Lûkə 19
19
Yésuwə a tání nkuwâ a táks, Zákiyusə
1Ngə Yésuwə a bílíní ɛkə a túmbí á nkí n Jeríko. 2Mɔ nfɔ́ a bílí awə̌ bá bə́ŋákíní bá Zákiyusə. A bílí nkuwâ-a-táks a n nə̂n, a bílí ndi a mɔ. 3Zákiyusə a bílí ɛ wanan álí mín mɔ a wə̌ bá bílíní ɛ bə̌ŋ bá Yésuwə, ndé nji ɛ bíliyǎ mɔ ngə baʼ jǐta bá bílíní áwə́, mɔ́ pə́ a bá mɔʼ awə̌ a kpátání. 4Ti a kǐ na mifílí á wúsú a pulú á ɛju ɛ́ bwə̌ ɛ́ síkámɔnə ngə á mín ní Yésuwə. Yésuwə a bílí ɛ paʼ á pɛsi ɛni. 5Ngə Yésuwə a pílíní a fǔm bû a tátí á mǐn, ti a míní Zakiyusə. Ti a pɔŋí mɔ́ nána, “Zakíyusə, shǔl áshí shám. N lɔ́lí ɛ bá nkən á ndáʼ ɛ́ wə wúyɛ́.” 6Zakiyusə a shúlí áshí ɛtî ɛfɔ́, a kasí Yésuwə ngə nkən á ndáʼ ɛ́ mɔ na munyɛŋgɛ. 7Baʼ básə́sə̌n ábə́ bá míní yə̌ ɛ́yə́ ɛ́ bwə́lání, bá bútí ɛ lim átin nána, “Mɔ anínán a kǐ á ndáʼ ɛ mɔ awə̌ ǎ bwə wubî.”
8Zakiyusə a tyə́bí á mǐn, ti a byábí á Yésuwə nána, “Tátí, Sísə́, m bə ɛpɛ ɛ litfu lí myə á baʼ ábə́ bá dí liban. Njí n nuŋání mɔ yǔm á masəŋán átin, n timbí mɔ́ yɔ́ bitî bínîn.” 9Ti Yésuwə a byábí á mɔ́ nána, “Lishuŋgɛ lí mə́ ɛ paʼ á ndáʼ ɛnín wúyə́. Mɔ ani pə́ a dí mwǎn mú nja mú Ábrahâmə.” 10Mwǎn a Mɔnyuŋ a pilí álí saʼ na álí shuŋgɛ́ baʼ ábə́ bá gbɛ́.
Ŋganú ɛyə̌ bá mwɛ́sání babwəla-bá-ndutu na ngáʼ
11“Baʼ bá bílíní wə̌ ɛ wúlán yə̌ ɛ́yə́ Yésuwə a bílíní ɛ byá. Ti a kǐ á wusú álí pɔ̌ŋ bɔ́ ŋganú. A n mə̌ ɛ́ wútan Jerúsálɛmə. Áfánikə̌, baʼ bá bílí ɛ kani nána Janiya lí Dyǔ lí paʼ təlí. 12Ti Yésuwə a byábí nána, Nfɔn a mɔ á bílí awə̌ a n wɔ́ŋ álí kə á ɛ́kumbu ɛ́yə́ ɛ́ bílí kfwáŋ, á ɛ́tútú nána bá fílí mɔ́ kə̂ŋ, ti a timbí á fǔm bú mɔ́ 13Ngə púndá ɛ́ mɔ ɛli kə ɛ pílíní, a bəŋí babwəla-bá-ndutu bá mɔ dyǔm, ti a bəkí mɔtɛ́ ɛkúlí ɛ́ kápan dyǔm, a pɔŋá bɔ́ nána, ‘Nyí nɔ̌ŋ na, nyí bwə nyungá, kə́ŋ ti á púndá ɛyə̌ n timní á mbí.’ 14Baʼ bá mɔ bâ n kfwɛʼ mɔ́. Ti bá lúmí bakə-bá-ndúm álí nan mɔ́ á mbís álí pɔ̌ŋ ngɔ́mna nána, ‘Sí nə́ŋiyǎ nána, mɔ ani a bá kə̂ŋ ɛ́ sə.’
15Kánâwə̌, bá bwə́lí mɔ ani kə̂ŋ, ti a timbí á mbí á nkí m mɔ. Ngə a timbíní, áfâ áshí áshí, a bəŋí babwəla-bá-ndutu bá mɔ ábə́ a bəkíní ngáʼ álí bí nsə́ŋ ámə́ bá bwə́líní. 16Mɔʼ a ndutu a wusúwə a pílí, ti a pɔ́ŋí mɔ́ nána, ‘Sísə́ bikúlí dyǔm ábə́ ɛ bə́kíní mi, ɛ́ bwəlí nsə́ŋ ámə́ n dí bitî dyǔm.’ 17Mɔ ani a pɔŋí mɔ nána, ‘Ɛ bwəlí bwâm. Ɛ dí mbwəlá-a-ndutu a mbâ! Ngə ɛ púlíní ɛ kúmbɛ́ nsam ntə́kə̂n, m bə wə̂ ngínya álí janiya míkí dyǔm.’ 18Mɔʼ a ndutu awə̌ a lwínjání bábɛ̂ mɔ́ pə́ a pílí ti a pɔŋí mɔ nána, ‘Sísə́ bikúlí dyǔm ábə́ ɛ bə́kíní mí ɛ́ bwəlí nsə́ŋ ámə́ n dí bitî bítân.’ 19Mɔ ani a pɔŋí mɔ́ nána, ‘N bə wə̂ ngínya álí janiya míkí mítân.’
20Mɔʼ a ndutu a mpə́pə̂ mɔ́ pə́ á pilí ti a pɔŋí mɔ́ nána, ‘Sísə̂ bikúlí dyǔm bí wə bɔ́ bín. N tfúlí yɔ́ á bɔ́kɛlɛ-ɛ-tundú, ti n shwɛlí bɔ́. 21M bílí wə ɛ báŋ á ɛ́tútú nána ɛ dí nfíʼ. Ɛ̌ nuŋ ɛ́yə́ ɛ́ shiyǎ ɛ́ wə, ɛ̌ fúl áfə́ ɛ wúnyaní.’ 22Sisə́ ani a pushú mɔʼ a ndutu ani nána, Ɛ dí mbwəlâ a ndutu a mbî. Nsu n wəmə́nə́ mɔ́ m búlú wə̂. Njí wəmə̌n ɛ bí nána n dí nfíʼ, nǎn nǔŋ ɛ́yə́ ɛ́ shiyǎ ɛ́ myə, nǎn fúl áfə́ n wúnyaní 23ní ɛ fílí ngáʼ ɛ́ myə á ndáʼ ɛ wukɔŋgɔ ngə n nuŋní yɔ́ na nsə́ŋ ámǐn á púndá ɛyə̌ n timní?”
24Ti a byábí á baʼ ábə́ bá tyə́bí á nsaŋ nána, “Núŋán mɔ́ bikúlí dyǔm bî nyí bə́ bɔ́ á nbwəlá a ndutu awə̌ a wɔ́ŋí mbúki ɛ́kúlí.” 25Ndé bá púshú mɔ́ nána, “‘Sísə́, mɔ́ ani a wɔ́ŋí mbúki ɛkúlí!’ 26Ti sísə́ ani a pushú bɔ́ nána, ‘Nǎn pɔ̌ŋ nyə́ nána, á bá ábə́ bá wɔ́ŋí, Dyǔ lí bán pə́ álí bə bɔ́. Ndé á baʼ ábə́ bá wɔ́ŋiyǎ, ká mǎ yǔm ɛ́yə́ bá wɔ́ŋíní Dyǔ lí kuwán bɔ́.’ 27Á baʼ bá ábə́ bá kfwɛ́ mí, ábə́ bá bíliyǎ ɛ sa nána bá wɔ́ki mí kə̂ŋ, pánániyání bɔ́ fánán, nyí búlú bɔ́ á wusú wú myə.”
Yésuwə a kwilí a Jerúsálɛmə ngə kə̂ŋ
28Ngə Yésuwə a malíní pɔ́li ɛní ɛsə́sə̌n a búkú álí kə á Jerúsálɛmə. 29Bá pílí álí wútan nkí n Bɛfágə na nkí n Bɛ́táni. Ngə bá bílíní á Wukul wú mə̌ má Ólivə, a lúmí bawútú bá mɔ bábɛ̂ á wusú nána. 30“Kəkáni á nkí ámə́ n dí nyə́ á wusú. Ngə nyí kwilíní áwə́, nyí mín ngə bá tfúlíní mǎ jakás ɛyə̌ mɔ ká nfɔ́ a nan púlúwání wə́ ámǐn. Nyí kákú yɔ́ nyí pánán yɔ́ fánán. 31Njí mɔ a kɔ́ndɛ́ nyə́ á ɛ́tútú ɛ́yə́ nyí kákúní yɔ́, nyí pɔ̂ŋ mɔ́ nána, ‘Sísə́ ǎ sa yɔ́ ɛ bwəlan.’”
32Baʼ ábə́ a lúmíní bá kǐ bá tání misam ngə Yésuwə á pɔŋíní bɔ́. 33Ngə bá bílíní ɛ kákú jakás ɛni, baʼ ábə́ bá wɔ́ŋí yɔ́ bá kɔndɛ́ bɔ́ nána, “Yə̌ nyí kákúní yɔ́?” 34Bawútú bá Yésuwə bá púshú bɔ́ nána, “Sísə́ ǎ sa yɔ́ ɛ bwəlan” 35Ti bá kánání yɔ́ á Yésuwə. Bá wɛ́tí miku mí bɔ á mbí ɛ nyam, ti bá wúnjání Yésuwə álí pulu yɔ́ ámín. 36Ngə bá bútíní ɛ kə, baʼ bá wɛ́tí miku mí bɔ á nji.
37Á púndá ɛyə̌ bá butíní ɛ shul a wukul wú mə̌ má Ólivə álí kə́ á Jerúsálɛmə, limuti lí bawútú bá mɔ ábə́ bá bílí na mɔ́ bá bútí ɛ sákán Dyǔ, bá kɛ́siyá pə́ mɔ́ á misam mi nə̂n ámə́ bá míníní. 38Bá bílí ɛ byá nána,
“Wunam na kə̂ŋ ɛyə̌ ɛ̌ paʼ á dǐn lí Sáŋgúwə́!
Musaŋgu m bá á wudya wú Dyǔ,
Ɛdúbɛ́ ɛ́ bə́kan Dyǔ álə́ lí dí kə́ŋ ti ámǐn!”
39Ti duŋgu lí Bafárisî ábə́ bá bílí á ndíŋgí n limuti lî bá byábí á Yésuwə nána, “Mulɛ̂, pɔ̌ŋ bawútú bá wə bá si bwə ntɔkɔku!” 40Yésuwə a pushú bɔ́ nána, “Á mbálɛ nǎn pɔŋ nyə́ nána, njí bá makú ntɔkɔku, malɛ́ mánán má butí ɛ bún ɛsakí.”
Yésuwə a jǐ Jerúsálɛmə
41Yésuwə a pilí álí wútan nkí n Jerúsálɛmə. Ngə a míníní Jerúsálɛmə a wusú, mashíya má butí mɔ́ ɛ nyít á mǐ, á jiyá Jerúsálɛmə, 42nána, “Ɛ́ lɔ́lí nána nyí bî yə̌ ɛ́yə́ ɛ́ panán musaŋgu. Ndé sɔnsɔ́nǎn, nyí sî púlá yɔ́ ɛ mín. 43Púndá ɛ̌ paʼ ɛyə̌ baʼ ábə́ bá kfwɛ́ nyə́ bá kámbúní nyə́ na bipaʼ ngə wukâ, ti bá kúwí nyə́ á njum á pɛsi ɛsə́sə̌n. 44Bá nywɛ́sí nyə́, nyə́ na bǎn bá nyə básə́sə̌n. Lilɛ́ ká lifɔ́ lí sí bukɛ́níyá áshí, á ɛ́tútú nána nyí yə́mbiyǎ púndá ɛyə̌ Dyǔ lí pílíní á lí shuŋgɛ́ lungɛ́ lí nyə́.”
Yésuwə a kǐ á Tɛ́mpɛl
45Yésuwə a kwilí á Tɛ́mpɛl átin, a tání baʼ bá nyúŋgá áwə́. Ti a butí bɔ́ ɛ nan, 46á byábá nána “Ɛ tílání á kâti ɛ Dyǔ nána Dyǔ lí byábí nána, ‘Tɛ́mpɛl ɛ́ myə ɛ́ bá ndáʼ ɛ makáni.’ Ndé nyí mə́ yɔ́ ɛ timbí fǔm áfə́ bajíb bá sɔmɔní.
47Butya bǔn bû Yésuwə a bílí baʼ ɛ lɛ́fú á Tɛ́mpɛl. Prísə a nə̂n, balɛ̂ bá mbéndá na bajaniya bá nkí bá bílí ɛ sǎ nji álí búlú mɔ́. 48Ndé bá púliyǎ á ɛ́tútú nána baʼ básə́sə̌n bá n nəŋ álí wúkan bíyala bí mɔ bísə́sə̌n.”
Currently Selected:
Lûkə 19: bwt
Highlight
Copy
Compare
Share
Want to have your highlights saved across all your devices? Sign up or sign in
