Lûkə 24
24
Yésuwə á pumú
1Mǎ mushú pilílí á Sɔ́ndi, balân bâ ábə́ bá pɔ́ŋí Yésuwə á mbǐ, bá kǐ á sɔngɔ. Bá lə́kí bilúŋgísán ábə́ bâ m məní ɛ bunsan bí lí tambú mbimba. 2Ngə bá pílíní áwə́ bá tání nána lilɛ́ álə́ bá kfútíní nsu m sɔngɔ, lí fálú áfə́ lí bílíní. 3Ti bá kwilí áwə́ á ndim átin, ndé bá tániyǎ mbimba m Yésuwə. 4Bá tyə́bí áwə́ milə́m mí tákiyá bɔ́ á libum. Ti baʼ bábɛ̂ bá pílí təlí. bá tyə́bí bɔ́ á nsaŋ n nyǔ na mabaʼ ámə́ má nwáŋákí jǐta. 5Á bɔŋ á bə́ bú bílí bɔ́ átin, balân bâ bá nyɔ́kí milú mí bɔ́ áshí, ti baʼ bâ bábɛ̂ bá pɔŋí bɔ́ nána, “Á ɛ́tútú ɛ́yə́ nyí saʼní mɔ awə̌ a dí luŋgɛ́ á ndíŋgí m baʼ ábə́ bá mə̌ ɛ́ wá? 6A shiyǎ fánán, amə̌ ɛ pumu. Nyí kání ngə a pɔŋíní nyə́ á púndá ɛyə̌ a bílíní á Gálilî nána, 7Bá lɔ́lí ɛ bə̌ Mwǎn á Mɔnyuŋ á makɛ́ má baʼ bábî nána bá búmí mɔ́ á mbásá. Ndé á bǔn ábə́ bú lwínján madû málán á pumu.” 8Áfâ balân bâ bá káníní biyala bí mɔ.
9Bá tímbí á ndáʼ, bá pɔŋí bawútú dyǔm na nfɔ́ na baʼ bápə́pə̂ misam mísə́sə̌n ámə́ bá míníní. 10Balân bâ bá bílí Meríyə́ Magdalɛ̂nə, Johána, na Meryə nyǎ mú Jémsə. Bɔ́ na balân bápə́pə̂ ábə́ bá bílí na bɔ́, bá pɔ́ŋí misam mî á bawútú-bálí-lúm. 11Ndé bawútú bá bílí ɛ kani nána yə̌ ɛ́yə́ balân bâ bá byábíní ɛ́ bílí ɛyə́lí ɛ́ mbyá. Áfánikə̌ bá dúbɛ̌ bɔ́. 12Ndé Píta á tyə́bí ámǐn, a kǐ mifílí kə́ŋ ti á sɔŋgɔ. Ngə a pílíní áwə́, a nyɔ́ŋgí áshí, a tátí áwə́ átin. A míní wɔ̂ mbɔ́m. Ti á tímbí á ndáʼ. A bílí ɛ taʼ álí kani lí mɔ́ á yə̌ ɛ́yə́ ɛ́ bwə́lání.
Yésuwə a pílí á baʼ bábɛ̂ á nji ɛ Ɛ́mawusə
13Mulimlim m bǔn bû baʼ bábɛ̂ ábə́ bá bílí bawútú bá Yésuwə, bá bílí ɛkə á nkí ntə́kə̂n ámə́ bá bílíní ɛ bəŋ bá Ɛ́mawusə. Álí falu á nkí n Jerúsálɛmə lipaʼ á Ɛ́mawusə ɛ bílí ká maylə shyǎmbɛ. 14Bawútú bâ bá bílí ɛ kə, bá fətányá pɔ́li ɛ misam ámə́ mí bwə́lání. 15Ngə bá mə́ní ɛ fətán pɔ́li kə́ŋkə́ŋ, Yésuwə mɔ́mə̌n a tání bɔ́, ti a butí ɛ kə na bɔ́. 16Bá míní mɔ́, ndé bá yəmbiyǎ mɔ́. 17Ti Yésuwə a kɔndɛ́ bɔ́ nána, “Pɔ́li ɛ fə́ nyí fɛtání ná ngə nyí kəní?”
Yɔ̂ bá tyə́bíní na wuwa wú nlə́m á masú mábɔ. 18Ti bɔ́ mɔ nfɔ́ awə̌ bá bílíní ɛ bəŋ bá Klyópasə a kɔndɛ́ mɔ́ nána, “Wəmə̌n nfɔ́ ɛ dí nkən á Jerúsálɛmə awə̌ a bíyǎ misam ámə́ mí bwə́lání áwə́ madû mánán ámə́ má túmbí?” 19Yésuwə a kɔndɛ́ mɔ́ nána, “Misam mí fə́?” Bá pushú Yésuwə nána, “Misam ámə́ mí bwə́lání Yésuwə mɔ a Názarɛtə. Mɔ ani a bílí nlakwawu-a-mudî awə̌ a bílí ɛ́ byá, á bwəlá misam mínə̂n á wusú wú Dyǔ na wusú wú bǎnyûŋ. 20Baprîsə bá sə bánə̂n na bajaniya bá bə́kí mɔ́ á mákɛ́ má janiya nfɔ́ awə̌ a nyítí mbakú nána bá búlu mɔ́. Yɔ̂ bá búmíní mɔ́ á mbásá. 21Sí bílí ɛ kani nána mɔ́ á shuŋgɛ́ baʼ bá Ísrɛl. Njí ɛ makú á mî á nsaŋ, ɛ́tɛ̂n madû málán ɛyə́ misam mî mí bwə́lání. 22Álí bán pə́, duŋgu lí bálân bá ndíŋgí n sə́ bá pánání sə́ pɔ́li ɛ manyáká. Bá kǐ á sɔŋgɔ mushú mushú mú 23ndé bá tániyǎ mbimba n mɔ. Bá tímbí ti bá pɔ́ŋí sə́ nána bá míní áŋgɛl ɛ́bɛ̂ á bíyúŋgu átin ɛ́yə́ ɛ́ pɔ́ŋí bɔ́ nána Yésuwə a dí luŋgɛ́. 24Dungu lí baʼ bá ndíŋgí n sə bá kǐ á sɔŋgɔ, bá míní yɔ́ mulimlim ngə balân bâ bá byábíní, ndé bá míniyǎ mɔ́.”
25Ti Yésuwə á byábí á bɔ́ nána, “Nyí dí baʼ bá ɛlɛmâ. Nyí sə̌ ɛ pámí ɛ́ dúbɛ́ misam mísə́sə̌n ámə́ bá lakwa bá mudî bá byábíní! 26Ngáʼ ɛ́ lɔ́lí ɛ́ bá nána Ani Awə̌ bá Wɔ́kílíní á lɔlí ɛ kwisí mutakaʼ múnán nsə́sə̌n kandíni a kwilí á wulɔʼ wú mɔ?” 27Ti Yésuwə a túkú bɔ́ misam mísə́sə̌n ngə mí tílání tɛ́ŋgɛnɛ mɔ́mə̌n á kâti ɛ Dyǔ, butya á kâti ɛ Mósisə na kâti ɛ́ balakuwa-bá-mudî básə́sə̌n.
28Ngə bá pílíní álí wútan nkí ámə́ bá bílíní ɛ kə, Yésuwə a bwəlí ngə a bílí wə̌ ɛ kə á wusú. 29Ndé bá púshwǎ ná a túm, ti bá pɔ́ŋí mɔ́ nána, “Dyɛ̌ na sə́. Bǔn bú mə́ ɛ kə, ɛfínjan ɛ́ wútí ɛ paʼ.” Ti a kǐ ɛ dyɛ na bɔ́. 30Ngə a shumání á tíbili na bɔ́ álí dyá, a nuŋí blɛ̂t, a namsɛ́ bɔ́, a kabí bɔ́, ti a bəkí bɔ́. 31Ti mǐ má bɔ má púwání, bá yəmbí mɔ́. Ndé a nyɔ́ŋí bɔ́ á mǐ. 32Ti bá byábí á mɔtɛ́ nána, “Nga nyɔ́ŋgí ɛ bílí sə́ á mílə́m á púndá ɛyə̌ á bílíní sə́ ɛ byábán á nji, á túkwá sə́ ɛyala ɛ́ Dyǔ?”
33Bá fálú áshí ɛtî ɛfɔ́, bá tím á Jerúsálɛmə. Ti bá tání bawútú dyǔm na nfɔ́ bání ngə bá bílíní fǔm bufɔ́ ɛyɔyɔʼ na bawútú bápə́pə̂. 34Ti bawútú ábə́ bá táníní á ndáʼ átin, bá pɔ́ŋí bɔ́ nána, “Na mbálɛ, Sáŋgúwə́ a pumú, a pílí á Sáyímɔnə!”
35Ti baʼ bâ bábɛ̂ bá tɛ́lɛ́ yə̌ ɛ́yə́ ɛ́ bwə́lání á njí, ngə bá yə́mbíní Yésuwə á púndá ɛyə̌ a kábíní blɛ̂t
Yésuwə á pílí á bawútú bá mɔ́
36Ngə baʼ bâ bábɛ̂ bá bílíní ɛ pɔ̌ŋ yə̌ ɛ́yə́ ɛ́ bwə́lání, Yésuwə mɔ́mə̌n á tyə́bí áwútitîn wú bɔ təlí. Ti á sambání bɔ́ nána, “Musaŋgu n bá na nyə́.”
37Bá wúkí bɔŋ búnə̂n ngə bá bílíní ɛ kaní nána bá míní ngvú. 38Ndé Yésuwə á byábí á bɔ́ nána, “Yə̌ nyí taʼní átin jǐta? Yán nyísan m bwə́líní ka n kwílí nyə́ á milə́m? 39Nyí táti makɛ́ má myə na makwi má myə ngə nyí mínní nána miyə́ nín. Nyí nyɔtí nyǔ ɛ́ myə álí mín njí ngvú a wɔ́ŋiyǎ nyam na bifiʼ ngə nyí míníní nána n wɔ́ŋí.”
40Ngə a byábíní nâni, a lúfú bɔ́ makɛ́ má mɔ na makwi má mɔ. 41Ngə bá bílíní wə̌ manyáká na munyɛŋgɛ nsə́sə̌n, milə́m mí bɔ́ mí tákiyá bɔ́ á líbum, yɔ̂ a kɔndɛ́ní bɔ́ nána, “Nyí wɔ́ŋí yǔm ɛ́ lí dyá fánán?” 42Bá bə́kí mɔ́ mǎ mǔn n shwî ɛ́yə́ bá bfumní. 43A nuŋí yɔ́ a dyá yɔ́ á wusú wú bɔ́ mɔ ansə́sə̌n
44Ti Yésuwə a byábí á bɔ́ nána, “Mulimlim m misam mínán mɔ́ n pɔŋíní nyə́ á púndá ɛyə̌ n bílíní na nyə́, bá lɔ́lí ɛ lwínjí yǔm tɛ́ ɛ́yə́ ɛ́ tílání tɛ́ŋgɛnɛ mi á kâti ɛ mambéndá ɛ Mósisə, á kâti ɛyə̌ balaku bá mudî bá tílíní, na á kâti ɛ mikɔ́ni.”
45Ti a pú libyɛ́ lí bɔ́ ngə bá sɔ́ntání kâti ɛ Dyǔ. Ti a byábí á bɔ́ nána, 46“Ɛ́ tílání á kâti ɛ Dyǔ nána, Ani Awə̌ bá Wɔ́kílíní na Mudî ámə́ n Sáŋí a lɔlí ɛ kwisí mutaka, a wá, á bǔn ábə́ bú lwínjání madû málán a lɔlí ɛ pumu. 47Á dǐn lí Yésuwə, baʼ bá bútí ɛ́ lɛ́fú á bikumbu bísə́sə̌n nána baʼ bá máku álí bwə wubî ngə Dyǔ lí láksɛ́ní wubî wú bɔ. Bá lɔ́lí ɛ butí ɛ́ lɛ́fú ndúm ɛní butya á Jerúsálɛmə. 48Nyí dí mbúŋ á misam mínán mísə́sə̌n. 49Mimə̌n n lúmí nyə́ yə̌ ɛ́yə́ Sáŋ m myə á fílíní likaʼ nána á lúmí nyə́. Ndé nyí lɔ́lí ɛ sǐnj á nkí kə́ŋkə́ŋ ngínya ɛ́yə̌ ɛ́ fí á mǐn ɛ pâʼ á nyə́.”
Yésuwə a kǐ ámǐn
50Ti Yésuwə a falú na bɔ́ á nkí, a kanání bɔ́ kə́ŋ ti á nsaŋ m Bɛ́táni. Áwə́ a wɛnjí makɛ́ má mɔ ámǐn, ti a namsɛ́ bɔ́. 51Ngə a bílíní bɔ́ ɛ namsɛ, a makú bɔ́, ti a kə̌ ámǐn. 52Bawútú bâ bá shúmí mabɔ́ŋ áshí. Ti bá tímbí á Jerúsálɛmə na munyɛŋgɛ n nə̂n. 53Bá bílí ɛ kə ɛtî tɛ́ á Tɛ́mpɛl álí kɛsí Dyǔ.
Currently Selected:
Lûkə 24: bwt
Highlight
Copy
Compare
Share
Want to have your highlights saved across all your devices? Sign up or sign in
