé awə̌ a shulí nyǔ ɛ́ mɔ bá pusí mɔ́.”
Yésuwə a namsɛ́ bǎnbándəm
15Baʼ bá pánání bǎnbándəm á Yésuwə nána á bán bɔ́ makɛ́ á nyǔ álí namsɛ́ bɔ́. Ngə bawútú bá mɔ bá míníní nâ bá kándí baʼ bâ. 16Ndé Yésuwə a bəŋí bǎn bâ, ti a byábí nána, “Nyí makú bǎnbándəm bá pâʼ á mi, nyí si káŋ bɔ́, a ɛ́tútú nána ɛbú ɛ bâʼ ngə bɔ́, bɔ́ bá wɔ́ŋí Janiya lí Dyǔ. 17A mbálɛ nǎn pɔ̌ŋ nyə́ nána, mɔ awə̌ a kásiyǎ Janya lí Dyǔ ngə mwǎndəm a sî kwilíyá á wə́.”
Ndi a mɔ
18Mɔ a nə̂n nfɔ́, a kɔndɛ́ Yésuwə nána, “Mulɛ̂ a mbâ, yə̌ n lɔ́líní ɛ bwə álí kwisí luŋgɛ́ álə́ lísə̌ ɛ́ mɛ?” 19Yésuwə a kɔndɛ́ mɔ́ nána, “Á ɛ́tútú ɛ́yə́ ɛ̌ bəŋní mi mulɛ̂ a mbâ? Mɔ ká nfɔ́ a shiya a mbâ ɛ́sitúm Dyǔ lɔ́mə̌n nfɔ́.” 20Ɛ bí mambéndá mâ ámə́ má byá nána, ɛsi bwə ndúman, ɛsi búlú bâʼ, ɛsi jíb, ɛsi tyə́ mbúŋ ɛ matúm, dúbɛ́ sáŋ ŋ wə na nyǎ n wə. 21Mɔ a nə̂n ani a timbí Yésuwə nána, “Kə́ŋ ti á púndá ɛyə̌ bá jyɛ́ni mí m mə̌ ɛ kɔ́ŋgɔ́ mambéndá mǎ másə́sə̌n.” 22Ngə Yésuwə a wúkíní nâni, a pɔŋí mɔ́ nána, “Yǔm ɛ́pə́pə̌ ɛ́ dí ɛ́yə́ ɛ lɔlíní ɛ bwə. Súm byə̌m bísə́sə̌n ábə́ ɛ wɔ́ŋíní, ɛ bə̂ ngáʼ ɛyə̌ ɛ fí áwə́ á baʼ ábə́ bá dí líban. Njí ɛ bwəlí nâ, ɛ̌ kwisí wudi á wúdya wú Dyǔ. A púndá ɛni pǎʼ ɛ pɔ̂ŋ mi á mbǐ.” 23Ndé ngə mɔ ani a wúkíní nâ, nlə́m m fɛ́njí mɔ́ á líbum a ɛ́tútú nána a bílí ndi a mɔ a mbímbí. 24Yésuwə a míní nána nlə́m m fɛ́njí mɔ ani á libum. Ti a byábí nána, “‘Ɛ kámbí jǐta nána badi bá baʼ bá kwíli á Janiya lí Dyǔ.’ 25Ɛ dí yǔm ɛ́tə́kə̂n nána nyam ɛnə̂n ngə kámɛl ɛ túm á ɛ́pɔn ɛ́ ndɔndɔku, na ndi a mɔ a kwíli á Janiya lí Dyǔ. 26Baʼ ábə́ bá wúkí yə̌ ɛ́yə́ Yésuwə a byábíní bá kɔ́ndɛ́ mɔ́ nána njá kə́ á kwisí líshuŋgɛ? 27Yésuwə a pushú bɔ́ nána, Yə̌ ɛ́yə́ bǎnyûŋ bá mínní nána ɛ́ kámbí álí bwə, ɛ kámbyá á Dyǔ álí bwə yɔ́.” 28Ti Píta a byábí nána, Tátí, sí mákú byə̌m bí sə bísə́sə̌n álí pɔ̌ŋ wə̂ á mbís. 29Yésuwə a pushú bɔ́ nána, Á mbálɛ, nǎn pɔ̌ŋ nyə́ nána, mɔtɛ́ awə̌ a makú wúdya wú mɔ tɔ̌ mwalân m mɔ, tɔ̌ bǎn-bá-nyǎ, tɔ̌ sáŋ na nya, tɔ̌ bǎn, a ɛ́tútú ɛ́ janya lí Dyǔ, 30á kwisí jǐta á nkínshíyə na luŋgɛ́ álə́ lísə̌ ɛ́ mɛ á púndá ɛyə̌ ɛ̌ paʼ.
Yésuwə a pɔŋí ŋganú tɛ́ŋgɛnɛ liwá na li pumu lí mɔ
31Yésuwə a kanání bawútú bá mɔ dyǔm na bábɛ̂ á nsaŋ, ti a pɔŋí bɔ́ nána, Sí kə̌ á Jerúsálɛmə. Á wə́ misam mísə́sə̌n ámə́ balakuwa-bá-múdî bá byábíní tɛ́ŋgɛnɛ Mwǎn a Mɔnyuŋ mí bwəlání. 32Ɛ́ tílání nána, bá kú mɔ́, bá bə́ mɔ́ á mákɛ́ má baʼ ábə́ bá shíyǎ baʼ bá Ísrɛl, ábə́ bá wɛlí mɔ́, bá lwí mɔ́, bá pɛ́njí mɔ́ bikfwɛn á nyǔ. Bá shwɛnjí mɔ́, bá búlú mɔ́. 33Ndé á mádû málán á pumu.
34Ndé bawútú bá mɔ bá sɔ́ntaniyǎ ká yǔm ɛ́yə́ Yésuwə a byábíní, á ɛ́tútú nána ŋganú ɛni ɛ túmbí bɔ́ libyɛ́. Bá púliyǎ ɛ́ bî yǔm ɛ́yə́ Yésuwə a bílíní ɛ byá.
Yésuwə a pwisí mɔ a wə̌ mǐ má dímíní á nlú
35Ngə Yésuwə a pilíní álí wútan nkí n Jeríko, mɔ a mayɔ́mbɔ́ awə̌ mǐ má dímíní á nlú a shumání á nsaŋ n nji á yɔ́mbɔ́ byə̌m. 36A wúkí ngə limuti lí baʼ bá túmní, ti a kɔndɛ́ nána, Yə̌ ɛ́ bwə́lání? 37Bá pushú mɔ́ nána, Yésuwə mɔ a Názárɛtə mɔ́ ǎ túm. 38Ti a kándí ámǐn nána, Yésuwə, mwǎn mú nja n Devídə! Wú mî likini. 39Baʼ ábə́ bá bílí á wusú bá kándí mɔ́ nána a dǐb nsu m mɔ. Ndé a kándí pə́ ámǐn litúm ɛtî ɛ́ wusúwə nána, Mwǎn mú nja n Devídə! Wú mî likini! 40Yésuwə a tyə́bí, ti a pɔŋí nána bá pánán mɔ́. Ngə bá pánání mɔ́ liwútán Yésuwə, a kɔndɛ́ mɔ́ nána, 41Yə̌ ɛ́ saʼní nána n bwə́li wə? Mɔ ani a pushú nána, Sísə́, bwə mî n mín pə́ wǔm. 42Yésuwə a pushú mɔ́ nána, Mín kə́! Dúbɛ lí wə lí pwísí wə. 43Áfâ áshí áshí, a butí pə́ ɛ mín wǔm. Ti a pɔŋí Yésuwə á mbǐ, á kɛ́syá Dyǔ. Ngə limuti lí baʼ álə́ lí bílí áwə́ lí míníní nâni, bá bútí ɛ kɛ́sí Dyǔ bɔ́ baʼ básə́sə̌n.
Currently Selected:
Lûkə 18: bwt
Highlight
Copy
Compare
Share
Want to have your highlights saved across all your devices? Sign up or sign in
