Lûkə 23
23
Páyíletə a káyísí Yésuwə
1Bajaniya básə́sə̌n bá nkí bá tyə́bí ámǐn, ti bá kánání Yésuwə á Páyíletə. 2Áwə́ bá bútí mɔ́ ɛ bán misam á nlú, bá byábá nána, “Sí wálí mɔ anínán ngə ǎ pánání mpungú á ɛkumbu ɛ́ sə. Ǎ byábá nána sí si sáwú táks ɛ́ Káyísa, ǎ byá pə́ nána mɔ́ a dí Ani Awə̌ bá Wɔ́kílíní, nâni ɛ́ dí nána mɔ́ a dí kə̂ŋ.” 3Ti Páyíletə a kɔndɛ́ Yésuwə nána, “Wǝ̌ ɛ dí kə̂ŋ ɛ baʼ bá Ísrɛl?” Ti Yésuwə a pushú mɔ́ nána, “Ngə wəmə̌n ɛ byábíní.” 4Páyíletə a pɔŋí baprîsə bánə̂n na limuti lí baʼ nána, “N míniyǎ liwusɛ́ ká lífɔ́ álə́ lí kfúndísí mɔ anínán muká.” 5Ndé bá kǐ á wusú álí byá nána, “Ǎ panán mpuŋgú á mílú mí baʼ na misam ámə́ ǎ lɛ́fúní á pɛsi ɛ mbú ɛ Judéya. A butí á Gálilî, a mə̌ ɛ paʼ áfán.”
Hɛ́rɔdə a káyísí Yésuwə
6Ngə Páyíletə a wúkíní nâ, a kɔndɛ́ Yésuwə njí a dí mɔ a Gálilî. 7Bá lɛ́fú mɔ́ nána nâ ɛ́ díní. Ngə ɛkumbu ɛ́ Gálilî ɛ́ bílíní á janiya lí Hɛ́rɔdə, Páyíletə a lúmí Yésuwə á mɔ́. Hɛ́rɔdə mɔ́mə̌n a bílí a Jerúsálɛmə á púndá ɛni. 8A n wɔ́ŋ nyɔ́ngí jǐta álí mín Yésuwə á ɛ́tútú nána á bílí ɛ wú misam jǐta tɛ́ŋgɛnɛ mɔ́. A bílí ɛ sa álí mín misam mí mányáká ámə́ Yésuwə a bwəlákíní. Áfánikə̌ Hɛ́rɔdə a wúkí munyɛŋgɛ ngə bá pánání Yésuwə á mɔ́. 9A kɔndɛ́ mɔ́ misam jǐta, Yésuwə a tímbiyǎ mɔ́ ká yǔm. 10Baprîsə bánə̂n na balɛ̂ bá mbéndá bá tyə́bí ámǐn, bá bútí Yésuwə ɛ bán misam jǐta á nyǔ. 11Yɔ̂ Hɛ́rɔdə na baʼ bá miku mí ngvɛʼ ɛ́ mɔ bá bútíní mɔ́ ɛ wɛlí, bá nyasíyá mɔ́. Ti bá fílí mɔ́ nkuʼ m mbâ, ka bá lúm pə́ mɔ́ á Páyíletə. 12Butya bǔn bû Hɛ́rɔdə na Páyíletə bá bwə́lí musaŋgu. Á púndá ɛsə́sə̌n ɛyə̌ ɛ́ túmbí á mbí ɛkfwɛyí ɛ́ bílí bɔ́.
Bá nyítí mbakú nána bá búlu Yésuwə
13Ti Páyíletə a bəŋí baprîsə bá nə̂n, bajaniya bá nkí, na baʼ bápə́pə̂. 14Ti a pɔŋí bɔ́ nána, “Nyí kɔ́sɛ́ ɛ panan mi mɔ anínán nána ǎ puŋgú baʼ milú. M mǝ̌ mɔ́ ɛ káyísi á wusú wú nyə ndé m mínyǎ lifǝŋgǝ̂ álə́ a bwəlíní 15Ká Hɛ́rɔdə pǝ́ a mínyǎ lifəŋgə̂ á mɔ́, yɔ̂ a lúmíní pǝ́ mɔ́ á sǝ́. Nyí mín kǝ́ nána a bwǝ́liyǎ yǔm ɛ́ bî ká ɛ́fɔ́ ɛ́yə́ ɛ́ bwə mɔ́ a kwisí liwá. 16Áfánikə̌ n pɔŋ nána bá shwɛ́nji mɔ́, ti bá máku mɔ́ a kə.” 17#23:17 Dungu lí kâti ɛ́ wusúwə ɛ́ bándí njɔŋ 17 Sɔnsɔ́nǎn, mbvú tɛ́, á púndá ɛ Ŋgandu ɛ Litúm á Mǐn, Payletə a n wɔ́ŋ á lí fúl mɔ a bibuwa nfɔ́ á ɛ́tútú ɛ́ baʼ bá nkí. 18Limuti lí baʼ básə́sə̌n bá búní nána, “Nǔŋ mɔ anínán, ɛ búlú mɔ́! Makú sə́ Barábasə.” 19(Barábasə a bílí mɔ awə̌ bá fílíní á bíbuwa á ɛ́tútú ɛ́ mpungú ámə́ á butíní á nkí átin, na nána a bílí ɛ búlú bâʼ) 20Ngə nlə́m m bílíní Páyíletə álí makú Yésuwə, a byábání pǝ́ bɔ́. 21Ndé bá búní pə́ nána, “Bumí mɔ́ á mbásá! Bumí mɔ́ á mbásá!” 22Á pɔŋí pə́ bɔ́ ɛtî ɛ́yə́ ɛ́ lwínjání bitî bílán nána, “Á ɛ́tútú ɛ́ yə̌? Wubî wúfə́ a bwəlíní? N kúwiya mɔ́ na lifǝŋgǝ̂ ká lifɔ́ álə́ lí tíŋgání mɔ́ ɛ bwə a kwísi liwá. Áfánikə̌ n shwɛ́njí mɔ́, ti m makú mɔ́, a kə̂.” 23Ndé bá pǝ́ndí makwi áshí bá búna na ngínya nána bá lɔ́lí ɛ bumí Yésuwə á mbásá. Á shúkán bá púshú mbyá m bɔ. 24Ti Páyíletə a nyítí mbakú nána bá bwə ngə bá sákíní. 25A fúlí mɔ awǝ̌ bá bílíní ɛ kɔndɛ, awə̌ a bílí á bíbuwa á ɛ́tútú ɛ́ mpuŋgú na mbúlu m bâʼ. Yɔ́ a mwɛsání bɔ́ Yésuwə nána bá bwə ngə bá nə́ŋíní na mɔ́
Bá búmí Yésuwə á mbásá
26Ngə sója ɛ́ bílíní Yésuwə ɛ kanan, bá búmání Sáyímɔnə mɔ a nkí n Sirînə. Mɔ anín a fí á nkí ntə́kə̂n ámə́ m bílí á nsaŋ. Ti bá kúwí mɔ́, bá bwə́lí mɔ́ á pǝ́mbí mbásá ɛ́ Yésuwə, á pɔŋá mɔ́ á mbǐ.
27Limuti lí baʼ lí bílí mɔ́ ɛ pɔ̌ŋ á mbǐ. Á ndíŋgí m mû, balân bá bílí áwə́ ábə́ bá bílí ɛ ji, bá ləba. 28Yɔ́ Yésuwə á tátíní á mbǐ, ti a pɔŋí bɔ́ nána, “Ǎ balân bá Jerúsálɛmə, nyí si ji mî, jiyáni nyǔ ɛ́ nyə na bǎn bá nyə. 29N byá nâ á ɛ́tútú nána madû má paʼ ámə́ baʼ bá byání nána, ‘Wunam na bikumba bí balân, na ábə́ bá nan jyɛ́ wə́ fúliyɛ̌, na ábə́ bá nan mwáŋíyá wǝ́!’
30Á púndá ɛni yɔ́ baʼ bá pɔŋákíní makul mánə̂n nána,
‘Kfúndáni á nyǔ ɛ́ sə,’
tɔ̌ bá pɔŋ mákul nána,
‘Kfútíyáni sə́.’
31Njí bá tíŋgání ɛ bwə misam mínán mísə́sə̌n sɔnsɔ́nǎn ɛ́yə́ bwə̌ wú díní wə̌ wú fwɛ́, ní yán bá bwəní wə̌ti bwə̌ wú kínjí?”
32Bá kánání baʼ bá bî bábɛ̂ pǝ́ na Yésuwə álí kǝ bɔ́ ɛ bumi á mbásá. 33Á púndá ɛyə̌ bá pílíní á fǔm ábə́ bá bílíní ɛ bəŋ bá Ɛfis ɛ́ Nlú, bá búmí Yésuwə á mbásá, na baʼ bâ bá bî bábɛ̂. Bá búmí mɔ nfɔ́ á ɛ́kɛ́ ɛ́ mbâ ɛ́ mɔ, aníní á ɛ́ kɛ́ ɛ́ mwɛ ɛ́ mɔ. 34Yɔ́ Yésuwə a byábí nána, “Sáŋ m myə, laksɛ́ bɔ́ á ɛ́tútú nána bá bíyǎ yə̌ ɛ́yə́ bá bwəní.” Ti sója ɛ́ wáŋgú mbambáʼ álí ka miku mí Yésuwə.
35Limuti lí baʼ bá tyə́bí á nsaŋ, bá tátíyá yə̌ ɛ́yə́ ɛ́ bwəlan. Ndé bajaniya bá baʼ bá Ísrɛl bá bílí mɔ́ ɛ nyasi nána, “A shuŋgɛ́ baʼ bápə́pə̂, a shúŋgɛ́ mɔ́mə̌n njí ɛ́ dí mbálɛ nána mɔ Dyǔ lí pwɛ́síní, ka lí Wɔ́kílíní mɔ́!”
36Sója pǝ́ ɛ́ bílí mɔ ɛ́ nyási. Bá pánání mɔ́ mǐm ámə́ má kpɛ́nyí, 37bá pɔŋá mɔ́ nána, “Njí wǝ̌ ɛ́ dí kə̂ŋ ɛ baʼ bá Ísrɛl, shuŋgɛ́ wəmə̌n!”
38Bá tílí á nlú m mbásá mɔ nána, “Kə̂ŋ ɛ baʼ bá Ísrɛl yɔ́ ɛnín.”
39Mɔ nfɔ́ á baʼ bábî bâ bábɛ̂ ábə́ bá búmíní á mbásá ná Yésuwə a lwí mɔ́ nána, “Nga wǝ̌ ɛ dí Ani awə̌ Dyǔ lí Wɔ́kílíní? Shuŋgɛ́ wəmə̌n ɛ shuŋgɛ́ pǝ́ sǝ́!”
40Ndé mɔ anínánî a kándí nsún m mɔ́ nána, “Ɛ sə̌ ɛ́ báŋ Dyǔ? Sî wə baʼ bábɛ̂ sí wɔ́ŋí mulimlim n kɔ́ksɛ álə́ mɔ́ pə́ a wɔ́ŋíní. 41Ndé kɔ́ksɛ álə́ sí kwísíní lí tɛ́ŋgɛ́ní na wubî wú sə. Ndé mɔ anín a bwə́liyǎ wubî ká wufɔ́.” 42Ti mɔ ani a byábí á Yésuwə nána, “A Yésuwə, sûn kaní mí á púndá ɛyə̌ ɛ́ kwiliní á wudya wú wǝ.” 43Yésuwə a pushú mɔ́ nána, “Á mbálɛ, nǎn pɔ̌ŋ wə nána wúyə́ bún ɛ́ bá na mi á Páradáyisə.”
Yésuwə á gvúlí
44Ɛ́ bílí ngǝ́ŋ dyǔm na ɛbɛ̂ ɛ́ lisín. Ɛfínjan ɛ́ kfútí wǔm másə́sə̌n kǝ́ŋkə́ŋ taʼ ngǝ́ŋ ɛ́lán ɛ́ lisín. 45Dúlu lí bíliyǎ pǝ́ ɛ míndi. Sanji ɛyə̌ ɛ kabí Tɛ́mpɛl átin, ɛ nyabí átin muŋgu mábɛ̂. 46Yésuwə a fə́mí na ngɔli ɛnə̂n nána, “Sáŋ m myə m bǝkí mudî m myə á mákɛ́ má wǝ!” Ngə a malíní álí byá nâ, a shúlí pəmi, ti a gvúlí. 47Ngə nlú n sója n míníní yǔm ɛ́yə́ ɛ́ bwə́lání, a kɛsí Dyǔ, á byábá nána, “Á mbálɛ, mɔ ani á bílí mɔ a mbâ.” 48Limuti lí baʼ álə́ lí pílí áwə́ álí mín misam ámə́ mí bílí ɛ bwǝlan, ngə bá míníní misam mí mányáká ámə́ mí bwə́lání, mɔtɛ́ á kpándí makɛ́ á makaŋgá ngə bá tímbákíní á mandáʼ má bɔ. 49Basún bá Yésuwə básə́sə̌n na balân ábə́ bá bútí mɔ́ ɛ pɔ̌ŋ á mbǐ butya á Gálilî, bá tyǝ́bí kfwáŋ bá tátíyá misam ngə mí bwəlání.
Bá wúshí Yésuwə
50-51Mɔ nfɔ́ a bílí awǝ̌ dǐn lí mɔ lí bílí Josɛ́fə. Mɔ ani á n fí á nkí n baʼ bá Ísrɛl ámə́ bá bə́ŋákíní bá Arímatíya. A bílí mɔ a ɛdúbɛ́. A bílí pə́ mɔ a mbâ na mɔ awə̌ á sáŋí. Ká ngə á bílíní mɔ a ngvwa, a púshúwá mbakú ɛyə̌ bajaniya bá nkí bání bá túmbíní álí búlú Yésuwə. A bílí mɔ nfɔ́ a baʼ ábə́ bá fílí nlə́m m bɔ nána bǔn bú paʼ ɛ́yə́ Dyǔ lí nuŋní janiya. 52A kǐ ɛ yɔ́m Páyíletə nána a bə́ mɔ́ mbimba n Yésuwə. 53Ngə bá bəkíní mɔ́ wunja, a fúlí mɔ́ á mbásá, a pílání mɔ́ na ɛlɔ́kɔ́ ɛ́ mbɔ́m, ti a kǐ mɔ́ ɛ́ dími á ndim ámə́ bá shə́líní á lilɛ́ átin, áfə́ bá nan dímíyání mɔ̂ʼ. 54Bǔn bû bú bílí Bǔn bú Mbunsan, á púndá ɛyə̌ Bǔn bú Líkɔ́mbɛ bú n lɔni ɛ butí. 55Balân ábə́ bá bútí Yésuwə ɛ pɔ̌ŋ á mbǐ butya á Gálilî, bá nání Josɛ́fə á mbǐ, bá míní ndim, bá mín pə́ ngə bá nɛ́njíní mbimba n mɔ á ndim átin. 56Ti bá tímbí á n nkí átin, bá bútí ɛ́ tambú mafû na bilúŋgísán ábə́ bá bwəlání álí tambú mbimba. Á Bǔn bú Likɔ́mbɛ, bá kɔ́mbɛ ngə mbéndá ɛ baʼ bá Ísrɛl ɛ tyə́siní.
Currently Selected:
Lûkə 23: bwt
Highlight
Copy
Compare
Share
Want to have your highlights saved across all your devices? Sign up or sign in
